അതിനൊപ്പമെന്റെ തോളിലൊരടി കൂടി പൊട്ടിച്ചു…
“”…പറേടാ.! നിനക്കിതെന്തോത്തിന്റെ സൂക്കേടാ..?? നീ കൊറേ നാളായ്ട്ടോരോ കോപ്രായങ്ങള് കാണിയ്ക്കാൻ തുടങ്ങീതാ… കൊച്ചല്ലേ… വേണ്ടാ വേണ്ടാന്നു കരുതുമ്പോ… പറേടാ… ഇതെന്തായിത്..?? എന്തോയീ കാണിച്ചു വെച്ചേക്കുന്നേന്ന്..??”””_ ചോദിച്ചതിനൊപ്പം എന്റെ വലതുതോളിൽ രണ്ടടികൂടി തന്നിട്ടവൾ നോട്ട്ബുക്കിലെ കുത്തിവരയിലേയ്ക്കു വിരൽചൂണ്ടി…
ആദ്യമേതന്നെ ഭാഗ്യദേവത കനിയാതിരുന്നതിലുള്ള ദേഷ്യവും അതിനൊപ്പമവൾടെ തല്ലും വഴക്കും കൂടിയായപ്പോളെന്റെ കണ്ണുകൾനിറഞ്ഞു…
“”…എന്താടാ ഒന്നുമ്മിണ്ടാതെ നിയ്ക്കുന്നേ..?? നിന്നോടു ചോദിച്ചകേട്ടില്ലേ..?? ഇപ്പെന്റെസ്ഥാനത്തു മറ്റാരെങ്കിലുമായിരുന്നു വന്നു കണ്ടിരുന്നേങ്കിലോ..??”””_ തുറിച്ചുനോക്കിക്കൊണ്ടവൾ അടുത്ത
ചോദ്യമിട്ടപ്പോഴും ഞാനൊന്നുംമിണ്ടാതെ തലകുനിച്ചുനിന്നു…
പിന്നെയുമവളെന്തൊക്കെയോ പറഞ്ഞെന്നെ ശകാരിച്ചെങ്കിലും ഞാനതൊന്നും കേട്ടില്ല…
ഒടുക്കമവളൊന്നടങ്ങിയെന്നു തോന്നിയപ്പോൾ ഞാൻവീണ്ടും മുഖമുയർത്തി അവളെനോക്കി…
“”…എന്താടാ നോക്കുന്നേ..??”””_ എന്റെ നോട്ടമിഷ്ടമാകാതെ അവൾ ചീറിയപ്പോളൊന്നു പേടിച്ചെങ്കിലും ഞാൻ മുഖംമാറ്റിയില്ല…
“”…മീനുവേച്ചീ… ആരോടുമ്പറയല്ലേ… അച്ഛനറിഞ്ഞാ ന്നെ അടിയ്ക്കും..!!”””_ പേടിയോടെയാണെങ്കിലും ഞാനൊരുവിധത്തിലതു പറഞ്ഞൊപ്പിച്ചു…
കേട്ടതുമവളറിയാതെ വലതുകൈ നെറ്റിയിൽ താങ്ങിപ്പോയി;
“”…എന്റെ ദൈവമേ.! എന്നിട്ടിത്രേമ്പേടിയുള്ള നീ പിന്നെന്തിനാ വേണ്ടാത്ത പണിയ്‌ക്കൊക്കെ പോണെ..?? ഇപ്പൊ ഞാങ്കണ്ടതുകൊണ്ടു കൊള്ളാം… ആന്റിയോ… കീത്തുവോആണിതു കണ്ടേങ്കിലോ..?? അപ്പൊ തല്ലു കിട്ടില്ലായ്രുന്നോ..??”””
“”…മ്മ്മ്..!!”””_ അവൾടെ ചോദ്യത്തിന് മുഖം കുനിച്ചുനിന്നു ഞാൻ തലകുലുക്കി…
“”…മ്മ്മ്.! പോട്ടേ.! ചേച്ചി പെട്ടെന്നുള്ള ദേഷ്യത്തിനങ്ങ് തല്ലീതാ… സോറി.! ഇനിയിതേപോലുള്ള വേലത്തരങ്ങളൊന്നും കാണിയ്ക്കരുതൂട്ടോ..!!”””_ എന്റെ പാവത്തം നിറഞ്ഞുതുളുമ്പിയുള്ള നിൽപ്പുകണ്ടിട്ടാവണം മീനാക്ഷിയുടെ മനസ്സൊന്നുതണുത്തു…
കുനിഞ്ഞുനിന്നെന്റെ കവിളിൽമെല്ലെ തട്ടിക്കൊണ്ടവൾ
അങ്ങനെപറഞ്ഞതും,
“”…ഇല്ല.! ഞാങ്കാണിയ്ക്കും.! എന്നെയിതുവരെ ഇഷ്ടാന്നുപറഞ്ഞില്ലല്ലോ… കല്യാണങ്കഴിയ്ക്കാന്നും പറഞ്ഞില്ല… അപ്പൊങ്ങനെ പറേണവരെ ഞാങ്കാണിയ്ക്കും..!!””” _ മീനാക്ഷിയെനോക്കി കുറച്ചുവാശിയോടതു പറയമ്പോൾ പെട്ടെന്ന് അവളൊന്നമ്പരന്നു…
“”…എന്താ..?? എന്താ നീ പറഞ്ഞേ..?? കല്യാണങ്കഴിയ്ക്കണോന്നോ..??”””_ അതുചോദിച്ചതുമവള് പെട്ടെന്നുറക്കെ ചിരിച്ചുപോയി… പിന്നെ പരിസരമൊന്നു വീക്ഷിച്ചശേഷമെന്റെ ചെവിയോടു മുഖമടുപ്പിച്ചു…
“”…ആം.! എന്താ..?? എന്നെ കല്യാണങ്കഴിയ്ക്കാന്നു പറാ… എന്നാ ഞാമ്പിന്നിങ്ങനൊന്നും കാണിയ്ക്കൂല..!!”””
“”…മോനേ ഡാ… ഈ കല്യാണോം പ്രേമോന്നും കുട്ടിക്കളിയല്ല… അതോണ്ടെന്റെ കുട്ടനാ ചിന്തേക്കെവിട്ടേച്ച് നന്നായ്ട്ടു പഠിയ്ക്കാന്നോക്കൂട്ടോ..!!”””_ പറഞ്ഞതിനൊപ്പം കവിളിലൊന്നുതട്ടി തിരിഞ്ഞുനടക്കാനായി തുടങ്ങീതും എന്റെ മനസ്സാകെയിടിഞ്ഞു…
ഞാൻ കടുത്തസങ്കടത്തോടെ മനസ്സിലുദിച്ച സംശയമതേപടി ചോദിച്ചു;
“”…അപ്പൊ… അപ്പൊന്നെ ഇഷ്ടല്ലേ..??”””
“”…ഇഷ്ടാണല്ലോ… ഒരുപാടിഷ്ടാ..!!”””_ മീനാക്ഷിയുടെ വായീന്നതുകേട്ടതുമെന്റെ മനസ്സിൽ വീണ്ടുമൊരു പ്രത്യാശവിരിഞ്ഞു;
“”…അപ്പൊപ്പിന്നെന്താ കല്യാണങ്കഴിച്ചാല്..??”””
“”…ന്റെ സിത്തൂ… ഇതു കല്യാണങ്കഴിയ്ക്കണ ഇഷ്ടല്ല… അതു വേറെയിഷ്ടം… ഇതു വേറെയിഷ്ടം..!!”””_ അവളു വിവരിച്ചെങ്കിലും അതൊന്നും കൃത്യമായി മനസ്സിലാകാത്തതുകൊണ്ട് ഞാൻ വായും തുറന്നുപിടിച്ചുനിന്ന് കേട്ടു… ശേഷം,
“”…അപ്പൊ… അപ്പൊന്നെ… അപ്പൊന്നെ കല്യാണങ്കഴിയ്ക്കൂലേ..??”””_ ഞാനിടറിയസ്വരത്തിൽ ചോദിച്ചതും മീനാക്ഷിയുടെമുഖവും വല്ലാതായി…
“”…സിത്തൂ… മോനേ നീ സങ്കടപ്പെടാതെ… അല്ലേത്തന്നെ അതൊക്കെങ്ങനെ ശെരിയാവോന്ന് നീയൊന്നാലോയിച്ചേ… ഒന്നൂല്ലേലും ഞാന്നിന്റെ ചേച്ചീടെ കൂട്ടുകാരിയല്ലേ… അതായത് ചേച്ചിയല്ലേ..?? അല്ലേലും പ്രായത്തില്മൂത്ത പെൺകുട്ട്യോളെയൊന്നും ആമ്പിളേളര് കെട്ടിക്കൂട… അതൊക്കെ നാണക്കേടാടാ… അതോണ്ടു മോൻ ചീത്തക്കാര്യോക്കെ മനസ്സീന്നുകളഞ്ഞിട്ട് നല്ലകുട്ടിയായി പോയി പഠിയ്ക്ക്..!!”””_ അവൾവീണ്ടും പുഞ്ചിരിയോടെ ഉപദേശിച്ചിട്ടും എനിയ്ക്കുകാര്യമായ മാറ്റമൊന്നുംവന്നില്ല…
അതുകൊണ്ടുതന്നെ ഞാനതേചോദ്യം വീണ്ടുംചോദിച്ചു, അവളതേ മറുപടിയുംതന്നു…
കൂട്ടത്തിൽ ചേച്ചീടെപ്രായമുള്ള ആരേയുമെനിയ്ക്കു കല്യാണംകഴിക്കാൻ പറ്റില്ലെന്ന പ്രപഞ്ചസത്യവും പറഞ്ഞു മനസ്സിലാക്കി…
അതോടെ പ്രേമിയ്ക്കുന്നതിനുമുന്നേ പ്രായംപണിതന്ന കാമുകനായി ഞാൻ…
എല്ലാം പറഞ്ഞവസാനിപ്പിച്ച് മീനാക്ഷിപോണതുംനോക്കി തിട്ടപ്പുറത്തുനിന്ന ഞാൻ, തിരികെ മുറിയിൽപ്പോയിക്കിടന്നു കുറേനേരം കരഞ്ഞു…
അന്നത്തെ മീനാക്ഷിയുടുപദേശവും പ്രായത്തിനുമുതിർന്ന പെൺകുട്ടികളെ കല്യാണംകഴിയ്ക്കാൻ പാടില്ലെന്നുള്ള ന്യായവുമൊക്കെ കേട്ടപ്പോൾ അവൾക്കെന്നോടു വലിയ താല്പര്യമൊന്നുമില്ലെന്ന് ബോധ്യമായി…
പിന്നെയാകെ തോന്നിയൊരു ആശ്വാസമെന്നുപറയുന്നത് കുറച്ചുകൂടി വലുതാവുമ്പോൾ വേറെ നല്ല പെൺകുട്ടികളെ കിട്ടുമെന്നുള്ള അവളുടെ വാക്കുകളായിരുന്നു…
അതിനുശേഷം മീനാക്ഷിയെ കാണാനോ മിണ്ടാനോ ഒന്നുംതന്നെ ഞാൻശ്രെമിച്ചില്ല…
കാണുമ്പോൾ അവളുവന്നു മിണ്ടാൻശ്രെമിച്ചാലും ഞാനൊഴിഞ്ഞുമാറി നടന്നു…
ദേഷ്യവും സങ്കടവുമൊക്കെയായിരുന്നു അതിനുപിന്നിലെന്നു കൂട്ടിക്കോളൂ…
അങ്ങനെയൊക്കെ
ജീവിതമോരോദിവസവും മുന്നിലേയ്ക്കു തള്ളിനീക്കുമ്പോഴാണ് ഗൾഫിൽനിന്നും ലീവിനുവന്ന സജീഷേട്ടനും പുള്ളിക്കാരന്റെ ഉറ്റചങ്ങാതിയായ അഭിലാഷെന്ന അഭിയേട്ടനുംചേർന്ന് ഒഴിഞ്ഞുകിടന്നൊരു ഇരുമുറികെട്ടിടം വാടകയ്ക്കെടുക്കുന്നത്…
അവിടെ നവഭാവനയെന്ന പേരിലൊരു ആർട്ട്സ് ആൻഡ് സ്പോർട്സ് ക്ലബായിരുന്നു അവരുടെയുദ്ദേശം…
ഒരുമുറി പൂർണ്ണമായും ലൈബ്രറിയും മറ്റേമുറിയിൽ ടിവിയും സ്പോർട്സ് എക്വുപ്പ്മെന്റ്സുമായി അത്യാവശ്യം വലിയൊരുക്ലബ്…
സാധനസാമഗ്രഹികളുടെ മുതൽമുടക്ക് തിരിച്ചു പിടിയ്ക്കാനെന്നോണം മെംബർഷിപ്പിന് ഒരു നിശ്ചിത തുകയീടാക്കാൻ ശ്രെമിച്ചപ്പോൾ അമ്മയോട് കരഞ്ഞുപറഞ്ഞ് ഞാനും ശ്രീയുംകൂടി ക്ലബിൽകയറിപ്പറ്റി…
രാവിലെസ്കൂളിലും വൈകുന്നേരം ക്ലബ്ബിലുമായി സമയംചിലവഴിച്ച ഞാൻ മീനാക്ഷിയെപൂർണ്ണമായും മനസ്സിൽനിന്നും പറിച്ചെറിയുവാനുള്ള ശ്രെമത്തിലായിരുന്നു…
അച്ഛൻ ഹോസ്പിറ്റലിലെ തിരക്കൊക്കെക്കഴിഞ്ഞു ഫ്രീയാകുമ്പോൾ നേരമിരുട്ടും…
അച്ഛൻ വീട്ടിൽകയറുന്നതിനുമുന്നേ എത്തിക്കോളണമെന്ന അമ്മയുടെ ഉഗ്രശാസനയുടെ പുറത്താണ് ക്ലബ്ബിലെപ്പോക്ക്…