അമ്മുവിനെ കാണണം. അവളോട് യാത്രപറയണം. അതായിരുന്നു ആദ്യം ദീപക്കിന്റെ മനസ്സിൽ വന്നത്.
ആന്റണിയോട് നന്ദി പറഞ്ഞശേഷം അവൻ അരുണിമയുടെ വീട്ടിലേക്ക് തിരിച്ചു.
__________
തന്റെ പ്രിയ കാമുകന്റെ ചിത കത്തുന്നത് കണ്ട് പാതി ജീവനോടെയാണ് അരുണിമ വീട്ടിൽ വന്നു കയറിയത്.
അപ്പുവിന്റെ തോളിൽ ചാരി കരഞ്ഞുകൊണ്ട് വരുന്ന മോളെയാണ് രാധാമണി കാണുന്നത്.
അവരോടി വന്നു അപ്പുവിനോട് കാര്യങ്ങൾ തിരക്കി.
“എല്ലാം പറയാൻ അമ്മ. ആദ്യം ചേച്ചിയെ മുറിയിൽ ആക്കട്ടെ.
അവളുടെ ഒരു സുഹൃത്ത് ഇന്നൊരു ആക്സിഡന്റിൽ മരിച്ചു. അതിന്റെ ഷോക്കിലാണ് അവൾ”
അപ്പുവും അമ്മയും കൂടെ അരുണിമയെ അവളുടെ മുറിയിലാക്കി.
“രണ്ടാളും കുളിച്ചിട്ട് വാ. ഞാൻ ആഹാരം എടുത്തു വെക്കാം.”
“എനിക്കൊന്നും വേണ്ട അമ്മാ “ അരുണിമ കരഞ്ഞുകൊണ്ട് പറഞ്ഞു.
“എന്നു പറഞ്ഞാൽ എങ്ങനെ ആ മോളെ. എന്തെങ്കിലും കഴിച്ചിട്ട് നീ കിടന്നോ.”
“അമ്മ എടുത്ത് വെച്ചോ, ഞാൻ കൊടുത്തോളാം ചേച്ചിക്ക്. “ അപ്പു പറഞ്ഞു.
രാധാമണി അടുക്കളയിലേക്ക് നടന്നു.
“ചേച്ചി, ഉടുപ്പ് മുഴുവൻ ചെളിയും മണലുമാണ്. ഒന്നുപോയി കുളിച്ചിട്ട് വരൂ. “
അവൻ ചേച്ചിയുടെ ടവൽ എടുത്ത് ബാത്രൂമിൽ കൊണ്ട് വെച്ചു. ഞാൻ പോയി കുളിച്ചിട്ടു വരാം.
__
അപ്പു തന്റെ മുറിയിൽ പോയി കുളിച്ചുവെങ്കിലും, തിരിച്ചുവന്നപ്പോഴും അരുണിമ കട്ടിലിൽ അതേ ഇരിപ്പിൽ തന്നെ ആയിരുന്നു.
നിർബന്ധിച്ചിട്ട് കാര്യമുണ്ടെന്ന് തോന്നത്തത് കൊണ്ട് അപ്പു താഴെ പോയി രണ്ടാൾക്കുമുള്ള ഭക്ഷണം എടുത്ത്കൊണ്ട് ചേച്ചിയുടെ മുറിയിലേക്ക് ചെന്നു.
ചേച്ചിയുടെ പാത്രം എടുത്തു അവളുടെ അടുത്തിരുന്നു അവൻ ഭക്ഷണം വാരി അവളുടെ ചുണ്ടോട് അടുപ്പിച്ചു.
“കഴിക്കൂ ചേച്ചി. ഇന്ന് ഉച്ചയ്ക്ക് കഴിച്ചതല്ലേ. എത്ര നേരമായി ഇങ്ങനെ വിശന്നു ഇരിക്കും. ചേച്ചി കഴിച്ചില്ലെങ്കിൽ ഞാനും കഴിക്കുന്നില്ല.”
“എനിക്ക് വയ്യ അപ്പു. നിനക്കെല്ലാം അറിയാവുന്നതല്ലേ. തൊണ്ടയിൽ നിന്നും വെള്ളം പോലും ഇറങ്ങുന്നില്ല.”
അപ്പു പ്ലേറ്റ് തിരികെ മേശയിൽ വെച്ചിട്ട് ചേച്ചിയെ ചേർത്ത് പിടിച്ചു. അരുണിമ അവന്റെ തോളിൽ തലചായിച്ചു കരഞ്ഞു.
“ചേച്ചി കിടന്നോ. ഇങ്ങനെ കരഞ്ഞു കലങ്ങിയ ചേച്ചിയെ കാണാൻ എനിക്കു വയ്യാ.”
“ഇന്ന് നിനക്ക് എന്റെ കൂടെ ഇവിടെ കിടക്കാമോ? എനിക്ക് ഇന്നു ഒറ്റക്കു കിടക്കാൻ വയ്യടാ“
“അതിനെന്താ ചേച്ചി. ഞാൻ ഇവിടെ തന്നെ കാണും. ചേച്ചി കിടന്നോ.”
അരുണിമ കട്ടിലിൽ ഒരു ഭിത്തിയോടു ചേർന്നു കിടന്നു. അവളോട് ചേർന്നു അപ്പുവും.
അപ്പുവിന്റെ വിരലുകൾ ചേച്ചിയുടെ തലയിൽ തലോടിക്കൊണ്ടിരുന്നു.
അധികം വൈകാതെ രണ്ടുപേരും ഉറക്കത്തിലേക്ക് വഴുതി വീണു.
രാധാമണി കുറച്ച് നേരത്തിനു ശേഷം വന്നു നോക്കിയപ്പോൾ ഒട്ടും കഴിക്കാത്ത 2 പ്ലേറ്റും കെട്ടിപിടിച്ച് ഉറങ്ങുന്ന മക്കളെയും ആണ് കണ്ടത്.
അവരുടെ ഉറക്കം കണ്ട രാധാമണിക്ക് തെല്ലാശ്വാസം തോന്നി.
അവരൊന്നും പറയാതെ ശബ്ദമുണ്ടാക്കാതെ പ്ലേറ്റും എടുത്ത് ലൈറ്റും ഓഫ് ആക്കി മുറിയുടെ വാതിൽ ചാരി അവർ താഴേക്കു പോയി.
_________
രാത്രി 2 മണി കഴിയാറായപ്പോളാണ് ദീപക് അരുണിമയുടെ വീട്ടിലെത്തുന്നത്.
മതിലോ ഗേറ്റോ വാതിലോ ആത്മാക്കളുടെ വഴി തടയാത്തതുകൊണ്ട് അവൻ നേരെ വീട്ടിലേക്കു കയറി.
മുകളിലെ നിലയിലാണ് അവളുടെ മുറി. അവൻ നേരെ മുകളിലേക്ക് പടവുകൾ കയറി.
ആദ്യത്തെ മുറിയിൽ ആരും ഉണ്ടായിരുന്നില്ല. കണ്ടിട്ട് അരുണിന്റെ മുറിയാവണം.
അടുത്ത മുറിയുടെ ഉള്ളിൽ കയറിയപ്പോൾ അവന്റെ കണ്ണുകൾ നിറഞ്ഞു.
കരഞ്ഞു വീർത്ത കണ്ണുകളോടെ തന്റെ അമ്മു കിടന്നുറങ്ങുന്നു.
അവളെ കെട്ടിപിടിച്ച് അവളുടെ അനിയനും.
ആന്റണി പറഞ്ഞത് പോലെയാണെങ്കിൽ എനിക്ക് അവളുടെ അനിയന്റെ ശരീരത്തിൽ കയറാൻ പറ്റണം.
അങ്ങനെ ചെയ്താൽ അവളോട് എനിക്ക് സംസാരിക്കാം.
ദീപക് അരുണിന്റെ ശരീരത്തിനു മുകളിൽ കയറി കിടന്നു. തീവ്രമായി അവന്റെ ശരീരത്തിൽ പ്രവേശിക്കാൻ അവൻ ആഗ്രഹിച്ചു.
പതിയെ പതിയെ അവന്റെ ആത്മാവ് അരുണിന്റെ ശരീരത്തിലേക്ക് പ്രവേശിക്കാൻ തുടങ്ങി.
വീണ്ടും ദീപക്കിന് കൈകളും കാലുകളും എല്ലാം ചലിപ്പിക്കുവാൻ കഴിയുന്നുണ്ട്.