ദൈവമേ ഈ പെണ്കുട്ടിയുടെ അടി വസ്ത്രമാണോ ഞാന് ധരിക്കേണ്ടത്.എന്റെ ഹൃദയമൊന്ന് കാളി. അങ്ങനെയല്ലെന്ന് ബോധ്യപ്പെടാന് എനിക്കധികം സമയം വേണ്ടി വന്നില്ല.പുതിയ പേക്കറ്റ് പൊളിച്ച് ഒരു അടിവസ്ത്രം അവള് എന്റെ മുമ്പിലേക്കിട്ടു.ഞാന് വീണ്ടും അവളുടെ മുമ്പില് ശങ്കിച്ചു നിന്നു.അവളുടെ മുഖത്ത് വല്ലാത്തൊരു നിസ്സഹായതയും ഒരു അപകര്ഷതാബോധവും ഞാന് കണ്ടു.കൃത്രിമമായ ഒരു ശൃംഗാര ഭാവത്തോട് തന്നെയാണ് അവള് ഞാനുമായി സംസാരിക്കാന് തുനിഞ്ഞതും.
” എന്താ നിന്റെ പേര് ? ”
പേരറിഞ്ഞിട്ടെന്താ കാര്യം എന്നൊരു ചോദ്യഭാവം അവളുടെ മുഖത്ത് മിന്നിമറിഞ്ഞെങ്കിലും അതൊന്നും പ്രകടമാക്കാതെ അവള് പറഞ്ഞു. ” ജീന ”
” സര്, നിങ്ങള് മസാജിനല്ലേ വന്നത് ? വസ്ത്രമഴിക്കൂ. ” ശുദ്ധമായ ഇംഗ്ലീഷില് വ്യാകരണ നിയമങ്ങളെല്ലാം പാലിച്ചു കൊണ്ടാണ് അവള് അങ്ങനെ ആവശ്യപ്പെട്ടത്.എന്നിലെ ആശ്ചര്യം ഒരു ചോദ്യചിഹ്നമായി ഞാനവളുടെ മുമ്പില് അവതരിപ്പിച്ചു. കമ്യൂണിസ്റ്റ് രാജ്യങ്ങള് ഇംഗ്ലീഷ് വിദ്യാഭ്യാസത്തെ പ്രോത്സാഹിപ്പിച്ചിരുന്നില്ല എന്നാണെന്റെ കേട്ടറിവ്.അനുഭവത്തില് അത് ഏറെക്കുറെ ശരിയുമായിരുന്നു.
പതിറ്റാണ്ടുകളോളം കമ്യൂണിസ്റ്റുകളുടെ ഭരണത്തിന് കീഴില് ജീവിതം ഹോമിച്ച റഷ്യക്കാരും വ്യക്തി സ്വാതന്ത്ര്യം എന്ന വാക്കിന്റെ അര്ത്ഥ തലങ്ങള്തേടിയലയുന്ന ചൈനക്കാരും ഇംഗ്ലീഷും അറബിയും സംസാരിക്കാന് കഴിയാതെ എന്റെ മുമ്പില് നട്ടംതിരിഞ്ഞിട്ടുണ്ട്.
ഇംഗ്ലീഷ് ഭാഷയില് പരിജ്ഞാനമുണ്ടായാല് ലോകവുമായുള്ള സമ്പര്ക്കം കൂടുമെന്നും തദ്വാരാ സ്വാതന്ത്ര്യത്തിന് പുതിയ വ്യാഖ്യാനങ്ങള് അവര് നിര്വ്വചിക്കുമെന്നും അധികാരികള് ഭയന്നിട്ടുണ്ടാകാം.
”എനിക്ക് ഹോട്ടലിലായിരുന്നു മുമ്പ് ജോലി.” എന്റെ സംശയത്തിന്
അവള് ഉത്തരം തരികയും വീണ്ടും വസ്ത്രമഴിക്കാന് നിര്ബന്ധിക്കുകയും ചെയ്തു.
” എനിക്ക് മസാജ് വേണ്ടത് ശരീരത്തിനല്ല.മനസ്സിനാണ്. ” പല പുരുഷ•ാരുടേയും കാമാര്ത്തമായപുഞ്ചിരി കണ്ട അവള്ക്ക് മുമ്പില് അല്പം വ്യത്യസ്തമായ പുഞ്ചിരി അവതരിപ്പിക്കാന് ശ്രമിച്ചു കൊണ്ട് ഞാന് പറഞ്ഞു.
” പിന്നെ !” അവള് അര്ധോക്തിയില് നിര്ത്തുകയും തുടരുകയും ചെയ്തു. ” റിലാക്സേഷന് ഫുള് ബോഡി മസാജിനാണ് നിങ്ങളുടെ സുഹൃത്ത് കൗണ്ടറില് പണമടച്ചത്.അത് നിര്വ്വഹിക്കേണ്ടത് എന്റെ കടമയാണ്.”
” ഒരു മണിക്കൂര് നമുക്ക് നിന്നെക്കുറിച്ചും നിന്റെ നാടിനെക്കുറിച്ചും സംസാരിച്ചിരിക്കാം. ” ജീന സമ്മതിച്ചില്ല.അവള് എന്റെ കുപ്പായത്തിന്റെ കുടുക്കുകള് ഓരോന്നായി അഴിക്കുകയും പിന്നെ പാന്റിനെ മുറുക്കിയിരിക്കുന്ന ബെല്ട്ട് അയച്ചിടുകയും ചെയ്തു.
പുരുഷന്റെ സടകുടഞ്ഞെഴുന്നേല്ക്കലുകള് എന്നില് നിന്നും എങ്ങോ ഓടി മറഞ്ഞത് പോലെ എനിക്ക് തോന്നി.ലൈംഗിക വികാരത്തിന്റെ യാതൊരു തള്ളിക്കയറ്റമോ അല്ലെങ്കില് ശാന്തമായ ഒരു ഒഴുക്കോ എനിക്കനുഭവപ്പെട്ടില്ല.ഒഴുക്ക് നഷ്ടപ്പെട്ട തണ്ണീര്ത്തടം പോലെ എന്നിലെ വികാരങ്ങള് എങ്ങും പോകാതെ ഹൃദയത്തിനകത്ത് പരന്നു കിടന്നു.വാതിലുകള് മലര്ക്കെ തുറന്നിട്ടും.!
എന്ത് കൊണ്ടാണ് അങ്ങനെ സംഭവിച്ചതെന്നെനിക്കറിയില്ല.നിസ്സഹായതയെ ചൂഷണം ചെയ്യാന് ഒരിക്കലും എനിക്കാകുമായിരുന്നില്ല.വാ പിളര്ത്തി വരുന്ന വ്യാഘ്രത്തെ നോക്കുന്നത് പോലെയാണ് അവള് ആദ്യമെന്നെ നോക്കിയത്.ഇപ്പോള് സൗഹൃദം ഭാവിക്കുന്നുണ്ടെങ്കിലും.
‘ എന്റെ സാമ്പത്തിക നിസ്സഹായതയെ ചൂഷണം ചെയ്യാന് വന്നവനല്ലേ നീ ? ‘ പുറമെ പറഞ്ഞില്ലെങ്കിലും മനസ്സിലെങ്കിലും അവളങ്ങനെ ചോദിച്ചിട്ടുണ്ടാകാം. എന്റെ തോന്നലുകള് ഇപ്പോഴും മനസ്സിനകത്ത് ഖനീഭവിച്ചിരിക്കുന്നു.
അവള് എനിക്ക് മുമ്പിലിട്ട് തന്ന അടി വസ്ത്രം ധരിച്ച് വീതിയുള്ള ബെഞ്ചി•േല് ഞാന് കിടന്നു.ഇലക്ട്രിക് ബള്ബ് അവള് ഡിം ചെയ്തു.മുറിക്കകത്ത് സന്ധ്യാ വെളിച്ചം.മുല്ലപ്പൂവും ചന്ദനവും കൂടിച്ചേര്ന്ന ഒരു സുഗന്ധവും മുറിക്കകത്തുണ്ടായിരുന്നു.അവള് എന്റെ വലത് ചൂണ്ട് വിരല് പിടിച്ച് അഗ്രത്ത് പ്രത്യേക രീതിയില് ചെറുതായി അമര്ത്തി.ഒരു മൊട്ട്സൂചി തറിക്കുന്നത് പോലെയാണ് എനിക്ക് തോന്നിയത്.ആ ലഘു വേദനയുടെ സുഖം ചൂണ്ടു വിരലില് നിന്നും തലച്ചോറിലെത്തി ചുണ്ടുകള്ക്ക് പുഞ്ചിരി സമ്മാനിച്ചു.അവള് അങ്ങനെത്തന്നെ എന്റെ കൈ വെള്ളയിലും കൈത്തണ്ടയിലും കക്ഷത്തുമെല്ലാം ചെയ്തു കൊണ്ടിരുന്നു.
” ഈ സംഗീതം ആരുടേതാണ് ?” അവളുടെ കൈ വിരലുകള് വിയര്പ്പു വറ്റി വരണ്ട എന്റെ ശരീരത്തിന്റെ വിവിധ ഭാഗങ്ങളില് അമര്ത്തുമ്പോഴുണ്ടാകുന്ന സുഖത്തിന്റെ ലഹരി അനുഭവിക്കുന്നതിനിടയിലും ഞാനങ്ങനെ ചോദിച്ചു.
” സിസ്റ്റര് ലി യു വിന്റേത് ” ഒരു ചിത്രകാരിയുടെ സൂക്ഷ്മതയോടെ എന്റെ ശരീരത്തി•േല് കരവിരുത് പ്രകടിപ്പിക്കുന്നതിനിടയില് അവള് പറഞ്ഞു.
” ഇത് എന്ത് സംഗീതമാണ് ? ”
”ഞങ്ങളുടെ പ്രവിശ്യയിലെ പ്രാദേശികസംഗീതമാണിത്.”
” നീ ഏത് പ്രവിശ്യയില് നിന്നാണ് ? ”
”ഗു ആങ് ഷി. ” അവളുടെ ചൈനീസ് ഉച്ചാരണം എന്നെ വിവരം കെട്ടവനാക്കി.ഒരിക്കല് കൂടി ആ പേര് പറയാന് ഞാന് അവളോട് ആവശ്യപ്പെട്ടു.
”ഗു- ആങ്- ഷി ” അങ്ങനെ പറയുമ്പോള് അവളുടെ മുഖത്ത് അല്പം ധാര്ഷ്ട്യമുണ്ടായിരുന്നു.
”ബീജിങ്ങിനടുത്താണോ ഗുആങ്ഷി ? ” എനിക്കറിയാവുന്ന ചൈനയിലെ ഒരേയൊരു സ്ഥലപ്പേരില് ഞാന് കയറിപ്പിടിച്ചു.
”അല്ല ” അങ്ങനെ പറഞ്ഞ് അവള് എന്നോട് കുമ്പിട്ട് കിടക്കാനും മുഖം വലിയ വട്ടത്തിനകത്ത് പൂഴ്ത്തി വെക്കാനും പറഞ്ഞു.പിന്നെ എന്റെ മുതുകില് അവളുടെ കൈ മുട്ട് കൊണ്ട് ശക്തിയായി ഉഴിഞ്ഞു കൊണ്ടിരുന്നു. രണ്ട് കാലുകള് ഇരു വശത്തേക്കുമായി തൂക്കിയിട്ട് അവള് എന്റെ ചന്തിയി•േല് കയറിയിരുന്നു. അവളുടെ രണ്ട് കൈ മുട്ടുകളും എന്റെ മുതുകില് അമര്ത്തി കൈ വിരലുകള് കൊണ്ട് കഴുത്തിന്റെ രണ്ട് ഭാഗത്തും ഞെക്കിക്കൊണ്ടിരുന്നു.രക്തയോട്ടത്തിന് ചാലുകള് കീറുന്നത് പോലെ.
അവളുടെ രണ്ട് വലിയ മുലകള് പരുക്കന് പേശികളെപ്പോലെ എന്റെ പുറത്ത് അമര്ന്നു.ചൈനക്കാരികളുടെ മുലകള്ക്ക് ഇത്ര കാഠിന്യമോ ?
ഇപ്പോള് ഞാന് രണ്ട് ബണ്ണുകള്ക്കിടയില് പെട്ട ഒരു ചിക്കന് ബര്ഗര് പോലെയാണ്.ബെഞ്ചിനും അവള്ക്കുമിടയില് അടിച്ചമര്ത്തപ്പെട്ട ഒരു ഇന്ത്യക്കാരനാണ് ഞാനിപ്പോള്.കഴുത്തിലെ വിരലുകള് തലയിലേക്ക് അമര്ന്ന് കയറിക്കൊണ്ടിരുന്നു.
”ബീജിങ്ങില് നിന്നും 1220 മൈല് ദൂരമുണ്ട് ഗു ആങ്ഷിയിലേക്ക്. വിയറ്റ്നാമുമായി ഞങ്ങള് അതിര്ത്തി രേഖ പങ്കിടുന്നു. ” അവള് അങ്ങനെ പറയുമ്പോള് അവളുടെ ചുണ്ടുകള് എന്റെ ചെവിയുമായി അതിര്ത്തി രേഖ പങ്കിടുകയായിരുന്നു.എന്നാല് പക്ഷേ ആ ഉത്തരത്തിന് മറു ചോദ്യമുന്നയിക്കാന് എനിക്കാകുമായിരുന്നില്ല.