മല്ലിക വേഗം അകത്തു പോയി മുളകുപൊടി വെച്ച ടിന്നും പൊതിയാൻ കടലാസുമെടുത്ത് വന്നു…
“” ചേച്ചി ആവശ്യത്തിനെടുത്തോ………. “
മല്ലിക പാത്രം അവരുടെ നേരെ നീട്ടി…
ഗിരി ഇന്നലെ അത്യാവശ്യം സാധനങ്ങൾ വാങ്ങിയതിനാൽ കൊടുക്കാൻ സാധനമുണ്ടായി എന്ന് മല്ലിക ഓർത്തു…
മിനി അരകല്ലിനു മുകളിലേക്ക് പേപ്പർ വിരിച്ച് മുളകു പൊടി കുടഞ്ഞു തുടങ്ങി…
“ നിന്റെ വിരുന്നുകാരൊക്കെ പോയോ… ?”
ചോദ്യം ഏതു സമയത്തും മല്ലിക പ്രതീക്ഷിച്ചതായിരുന്നു…
“” കടേലേക്കെങ്ങാണ്ട് പോയതാ…”
മല്ലിക ഒഴുക്കൻ മട്ടിൽ പറഞ്ഞു…
അഥവാ ഗിരി തിരികെ വന്നാലും പറഞ്ഞു നിൽക്കാൻ കൂടിയായിരുന്നു അവളങ്ങനെ പറഞ്ഞത്…
“” ആരാ അത്…….?””
മിനി പാത്രം അടച്ചു വെച്ചു…
“” ചേട്ടന്റെ വകയിലൊരു പെങ്ങടെ മോനാ… “
“” അപ്പോ ഉമയുടെ മുറച്ചെറുക്കനാണല്ലോ… ….””
മിനി ഒരു വഷളച്ചിരി ചിരിച്ചു…
മല്ലികയ്ക്ക് ആകെ വിറഞ്ഞു കയറി…
“” അതും പറഞ്ഞ് ചേച്ചി ഉമയുടെയടുത്തേക്ക് ചെല്ല്…………… “
ഉള്ളിലെ ഈർഷ്യ, ഒരു ചിരി കൊണ്ട് മറച്ച് മല്ലിക പറഞ്ഞു……
ഉമയുടെ പേര് കേട്ടതും മിനിയുടെ മുഖത്തെ ചിരി മാഞ്ഞു…
“” അവള് പോയോ…………?””
പതിഞ്ഞ ശബ്ദത്തിൽ അവർ ചോദിച്ചു…
ഉമ പോകാതെ അവരിങ്ങോട്ട് വരില്ലെന്ന് മല്ലികയ്ക്ക് നല്ല പോലെ അറിയാമായിരുന്നു.
“” പോയി…….”
അവൾ മറുപടി കൊടുത്തു..
മിനി കടലാസിൽ മുളകുപൊടി പൊതിഞ്ഞെടുത്തു…
“” അവൻ നാട്ടിലെവിടാ……….?””
മിനി വിടുന്ന ലക്ഷണമില്ല……….
“ ഞാനും ഉമയുമൊക്കെ അവനെ ചെറുപ്പത്തിൽ കണ്ടതാ… അവൻ പുറത്തായിരുന്നു… …. “
മല്ലിക കള്ളം പറഞ്ഞു മുഷിഞ്ഞു…
“” ഗൾഫിലോ………?’
അത്ഭുതവും അവിശ്വസനീയതയും മിനിയുടെ മുഖത്തവൾ കണ്ടു…
ഗൾഫിലായിരുന്നു എന്നറിഞ്ഞാൽ തങ്ങളെങ്ങാനും രക്ഷപ്പെട്ടേക്കുമോ എന്നൊരു അസൂയയും കുശുമ്പും മല്ലിക അവരിൽ കണ്ടു…
“” ഗൾഫിലൊന്നുമല്ല…… തമിഴ്നാട്ടിലോ, ആന്ധ്രയിലോ എങ്ങാണ്ടായിരുന്നു…”
“”ങ്ഹാ……. അതു ശരി… “
മിനിയുടെ മുഖത്ത് സന്തോഷം തിരികെയെത്തി…
“” സെബാൻ ചേട്ടൻ പോയോ ചേച്ചീ… ?””
“” ഓ… അതിയാൻ രാവിലെ മോന്താനുള്ള വകയുണ്ടാക്കാൻ എറങ്ങീട്ടുണ്ട്…… “
വലിയ താല്പര്യമില്ലാത്ത മട്ടിൽ മിനി പറഞ്ഞു..
“” കുടി കുറവില്ലേ…………… ?””
“”പിന്നേ… ഇപ്പോൾ അവരഞ്ചാറു പേരു കൂടി വാറ്റിയാ കുടി… …. ഷെയറാണത്രേ… ഒരു തുള്ളി മറ്റേയാൾ കൂടുതൽ കുടിച്ചോന്നറിയാനാ പുലർകാലേ പാഞ്ഞു പോയത്… “”
മല്ലിക അതു കേട്ട് ചിരിച്ചു…
“” ഞാൻ പോകുവാടീ………. “
സംസാരം തന്റെ കുടുംബവിശേഷങ്ങളിലേക്ക് തിരിഞ്ഞത് ഇഷ്ടപ്പെടാതെ മിനിയും തിരിഞ്ഞു..
അവർ വീണ്ടും എന്തോ പറയാൻ വരുന്നത് മല്ലിക ശ്രദ്ധിച്ചു…
അപ്പോഴേക്കും അമ്പൂട്ടനും കുളി കഴിഞ്ഞു വന്നു…
പാന്റ് മാത്രം എടുത്തിട്ട് അവൻ അടുക്കളയിലേക്ക് വന്നു……
അവൾ പാത്രത്തിലെടുത്തു വെച്ച ചോറ് തലേ ദിവസത്തെ കറിചട്ടിയിലേക്കിട്ടിട്ട് അവൻ കുഴച്ചു തുടങ്ങി…
ഹാളിലെ പ്ലാസ്റ്റിക്ക് മേശയിലിരുന്ന ഫോൺ ബല്ലടിക്കുന്നുണ്ടായിരുന്നു…
ഓൺലൈൻ ക്ലാസ്സ് തുടങ്ങിയപ്പോൾ പഞ്ചായത്ത് മെമ്പർ അമ്പൂട്ടന് സമ്മാനിച്ചതാണ് ആ ഫോൺ……
ശമ്പളമൊക്കെ കിട്ടിയാലും ബാക്കി അത്രയധികം ബാക്കി വന്നാൽ മാത്രമേ ഉമ അത് റീ- ചാർജ്ജ് ചെയ്യാറുള്ളൂ..
സ്റ്റോറേജിൽ കിടക്കുന്ന വീഡിയോ കാണാൻ അമ്പൂട്ടനും കോൾ ചെയ്യാൻ മല്ലികയും ഉപയോഗിക്കുന്ന ഫോൺ……
മല്ലിക ഫോണെടുത്തു നോക്കി…
ഉമ………..!
അത്രയ്ക്ക് അത്യാവശ്യമില്ലാതെ അവൾ വിളിക്കാറില്ലെന്ന് മല്ലിക ഓർത്തു…
വല്ല അപകടവും…………?
കയ്യിൽ നയാ പൈസ ഇല്ലല്ലോ എന്ന ചിന്തയോടെ അവൾ ഫോണെടുത്തു……
“” കുഞ്ഞമ്മ എവിടെപ്പോയിരുന്നു…… ?””
ഉമയുടെ ദേഷ്യം മല്ലിക കാര്യമാക്കിയില്ല…
“” നീ കാര്യം പറയെടീ………. “
“” വല്ലതും അറിഞ്ഞായിരുന്നോ……..?””
“ ഞാനൊന്നുമറിഞ്ഞില്ല… നീ കാര്യം പറ… “
മല്ലിക ആകാംക്ഷയോടെ ചോദിച്ചു…
“ ആ സോമനെ രാത്രി ആരാണ്ട് പഞ്ഞിക്കിട്ടെന്ന്… രണ്ടു കൈയ്ക്കും ഒടിവുണ്ടെന്നാ കേട്ടത്…… “
ഉമയുടെ വാക്കുകൾ കേട്ടതും മല്ലിക ഒന്ന് നടുങ്ങി…
ഗിരി……….!
അല്ലാതാര് അത് ചെയ്യാൻ… ….?
“” രാവിലെ ഷീബേച്ചിയാ എന്നോട് വഴിയിൽ വെച്ച് പറഞ്ഞത്… അവരുടെ കെട്യോനും കൂടിയാ ആശുപത്രിയിലാക്കിയതെന്ന്……….””
“” ആരാന്നറിഞ്ഞോ……….?””
മല്ലിക ചോദിച്ചു…
“” അയാളായിരിക്കും……. “
ഉമ ശബ്ദം താഴ്ത്തി പറഞ്ഞത് മല്ലിക കേട്ടു..
“” ആനയോ പന്നിയോ കുത്താൻ വന്നെന്നാ ആശുപത്രിയിൽ പറഞ്ഞതെന്ന് കേട്ടു………”…”
“” നീയാരോടും പറയാൻ പോകണ്ട…… “
മല്ലിക പറഞ്ഞു…
“” പിന്നേ… എനിക്കതല്ലേ പണി…””
ഉമ ചൊടിച്ച് ഫോൺ വെച്ചു…
സോമന് തല്ലുകിട്ടേണ്ടതാണ് എന്ന കാര്യത്തിൽ സംശയമില്ല…
പക്ഷേ ഇത്…….?
ഗിരിയാകുമോ… ….?
എന്നാലും ഒരു സംശയം മല്ലികയുടെ ഉള്ളിൽ ഉടക്കി നിന്നു…
അമ്പൂട്ടൻ ഭക്ഷണം കഴിച്ച് അവളുടെ അടുത്തേക്ക് വന്നു……
“” ആരാ അമ്മേ… ….?””
“” ചേച്ചിയാടാ… …. “
“” എന്നാത്തിന്… ….?””
“” ആ സോമനെ ആരാണ്ട് രാത്രി തല്ലിയെന്ന്… …. “
അമ്പൂട്ടൻ ഒറ്റ ചിരിയായിരുന്നു… ….
“ മായാവീ………””
ചിരിക്കു പിന്നാലെ അവൻ പശ്ചാത്തല സംഗീതം കൂടി ഇട്ടു…
“” കിണിച്ചോ… …. നീയിതാരോടും പറയാൻ നിൽക്കണ്ട… “
മല്ലിക ഓർമ്മപ്പെടുത്തി …
അമ്പൂട്ടൻ ഷർട്ടും കൂടെ എടുത്ത് , ബട്ടൻസ് ഇട്ടിട്ട് മല്ലികയുടെ കവിളിൽ ഏന്തിവലിഞ്ഞ് ഒരുമ്മ കൊടുത്തു……
“ ഞാൻ പറഞ്ഞില്ലേ… ആ ചേട്ടൻ അങ്ങനെ പോകില്ലാന്ന്… “
ആദ്യം അതത്ര വിശ്വസനീയമായി തോന്നിയില്ല എങ്കിലും ഇപ്പോൾ മല്ലികയ്ക്കും ഏറെക്കുറെ ഉറപ്പായി……
സോമനെ തല്ലിയത് ഗിരിയാണെങ്കിൽ അവനങ്ങനെ ഇവിടം വിട്ടു പോകാൻ വന്നവനല്ല…… !
ഒരു ലക്ഷ്യം അവനുണ്ട്……!
അതെന്താണെന്ന് മാത്രം ഒരു പിടിയുമില്ല……
രാവിലെ മിനി ചേച്ചി വന്നത് ഇത് പറയാനായിരിക്കും എന്ന് മല്ലിക ഓർത്തു..
ഗിരി ഇവിടെ ഉണ്ടായിരുന്നോ എന്നറിയുകയായിരിക്കും ലക്ഷ്യം……
അല്ലെങ്കിൽ തന്നെ അടി കഴിഞ്ഞ സമയം തന്നെ ന്യൂസ് പിടിച്ചെടുക്കാനുള്ള സകല ഏഷണി വിദ്യകളും കൈവശമുള്ള അവർ ഇതറിയാതിരിക്കാൻ ഒരു വഴിയുമില്ല…
മുറ്റമടിക്കുമ്പോഴും പാത്രം കഴുകുമ്പോഴും മല്ലികയുടെ ചിന്ത അതു തന്നെയായിരുന്നു…
ഗിരി…….!
ജോലിയെല്ലാം ഒതുക്കി, തെങ്ങോലയുടെ ഈർക്കിലി ഊർന്ന്, ചൂലുണ്ടാക്കിക്കൊണ്ട് ഇരിക്കുമ്പോഴാണ് മുൻവശത്ത് ചാക്കു കെട്ടു വീഴുന്ന പോലെ ഒരു ശബ്ദം മല്ലിക കേട്ടത്……
പിന്നാലെ ജാക്കിയുടെ നന്ദിസൂചകമായ മുരളലും കേട്ടു..
വേഗത്തിൽ തന്നെ മല്ലിക ഉമ്മറത്തേക്ക് വന്നു…
മുക്കാൽച്ചാക്കിനടുത്ത് ഒരു അരിച്ചാക്ക് തിണ്ണയിലിരിക്കുന്നു…
അവൾ മുറ്റത്തിറങ്ങി താഴെ ഒതുക്കുകളിലേക്ക് നോക്കി…
ഗിരി പിൻ തിരിഞ്ഞ് ഇറങ്ങിപ്പോകുന്നത് അവൾ കണ്ടു…
മുന്നിൽ രണ്ടാൾ വേറെയുമുണ്ട്…
നടവഴിക്കപ്പുറം, ഒരു പിക്കപ്പ് നിർത്തിയിട്ടിരിക്കുന്നു…
