“” ഗിരീ………. തന്നോടുള്ള സ്നേഹം കൊണ്ട് പറയുകയാന്ന് കരുതിയാൽ മതി.. ഞങ്ങൾ ഫോറസ്റ്റുകാർക്കുപോലും അറിയാത്ത വഴികളും കിടങ്ങുകളും ഇവിടുത്തെ നാട്ടുകാർക്കറിയാം… തല്ക്കാലത്തേക്കേ ഈ പ്രശ്‌നം ഞാൻ പറഞ്ഞു തീർത്തിട്ടുള്ളൂ… അതും ന്യായം തന്റെയടുക്കൽ ആയതു കൊണ്ട് മാത്രം…… റോഡിൽ ആൾക്കാരു കാൺകെ അയാളുടെ ആളുകളെ തല്ലിയത് റാവുത്തർ മറക്കുമെന്ന് കരുതുന്നുണ്ടോ… ?””
ഗിരി ഹർഷനെ നോക്കുക മാത്രം ചെയ്തു..
“” വല്ല കിടങ്ങിലോ കുഴിയിലോ തന്നെ തല്ലിക്കൊന്നിട്ടാലും ആരും ചോദിക്കാൻ വരില്ല…….””
ഗിരി നിശബ്ദനായി ഇരുന്നു…
“” ഞാനിവിടെ ടെംപററി പോസ്റ്റാ… ഇനിയിപ്പോൾ ഈ വണ്ടി കൊണ്ടുപോയതിനും ഞാൻ സമാധാനം പറഞ്ഞേ പറ്റൂ…… ഇവിടെ ആർക്കായാലും തന്നെ സഹായിക്കാൻ ഒരു പരിധിയുണ്ട്… “
“” ഏതായാലും മുറിവുണങ്ങട്ടെ സാറേ………. “
ഗിരി സീറ്റിൽ ഒന്നിളകിയിരുന്നു…
“” അതു മതി… ഏതായാലും പോകുമ്പോൾ അവരെയും കൂടെ കൊണ്ടുപോകാൻ നോക്ക്… താൻ വരുന്നതിനു മുൻപ് അവർ സമാധാനമായി കഴിഞ്ഞിരുന്നതാ……. “
അവസാനം ഹർഷൻ പറഞ്ഞത് ശരിയാണെന്ന് ഗിരിക്കും അറിയാമായിരുന്നു……
താൻ വന്നതാണ് പ്രശ്നങ്ങളുടെ തുടക്കം……
ജീപ്പ് മുത്തപ്പൻപുഴ എത്തിയിരുന്നു..
ഫോറസ്റ്റ് ജീപ്പിന്റെ വരവും പ്രതീക്ഷിച്ച് സാധാരണയിൽ കൂടുതൽ ആളുകൾ അങ്ങാടിയിൽ ഉണ്ടായിരുന്നു…
ചായക്കടയും പലചരക്കുകടയും അടച്ചിട്ടില്ല……
താൻ വന്ന ദിവസത്തേക്കാൾ രാത്രി ആയിരുന്നിട്ടു കൂടി കടകൾ അടയ്ക്കാത്തതിന്റെ കാരണം ഗിരിക്ക് മനസ്സിലായിരുന്നു……
ഹർഷൻ ജീപ്പ് നിർത്തിയതും വരാന്തയിൽ നിന്നവരുടെ ശ്രദ്ധ അങ്ങോട്ടായി…
“” ഞാനിറങ്ങട്ടെ സാറേ……. “
ഗിരി ഇടതുകാൽ പുറത്തേക്കിട്ടു…
“”ങ്ഹാ… പിന്നേ, തന്റെ ഇടി കൊണ്ടവർ രണ്ടു പേരും കോളേജിലാ….. അവർക്കു വല്ലതും സംഭവിച്ചാൽ കേസ് മാറും… …. “
ഹർഷൻ ഓർമ്മ വന്നതു പോലെ പറഞ്ഞു…
ഒരു ചെറിയ ഭയം ഗിരിയിൽ ഉടലെടുത്തു…
ഇനി ഒരു തവണ കൂടി ജയിലിലേക്ക് പോകുന്നത് ആലോചിക്കാൻ വയ്യ… ….
“” ഞാൻ കൊണ്ടുപോയി വിടണോ… ? “
“” വേണ്ട സാറേ… …. അങ്ങോട്ടൊന്നും വണ്ടി പോകില്ല…….”
ഗിരി ജീപ്പിൽ നിന്നും ഇറങ്ങി…
പലചരക്കു കടയിൽ കയറി ഒരു ടൂത്ത്പേസ്റ്റും ബ്രഷും കൂടെ വാങ്ങിയാണ് അവൻ നടന്നു തുടങ്ങിയത്……
അത്ഭുതത്തോടെ തന്നെ നോക്കി നിന്ന ആളുകളുടെ അടക്കം പറച്ചിൽ പിന്നിൽ നിന്ന് ഉയരുന്നത് ഗിരി കേൾക്കുന്നുണ്ടായിരുന്നു …
വാഹനങ്ങൾ ചെല്ലുന്ന വഴി തീർന്നപ്പോഴേക്കും മുന്നിൽ ജാക്കിയുടെ സ്വരം ഗിരി കേട്ടു…
അവന്റെ കാലിൽ ഒന്ന് നക്കിയ ശേഷം ജാക്കി രണ്ടു പടികൾ ചാടിക്കയറി തിരിഞ്ഞു നിന്നു…
ഗിരി ഫോണെടുത്ത് തെളിച്ച് രണ്ട് പടികൾ കയറി…
ജാക്കിയും രണ്ട് പടികൾ കയറി തിരിഞ്ഞു നിന്നു…
അതിനിടയിൽ അവൻ വാലാട്ടുകയും സ്നേഹാതിരേകത്താൽ ഒരു ശബ്ദം പുറപ്പെടുവിക്കുകയും ചെയ്തിരുന്നു…
വീടിന്റെ മുറ്റം എത്തുന്നവരെ അതങ്ങനെ തുടർന്നു……
ബൾബുകൾ എല്ലാം തെളിഞ്ഞു കിടന്നിരുന്നു… ….
ഗിരി മുറ്റത്തേക്ക് കയറിയതും തിണ്ണയിലിരുന്നവർ എഴുന്നേറ്റു…
മൂന്നുപേരും തിണ്ണയിലുണ്ടായിരുന്നു…
ജാക്കി ചണച്ചാക്കിലേക്ക് കയറി, തിണ്ണയിലേക്ക് നോക്കി , ആളെ ഞാൻ കൂട്ടിക്കൊണ്ട് വന്നിട്ടുണ്ട് എന്നയർത്ഥത്തിൽ , വാലാട്ടിക്കൊണ്ട് ഒന്ന് നീട്ടി മൂളി…
അപരിചിതനേപ്പോലെ ഒരു മിനിറ്റ് ഗിരി പടിയിൽ നിന്നു..
മല്ലികയുടെ കൈകൾ വിറ കൊള്ളുന്നത് ഗിരി കണ്ടു…
ഉമ, ധരിച്ചിരിക്കുന്ന ടോപ്പിൽ വലതു കൈത്തലം കൂട്ടിപ്പിടിച്ച് തിരുമ്മുന്നു…
അമ്പൂട്ടൻ പുറത്തെ മുറിയുടെ വാതിലിൽ ചാരി നിൽക്കുന്നു…
ഉമയും മല്ലികയും ഒരേ സമയം ഗിരിയുടെ അടുത്തേക്ക് ഒരു ചുവടു വെച്ചു…
പിന്നീട് അവർ തമ്മിൽ ആശയക്കുഴപ്പം വന്നതു പോലെ മുഖത്തോട് മുഖം നോക്കിയതും ഗിരി ചെരുപ്പഴിച്ച് തിണ്ണയിലേക്ക് കയറി……
കയറ്റം കയറി വന്നതിനാൽ അവൻ ചെറുതായി കിതയ്ക്കുന്നുണ്ടായിരുന്നു…
അവൻ അരഭിത്തിയിലേക്കിരുന്നതും മല്ലിക അകത്തേക്ക് ഓടിപ്പോയി ഒരു കപ്പു വെള്ളവുമായി വന്നു…
അവളത് നീട്ടിയതും ഗിരി വാങ്ങി, പകുതിയോളം ഒറ്റ വലിക്ക് കുടിച്ച് ശ്വാസമെടുത്തു…
ഒരു മിനിറ്റു കൂടി മൗനം ഉറുമ്പെടുത്തതു പോലെ നീങ്ങി…
ഉമയെ ഒന്നു നോക്കിയ ശേഷം മല്ലിക അവനടുത്തേക്ക് ചെന്നു……
അവൻ തോർത്ത് പുതച്ചു കെട്ടിയിരുന്നതിനാൽ പുറത്തെ മുറിവ് അവർക്ക് കാണാനാകുമായിരുന്നില്ല…
മല്ലിക കൈ നീട്ടി അവന്റെ ഇടതു കൈ തന്റെ ഇരു കൈകളിലുമായി എടുത്തു…
“” നിനോട് പൊയ്ക്കോളാൻ ഞങ്ങൾ പറഞ്ഞതല്ലായിരുന്നോടാ… “”
മല്ലികയുടെ കൈകൾ വിറയ്ക്കുന്നത് ഗിരി അറിയുന്നുണ്ടായിരുന്നു……
അവളുടെ ശബ്ദം ചിലമ്പിച്ചിരുന്നു… ….
“ ശാപവും ശനിയും പിടിച്ച് കാലനു പോലും വേണ്ടാതെ കിടക്കുന്ന ഞങ്ങളുടെയടുത്തേക്ക് നീ എന്തിനു വന്നതാ… ?”
അവന്റെ കൈത്തലം കവിളിലേക്ക് ചേർത്ത് മല്ലിക വിങ്ങിപ്പൊട്ടി…
“” എനിക്ക് കുഴപ്പമൊന്നുമില്ല ചേച്ചീ……………”
ഗിരി വലം കൈ എടുത്ത് തന്റെ കൈ അടർത്തിമാറ്റാൻ ശ്രമിച്ചെങ്കിലും മല്ലിക വിട്ടില്ല…
“” നീ ആരുമല്ല… ശരിയാ… പക്ഷേ ഞങ്ങൾക്കു വേണ്ടിയല്ലേ നീ………. “
ഗിരി മുഖം തിരിച്ചു……
ഉമ ഭിത്തിയിൽ ചാരി , പുറംകൈ കൊണ്ട് മിഴികൾ തുടയ്ക്കുന്നത് ഗിരി കണ്ടു…
പച്ചയായ മനുഷ്യർ……….
ഉള്ളിൽ തിളച്ചുമറിയുന്ന അഗ്നിപർവ്വതത്തിന്റെ മുരളലും ഇരമ്പവും മാത്രമാണ് പുറമെ ചാടുന്നതൊക്കെയും……
സ്നേഹത്തോടെ ഒരു വാക്ക്… ….
ചിലപ്പോൾ ഒരു നോട്ടം……….
അതു മതി…, അതുമാത്രം മതി അവർക്ക്…
ഗിരിയുടെ മിഴികളും നനഞ്ഞു തുടങ്ങിയിരുന്നു……..
“ പുറത്ത് മുറിവുണ്ടെന്ന് അമ്പൂട്ടൻ പറഞ്ഞു… …. “
വാക്കുകൾ ഉമയുടേതായിരുന്നു…
വിശ്വാസം വരാതെയെന്നവണ്ണം ഗിരി അവളെ സൂക്ഷിച്ചു നോക്കി… ….
ഉമ മിഴികൾ താഴ്ത്തിക്കളഞ്ഞു…
“ പൊറത്തും ഉണ്ട്…””
അത്രയും നേരം നിശബ്ദനായിരുന്ന അവൻ ഗിരിക്കടുത്തേക്ക് വന്നു……
സ്വാതന്ത്ര്യത്തോടെ അമ്പൂട്ടൻ കഴുത്തിനു താഴെ കെട്ടിയിരുന്ന തോർത്ത് ശ്രദ്ധയോടെ അഴിച്ചെടുത്തു.
അവൻ ഗിരിയെ തിരിച്ചിരുത്താൻ ശ്രമിച്ചെങ്കിലും വിജയിച്ചില്ല…
ഗിരി നടുഭാഗം മാത്രം തിരിച്ച് പുറം അവർക്ക് കാണുന്ന രീതിയിലാക്കി……
“” ഈശ്വരാ………………..!!””
മല്ലിക അവന്റെ പുറത്തേക്ക് വലതു കൈത്തലം പതിയെ എടുത്തു വെച്ചു…
ബാൻഡേജിന്റെ അരികിലൂടെ അവളൊന്ന് തഴുകിയതും ഗിരി ഒന്ന് ഞെളിഞ്ഞു…
അടുത്ത നിമിഷം ഗിരി നേരെയിരുന്നു…
“” അത്രയേ ഉള്ളൂ………. “
ഗിരി നിസ്സാരമട്ടിൽ പറഞ്ഞു……
“ ഇത് പോരായിരിക്കും………. “”
ഉമ പിറുപിറുക്കുന്നത് ഗിരി കേട്ടു…
“” മൂന്നാലു കുത്തുകൂടി മേടിക്കണമെന്ന് കരുതിയതാ… അപ്പോഴേക്കും ആ ഫോറസ്റ്റുകാരൻ വന്നു ഇടപെട്ടു…… “
ഗിരി ചിരിയോടെ പറഞ്ഞു…
“” ഫോറസ്റ്റ്കാരനോ……….?””
മല്ലിക പിന്നോട്ട് ഒന്നു നീങ്ങി ചോദിച്ചു…
