എന്റെ ഡോക്ടറൂട്ടി 05

Ente Docterootty Part 5 |

Author : Arjun Dev | Previou Part

“”…എന്താടാ ചെക്കാ..?? എന്തോത്തിനാ നീയിങ്ങനോടിപ്പായണേ..??”””_ തിരിഞ്ഞുനിന്നെന്റെ മുഖത്തേയ്ക്കുനോക്കിയവള് ചോദിച്ചതും ഞാനൊന്നുമില്ലെന്നർത്ഥത്തിൽ ചുമൽകൂച്ചി…

അപ്പോഴുമെന്റെ ചുണ്ടിൽ എക്സൈറ്റ്മെന്റു നിറച്ചയൊരു പുഞ്ചിരിയുണ്ടായിരുന്നു…

കാരണം, അവളോടുള്ളിഷ്ടം കാണിയ്ക്കാമ്മേണ്ടി റ്റാറ്റുവൊക്കെ അടിച്ചു വന്നതാണല്ലോ…

“”…ഡാ ചെക്കാ… നീയീ വെയിലത്തോടിപ്പാഞ്ഞുവന്നത് എന്നെനോക്കി ചിരിയ്ക്കാനായ്രുന്നോ..?? വെയിലുകൊള്ളാതെ പോയി വീട്ടിലിരിയ്ക്കെടാ..!!”””_ മീനാക്ഷി ചുഴിഞ്ഞുനോക്കി കൂട്ടിച്ചേർത്തതിനു മറുപടിയായി ഞാനൊന്നുകൂടി വെളുക്കെ പുഞ്ചിരിച്ചു…

“”…മ്മ്മ്..?? എന്താഒരു ചിരിയും നാണോക്കെ..?? എന്തേലും കള്ളത്തരങ്കാണിച്ചോ..??”””

അപ്പോഴത്തെയെന്റെ റൊമാന്റിക് എക്സ്പ്രെഷനെ അവള് സംശയദൃഷ്ടിയോടെ നോക്കിയപ്പോൾ ഞാൻവീണ്ടും പരുങ്ങലിലായി…

“”…ഒന്നൂല്ല… ഞാ… ഞാഞ്ചുമ്മാ മീനുവേച്ചീനെ കാണാമ്മേണ്ടി വന്നയാ..!!””” _ തെല്ലൊരു പരിഭ്രമത്തോടുളെളന്റെ മറുപടികേട്ടതും അവളുണ്ടക്കണ്ണുരുട്ടിയെന്നെ രൂക്ഷമായി നോക്കി;

“”…എന്തോത്തിനാ എന്നെക്കാണണേ..?? ഇനീം കടിയ്ക്കാമ്മേണ്ടിയാണോ..??”””

“”…യ്യ്യോ.! അല്ല..!!”””

“”…പിന്നെ..??”””_ അവള് പോലീസുകാര് ചോദ്യംചെയ്യുമ്പോലെ
തുറിച്ചുനോക്കി ചോദിച്ചതും മറുപടിയൊന്നുംപറയാതെ ഞാനിടതുകൈ ഒരിയ്ക്കൽക്കൂടി പിന്നിലേയ്ക്കൊളിപ്പിച്ചു…

റൊമാന്റിക് എക്സ്പ്രെഷനും പൊളിഞ്ഞ് അവളുടെഭാവവും മാറിയതോടെ റ്റാറ്റു ഇപ്പോൾ കാണിയ്ക്കണോ വേണ്ടയോന്നുള്ള ആശയക്കുഴപ്പത്തിലായി ഞാൻ… അതാണ് കൈ മറച്ചത്, ഇനി അബദ്ധത്തിൽ പോലും കാണരുതല്ലോ…

എന്നാലവൾടെ മുഖത്തുനോക്കി കള്ളലക്ഷണത്തോടെ കൈപിൻവലിച്ചത് അവളു കൃത്യമായുംകണ്ടു…

“”…എന്താടാ കയ്യേല്..?? എന്താ ഒളിച്ചുപിടിയ്ക്കണേ..?? കൈകാട്ട്..!!”””_ പറഞ്ഞുകൊണ്ട് മീനാക്ഷി, കൈപിന്നിലേയ്ക്കു കൊണ്ടുപോയെന്റെ കൈയ്യിൽ പിടിയ്ക്കാൻ ശ്രെമിച്ചെങ്കിലും ഞാൻ വെട്ടിച്ചുമാറി പിന്നിലേയ്ക്കു ചാടി…

എന്തൊക്കെയായാലും സർപ്രൈസായി കൊണ്ടുവന്നത് വെറുതെയങ്ങ് കാണിയ്ക്കാമ്പറ്റോ..??!!

“”…എന്താത്..?? കൈകാട്ട്… നിന്നോടു പറഞ്ഞകേട്ടില്ലേ..?? മര്യാദയ്ക്കു കൈകാട്ടാൻ..!!”””_ പിന്നിലേയ്ക്കു വലിയാൻനോക്കിയ എന്റെകയ്യിൽ കടന്നുപിടിച്ചുകൊണ്ടവൾ അടുത്തേയ്ക്കുവലിച്ചതും ഞാനറിയാതെ അവൾക്കൊപ്പം ചേർന്നുപോയി…

“”…എന്താ കയ്യേല്..?? എന്തോ കള്ളത്തരമുണ്ടല്ലോ..?? ഇനിയന്നത്തെപ്പോലെ വല്ല ലെറ്ററുമാണോ..??”””_ പിന്നിൽ മറച്ചുപിടിച്ചിരുന്ന കൈ മുന്നിലേയ്ക്കെടുക്കാനായി ശ്രെമിയ്ക്കുന്നതിനിടയിൽ അവളെന്നെ തുറിച്ചുനോക്കി ആരാഞ്ഞു…

“”…യ്യ്യോ.! ലെറ്ററൊന്നൂല്ല..!!”””

“”…പിന്നെന്തോന്നാ..??”””_ അവളെന്റെയിടതുകൈ ശക്തിയായി മുന്നിലേയ്ക്കുവലിച്ചതും, പിന്നെ പിടിച്ചുനിൽക്കാനാവാതെ ഞാൻകണ്ണുകൾ മുറുകെയടച്ചുകൊണ്ട് കൈയവൾക്കുനേരേ നീട്ടി…

കണ്ണുകൾ മുറുകെയടച്ചിരുന്നെങ്കിലും റ്റാറ്റു മീനാക്ഷി കണ്ടെന്നുറപ്പായപ്പോൾ അവളുടെ പ്രതികരണമെന്താവുമെന്നുള്ള ത്വര എന്നിലുണർന്നു…

എന്നാൽ കുറച്ചു നേരമവൾടെ ഭാഗത്തുനിന്നും യാതൊരനക്കവുമില്ലാതെ വന്നപ്പോൾ എപ്പോഴോ ഉറങ്ങിപ്പോയ എന്നിലെ റൊമാന്റിക്ഹീറോ വീണ്ടും പൊടിതട്ടിയെഴുന്നേൽക്കുവായ്രുന്നു…

നായികയോടുള്ള പ്രണയംമൂലം സ്വന്തംകൈമുറിച്ചു പേരെഴുതിയ നായകനെ നിറകണ്ണുകളുടെ അകമ്പടിയോടുകൂടി നോക്കിനിൽക്കുന്ന നായികാസങ്കൽപ്പം…

ആ ഒരു സിനിമാറ്റിക് വിഷ്വൽ മനസ്സിൽതെളിഞ്ഞതും വീണ്ടുമെന്റെ ചുണ്ടുകളിലൊരു പുഞ്ചിരിവിടർന്നു…

എന്നാൽ, കൈവീശിയുള്ള അവൾടെയടി തോളിൽ വീഴുന്നതുവരെ മാത്രമേ ആ പുഞ്ചിരിയ്ക്കായുസ്സുണ്ടായുള്ളൂ…

“”…എന്താടായിത്..?? എന്തായീ കാട്ടിവെച്ചേക്കുന്നേന്ന്..??”””_ തോളിൽത്തന്നെ ഒരടികൂടി തന്നിട്ടെന്റെ കയ്യിലേയ്ക്കു ചൂണ്ടിയവൾ ചോദിച്ചപ്പോൾ ഞെട്ടിത്തരിച്ചുകൊണ്ട് കണ്ണുകൾ തുറന്നയെനിയ്ക്ക് പറഞ്ഞറിയിയ്ക്കാൻ പറ്റാത്ത തരത്തിലാണ് സങ്കടംവന്നത്…