ശിവമയം

[ Shadow ]

---

ഇപ്പോഴും കൊച്ചു കുട്ടിയാനാ വിചാരം..

ഇവൾക്കിനിനി എന്നാ ഈശ്വരാ ഒരു ബുദ്ധിയും ബോധോം വരുന്നെ..

എല്ലാത്തിനും എന്നെ പറഞ്ഞാൽ മതിയല്ലോ..

ഒന്നല്ലേ ഉള്ളൂ എന്ന് കരുതി ആവശ്യത്തിൽ കൂടുതൽ കൊഞ്ചിച്ചു വഷളാക്കി.

നന്ദിനി തന്റെ പരാതിയും പരിഭവങ്ങളും പതിവ് പോലെ അടുക്കളയിലെ ചട്ടിയോടും പാത്രങ്ങളോടും പറഞ്ഞു തീർത്തു.

ആ പാത്രങ്ങളുടെ കലപില ശബ്ദവും അമ്മയുടെ പായാരവും കേട്ട് കൊണ്ടാണ് ശിവാനി കണ്ണു തുറന്നത്.പുറത്തെ വെയിൽ ജനൽ പാളികളിലൂടെ വന്ന് കണ്ണിൽ കുത്തിയതും അവൾക്ക് കണ്ണ് പുളിച്ചു.അവൾ തന്റെ മിഴികളെ ഇറുക്കി അടച്ചു കൊണ്ട് ഒന്ന് കൂടി പുതപ്പിനുള്ളിലേക്കു ചുരുണ്ടു.

ശിവാനി.. എഴുനേൽകുന്നുണ്ടോ നീ..

സമയം എത്ര ആയീനാ നിന്റെ വിചാരം.

നിനക്ക് ക്ലാസ്സിൽ പോകണം എന്ന ചിന്ത ഒന്നും ഇല്ലേ..

അതെങ്ങനെയാ പഠിക്കണം എന്ന ചിന്ത ഉള്ളവർക്കല്ലേ ആ വക വിചാരം ഉണ്ടാകൂ.

ഓ ഈ നന്ദിനികുട്ടി രാവിലെ തന്നെ തുടങ്ങിയോ പടപ്പുറപ്പാട്..

പറച്ചില് കേട്ടാൽ തോന്നും ഞാൻ എംബിബിഎസ്ന് പഠിക്കാനെന്ന്.

വെറും ബിഎക്കാരി സെക്കന്റ് ഇയർ സ്റ്റുഡന്റ്.അതും ആവറേജ് മാർക്കും വാങ്ങി ഇരിക്കുന്ന എന്നോടാ ഈ വേദമോതൽ.

അതും പറഞ്ഞ് ശിവാനി പുതപ്പു ഒന്ന് കൂടി നേരെ പുതച്ചു..

ചെവിയിൽ എന്തോ കടിച്ച പോലെ വേദന തോന്നിയതും അവൾ ഉറക്കെ അലറി..

അമ്മാ..

കാറേണ്ട.. ഞാൻ തന്നെയാ.

നന്ദിനിയുടെ വിരൽ ഒന്ന് കൂടി അവളുടെ ചെവിയിൽ മുറുകി.

അയ്യോ അമ്മാ വിട്.. എനിക്ക് വേദനിക്കുന്നു.

ഈ വേദന പേടിച്ചാ രണ്ടാമത് ഒന്ന് കൂടി ഞാൻ കാത് കുത്താതെ.കോളേജിൽ പിള്ളേര് രണ്ടും മൂന്നും നാലും കുത്തും കുത്തി

അതിൽ പലേ തരം കമ്മലും ഫിറ്റാക്കി വരുന്ന കാണുമ്പോ കൊതിയോടെ നോക്കി നിന്നിട്ടുണ്ട്.അങ്ങനെ കാത് കുത്തുന്നതിന് പോലും ഇത്ര വേദന കാണില്ല.

സമയം നോക്ക് ശിവാനി.. എട്ടര മണി കഴിഞ്ഞു.നീ ഇന്ന് പോകുന്നില്ലേ..

യ്യോ എട്ടരയോ.. ഇന്ന് സ്പെഷ്യൽ ക്ലാസ് ഉള്ളതാ.അമ്മക്ക് കുറച്ച് കൂടി നേരത്തെ വിളിച്ചൂടെ..

ദേ ശിവാനി എന്നെ കൊണ്ടൊന്നും പറയിക്കല്ലേ നീ.

അമ്മാ ഇങ്ങനെ ശിവാനി എന്ന് നീട്ടി വിളിക്കല്ലേ ശിവ അത് മതി.

അതിന് മറുപടിയായി നന്ദിനി ഒന്നും മിണ്ടിയില്ല.

അവൾ ശിവാനിക്ക് കൊണ്ടു പോകാനുള്ള ചോറ് പാത്രത്തിലാക്കുമ്പോൾ ബാത്റൂമിൽ നിന്നും കേട്ടു ശിവയുടെ വകയായുള്ള ചോദ്യം.

അമ്മാ ഇന്ന് കുളിക്കണ്ടല്ലോ.. സമയം ഇല്ല.

പല്ലും തേച്ച് കയ്യും കാലും മുഖോം ഒന്ന് കഴുകിയാൽ പോരെ..

കുളിക്കാതെ ഇറങ്ങി വന്നാൽ നിനക്ക് ഞാൻ പച്ചവെള്ളം തരില്ല.

അത് കേട്ടതും ശിവ ഒരു ബക്കറ്റ് തണുത്ത വെള്ളം എടുത്ത് തന്റെ തല വഴി കമിഴ്ത്തി.അതോടെ അവളിൽ ബാക്കി നിന്ന ഉറക്കം എതിലെയോ പോയി മറഞ്ഞു.

അവൾ കുളിച്ചു ഡ്രസ്സ് മാറി വന്നപ്പോൾ ഒമ്പത് മണി കഴിഞ്ഞു.ഒമ്പതരയ്ക്ക് കോളേജ് ബസ് വരും.

ഇന്നാ വേഗം എടുത്ത് കഴിക്ക്.

നന്ദിനി കാസറോൾ ശിവാനിക്ക് നേരെ നീക്കി വച്ചു.

ഓ ഓട്ടട.. കൊള്ളാം.

ശിവാനി എന്താ നിന്റെ തീരുമാനം.

എന്താ അമ്മാ..

എബീടെ കാര്യാ ഞാൻ ചോദിച്ചെ.ഇന്നലെ ബാങ്കിൽ അവന്റെ അപ്പച്ചൻ വന്നിരുന്നു.

ഇനിയും വൈകിക്കാൻ പറ്റില്ല പോലും.അവർക്ക് എത്രയും വേഗം ഒരു മറുപടി കൊടുക്കണം.

ഇത് വരെ നിനക്ക് വയസ് പതിനെട്ട് ആകട്ടെ പറഞ്ഞ് നിന്നു.ഇതിപ്പൊ

പതിനെട്ടും കഴിഞ്ഞു പത്തൊമ്പതും കഴിയാറായി.പഠിക്കാൻ മിടുക്കുള്ള കുട്ടി ആയിരുന്നേൽ പഠിച്ചു വല്ല ജോലിയും ആയിട്ട് കെട്ടിച്ചു വിടാം എന്ന് കരുതായിരുന്നു.

ഇതിപ്പോ പഠിക്കേം ഇല്ലല്ലോ.എന്റെ നിർബന്ധം കൊണ്ടല്ലേ നീ ഇപ്പൊ ക്ലാസിൽ പോകുന്നത് തന്നെ.അതാണേൽ പകുതി ദിവസം ക്ലാസിന് വെളിയിലും.

ഓ അങ്ങനെ.. അവർക്കു തിരക്കാണേല് അവര് വേറെ നോക്കിക്കോട്ടെ അമ്മാ.. അല്ലേലും ഇപ്പൊ കോളേജിലുള്ള ഓരോ പയ്യന്മാരെ കാണുമ്പോ തോന്നും എന്നാത്തിനാ എന്റെ കാര്യം നേരത്തെ പറഞ്ഞു വച്ചേന്.

ശിവാനി നീ ഇത് എന്തു ഭാവിച്ചാ..

നന്ദിനി അവൾക്ക് നേരെ ഒച്ചയെടുത്തു.

അമ്മ ഞാൻ പറഞ്ഞ കാര്യം ആലോചിച്ചോ. ആദ്യം അതിനൊരു തീരുമാനം പറ.ആദ്യം അമ്മേടെ കല്ല്യാണം അത് കഴിഞ്ഞ് എന്റെ..