“അമ്മ പറ.. അമ്മയ്ക്ക് തോൽക്കണോ??…ഞങ്ങളെ എല്ലാവരെയും തോൽപ്പിക്കാണോ..?? “
അമ്മ ‘വേണ്ട’ എന്ന രീതിയിൽ തലയാട്ടി…
“തല ആട്ടിയാൽ പോരാ, വാ തുറന്നു ഉറക്കെ പറ.. “
“വേണ്ട..!! “
“അഹ്.. അങ്ങനെ ആണെങ്കിൽ അമ്മ ഉറച്ച തീരുമാനം എടുക്കണം…മനസ്സിലായോ…പിന്നെ എന്തൊക്കെ വന്നാലും ഒരു കാര്യം ഓർമിച്ചു വച്ചോ…ഒറ്റയ്ക്കല്ല…ഞങ്ങൾ എല്ലാവരും ഉണ്ട് കൂടെ…ഒക്കെ…ഇനി ആരൊക്കെ ഇല്ലെങ്കിലും, എന്തൊക്കെ വന്നാലും, നടന്നാലും ഞാൻ ഉണ്ടാവും കൂടെ…ഒക്കെ… അതാദ്യം ഈ മണ്ടയിലേക്ക് കയറ്റി ഫീഡ് ചെയ്ത് വെച്ചേക്കണം കേട്ടോ…”
ഞാൻ പറഞ്ഞത് കേട്ട് അമ്മ ചിരിച്ചു കൊണ്ട് തലയാട്ടി…ആ ചിരി കണ്ടപ്പോൾ തന്നെ എനിക്ക് മനസ്സിലായി അമ്മ പകുതി ഒക്കെ ആയി എന്ന്…ഫുൾ ഒക്കെ ആകണമെങ്കിൽ അമ്മ തന്നെ വിചാരിക്കണം….
എന്റെ ഫോണിൽ വന്ന മെസ്സേജ് ടോൺ ഞങ്ങൾ രണ്ടാളുടെയും ശ്രദ്ധ തിരിച്ചു…ഞാൻ പാന്റിന്റെ പോക്കറ്റിൽ നിന്ന് ഫോൺ എടുത്തു നോക്കി, ഫുഡ് ഡെലിവറി ന്റെ നോട്ടിഫിക്കേഷൻ ആണ്, അപ്പോൾ തന്നെ കാളിങ് ബെല്ലും ശബ്ധിച്ചു ….
ഞാൻ അമ്മയുടെ കവിളിൽ രണ്ട് തട്ട് തട്ടി കവിളിൽ പറ്റിയ കണ്ണുനീർ തള്ള വിരൽ കൊണ്ട് തുടച്ചു കൊടുത്ത് എഴുനേറ്റു….റൂമിന്റെ വാതിൽ തുറന്ന് ഇറങ്ങിയപ്പോൾ അച്ഛൻ മെയിൻ ഡോർ തുറന്നിരുന്നു…ശബ്ദം കേട്ട് അച്ഛൻ തിരിഞ്ഞു നോക്കി…. സുബൈദയെ അവിടെ എങ്ങും കണ്ടില്ല….
ഞാൻ നേരെ ചെന്ന് ഓർഡർ വാങ്ങി ഡെലിവറി ബോയോട് ഒരു താങ്ക്സും പറഞ്ഞ് തിരിഞ്ഞു നടന്നു…
“മോനെ…”
പിന്നിൽ നിന്ന് അച്ഛന്റെ വിളി…കാലത്തിനു അപ്പുറം നിന്ന് ആരോ വിളിക്കുന്നത് പോലെ ആണ് എനിക്ക് തോന്നിയത്…ഉള്ളിൽ ‘എന്താ അച്ഛാ’ എന്ന് ചോദിക്കാൻ വെമ്പുന്ന ഒരു കുഞ്ഞു കുട്ടിയെ ഞാൻ അടക്കി നിർത്തി…മനസ്സിൽ അമ്മയുടെ കരയുന്ന ചിത്രം നിറഞ്ഞപ്പോൾ ദേഷ്യം നുരഞ്ഞു പൊന്തി, ശ്വാസം കേറ്റി വലിച്ചു ദേഷ്യം അടക്കി ഞാൻ തിരിഞ്ഞു…
“വേണ്ട…”
കൈപൊക്കി ചൂണ്ട് വിരൽ ചുണ്ടിനു കുറുകെ വച്ച് ‘മിണ്ടരുത് ‘ എന്ന് കാണിച്ചു…
“നാളെ.. “
അത്ര മാത്രം പറഞ്ഞ് ഞാൻ റൂമിലേക്ക് നടന്നു…
അടുക്കളയിൽ പോയി ഒരു പ്ലേറ്റ് കൊണ്ട് വന്ന് ഞാൻ ഓർഡർ ചെയ്ത ചപ്പാത്തിയും വെജിറ്റബിൾ കുറുമയും വിളമ്പി അമ്മയ്ക്ക് നേരെ നീട്ടി…
‘വിശപ്പില്ല ‘ എന്ന് പറഞ്ഞ് അമ്മ മുഖം തിരിച്ചു…ഞാൻ ഒരു ചെറിയ കഷ്ണം മുറിച്ച് കറിയിൽ മുക്കി അമ്മയുടെ മുഖത്തിന് നേരെ നീട്ടി,അമ്മ ആദ്യം എതിർത്തെങ്കിലും
‘എന്റെ കൊച്ചല്ലേ…ഞാനല്ലേ തരുന്നേ, കുറച്ച് കഴിക്ക് ‘
എന്ന ഒറ്റ ഡയലോഗിൽ അമ്മ വീണു… ഓരോ കഷ്ണം ഞാൻ അമ്മയ്ക്ക് കൊടുക്കുമ്പോൾ അമ്മ തിരിച്ച് എനിക്കും വാരിത്തരും…അങ്ങനെ പരസപരം കഴിപ്പിച്ച് വാങ്ങിച്ച ഫുഡ് മുഴുവൻ തീർത്തു…. അമ്മയെ വാ കഴുകാൻ വിട്ടിട്ട് ഞാൻ പ്ലേറ്റ് ഒക്കെ എടുത്ത് അടുക്കളയിലേക്ക് പോയി….
അവിടെ അപ്പോൾ സൈനബ എന്തോ പാചകം ചെയ്യുന്നുണ്ടായിരുന്നു…. കാൽപെരുമാറ്റംകേട്ട് തിരിഞ്ഞു നോക്കിയ അവർ എന്നെ കണ്ട് ഞെട്ടി, പിന്നെ എന്നോടെന്തോ സംസാരിക്കണം എന്ന ലക്ഷ്യത്തോടെ ഇടക്കിടെ നോക്കി കൊണ്ടിരുന്നു…
ഞാൻ അവരെ ശ്രദ്ധിക്കാതെ പ്ലേറ്റ് സിങ്കിൽ ഇട്ട് കഴുകാൻ തുടങ്ങി….
“മോൻ അത് അവിടെ വച്ചോ, ഞാൻ കഴുകിക്കോളാം…”
അവർ പറഞ്ഞു….
ഞാൻ അവരെ ദേഷ്യത്തോടെ ഒന്ന് നോക്കി…അവർ പതറി കൊണ്ട് മുഖം താഴ്ത്തി…ഞാൻ എന്റെ പണി തുടർന്നു…
“മോനെ…ഞാൻ…”
അവർ എന്തോ പറയാൻ തുടങ്ങുന്നതിനു മുൻപേ ഞാൻ അവർക്ക് നേരെ വിരൽ ചൂണ്ടി വാണിംഗ് കൊടുത്തു…എന്റെ മുഖം അപ്പോൾ ദേഷ്യത്താൽ ചുവന്നിരുന്നു…ഞാൻ ചുണ്ടിനു കുറകെ വിരൽ വച്ച് മിണ്ടരുത് എന്ന് അവരോട് ആംഗ്യം കാണിച്ചു…എന്റെ മുഖത്തെ ദേഷ്യം കണ്ട് അവർ ഞെട്ടലോടെ പിന്നോട് നീങ്ങി…
ഞാൻ പാത്രം കഴുകി വേസ്റ്റ് മുഴുവൻ ബിന്നിലിട്ട് കയ്യും മുഖവും കഴുകി തിരിച്ചു നടന്നു…അവർ അപ്പോൾ തല കുമ്പിട്ടുകൊണ്ട് പാചകം ചെയ്യുകയായിരുന്നു….
ഞാൻ റൂമിലേക്ക് പോയി, വാതിൽ അടച്ച് അമ്മയുടെ അടുത്തേക്ക് ചെന്നു.. അമ്മ അപ്പോഴേക്കും കിടന്നിരുന്നു… ഞാൻ അമ്മയുടെ നെറ്റിയിൽ ഒരു മുത്തം കൊടുത്ത് നെറുകയിൽ ഒന്ന് തലോടി, ലൈറ്റ് ഓഫാക്കി അമ്മയുടെ അടുത്ത് കിടന്നു…