”വിശേഷമല്ലടാ നീ ചോദിക്കുന്നത്, നീ വഷളത്തരമാണ് പറയുന്നത്. പന്ത് കളിക്കാനാണെങ്കിൽ അത് പോയി ചെയ്യ്, അല്ലാതെ ഇവിടെ വന്ന് പെങ്കുട്ടികൾക്ക് ട്യൂഷൻ എടുക്കണ്ട,” ആമി അവനെ പിച്ചാൻ അടുത്തേക്ക് ചെന്നു.
ഷാനി പേടിച്ച് കുറച്ചു ദൂരത്തേക്ക് മാറി നിന്നു. “പടച്ചോനെ… ഇവൾ ഇതെപ്പോ ഇവിടെ വന്നോ എന്തോ! നീ ഒന്ന് അടങ്ങ് ആമി… ഞാൻ പോവാ… ഞാൻ പോവാ…” അവൻ ആമിയെ പേടിച്ച് പതുക്കെ മൈതാനത്തേക്ക് ഓടി മറഞ്ഞു.
അവരുടെ ഈ രസകരമായ പോര് കണ്ട് ഐഷുവിന് ചിരി അടക്കാൻ കഴിഞ്ഞില്ല. ഷാനിയുടെ ആ പരുങ്ങലും ആമിയുടെ ആ തന്റേടവും കണ്ടപ്പോൾ അവൾ ഉറക്കെ ചിരിച്ചുപോയി.
”സാരമില്ല കേട്ടോ… അവൻ ഇങ്ങനെയൊക്കെയാണ്. എല്ലാത്തിനെയും ഒന്ന് സുഖിപ്പിക്കാൻ നോക്കുന്നതാ,” ആമി ചിരിച്ചുകൊണ്ട് ഐഷുവിന്റെ അടുത്തിരുന്നു.
“പേര് ഐഷു എന്നാണല്ലേ? അജു പറഞ്ഞിരുന്നു.”
”അതെ… ,” അവൾ ചിരിച്ചു.
“നല്ല മറുപടിയാണ് നീ അവന് കൊടുത്തത്. അവൻ കുറെ നേരമായി ഓരോന്ന് പറഞ്ഞു കൊണ്ടിരിക്കുകയായിരുന്നു.”
”ഇവന്മാരെയൊക്കെ ഇങ്ങനെ തന്നെ കൈകാര്യം ചെയ്യണം,” ആമി ഒരു കണ്ണിറുക്കി പറഞ്ഞു.
“അജു നല്ല സ്പീഡിലാണല്ലോ ഇന്ന്… നിങ്ങളെ കാണിക്കാനാണെന്ന് തോന്നുന്നു.”
അജുവും ഫ്രണ്ട്സും ഗ്രൗണ്ടിൽ ഓടുന്നത് നോക്കി അവർ രണ്ടുപേരും അവിടെയിരുന്ന് വിശേഷങ്ങൾ പങ്കുവെക്കാൻ തുടങ്ങി. ഷാനിയുടെ പഞ്ചാരയടി അവിടെ തീർന്നുവെങ്കിലും ഐഷുവിന്റെ മനസ്സിൽ ആമി വന്ന ആ നിമിഷം ഒരു തമാശയായി തങ്ങിനിന്നു.
ഷാനി ഓടിപ്പോയ വഴിയിലേക്ക് നോക്കി ആമി ദീർഘശ്വാസം വിട്ടു. ഐഷു ചിരിയോടെ അവളെ നോക്കി ഇരുന്നു.
”അല്ല ആമി, ഈ ഷാനി നിന്റെ ആരെങ്കിലും ആണോ? നീ അവനെ ശരിക്കും വിറപ്പിച്ചു കളഞ്ഞല്ലോ,” ഐഷു കൗതുകത്തോടെ ചോദിച്ചു.
ആമി ഒന്ന് ചിരിച്ചു, എന്നിട്ട് നെറ്റിയിലെ വിയർപ്പ് തുടച്ചു.
“അവൻ എന്റെ കാമുകനാ ഐഷൂ… ഇതേപോലെ പഞ്ചാര അടിച്ച് ഓരോന്ന് പറഞ്ഞു എന്നെ അങ്ങ് വീഴ്ത്തിയതാ. വീണു കഴിഞ്ഞപ്പോഴാണ് ആളുടെ യഥാർത്ഥ സ്വഭാവം എനിക്ക് മനസ്സിലായത്. ഓരോ പെണ്ണിനെ കാണുമ്പോഴും ഇങ്ങേർക്ക് വല്ലാത്തൊരു ഇളക്കമാണ്. അതുകൊണ്ട് ഇപ്പൊ ഞാൻ ഇങ്ങനെ കൺട്രോളിൽ ഇട്ട് കൊണ്ടുനടക്കുവാ. ശരിക്കും പറഞ്ഞാൽ വാലിൽ കെട്ടിയ പാട്ട പോലെയാ അവൻ എന്റെ കൂടെ,”
ആമി ഗൗരവത്തിൽ പറഞ്ഞെങ്കിലും അവളുടെ കണ്ണുകളിൽ ഒരു കുസൃതിയുണ്ടായിരുന്നു.
ഐഷു പൊട്ടിച്ചിരിച്ചു പോയി.
“അപ്പൊ നിനക്ക് നല്ല പണിയാണല്ലോ കിട്ടിയത്.”
”എന്ത് ചെയ്യാനാ, ഇഷ്ടപ്പെട്ടു പോയില്ലേ. അവന്റെ ഈ വായന അവസാനിപ്പിക്കാതെ എനിക്ക് സമാധാനം കിട്ടില്ല,”
ആമി പറഞ്ഞു നിർത്തിയപ്പോഴേക്കും അജു മൈതാനത്ത് നിന്നും കിതച്ചുകൊണ്ട് അവിടേക്ക് നടന്നു വന്നു.
അവന്റെ ജെഴ്സി വിയർപ്പിൽ കുതിർന്നിരുന്നു. മുടിയിഴകളിൽ നിന്നും വിയർപ്പുതുള്ളികൾ മുഖത്തേക്ക് ഒലിച്ചിറങ്ങുന്നുണ്ട്. ഐഷുവിന്റെയും ആമിയുടെയും ഇടയിലേക്ക് അവൻ വന്നു നിന്നു.
”എന്താടാ അജൂ… ഇന്ന് നേരത്തെ നിർത്തിയോ?” ഐഷു അവനെ നോക്കി ചോദിച്ചു.
അജു ഒന്ന് അമർത്തി ശ്വാസം വിട്ടു. ദൂരെ ഗ്രൗണ്ടിൽ തളർന്നിരിക്കുന്ന ഷാനിയെ അവൻ ഒന്നു നോക്കി. “ആഹ് .. ആ ഷാനിയെ സബ്ബ് ഇറക്കി. എന്തോ വല്ലാതെ കിതയ്ക്കുന്നു… അതുകൊണ്ട് ഇന്ന് ഇത്രയൊക്കെ മതി എന്ന് വെച്ചു,
” അജു ഒരു ഒഴുക്കൻ മട്ടിൽ പറഞ്ഞു. സത്യത്തിൽ ഷാനി ഐഷുവിന്റെ അടുത്ത് വന്നിരുന്നത് അജുവിന് അത്ര പിടിച്ചിരുന്നില്ല.
അജു തന്റെ തോളിലെ ടവൽ എടുത്തു.
“ശരി, ഞാൻ പോയി കൈയും കാലും ഒന്ന് കഴുകി വരാം. എന്നിട്ട് നമുക്ക് പോകാം,
” അജു ടാപ്പിന് അടുത്തേക്ക് നടന്നു.
”എന്നാ ഞാനും ഉണ്ടല്ലോ കഴുകാൻ… എന്റെയും കൈയൊക്കെ ആകെ പൊടിയായി,” എന്ന് പറഞ്ഞുകൊണ്ട് ആമിയും അജുവിന്റെ പിന്നാലെ എഴുന്നേറ്റു പോയി.
Polichu pawor sadhanam kathirikkunnu next 🔥🔥🔥🔥
Next part vegam idu