അതും പറഞ്ഞ് ഞാൻ വാതിൽ അകത്തിന്ന് കുറ്റിയിട്ടു. തിരിച്ച് ബെണ്ടിലേക്ക് കേറുമ്പോ തൊട്ടിലിലേക്ക് കണ്ണുടക്കി.
“അയ്യോ അച്ഛന്റെ ചക്കര ഇവിടെ ഉണർന്ന് കിടക്കുവാ….??”
ഉണർന്ന് കിടന്നിരുന്ന വാവയെ ഞാൻ പൊക്കിയെടുത്തു. അവളുടെ കുഞ്ഞു കവിളിലും താടിയിലും മുത്തി. ബെണ്ടിൽ കിടന്നിരുന്ന അനുവും എഴുന്നേറ്റിരുന്നു.
“അമ്മേടടുത്ത് വാടാ…..”
അലസമായി കിടന്ന സാരി നേരെയാക്കി
എന്റെ കൈയിലിരുന്ന കുഞ്ഞിനെ അവൾ വാങ്ങി നെഞ്ചോട് ചേർത്ത്
കൊഞ്ചിച്ചു. അവളുടെയാ കുഞ്ഞു കാലിലെ വെളുപ്പും ചുവപ്പും കലർന്ന പാതത്തെ ഞാൻ ചുംബിച്ചു. അവളാ പിഞ്ചു കൈയുയർത്തി മുകളിലേക്ക് ചൂണ്ടുന്നുണ്ട്.
“നോക്ക് നോക്ക് ഫാൻ കറങ്ങുന്നത് കണ്ടോ…..??”
ചെറിയ ഉണ്ടകണ്ണുരുട്ടി അവൾ ഫാനിലോട്ട് തന്നെ നോക്കി. ആ കണ്ണുകളിൽ അത്ഭുതവും ആകാംക്ഷയുമാണ്. അനു കൈചൂണ്ടുന്നിടത്തെല്ലാം അവളുടെ കണ്ണുകൾ പതിഞ്ഞിരുന്നു.
“ദേ നോക്ക്, കരടിയെ കണ്ടോ….?? അച്ഛനെ പോലെയിരിക്കുന്നല്ലേ വാവേ….??”
വെളുത്തൊരു കരടിയെ കുഞ്ഞിന് കാട്ടികൊണ്ട് പറഞ്ഞവൾ എന്നെ നോക്കി കളിയാക്കി ചിരിച്ചു.
“അച്ഛൻ കരടിയൊന്നും അല്ലടാ..! അമ്മയോട് പറഞ്ഞ് കൊടുത്തേ അച്ഛൻ കരടിയല്ലാന്ന്….!”
അവളെ ഞാൻ എടുക്കുന്നതിനൊപ്പം പറഞ്ഞു. അവളെന്റെ കൈയിലിരുന്ന് എന്തക്കെയോ മൂളുന്നുണ്ട്.
“അനു…..”
“mm…..”
“എന്ത് സുന്ദരിയാല്ലേ നമ്മടെ വാവ…”
“mm. എന്റെ മുത്തിന് കണ്ണ് കിട്ടാണ്ടിരിക്കട്ടെ…..!”
കുഞ്ഞിന്റെ തലയിലുഴിഞ്ഞ് കൊണ്ടവൾ പറഞ്ഞു.
“നീ ചുമ്മ ഇരിക്കുവാണേ അമ്മേ പോയി ഒന്ന് സഹായിച്ചൂടെ…..??”
“ഞാനെന്ത് ചെയ്യാനാടാ അടുക്കളേ കേറിയ മുട്ട് കാല് തല്ലിയൊടിക്കൂന്നാ പറഞ്ഞേക്കണേ….”
“പാവം ഒരുപാട് കഷ്ടപ്പെടുന്നുണ്ട് ടി…”
“ഞാൻ അങ്ങോട്ട് ചെല്ലട്ടേടാ…..??”
“ചെല്ലെടി. എന്തേലും ചെന്ന് ചെയ്ത് കൊടുക്ക്….!”
“അമ്മാ, അമ്മുമ്മയെ അടുക്കളേ സഹായിച്ചിട്ട് വരാവേ…..”
എന്റെ മടിയിലിരുന്ന വാവയുടെ കവിളിൽ വേദനിപ്പിക്കാതെ പിച്ചി അവൾ പറഞ്ഞു. എന്റെ ചുണ്ടിൽ നേരത്തെ മുടങ്ങിയതിന്റെ ബാക്കിയെന്ന പോലെ അവളുടെ അധരങ്ങളമർത്തി. പിന്നീട് മുറിവിട്ട് പോയി. അടുക്കളേ അടുപ്പിക്കില്ലാന്ന് എനിക്കും എന്നേക്കാൾ നന്നായി അവൾക്കുമറിയാം.
“നിന്റെ അമ്മക്ക് വട്ടുണ്ടോ പെണ്ണേ…?? ചുമര് മൊത്തം ഇങ്ങനെ സ്റ്റിക്കർ ഒട്ടിക്കാൻ…..?? എഹ്….”
എന്തോ മനസ്സിലായത് പോലെ പല്ലില്ലാത്ത മോണ കാട്ടി അവൾ ചിരിച്ചു.
ഞാനവളുടെ നെറ്റിയിലും കവിളിലും താടിയിലും വയറിലും ഒക്കെ ചുംബിച്ചു. മൂക്ക് കൊണ്ട് മൂക്കിലുരസി. കുഞ്ഞിന് നന്നായി ഉറക്കം വരുന്നുണ്ടെന്ന് മനസ്സിലായി.
“അച്ഛനും ഉറക്കം വരുവാ….! ഇന്ന് നമ്മക്ക് ഒരുമിച്ച് കിടന്ന് ഉറങ്ങാവേ…..”
ബെണ്ടിലേക്ക് ഞാൻ ചരിയുമ്പോ എന്റെ നെഞ്ചോട് ചേർന്ന് വാവയുമുണ്ടായിരുന്നു. അവളുടെ തലയിൽ ചുംബിച്ച് മുതുകിൽ തട്ടിയുറക്കുമ്പോ, ഒരച്ഛന്റെ ചൂടേറ്റ് അവളതി വേഗമുറങ്ങിയിരുന്നു……!
“കാർത്തി…..,,, എന്റെ സന്തോഷം എങ്ങനാടാ ഞാൻ അറിയിക്കുവാ….?? നീയും അനുവും തുമ്പിയും അമ്മയും എല്ലാരും ആയിട്ട് സന്തോഷത്തോടെ ഇരിക്കുന്നില്ലേ…. എനിക്കത് മതീടാ…..! ശിവ ഭഗവാൻ എനിക്കൊരു വരം തന്നെടാ, നിന്റെ നെഞ്ചിലെ ചൂടേറ്റ് ഉറങ്ങുന്ന പൊന്ന് മോളില്ലേ… അത് ഞാനാ….! ജീവിച്ചിരുന്നപ്പോ ഒരമ്മയുടേം അച്ഛന്റേം സ്നേഹം എനിക്ക് കിട്ടിലാ. എന്നാ ഇതെന്റെ പുതിയ ജന്മാ. നീ എനിക്ക് അച്ഛന്റെ സ്നേഹവും അനു എനിക്ക് അമ്മയുടെ സ്നേഹവും തന്ന് വളർത്തും. അതാ ഭഗവാന്റെ തീരുമാനം. ഓർമയുണ്ടോ കാർത്തി അന്ന് കടപ്പുറത്ത് വച്ച് ഐസ്ക്രീം കാരൻ പറഞ്ഞത്., നമ്മളെ കാണാൻ ശിവ ഭഗവനേം, പാർവതി ദേവിയെം പോലുണ്ടെന്ന്. അന്ന് ഞാനുമത് വിശ്വസിച്ചു. എന്നാ അതല്ല സത്യം. നിങ്ങളുടെ പ്രണയം പാതിയെ പ്രാണനായി കണ്ട പരമശിവനെ പോലെ, പതിയെ ആത്മാവാക്കിയാ പാർവതി ദേവിയെ പോലെ….!! നിങ്ങളുടെ മകളായി ജനിച്ചതിൽ ഞാനെന്തോ പുണ്യം ചെയ്തിട്ടുണ്ട് ടാ…. ഒരൊറ്റ കാര്യത്തിലേ എനിക്ക് വിഷമം ഉള്ളൂ, നിന്നെ ഇനി മുതല് അച്ഛന്ന് വിളിക്കേണ്ടി വരുമല്ലോന്ന് ഓർക്കുമ്പോ……,,,”
“പാറു………..”
ഞെട്ടിയുണരുമ്പോ കണ്ടത് സ്വപ്നം ആണെന്ന് വിശ്വസിക്കാനേ പറ്റിയില്ല. എന്റെ പാറു….. അവളെ പറ്റിയോർക്കുമ്പോ എത്ര സന്തോഷത്തോടെ ഇരുന്നതും ഉള്ളിലൊരു വിങ്ങലാ. നെഞ്ചിൽ തപ്പി നോക്കുമ്പോ കുഞ്ഞില്ല. ചാടി പിടഞ്ഞെഴുന്നേറ്റു, തൊട്ടിലിലും നോക്കി. മുറി വിട്ടോടി ഹാളിലേക്ക് ചെല്ലുമ്പഴാ സമാധാനം ആകണേ…, അമ്മയും അനുവും സോഫയിൽ ഇരിക്കുന്നു താഴെ കൈയിൽ കിലുക്കുമായി വാവ കളിക്കുന്നു…..!!
“എന്തൊരു ഉറക്കാ ഏട്ടാ…..?? എത്ര തവണ വിളിച്ചൂന്നോ….?? മണി 11 ആയി. വിശന്നിട്ട് കണ്ണ് കാണാൻ വയ്യ വന്നേ വല്ലതും കഴിക്കാം….”
എന്നെ കണ്ടതും അനു ചാടി എഴുന്നേറ്റ് പറഞ്ഞു. എനിക്കും നല്ല വിശപ്പുണ്ടായിരുന്നു, പിന്നെ സമയം കളയാതെ കഴിക്കാനിരുന്നു. അടുത്തായി തന്നെ അനുവും അവളുടെ മടിയിൽ ഞങ്ങടെ കുഞ്ഞും….!! വയർ നിറച്ചൂട്ടിട്ടെ അമ്മയിരിക്കൂ. നല്ല ഇഡലിയും മുളക് ചമ്മന്തിയും. ചൂട് ഇല്ലായിരുന്നുവെങ്കിലും ടെസ്റ്റിന് ഒരു കുറവും ഇല്ലായിരുന്നു. അസ്വദിച്ച് തന്നെ നാലഞ്ഞെണ്ണം പറഞ്ഞയച്ചു. അനു നേരത്തെ കഴിച്ചു തീർത്തു മുറിയിലേക്ക് പോയി ഇനി വേണം കുഞ്ഞിന് പാല് കൊടുക്കാൻ. നമ്മള് മാത്രം കഴിച്ചാൽ പോരല്ലോ കുഞ്ഞിനും വിശപ്പൊക്കെ കാണില്ലേ…. ഞാൻ കഴിച്ച് കഴിഞ്ഞ പാത്രവും കൊണ്ടമ്മ പോയി, കൈയൊക്കെ കഴുകി ഞാൻ മുറിയിലേക്കും. ചാരിയ വാതിൽ തുറന്ന് അകത്തേക്ക് കേറി. കുഞ്ഞിനെ മടിയിൽ കിടത്തി അവൾ പാല് കൊടുക്കുന്നുണ്ട്. അവൾക്കടുത്തായി തന്നെ ഞാനും ചെന്നിരുന്നു.
“അനു കൊറേ നാളായി ഒരു കാര്യം പറയണം എന്ന് വിചാരിക്കുന്നു…..,,”
“mm….??”
“ഞാൻ വേറൊരു ജോലി നോക്കിയാലോ എന്നാലോചിക്കുവാ….!!”
“ഇപ്പൊ പോണ ഈ ജോലിക്കെന്താരു കുറവ്….??”
“എനിക്ക് വയ്യെടി ക്ലീൻ ചെയ്ത് ചെയ്ത് മടുത്ത്…..!!”
“മക്കക്ക് പിന്നെ ക്ലിനിങ് അല്ലായിരുന്നോ ഇഷ്ട്ടം….?? ഇപ്പൊയെന്ത് പറ്റി….??”
“ഇഷ്ട്ടൊക്കെ ആയിരുന്നു., പക്ഷെ ഇതിന് ഇത്രയും പാടുണ്ടാവൂന്ന് ഞാനിറിഞ്ഞോ..??”
“mm. നീ വേറെ എവിടേലും നോക്കുന്നുണ്ടോ….??”
“അഹ് ഒന്നുരണ്ടിടത്ത് അന്വേഷിച്ചു. വല്ലതും കിട്ടോന്ന് നോക്കട്ടെ….!!”
“അപ്പൊ അളിയനും കാണില്ലേ….??”
“പിന്നവൻ ഇല്ലാതെ ഞാനുണ്ടോടി….??”
“മതിയോ എന്റെ ചക്കരക്ക്….?? വയറ് നിറഞ്ഞോടി കള്ളി….??”
കുഞ്ഞിനെ തോളിലിട്ട് മുതുകിൽ കുറച്ച് നേരം തട്ടി കൊടുത്തു…….
“mm ഇനി കുറച്ച് നേരം ഇവിടിരിക്ക്…. എന്റെ മോള്….”
ഏമ്പക്കം പോയ ശേഷം കുഞ്ഞിനെ കട്ടിലിലേക്കിരുത്തി. കുഞ്ഞ് താഴെ വീണ് പോകും എന്ന പേടി ഞങ്ങൾക്കില്ല., കാരണം നാല് സൈഡും തലയണ കൊണ്ടൊരു മതില് തന്നെ അനു കെട്ടീട്ടുണ്ട്…..!!