“” അയാളോട് ആ ഒളിഞ്ഞു നോട്ടം നിർത്താൻ പറ… …. അവനെ അങ്ങനെയങ്ങ് ഒഴിവാക്കാൻ വയ്യല്ലോ… “
ഹബീബ് ഓഫീസ് റൂമിന്റെ വാതിൽ കടന്നു..
റാഫി കടന്നതും പിന്നിൽ വാതിലടഞ്ഞു……
“” തെര നിറച്ച് ഒരു നാടൻ തോക്ക് സോമന്റെ ഷെഡ്ഡിൽ എത്തിച്ചേക്ക്… “”
പറഞ്ഞിട്ട് ഹബീബ് റാഫിക്കു നേരെ തിരിഞ്ഞു…
“” വന്നിട്ടധികമൊന്നും ആയിട്ടില്ല…… എന്നാലും കണ്ടതും കേട്ടതുമൊക്കെ വെച്ചു നോക്കുമ്പോൾ… ഒറ്റയാനാ അവൻ……. “
ഹബീബ് ഇടത്തേ നെഞ്ചിൽ വലതു കയ്യാൽ ഒന്നു തടവി……
“” ഒറ്റയാൻ………. “
റാഫി ഹബീബിന്റെ മിഴികളിലെ കൂർമ്മത കണ്ടു…
***** ****** ***** ***** ******
തിരികെയും ഫോറസ്റ്റ് ജീപ്പിൽ തന്നെയായിരുന്നു യാത്ര…
മരുന്നുകൾ വാങ്ങിക്കൊടുത്തത് ഹർഷനാണ്……
“” സാറിന് എന്നോടെന്തോ ഒരു സോഫ്റ്റ് കോർണർ ഉള്ളതു പോലെ… “”
ജീപ്പിലിരിക്കുമ്പോൾ മുഖവുരയൊന്നും കൂടാതെ ഗിരി ചോദിച്ചു…
ഷർട്ട് ഉപേക്ഷിച്ചിരുന്നു……
ഒരു വെള്ള തോർത്താണ് ഗിരി പുതച്ചിരുന്നത്…
“ ആപത്തിൽ പെടുന്ന വന്യമൃഗങ്ങളെ രക്ഷിക്കുക എന്നതാണ് ഞങ്ങൾ ഫോറസ്റ്റുകാരുടെ ഡ്യൂട്ടി… “
ഹർഷൻ ചിരിയോടെ പറഞ്ഞു…
ഗിരി മിണ്ടിയില്ല…
“” ഈ റാവുത്തർ അത്ര നല്ല പാർട്ടിയൊന്നുമല്ല.. ഇല്ലീഗലായിട്ട് എന്തൊക്കെ ചെയ്യാൻ പറ്റുമോ അതു മാത്രമേ അയാൾ ചെയ്യൂ… പിന്നെ വേറൊരു കാര്യമുണ്ട് , കൂടെ നിന്നാൽ അമ്പിളി അമ്മാവനെ വരെ പിടിച്ചു തരും… “
ഹർഷൻ ഡ്രൈവിംഗിനിടെ പറഞ്ഞു…
ഗിരി ആലോചനയിലായിരുന്നു……
ഹബീബ് റാവുത്തറിനെക്കുറിച്ച് ഹർഷൻ ഏകദേശ രൂപം ഹോസ്പിറ്റലിലേക്ക് പോകുന്ന വഴി അവനെ അറിയിച്ചിരുന്നു…
“” തന്നെ അവിടെയിട്ട് കുത്തിയപ്പോൾ നാട്ടുകാർ ആരെങ്കിലും വന്നോ… ഇല്ലല്ലോ… താനായതു കൊണ്ട് തിരിച്ചു തല്ലി… …. “
ഹർഷൻ പറഞ്ഞു……
“” സോമൻ കുളി സീൻ കാണാൻ പോകുന്ന കാര്യമൊക്കെ ചായക്കടയിലും ചർച്ചയാ… ആ പെണ്ണുങ്ങളൊക്കെ കുളി നിർത്തി എന്നല്ലാതെ സോമനെ ആരെങ്കിലും തല്ലിയോ………?””
ഗിരി തല ചെരിച്ച് ഹർഷനെ നോക്കി…
“” ഇങ്ങോട്ടാണ് വരുന്നതെന്ന് പറഞ്ഞപ്പോൾ ഓഫീസിൽ നിന്ന് എനിക്കാകെ കിട്ടിയ ഉപദേശം അയാളെ ചൊറിയാൻ നിൽക്കണ്ട എന്ന് മാത്രമായിരുന്നു.. “
ഹർഷൻ ഒന്നു നിർത്തി……
“” താനെന്താ ആലോചിക്കുന്നത്… ?””
“” ഒന്നുമില്ല സാറേ… …. “
“” ഒരു നിസ്സാര കാര്യത്തിനാ അയാളീ ഗുണ്ടകളെ ഒക്കെ ഇറക്കിയത്…… അപ്പോൾ വലിയ പ്രശ്നമായിരുന്നെങ്കിലോ… ?””
ഗിരി മിണ്ടിയില്ല……….
“” ഒന്നുകിൽ താൻ നാട്ടിലേക്ക് പോ… അല്ലെങ്കിൽ അവരെ കൂട്ടി പോ… “
ഹർഷൻ പറഞ്ഞു നിർത്തി…
അങ്ങനെയൊന്നും തനിക്കിവിടം വിട്ടു പോകാനാകില്ല…
ഗിരി മനസ്സിലാണത് പറഞ്ഞത്…
“” ഗിരീ………. തന്നോടുള്ള സ്നേഹം കൊണ്ട് പറയുകയാന്ന് കരുതിയാൽ മതി.. ഞങ്ങൾ ഫോറസ്റ്റുകാർക്കുപോലും അറിയാത്ത വഴികളും കിടങ്ങുകളും ഇവിടുത്തെ നാട്ടുകാർക്കറിയാം… തല്ക്കാലത്തേക്കേ ഈ പ്രശ്നം ഞാൻ പറഞ്ഞു തീർത്തിട്ടുള്ളൂ… അതും ന്യായം തന്റെയടുക്കൽ ആയതു കൊണ്ട് മാത്രം…… റോഡിൽ ആൾക്കാരു കാൺകെ അയാളുടെ ആളുകളെ തല്ലിയത് റാവുത്തർ മറക്കുമെന്ന് കരുതുന്നുണ്ടോ… ?””
ഗിരി ഹർഷനെ നോക്കുക മാത്രം ചെയ്തു..
“” വല്ല കിടങ്ങിലോ കുഴിയിലോ തന്നെ തല്ലിക്കൊന്നിട്ടാലും ആരും ചോദിക്കാൻ വരില്ല…….””
ഗിരി നിശബ്ദനായി ഇരുന്നു…
“” ഞാനിവിടെ ടെംപററി പോസ്റ്റാ… ഇനിയിപ്പോൾ ഈ വണ്ടി കൊണ്ടുപോയതിനും ഞാൻ സമാധാനം പറഞ്ഞേ പറ്റൂ…… ഇവിടെ ആർക്കായാലും തന്നെ സഹായിക്കാൻ ഒരു പരിധിയുണ്ട്… “
“” ഏതായാലും മുറിവുണങ്ങട്ടെ സാറേ………. “
ഗിരി സീറ്റിൽ ഒന്നിളകിയിരുന്നു…
“” അതു മതി… ഏതായാലും പോകുമ്പോൾ അവരെയും കൂടെ കൊണ്ടുപോകാൻ നോക്ക്… താൻ വരുന്നതിനു മുൻപ് അവർ സമാധാനമായി കഴിഞ്ഞിരുന്നതാ……. “
അവസാനം ഹർഷൻ പറഞ്ഞത് ശരിയാണെന്ന് ഗിരിക്കും അറിയാമായിരുന്നു……
താൻ വന്നതാണ് പ്രശ്നങ്ങളുടെ തുടക്കം……
ജീപ്പ് മുത്തപ്പൻപുഴ എത്തിയിരുന്നു..
ഫോറസ്റ്റ് ജീപ്പിന്റെ വരവും പ്രതീക്ഷിച്ച് സാധാരണയിൽ കൂടുതൽ ആളുകൾ അങ്ങാടിയിൽ ഉണ്ടായിരുന്നു…