Kathal An Unusual Love Story

Author : Rudradev

ഇതൊരു സങ്കല്പിക കഥ മാത്രം ആണ്.. ആ സെൻസിൽ മാത്രം എടുക്കുക…. LGBTQ+ ഇഷ്ടമുള്ളവർക്ക് വായിക്കാം ഇല്ലെങ്കിൽ സ്കിപ്പ് ചെയ്യാം..

********************************

കട്ട ചൂടിന് ബാങ്കിന്റെ അകത്തേക്ക് കേറിയപ്പോൾ തന്നെ എനിക്ക് പകുതി ജീവൻ വന്നു… അങ്കിൾ തന്നു വിട്ട റിക്വസ്റ്റ് ലെറ്റർ കൈയിൽ പിടിച്ചുകൊണ്ടു കുറച്ചു നേരം നിന്നപ്പോ തന്നെ അകത്തു നിന്നൊരു സെക്യൂരിറ്റി ചേട്ടൻ എന്താണ് കാര്യം എന്ന് ചോദിച്ചു… സ്റ്റേറ്റ്മെന്റ് എടുക്കണം എന്ന് പറഞ്ഞതും ഒരാളുടെ ക്യാബിൻ ചൂണ്ടി അവിടെ കൊടുത്താൽ മതിയെന്ന് പറഞ്ഞു…

അങ്ങോട്ടേക്ക് നടന്നു… ക്യാബിനു മുന്നിൽ ഒന്ന് രണ്ട് പേരുണ്ട്….. കുറച്ചു നേരം കൂടെ എസിയിൽ നിൽക്കാല്ലോ എന്ന് കരുതി അവരുടെ ബാക്കിൽ ക്ഷമയോടെ നിന്നു….

വെറുതെ അവിടെ ഇരിക്കുന്ന ഓഫീസറിന്റെ മുഖത്തോട്ട് നോക്കി അവർ പക്ഷെ തിരിഞ്ഞു ഇരിപ്പാണ്…പെട്ടന്ന് എന്റെ ബാക്കിന്നു ആ സെക്യൂരിറ്റി ചേട്ടൻ വിളിച്ചു പറഞ്ഞു ആ ക്യാബിൻ അല്ല തൊട്ട് അപ്പുറത്തെ ആണെന്ന്….

അവിടെ ആണെങ്കിൽ ആരുമില്ലതാനും…. അവിടേക്ക് നടന്നു ക്യാബിൻ നോക്കി മാം എന്ന് വിളിച്ചതും വിളി കേട്ടുകൊണ്ട് എന്നെ നോക്കുന്ന രണ്ട് വെള്ളാരം കണ്ണുകൾ ഞാൻ കണ്ടു…..

റെമോ സിനിമയിൽ കീർത്തി സുരേഷിനെ കണ്ട ശിവകാർത്തികേയന്റെ അവസ്ഥ ആയിപോയി എനിക്ക്…..

അമ്പില്ലേ അമ്പ്……അത് നെഞ്ചിൽ തറഞ്ഞു കേറി അവളുടെ ആ നോട്ടം കണ്ട്……

മിഴിച്ചു നോക്കി നിന്ന എനിക്ക് അവളുടെ ” എന്താണ് വേണ്ടത് “എന്ന ചോദ്യം പോലും ശ്രദ്ധിക്കാൻ പറ്റിയില്ല 🤭🤭🤭🤭…..

പിന്നേം അവിടത്തെ ടേബിളിൽ തട്ടി വിളിക്കേണ്ടി വന്നു അവൾക്ക് എന്നെ ഉണർത്താൻ…..എങ്ങനെയോ ബോധം വരുത്തി വേണ്ട കാര്യം പറഞ്ഞു ഒപ്പിച്ചു…. അര മണിക്കൂർ വെയിറ്റ് ചെയ്യണം എന്ന മറുപടി….

നിന്നെ ഇങ്ങനെ കാണാൻ പറ്റുമെങ്കിൽ അര മണിക്കൂർ അല്ല ഒന്നര വർഷം വേണേലും വെയിറ്റ് ചെയ്യാം എന്ന് ഞാൻ ആത്മഗതം പറഞ്ഞുകൊണ്ട് അവിടെ പോയി ഇരുന്നു….

അരമണിക്കൂർ തികഞ്ഞില്ല അവൾ എന്നെ വിളിച്ചു സ്റ്റേറ്റ്മെന്റ് കൈയിൽ തന്നു….

എന്നെ ഒന്ന് നോക്കുക പോലും ചെയ്യാണ്ട് അവൾ തന്റെ ജോലിയിലേക്ക് തിരിഞ്ഞു……എന്നാലും ഇടയ്ക് എന്നെ നോക്കി ചിരിച്ചോ എന്നൊരു ഡൌട്ട് ഇല്ലാതില്ല കേട്ടോ…..എനിക്കെന്തായാലും ചെറിയ വിഷമം തോന്നി… ഇനിയിപ്പോ സ്റ്റേറ്റ്മെന്റ് എങ്ങനെ എടുക്കും ആരുടെ എടുക്കും ഇവളെ ഇനി എങ്ങനെ കാണും എന്നൊക്കെ ആയിരുന്നു എന്റെ വിഷമം…..

നടന്നു പോയി സെക്യൂരിറ്റി ചേട്ടനോട് ആ മാഡത്തിന്റെ കല്യാണം കഴിഞ്ഞോ എവിടേയോ കണ്ടപോലെ തോന്നി എന്നൊരു കള്ളം തട്ടി വിട്ടപ്പോ അയാൾ പറഞ്ഞു. ഇല്ല എൻഗേജ്മെന്റ് മാത്രമേ കഴിഞ്ഞിട്ടുള്ളൂ എന്നാണ്…..

പകുതി ജീവൻ പോയെങ്കിലും ഗോൾ അടിക്കാൻ പോകുന്നെ ഉള്ളൂ ഇതുവരെ ഗോൾ അടിച്ചിട്ടില്ല എന്ന കാര്യം ചെറിയ ആശ്വാസം നൽകി….

പക്ഷെ എല്ലാം ചിന്തിച്ചതിന്റെ അവസാനം എന്റെ ഹൃദയം തകർന്ന് പോയ ഒരു റിയാലിറ്റി ഉണ്ടായിരുന്നു…..

അത് മൈൻഡിലോട്ട് വന്നതും എന്റെ സകല പ്രതീക്ഷയും വെള്ളത്തിലായി….

അവൾ അങ്ങനെ അല്ലെങ്കിൽ ………. ?

കാരണം ഞാൻ ഞാനൊരു പെണ്ണാണല്ലോ…….. അവളും…….

അതിപ്പോ ട്രൈ ചെയ്താൽ അല്ലേ അറിയൂ എന്ന് എന്റെ ഹൃദയം വിളിച്ചു പറഞ്ഞു അത് ശെരിയാണല്ലോ എന്ന് ഞാനും ….

അവിടെന്ന് നേരെ പോയത് അതെ ബാങ്കിൽ അക്കൗണ്ട് ഉള്ള ആൾക്കാരെ കണ്ട് പിടിക്കാൻ ആയിരുന്നു. എന്തെങ്കിലും ഒരു കാരണം വേണമല്ലോ അവിടെ കയറാനും അവളെ കാണാനും….

അങ്ങനെ കൂട്ടുകാരുടെ പരിചയത്തിൽ ഒക്കെയുള്ള ഒന്ന് രണ്ട് പേരുടെ കിട്ടി. അവരുടെ റിക്വസ്റ്റ് ലെറ്റർ ആയിട്ട് അടുതടുത്ത പല ദിവസവും ഞാൻ അവിടെ കയറി ഇറങ്ങി…

ആശ്ചര്യം എന്തെന്നാൽ എന്നെ കാണുമ്പോ ഒക്കെ അവളുടെ മുഖം വിടരും അപ്പോൾ തന്നെ അതൊരു ഗൗരവ ഭാവത്തിലേക്ക് മാറുകയും ചെയ്യും.

അന്നത്തെ ദിവസം ഞാൻ കുറച്ചു നേരത്തെ പോയി… പതിവില്ലാതെ അവൾ എന്നോട് ചോദിച്ചു

“തന്റെ പേരെന്താ?”

“അമർ”

ഒട്ടും മടിക്കാതെ ഞാൻ പറഞ്ഞു

“എന്ത് ”

“അമർ, അമർജ്യോതി അമറെന്നു വിളിക്കും ”

“എന്താ പേര് ” ഞാനും തിരിച്ചു ചോദിച്ചു

“നിനക്ക് വായിക്കാൻ അറിയില്ലേ ഇവിടെ എഴുതി വച്ചേക്കുവല്ലേ…?”

അവളുടെ ഗൗരവം ഒട്ടും കുറയ്ക്കാതെ പറഞ്ഞു…

“ഞാനത് കണ്ടു പക്ഷെ ഒരാളുടെ പേര് അയാളുടെ നാവിൽനിന്ന് കേൾക്കുന്നത് അല്ലേ അതിന്റെ സുഖം…..”

കുറച്ചു നേരം എന്റെ മുഖത്തേക്ക് നോക്കിയിട്ട് അവൾ പറഞ്ഞു

“രുദ്ര,രുദ്ര ലക്ഷ്മി പ്രകാശ് ”

“ഹ്മ്മ് ”

ഞാൻ അവിടെ വെയിറ്റ് ചെയ്യാം എന്ന് പറഞ്ഞു പേപ്പർ കൊടുത്തു തിരിഞ്ഞതും അവൾ എന്നെ വിളിച്ചു

“അവിടെ നിൽക്ക് ”

“എന്താ…?”

“താനിത്ര കഷ്ടപ്പെട്ട് ഇനി വരണം എന്നില്ല കേട്ടോ എന്തേലും ഉണ്ടെങ്കിൽ വിളിച്ചാൽ മതി ”

എന്ന് പറഞ്ഞു അവൾ അവളുടെ ഒഫീഷ്യൽ കാർഡ് എനിക്ക് നേരെ നീട്ടി….

ശെടാ ഇതിപ്പോ ഞാൻ അവളെയാണോ അവൾ എന്നെയാണോ വളക്കുന്നത് എന്ന് എനിക്ക് തോന്നിപ്പോയി കാരണം ഞാൻ ചെയ്യേണ്ടത് ആണല്ലോ അവൾ ചെയ്യുന്നത് 😂

എന്നാലും നമ്പർ കിട്ടിയ സന്തോഷത്തിൽ ഞാൻ അവിടെന്ന് ഇറങ്ങി അപ്പോ തന്നെ നമ്പർ സേവ് ആക്കി വെച്ചു

ഒരു മെസ്സേജ് അപ്പോൾ തന്നെ അയച്ചു

ഹായ് ഞാൻ അമർ ആണ് എന്ന് പറഞ്ഞിട്ട്…

അവൾ തിരിച്ചു അപ്പോൾ തന്നെ ഒരു സ്മൈലി ഇട്ടു

സ്റ്റേറ്റ്മെന്റ് മെയിൽ അയക്കാമോ എന്ന് ഞാൻ ചോദിച്ചപ്പോൾ

നിനക്ക് ശെരിക്കും സ്റ്റേറ്റ്മെന്റിന്റെ ആവശ്യം ഉണ്ടോ എന്നവൾ എന്നെ ഞെട്ടിച്ചുകൊണ്ട് ചോദിച്ചു

ഇല്ല എന്ന് ഞാൻ മറുപടി ഇട്ടു

അതിന്റെ കൂടെ ഞാൻ അയച്ചു..

” കാണാൻ എന്തെങ്കിലും കാരണം വേണ്ടേ അതുകൊണ്ട് ചെയ്യുന്നതാണ് ”

” നീയെന്തിനാ എന്നെ കാണുന്നത് ”

” അതിപ്പോ എനിക്ക് അറിയില്ല. തന്റെ ഒരു നോട്ടം കിട്ടാൻ വേണ്ടി ഇങ്ങനെ പലതും ചെയ്യുന്നു..ആരാ എന്താ എന്ന് പോലും കൃത്യമായി എനിക്ക് അറിയില്ല എന്നിട്ടും ഞാൻ ചെയ്യുന്നു..എന്നെ പറ്റി മോശമായി വിചാരിക്കരുത് പ്ലീസ്… എനിക്ക് തുറന്ന് പറയണം എന്ന് തോന്നി ”