————————————————————-
ഏഴുമണി ആയപ്പോഴേക്കും രാമചന്ദ്രൻ സാറിന്റെ കോളേത്തി.
“ഹെലോ സാറെ “..
“ആ.. അജയ് ഞങ്ങൾ താഴെയുണ്ട്.”
“ആ സാറെ… ദേ ഞാനെത്തി…” ഞാൻ താഴേക്ക് ചെന്നു…
വണ്ടിയുടെ അടുത്ത് രാമചന്ദ്രൻ സാർ നിൽപ്പുണ്ടായിരുന്നു.
“ഹാ സാറെ..”
“അജയ്…”
“യാത്ര ഒക്കെ സുഖമായില്ലേ?”
“ഓഹ്… ദൈവം സഹായിച്ചു പോയ കാര്യമെല്ലാം ഭംഗിയായി കഴിഞ്ഞു.. പിന്നെ ഇത്തിരി താമസിച്ചു പോയി…”
“ഹേയ്… അത് സാരമില്ല വേറെ ഓട്ടമൊന്നും ഞാൻ പിടിച്ചിട്ടില്ല.. അല്ല സാർ ഒറ്റക്കാണോ വണ്ടിയും കൊണ്ടു വന്നത്? ”
“അല്ല.. ദാ മുകേഷ് ഉണ്ട്..” കുറച്ചു മാറി കിടന്ന ഒരു ആൾട്ടോയിലേക്ക് പുള്ളി കൈ ചൂണ്ടി…
അതിൽ ഇരുന്നയാൾ കൈ വീശി കാണിച്ചു, ഞാനും കൈ ഉയർത്തി..
“അപ്പോൾ അജയ് ഇതാ ” പുള്ളി പോക്കെറ്റിൽ നിന്ന് ചാവിയും ഒപ്പം നോട്ടുകളും നീട്ടി. അത് വാങ്ങി എണ്ണി നോക്കിയ ശേഷം ഒരു അഞ്ഞൂറിന്റെ നോട്ട് ഞാൻ തിരികെ പുള്ളിക്ക് നൽകി…
“എന്താടോ ഇത്?”
“അത് സാറിനുള്ളയെന്റെ ഡിസ്‌കൗണ്ട് ആയി കൂട്ടിക്കോ..”
“ഇങ്ങനെ ഡിസ്‌കൗണ്ട് തന്നാൽ ഞാൻ സ്ഥിരം തന്നെ വിളിക്കേണ്ടി വരുമല്ലോ “…
പുള്ളിയുടെ കൂടെ സംസാരിച്ചു കൊണ്ട് അൾട്ടോയുടെ അടുത്തു വരെയെത്തി അവർ രണ്ടു പേരേയും യാത്രയാക്കി. പിന്നെ നേരെ ഷോപ്പിലെത്തി താഴെ കൗണ്ടറിൽ ഉള്ള അനൂപിനെ കടയിലെ കാര്യങ്ങൾ ഏൽപ്പിച്ചു. പിന്നെ വണ്ടിയെടുത്തു നേരെ ഇക്കയുടെ വീട്ടിലേക്ക് വിട്ടു.
————————————————————-
ഗേറ്റ് തുറന്നു കിടക്കുകയായിരുന്നു. വണ്ടി ലൈറ്റ് ഓഫാക്കി നേരെ വീടിനു പിന്നിലേക്ക് എടുത്തു. പഴയ സാധനങ്ങൾ വയ്ക്കാൻ ഒരു സൈഡ് തുറന്ന ഗാറേജ് പോലൊന്നാ വില്ലക്ക് പിറകിൽ ഉണ്ടാക്കിയിരുന്നു..
വണ്ടി ഞാൻ റിവേഴ്സിൽ അങ്ങോട്ടേക്ക് കേറ്റിയിട്ടു. പിന്നെ ഡിക്കി ഓപ്പൺ ആക്കി പുറത്തിറങ്ങി. അപ്പോഴേക്കും ഇക്കയുടെ മമ്മി ഇറങ്ങി ഗ്യാരജിലേക്ക് വന്നു.
“അജു “..
“ആ മമ്മി.. ഞാൻ പുറകിലുണ്ട്.”
അവര് വണ്ടിയുടെ പിന്നിലേക്ക് എത്തി അപ്പോഴേക്കും ഞാൻ സ്റ്റെപ്പിനി അഴിച്ചു താഴെ ഇട്ടിരുന്നു.
പിന്നെ അവിടെ ഉണ്ടായിരുന്ന ഒരു ചെറിയ കമ്പിപ്പാര കൊണ്ട് ടയർ ഇളക്കി മാറ്റി, റിംമിൽ നിന്ന് ടയർ വേറെ ആയതോടെ ഉള്ളിൽ വച്ചിരുന്ന നോട്ടുകൾ ഇളകി പുറത്തേക്ക് വീണു..
സാധാരണ ഗോൾഡ് എത്തിക്കുക മാത്രമാണ് ജോലി. ക്യാഷ് മറ്റു വഴികളിൽ കൂടി എത്തും, ഇത് വേറെന്തോ സ്കീം ആയത് കൊണ്ടാണ് ക്യാഷും കൊണ്ട് വരേണ്ടി വന്നത് അത് കൊണ്ടാണ് ഇത് അബ്ദുക്ക ഏൽക്കാഞ്ഞത്.
“മമ്മി ആ ബാഗ് അവിടെ വച്ചിട്ടു പൊയ്ക്കോ ഞാൻ എല്ലാം സെറ്റ് ആക്കി എടുത്തോണ്ട് വരാം ”
“എന്നാൽ ശരി…” അവർ തിരികെ വർക്ക്‌ ഏരിയ വഴി വീടിനുള്ളിലേക്ക് പോയി…
ടയറിനുള്ളിലെ നോട്ട് കെട്ടുകൾ എടുത്ത ശേഷം, ഞാൻ സ്പീക്കർ അഴിച്ചു അതിനു പിന്നിൽ ഉള്ള നോട്ടുകെട്ടുകൾ കൂടി എടുത്തു വച്ചു. 2000 ന്റെ മൊത്തം 79 കെട്ടുകൾ..
ഒരു കോടി അമ്പത്യെട്ടു ലക്ഷം രൂപ… ഞാൻ ഒരു ദീർഘ നിശ്വാസം എടുത്തു… കുറച്ചു നേരം ആ നോട്ട് കെട്ടുകൾ നോക്കി നിന്നു പോയി. പിന്നെ അവയൊക്കെ അടുക്കി ബാഗിലാക്കി, വർക്ക്‌ ഏരിയ വഴി ഞാനും വീടിനുള്ളിലേക്ക് കടന്നു.
കിച്ചൺ കടന്നു ഹാളിലെത്തി, അവിടെ ഇക്കയുടെ മമ്മിയും, ഡാഡിയും ഉണ്ടായിരുന്നു.
പണം അടങ്ങിയ ബാഗ് ഞാൻ മമ്മിയുടെ നേർക്ക് നീട്ടി അവരത് വാങ്ങിയ ശേഷം മറ്റൊരു മുറിയിലേക്ക് കൊണ്ട് പോയി..
ഞാൻ കുറച്ചു നേരം കൂടി അവിടെ ചിലവഴിച്ചതിനു ശേഷം യാത്ര പറഞ്ഞിറങ്ങി. ഫ്ലാറ്റിൽ പോകുന്നതിനു പകരം നേരെ ബാരിലേക്ക് വിട്ടു.
ഇന്നിനി രണ്ടെണ്ണം അടിക്കാതെ എങ്ങിനെയാ ഉറങ്ങുവാ… രണ്ടു ദിവസം കൊണ്ട് ടെൻഷൻ അടിച്ചു പണ്ടാരമടങ്ങി.. ഇപ്പോഴും വിറയൽ മാറിയിട്ടില്ല. ഇനിയെന്ത് വന്നാലും ഇത്തരം കളികൾക്കില്ല.. 🙏🏻🙏🏻🙏🏻 മതിയായി…. ഹോ…
ബാറിൽ നിന്ന് ഇറങ്ങി റൂമിലെത്തിയപ്പോഴേക്കും ഞാൻ ആകെ അവശനായി പോയിരുന്നു. ശാരീരിക ക്ഷീണത്തേക്കാൾ കൂടുതൽ മാനസിക ക്ഷീണം ആയിരുന്നു. പേടിയും, ടെൻഷനും ഇത്രത്തോളം ഒരാളെ വീക്ക്‌ ആകുമെന്ന് രണ്ടു ദിവസം കൊണ്ടെനിക്ക് മനസ്സിലായി..
കുളിച്ചു വന്നു ബെഡ്‌ഡിലേക്ക് വീണത് മാത്രമേ എനിക്കോർമ്മയുള്ളൂ പിന്നെ കണ്ണ് തുറക്കുന്നത് കാളിംഗ് ബെൽ മുഴങ്ങുന്നത് കേട്ടാണ്… ആറു മണി കഴിഞ്ഞിരിക്കുന്നു. ഫോണിൽ സമീറയുടെ മിസ്ഡ് കാൾസ്.. പാവം രാത്രി കുറേ വിളിച്ചിട്ടുണ്ട്..
കുറെയേറെ നേരം വർക്ക്‌ ഔട്ട്‌ ചെയ്തു അതോടെ തലേന്നത്തെ ഹാങ്ങ്‌ ഓവർ അങ്ങ് മാറി. ഷോപ്പിൽ പോകാൻ ഒരു മൂഡ് തോന്നുന്നില്ല, നേരെ ഫോൺ എടുത്തു സമീറയുടെ നമ്പർ ഡയൽ ചെയ്തു.
“ഹലോ “… സ്വരം കേട്ടാൽ അറിയാം പരിഭവമുണ്ട്, വിശദീകരിക്കാൻ നിന്നാൽ പിന്നെ പെണ്ണ് ജാഡ കാണിക്കും. അത് വേണ്ട,
“ഹാ… സമീറ..”
“ഹ് മും..”
” ഡീ ഞാൻ ഇന്ന് വരില്ല… ”
“ങ്‌ ഹേ… അതെന്താ?”
“സുഖമില്ല..ഒരു കോൾഡ്ഇന്നലെ രാത്രിയിൽ തുടങ്ങിയതാ… ”
“മരുന്നൊന്നും കഴിച്ചില്ലേ… ആശുപത്രിയിൽ പോണോ?” പരിഭവം മാറി.. ശബ്ദം കേട്ടാലറിയാം, പാവത്തിന് ടെൻഷൻ ആയിട്ടുണ്ട്..
“ഓഹ്… വേണ്ട സമീറ. ഒന്ന് റസ്റ്റ്‌ എടുത്താൽ മാറിക്കോളും.. എന്നാൽ ശരി ഞാനൊന്ന് കിടക്കട്ടെ..”
“ഡാ ഒരു ഗുളിക വല്ലതും കഴിക്ക്, പിന്നെ റസ്റ്റ്‌ എടുക്കണേ… ”
“ശരി… ബൈ..”
“മ് ഹും… ബൈ.. ടേക് കെയർ..”
പാവം ശബ്ദം കേട്ടാൽ അറിയാം വല്ലാതെ ആയിട്ടുണ്ട് ആള്. ഇവള് എന്നെ വല്ലാതെ പ്രേമിക്കുന്നുണ്ടല്ലോ എന്നത് എന്റെ ചിന്തകളെ ഒന്നല്ട്ടി…
കുറച്ചു നാളായി റൂമൊക്കെ ഒന്ന് ക്ലീൻ ആക്കിയിട്ട്, അതിനാൽ പതിയെ ആ പണിയിലേക്ക് കടന്നു. ഹോം തിയേറ്ററിൽ ഒരു ഇളയരാജ പ്ലേലിസ്റ്റ് പതിയെ ശബ്ദം കുറച്ചു വച്ചു, പിന്നെ പതിയെ ജോലിയിലേക്ക് കടന്നു.
ഏതാണ്ട് രണ്ട്മണിക്കൂർ കൊണ്ട് ഫ്ലാറ്റ് മുഴുവൻ ക്ലീൻ ആക്കി, ബ്രേക്ക്‌ ഫാസ്റ്റ് ആയി രണ്ടു ഡബിൾ ഓംലറ്റ് വിത്ത്‌ ബ്ലാക്ക് കോഫിയും തട്ടി .
പിന്നെ കുളിച്ചു ഫ്രഷായി പതിയെ ബാൽക്കണിയിൽ വന്നിരുന്നു താഴെ ഒഴുകുന്ന നഗരത്തിന്റെ തിരക്കിലേക്ക് നോക്കിയിരുന്നു കൊണ്ട് ഒരു സിഗരറ്റ് വലിച്ചു.
സ്വപ്നത്തിൽ മുഴുകിയിരുന്ന എന്നെ ഉണർത്തിയത് മൊബൈലിന്റെ റിങ് ടോൺ ആയിരുന്നു.
ഇക്കയാണ്, ഇനി പുതിയതെന്ത് കുരിശ്ണാവോ…
“ഹലോ.. ഇക്ക ”
“ആ അജു.. ഇന്നെന്താ പോയില്ലേ?”
“ഓഹ്.. രണ്ടു ദിവസത്തെ ടെൻഷൻ കാരണം ഞാൻ ഇന്ന് ലീവാക്കി..”
“ഹഹ.. എനിക്ക് തോന്നി.. എന്തിനാ അജു നീയിങ്ങനെ പേടിക്കുന്നത്?.”