രണ്ടാമത്തെ സെക്യൂരിറ്റി എന്നത് ഒരിക്കലും സ്ഥിരമല്ലാത്ത ആളാണ്…
ഷോപ്പ് തുടങ്ങി ഒരു വർഷത്തിനിടയിൽ ആറോ, ഏഴോ പേർ വന്നു പോയിട്ടുണ്ട്…
സുഹാന……….!
ഭർത്താവ് ഷെരീഫ്…
രണ്ടു മക്കൾ……….
മൂത്തയാൾ സഫ്ന ഫാത്തിമ, ഭർത്താവിന്റെ കൂടെ ഖത്തറിൽ…
രണ്ടാമത്തെയാൾ സൽമാൻ എന്ന സൽമാൻ ഫാരിസ്…
പതിനാറാം വയസ്സിലായിരുന്നു സുഹാനയുടെ കല്യാണം…
മൂത്ത പെൺകുട്ടി എന്നതും , ഇളയ ആൾക്ക് കല്യാണപ്രായം ആകുമ്പേഴേക്കും ആദ്യ കല്യാണത്തിന്റെ ബാദ്ധ്യതകൾ തീർക്കാമെന്നും കരുതി സുൾഫിക്കർ ആണ് അവന്റെ പ്രവാസ ജീവിതം തുടങ്ങിയ നാളിൽ സഹോദരിയെ വിവാഹം കഴിപ്പിച്ചയച്ചത്…
ആ കാലഘട്ടത്തിൽ നിയമങ്ങൾ അത്രയൊന്നും കർക്കശമല്ലായിരുന്നു താനും…
പതിനേഴാം വയസ്സിൽ ആദ്യപ്രസവം……
പതിനെട്ടര വയസ്സിൽ രണ്ടാമത്തേത്… ….
കഷ്ടി അഞ്ചടിക്കു മുകളിൽ ഉയരമുള്ള മെലിഞ്ഞവളാണ് സുഹാന……
പാവാടയും ബ്ലൗസും ധരിച്ചാൽ പഴയ പതിനേഴുകാരി… ….
സഫ്നയും സുഹാനയും ഒരുമിച്ചു പോകുന്നതു കണ്ടാൽ സഫ്ന മൂത്തതും സുഹാന ഇളയവളെന്നും പറയും…
സൽമാനും സുഹാനയുമാണ് പോകുന്നതെങ്കിലും അതു തന്നെ അവസ്ഥ..
ആറടിയോളം ഉയരമുള്ള ആജാനബാഹുവായ ഷെരീഫിന്റെ ശരീരപ്രകൃതമാണ് മക്കൾ ഇരുവർക്കും കിട്ടിയിരിക്കുന്നത്…
ഷെരീഫും പ്രവാസി തന്നെ…
അയാൾ നാട്ടിൽ വന്നാലും അധികമങ്ങനെ നിൽക്കാറില്ല……
മേലാക്കത്തെ വീട്ടിൽ നിന്ന് മഞ്ചേരിയിലെ ഷോപ്പിലേക്ക് പോകാൻ സുഹാനയ്ക്ക് ഉണ്ടായിരുന്ന സ്കൂട്ടി സൽമാൻ ഒലിപ്പുഴയ്ക്ക് കൊണ്ടുപോയതായിരുന്നു…
കുറച്ചു ദിവസങ്ങളായി ബസ്സിലാണ് അവൾ പോയി വരുന്നത്……
അബ്ദു റഹ്മാനും ഭാര്യ ഫാത്തിമയ്ക്കുമൊപ്പമാണ് ഇരുനില വീട്ടിൽ സുഹാനയുടെ ജീവിതം…..
ബസ് സ്റ്റോപ്പിലേക്ക് കുറച്ചു നടക്കാനുണ്ട്…
ചുരിദാർ ആയിരുന്നു അവളുടെ വേഷം..
പരിചയക്കാർ സുഹാനയെ നോക്കി ചിരിച്ചു…
അവളും പുഞ്ചിരി മടക്കി കൊടുത്തു..
അന്ന് സ്കൂൾ ഇല്ലാത്തതിനാൽ ബസ് സ്റ്റോപ്പിൽ അധികം ആളില്ലായിരുന്നു…
സ്റ്റോപ്പിനു മുന്നിൽ ഒരു കാർ നിർത്തിയിട്ടിരുന്നതിനാൽ, കാറിനെ ഓവർ ടേക്ക് ചെയ്താണ് അവൾ കൈ കാണിച്ച ബസ് നിർത്തിയത്……
സുഹാന പിൻവശത്തെ വാതിലിലൂടെ അകത്തേക്ക് കയറി…
ബസ്സിനുള്ളിൽ അധികം ആളുണ്ടായിരുന്നില്ല..
സ്ത്രീകളുടെ സീറ്റിനടുത്തേക്ക് അവൾ കമ്പിയിൽ പിടിച്ച് നടന്നു…
വലതു വശത്ത് രണ്ടു പേർക്ക് ഇരിക്കാവുന്ന ഒരു സീറ്റിൽ ഇരുപത് വയസ്സിനു മുകളിലുള്ള ഒരു യുവതി ഒറ്റക്കിരിക്കുന്നത് അവളുടെ ശ്രദ്ധയിൽ പെട്ടു……
സുഹാന അവിടേക്ക് നീങ്ങി…
ആ യുവതിയുടെ കയ്യിലിരിക്കുന്ന മൊബെൽ അവൾ മറച്ചെന്ന പോലെ പിടിച്ചിരിക്കുന്നതു കണ്ട്, ഒരു കേവല ജിജ്ഞാസയോടെ ഒന്നെത്തിനോക്കി സുഹാന , സീറ്റിലേക്കിരുന്നു..
KK stories………..!
ഡിസ്പ്ലേ യിൽ തെളിഞ്ഞ വലിയ അക്ഷരങ്ങൾ സുഹാന വായിച്ചു.
അടുത്ത് ആളിരുന്നതും വിളറിയ ഒരു ചിരിയോടെ യുവതി , ധൃതിയിൽ സെന്റർ ടച്ച് മാർക്ക് തൊട്ട് ഫയൽ ക്ലോസാക്കുന്നത് സുഹാന ശ്രദ്ധിച്ചു…
അവളും ഒരു പുഞ്ചിരി യുവതിക്കു സമ്മാനിച്ചു…
മറച്ചു വെച്ച് വായിക്കുന്ന സ്റ്റോറികൾ ഏതാണെന്ന് ഒരു നിമിഷം സുഹാന ആലോചിച്ചു…
പിന്നീടവൾ ആ ചിന്ത തിരുത്തുകയും ചെയ്തു.
ഒരു യുവതിയാണ്……….!
പൊതു സ്ഥലമാണ്… ….!
പക്ഷേ മലയാളികളുടെ കപട സദാചാര മൂല്യങ്ങളുടെ ആഴവും വ്യാപ്തിയും അവൾ അറിയാൻ പോകുന്നതേ ഉണ്ടായിരുന്നുള്ളൂ…
ഷോപ്പിനു മുന്നിൽ അവൾ പതിവു പോലെ ബസ്സിറങ്ങി… ….
ചന്ദനക്കുറിയണിഞ്ഞ ശിവരാമൻ ചേട്ടന്റെ പതിവു മുഖം ദർശിച്ച്, അയാൾക്കൊരു പുഞ്ചിരിയും സമ്മാനിച്ച് അവൾ ഹാന്റ് ബാഗിൽ നിന്ന് കടയുടെ ചാവിയെടുത്തു…
വായിച്ചു കൊണ്ടിരുന്ന പത്രം രണ്ടാക്കി മടക്കി ശിവരാമൻ ചേട്ടൻ അവൾക്കരുകിലേക്ക് വന്നു…
ലോക്ക് തുറന്ന് അവൾ നിവർന്നതും അയാൾ ഷട്ടർ ഉയർത്തിക്കൊടുത്തു…
“” കടയിപ്പോൾ മോളുടെ സ്വന്തമായോ..? അവരെയാരെയും ഇങ്ങോട്ടു കാണാറില്ല……””
അയാൾ കുശലം ചോദിച്ചു…
“” ഒരു പണിയുമില്ലാത്തത് എനിക്കല്ലേ… അവർക്കൊക്കെ ഓരോ തിരക്കല്ലേ… “