അതിനും ഒരു ചെറു പുഞ്ചിരി മാത്രമേ അവനിൽ നിന്നും വന്നുള്ളൂ. ഇയാൾക്ക് എന്താ ശരിക്ക് ചിരിക്കാൻ അറിയില്ലേ ശ്രീ ചിന്തിച്ചു.
പെട്ടെന്ന് അവൻ അവളുടെ പിന്നിലേക്ക് നോക്കി, ആ മുഖഭാവം മാറുന്നത് കണ്ടു. ഞൊടിയിടയിൽ അവൻ ഇരുന്നിടത്ത് നിന്നും എഴുന്നേറ്റ് അവളുടെ നേരേ കുതിച്ചു. എന്താ സംഭവിക്കുന്നത് എന്നറിയാതെ അവൾ പേടിച്ചു, മുഖം വിവർണ്ണമായി. അവന്റെ വലത് കൈ അവളുടെ വലത് കവിളിന്റെ സൈഡിലൂടെ പിന്നിലേക്ക് പോയി.
എന്താണ് നടക്കുന്നത് എന്ന് മനസ്സിലാക്കാതെ പിന്നിലേക്ക് നോക്കിയ അവൾ കാണുന്നത് ശരീരം നിറയെ നിറങ്ങൾ പൂശപ്പെട്ട നിലയിൽ ഉള്ള ഒരാളുടെ കൈ അശ്വിൻ പിടിച്ച നിലയിൽ ആണ്.
“ഇവളെ ഇന്ന് വിട്ടേക്ക്” അശ്വിൻ ആജ്ഞ സ്വരത്തിൽ പറഞ്ഞു.
എന്താണ് ഇവിടെ നടക്കുന്നത് എന്ന് മനസ്സിലാക്കാതെ ശ്രീ മിഴിച്ചിരുന്നു.
ആഗതനായ ആ പയ്യൻ ഒന്നും പറയാതെ തിരിച്ചു നടന്നു പോയി. അശ്വിൻ ഒന്നും സംഭവിക്കാത്ത രീതിയിൽ തിരികെ വന്നിരുന്നു.ഒന്നും മനസ്സിലാവാതെ ഇരിക്കുന്ന ശ്രീയെ കണ്ട് അച്ചു കാര്യം വിവരിച്ചു.
“ഇവിടെ ഓരോ അധ്യായന വർഷവും തുടങ്ങിയ ശേഷം വരുന്ന രണ്ടാമത്തെ വെള്ളിയാഴ്ച ഹോളി പോലെ ആഘോഷം നടത്തും. ഇതിനെ പറ്റി അറിയാതെ വരുന്ന ഫസ്റ്റ് ഇയർ പിള്ളേർ ആണ് പ്രധാന ഇരകൾ. ചേച്ചിയെ പോലെ വെള്ള ഒക്കെ ഇട്ട് വന്ന് പലരും പെട്ട് പോയിട്ടുണ്ട്”
അപ്പോഴാണ് രാവിലെ ഗായത്രി പറഞ്ഞതിന്റെ പൊരുൾ ശ്രീക്ക് മനസ്സിലായത്.
“അയ്യോ ഇനി ഞാൻ ഇപ്പോ എന്ത് ചെയ്യും? എനിക്ക് ആകെ ഉള്ള വെള്ള ചുരിദാർ ആണിത്. അച്ഛൻ വാങ്ങി തന്നതാ”
“ചേച്ചി പേടിക്കേണ്ട എട്ടൻ കൂടെ ഉള്ളപ്പോൾ ആരും ഒന്നും ചെയ്യില്ല. പിന്നെ ഇനി ക്ലാസ്സിൽ കയറാൻ പോകണ്ട. കുറച്ചു കഴിഞ്ഞു നമുക്ക് ഒന്നിച്ച് പുറത്തേക്ക് പോകാം” അച്ചു പറഞ്ഞു
“അറ്റൻഡൻസ്…!?” അവൾ ഒരു ചോദ്യം പോലെ സ്വയം പറഞ്ഞു
” ഇന്ന് ആരും അങ്ങനെ അറ്റൻഡൻസ് എടുക്കില്ല” അച്ചു അവൾക്ക് കുറച്ച് ആശ്വാസം പകരുന്നു കൊണ്ട് പറഞ്ഞു
“ചേച്ചി എവിടെ ആണ് താമസിച്ചിരുന്നത്?” അച്ചു ചോദിച്ചു
“കോളേജ് ഹോസ്റ്റലിൽ ആണ്” അവൾ പറഞ്ഞു “അതെ അവർ ഒന്നും ചെയ്യില്ലല്ലോ അല്ലേ?” തെല്ലുരു പേടിയോടെ ശ്രീ അശ്വിനെ നോക്കി ഒന്നൂടെ ഉറപ്പിക്കാൻ ചോദിച്ചു
അവളുടെ പേടി മനസ്സിലാക്കിയിട്ടെന്നോണം അച്ചു അശ്വിനെ നോക്കി പറഞ്ഞു “ഏട്ടാ എന്ന ഈ ചേച്ചിയെ ഒന്ന് കൊണ്ടുപോയി ആക്കിയിട്ട് വാ”
അവൾ പറയാൻ കാത്തിരിക്കുന്നത് പോലെ അവൻ എഴുന്നേറ്റു “വാ പോകാം” എന്ന് പറഞ്ഞു
“പറയാൻ കാത്തിരിക്കുന്നത് പോലെ ആണല്ലോ എഴുന്നേൽക്കുന്നത്! എന്താ ഒരു താൽപര്യം” അച്ചു ചിരിച്ചു കൊണ്ട് പറഞ്ഞു. അവനും ഒന്ന് പുഞ്ചിരിച്ചു
ശ്രീ ആദ്യം അവനെ ഒന്ന് നോക്കി. അവൻ ഒന്നും ഇല്ല എന്ന പോലെ കണ്ണടച്ച് കാണിച്ചു. പിന്നെ അവൾ ബാഗ് എടുത്തു അച്ചുവിനെ നോക്കി.
“ചേച്ചി ധൈര്യം ആയി പോയി വാ” അച്ചു ശ്രീയോട് പറഞ്ഞു. “ഏട്ടാ നോക്കികൊള്ളണേ” എന്ന് അശ്വിനോട് കൂട്ടി ചേർത്തു.
അശ്വിന് ശ്രീയുടെ കൈയ്യിൽ പിടിച്ച് മുന്നോട്ട് നടന്നു. ആ നീക്കം ഒട്ടും പ്രതീക്ഷിക്കാത്തിരുന്ന ശ്രീ ആദ്യ തന്റെ കൈയ്യിൽ പിടിച്ച ആ കൈയ്യിലേക്കും പിന്നെ അവനേയും നോക്കി യാന്ത്രികമായി അവനോട് ഒപ്പം നടന്നു.
“പിന്നെ പെട്ടെന്ന് തിരിച്ചും വരണം. ഇവിടെ ഒരുത്തി കാത്തിരിക്കുന്നുണ്ട് എന്ന് ഓർമ്മ വേണം. ഗേൾസ് ഹോസ്റ്റലിൽ ഈ ചേച്ചിയുടെ കൂടെ കേറി പൊറുതി തുടങ്ങരുത്” എന്ന് ഉറക്കെ വിളിച്ചു പറഞ്ഞു അച്ചു ഉറക്കെ ചിരിച്ചു.
അശ്വിൻ അതിന് പ്രതികരിച്ചില്ല എങ്കിലും ശ്രീ ഈ കുട്ടി എന്താ ഇങ്ങനെ ഒക്കെ തന്റെ കാമുകനോട് പറയുന്നത് എന്ന് അത്ഭുതത്തോടെ രണ്ടാളേയും മാറി മാറി നോക്കി യാന്ത്രികമായ ആ നടത്തം തുടർന്നു.
പക്ഷേ എന്തോ അവന്റെ പിന്നാലെ ഉള്ള ആ പോക്ക് അവൾക്ക് ഒത്തിരി ഇഷ്ടമായി. ആ കാന്താരി അച്ചുവിനോട് അസൂയ തോന്നി എങ്കിലും എന്തോ ഒരു പ്രത്യേക ഇഷ്ടം അവളോടും തോന്നി. ചുമ്മാതല്ല ഇങ്ങേർ അവളെ ഇഷ്ടപ്പെട്ടത്. കുറച്ചു നേരത്തെ പരിചയം കൊണ്ട് തന്നെ തനിക്ക് വരെ ഒരു ഇഷ്ടം തോന്നി.
അവർ ബൈക്ക് പാർക്ക് ചെയ്തിരുന്ന ഭാഗത്തേക്ക് അവർ നടന്നെത്തി. അശ്വിൻ കൂടെ ഉള്ളത് കൊണ്ട് ഒരാളും അവളോട് അടുത്തില്ല. അടുത്ത് വന്ന രണ്ട് പേർ അവന്റെ ഒറ്റ നോട്ടത്തിൽ തന്നെ പിന്നോട്ട് മാറി.
എന്താ ഒരു പവർ. അവളിൽ അനുനിമിഷം അയാളോടുള്ള ആരാധനാ കൂടി കൂടി വന്നു. അവൻ മറ്റൊരുവളുടെ ആണെന്ന് തന്നെ തന്നെ പറഞ്ഞു മനസ്സിലാക്കാൻ അവൾ ശ്രമിച്ചു. പക്ഷേ മനസ്സ് കേൾക്കണ്ടേ. മനസ്സ് കിളി പോയ പോലെ അവനോട് കൂടുതൽ അടുത്തു അടുത്ത് വന്നു.
അവൻ ബൈക്ക് എടുത്ത് സ്റ്റാർട്ട് ചെയ്ത് അവളെ ഒന്ന് നോക്കി. അവൾ ബാഗ് മടിയിൽ വച്ച് അവന്റെ പിന്നിൽ സൈഡിലേക്ക് തിരിഞ്ഞ് ഇരുന്നു. ബൈക്ക് മുന്നോട്ട് പോയപ്പോൾ ഗായത്രി ഉൾപ്പെടെ പലരും ആ കാഴ്ച നോക്കി നിൽക്കുന്നത് അവൾ ചെറിയ ചമ്മലോടെ കണ്ടു. എന്നാൽ അശ്വിൻ അതൊന്നും ശ്രദ്ധിക്കാതെ കോളേജ് കവാടം കടന്ന് ഒരു കിലോമീറ്റർ അകലെയുള്ള ഹോസ്റ്റൽ ലക്ഷ്യമാക്കി നീങ്ങി. അവനോട് ചേർന്ന് അങ്ങനെ ആ ബൈക്കിൽ ഇരുന്നപ്പോൾ എന്തോ ഒരു സുരക്ഷിതത്വവും സന്തോഷവും അവൾക്ക് തോന്നി. അവൾ കുറച്ച് മുന്നോട്ട് തന്റെ ശരീരം അവനോട് മുട്ടിച്ച് ഇരുന്നു. അവളുടെ മാറിടം അവന്റെ പിന്നിൽ പതിഞ്ഞു. അപ്പോഴേക്കും ഹോസ്റ്റൽ എത്തി. മനസ്സില്ലാ മനസ്സോടെ അവൾ ആ ബൈക്കിൽ നിന്നും ഇറങ്ങി. യാത്ര പറയാൻ അവനോട് ചേർന്ന് നിന്നു
“താങ്ക്സ്” അവൾ പറഞ്ഞു
“അതിന്റെ ഒന്നും ആവശ്യമില്ല. താൻ ചെല്ല്” അവൻ ആദ്യമായി ഗൗരവം വിട്ട് അവളോട് സംസാരിച്ചപ്പോൾ അവളുടെ മനസ്സ് അനന്ദതുന്തിലനൃത്തമാടി. അവന് മറ്റൊരുവളുടെ ആണെന്ന ന്യായം ഒന്നും ആ മനസ്സിനെ മാറ്റിയില്ല.
അവൾ അനങ്ങാതെ നിൽക്കുന്നത് കണ്ട് അവന് വീണ്ടും പറഞ്ഞു “താൻ ചെല്ല്ടോ. എന്നിട്ട് വേണം എനിക്ക് തിരിച്ചു ചെല്ലാൻ. എന്റെ അച്ചു അവിടെ വെയിറ്റിംഗ് ആണ്”
അത് കേട്ട ശ്രീക്ക് നെഞ്ചിൽ ഒരു കല്ല് എടുത്തു വച്ച പോലെ ആണ് തോന്നിയത്. അവളുടെ തെളിഞ്ഞ മുഖം പെട്ടെന്ന് വാടി. അത് അവനും ശ്രദ്ധിച്ചു.
മുഖത്ത് ഒരു ചിരി വരുത്തിയ ശേഷം ഒരക്ഷരം പോലും മിണ്ടാതെ അവൾ ഹോസ്റ്റൽ ലക്ഷ്യമാക്കി നടന്നു. എന്തെങ്കിലും പറഞ്ഞാൽ തെറ്റായി പോകുമോ എന്നൊരു തോന്നൽ ഉണ്ടായിരുന്നു അവൾക്ക്.
അവൾ നടന്നു നീങ്ങുന്നത് നോക്കി നിന്ന അശ്വിൻ പെട്ടെന്ന് എന്തോ ഓർത്തത് പോലെ വണ്ടി തിരിച്ചു കോളേജിലേക്ക് നീങ്ങി. അവന്റെ ബൈക്ക് സ്റ്റാർട്ട് ചെയ്ത ശബ്ദം കേട്ട അവൾ തിരിഞ്ഞ് അവൻ പോകുന്നത് നോക്കി നിന്നു. അവൻ അത് കണ്ണാടിയിൽ കണ്ടു എന്ന് അവൾ അറിഞ്ഞില്ല.
