സ്റ്റെല്ലയുടെ ഓഫീസിൽ ഇന്ന് ക്ലൈന്റ് വിസിറ്റ് ഉണ്ട് അതുകൊണ്ടു തന്നെ അവൾ തലേന്ന് രാത്രിയും അതിനുമുൻപുള്ള രാത്രിയും എല്ലാം പ്രൊജക്ടർ അവതരണത്തിനുള്ള ശക്തമായ തയ്യാർ എടുപ്പിൽ ആയിരുന്നു.
ഇന്നാണ് അവളുടെ ക്ലൈന്റ് വിസിറ്റും അവരുടെ പ്രൊജക്റ്റ് അവതരണവും.. വയലറ്റ് സാരിയിൽ അതി സുന്ദരിയായി തന്നെ ഇന്നവൾ ഒരുങ്ങിയിട്ടുണ്ട്.
” ആൽബി എങ്ങനെ ഉണ്ട്..? ”
” നീ ഇത്രം സുന്ദരി ആയിട്ട് ഒരുങ്ങി..പോയാൽ ചിലപ്പോൾ ആരും പ്രസന്റേഷൻ ശ്രെദ്ധിച്ചെന്ന് വരില്ലാട്ടോ..”
“മതി മോനെ മതി..!! ഓവർ ആക്കണ്ടാ..!! ”
എൻറെ പ്രേശംസ സുഖിച്ച് എങ്കിലും അവൾ അത് സമ്മതിച്ച് തന്നില്ല.
” ഞാൻ ഇറങ്ങാ.. ബൈ..”
ഞാൻ കേൾക്കാൻ പാകത്തിന് ഉച്ചത്തിൽ വിളിച്ചു പറഞു അവൾ പോകാൻ തുടങ്ങി.
” ഓൾ തെ ബെസ്റ്റ് ഡിയർ ”
“താങ്ക് യൂ മൈ ലവ് ”
ചിരിച്ച് കൊണ്ട് അവൾ ഇറങ്ങി പോയി.
ഞാൻ എന്റെ തിരക്കുകളിലേക്കും തിരിഞ്ഞു.. ബാംഗ്ലൂരിൽ തണുപ്പ് അതികരിച്ച് തുടങ്ങിയിരുന്നു നട്ടുച്ചയ്ക്ക് പോലും ചെറിയ തണുപ്പുള്ള കാലാവസ്ഥ..!!
അവൾ പോയ പുറകെ ഞാനും പുറപ്പെടാൻ ആരംഭിച്ചു. എനിക്കിന്ന് ഓഫീസിലെ ജോലി സംബന്ധമായി കോർമംഗലക്ക് പോകേണ്ടിയിരുന്നു..
അത് കൊണ്ട് തന്നെ ലാപ്പിൽ ലോഗിൻ ചെയ്ത് ഞാൻ ആദ്യമെ തന്നെ കോർമംഗലക്ക് തിരിച്ചു..!!
എല്ലാ ബാംഗ്ലൂരിയൻസിനെയും പോലെ തന്നെ സിൽക്ക് ബോർഡിലെ ട്രാഫിക് താണ്ടുക ചില്ലറ കാര്യമല്ല ഇപ്പോൾ ഓവർ ബ്രിഡ്ജ് വന്നതുകൊണ്ട് കുറച്ച് എളുപ്പം ആയെങ്കിലും ഇടക്ക് ഒന്ന് പെടും.
മടിവാള സെൻറ് ജോൺസിലെ ട്രാഫിക്കിൽ കുരുങ്ങി കിടക്കുമ്പോഴാണ് സ്റ്റെല്ലയുടെ ഫോൺകോൾ എനിക്ക് വരുന്നത്.. അപ്പോഴേക്കും സമയം 12 ആയിരുന്നു..
” ആ പറയെടി ”
” ആൽബി… നിന്നോട് ഒരു കാര്യം പറയാനുണ്ട് കേട്ടാൽ നീ ചിരിച്ചു ചാവും ഞാനിന്ന് ആകെ ചമ്മി നാറി എരപ്പായെടാ… !! ”
” കർത്താവേ..!! എന്റെ ഭാര്യ ചമ്മാൻ മാത്രം ഇത്ര വലിയ കാര്യം എന്താ..?? ”
ഞാൻ ചെറിയ അതിശയത്തോടെ ചോദിച്ചു.
” അതൊക്കെയുണ്ട് വന്നിട്ട് പറയാം..!! ഞാൻ ഈ സീനൊക്കെ സിനിമയിലും കൊറിയൻ ഡ്രാമയിലും മാത്രമേ കണ്ടിട്ട് ഉള്ളു..! ആദ്യമായിട്ടാണ് എനിക്ക് തന്നെ അബദ്ധം പറ്റുന്നത് ”
സ്റ്റെല്ല ഫോണിൽ കൂടി ചിരിച്ചുകൊണ്ടിരുന്നു.
” എടീ നീ ചിരിച്ചുകൊണ്ടിരിക്കാതെ കാര്യം എന്നാന്ന് പറ…??? ”
ഞാൻ സ്വരം ഇച്ചിരി കടുപ്പിച്ച് പറഞ്ഞു.
” അതൊക്കെ വന്നിട്ട് പറയാം…!! ”
എന്താണ് അവൾ പറയാൻ ഉദ്ദേശിക്കുന്നത് എന്ന് മനസ്സിലാക്കാതെ ഞാൻ ആകെ ടെൻഷൻ അടിച്ചു തുടങ്ങി.
‘ ആ എന്തായാലും നെഗറ്റീവ് ആയിട്ടുള്ള കാര്യമല്ല ആണെങ്കിൽ അവൾ അപ്പോൾ തന്നെ ഫോണിൽ കൂടി പറയാമായിരുന്നു ഇതെന്തോ സന്തോഷമുള്ള കാര്യമാണ് കുറച്ചുനേരം വെയിറ്റ് ചെയ്തു നോക്കാം ‘
പോയ കാര്യം പൂർത്തിയാക്കി ഞാൻ തിരിച്ചു പോകുമ്പോൾ സ്റ്റെല്ലയെ വിളിച്ചു നോക്കിയെങ്കിലും അവൾ ഫോൺ എടുത്തില്ല.
എന്തായാലും എനിക്ക് അധികം സർപ്രൈസ് താങ്ങാനുള്ള ശേഷിയില്ല എന്തുണ്ടെങ്കിലും പെട്ടെന്ന്… പെട്ടെന്ന് അറിയണം അങ്ങനെ ഒരു ത്വര ഉള്ള മനുഷ്യനാണ് ഞാൻ.
വീട്ടിലെത്തിയപ്പോഴേക്കും സ്റ്റെല്ല എനിക്ക് മുന്നേ എത്തി കുളിച്ച് ഫ്രഷ് ആയിരുന്നു.
വന്നുകയറിയതെ ഞാൻ അവളോട് കാര്യം ചോദിച്ചു.
” ഡീ… എന്താ പറയാൻ ഉണ്ട്.. എന്ന് പറഞ്ഞത്..?? ”
” വന്നിട്ട് ഒരു ചായ പോലും കുടിച്ചില്ലല്ലോ അതിനു മുൻപേ വിശേഷങ്ങൾ ചോദിക്കലാണോ…!! ”
അവൾ ചുമ്മാ ആക്കി ചിരിച്ചു കൊണ്ടിരുന്നു.
” ആ നീ പറ നീ ഭയങ്കര സംഭവമാക്കി പറഞ്ഞതല്ലെ..? എനിക്ക് അത് അറിയാഞ്ഞിട്ട് ആകെ ഒരു വിമ്മിഷ്ടം ”
” കുളിച്ചിട്ടു വാ..എന്നിട്ട് പറയാം…!! ഞാൻ ചായ എടുത്തു വെക്കാം ”
സ്റ്റെല്ല അതും പറഞ്ഞു കിച്ചണിലേക്ക് പോയി.
ഞാൻ പെട്ടെന്ന് തന്നെ കുളിയും പൂർത്തിയാക്കി പുറത്തേക്ക് വന്നു അവൾക്ക് ഓപ്പോസിറ്റ് വന്നിരുന്ന് ചായക്കപ്പ് കയ്യിൽ എടുത്തു.
‘ എന്താണ് സംഭവം ‘ എന്ന് ചോദിച്ചതും അവൾ ക്കിടന്ന് ചിരിക്കാൻ തുടങ്ങി.