എബിയെ അങ്ങനെ ആണ് അവന്റെ അപ്പച്ചനും അമ്മച്ചിയും വളർത്തിയത്l.എല്ലാ സ്വാതന്ത്ര്യവും അവർ അവന് നൽകിയിട്ടുണ്ട്.പക്ഷേ അവൻ അത് മിസ്സ് യൂസ് ചെയ്യില്ല.
എനിക്കു താൽപര്യം ഉണ്ട് എബിയുടെ കാര്യത്തിൽ.ശിവയുടെ ഉള്ളിലും എബിയോടുള്ള ഇഷ്ടം ഉണ്ട്.പക്ഷേ അത് അവൾ എനിക്ക് മുൻപിൽ സമ്മതിച്ചു തരില്ല.അവളിപ്പോ എന്നെ എങ്ങനേലും ആരുടേലും തലേൽ കെട്ടിവെയ്ക്കണം എന്ന ചിന്തയിൽ നടക്കല്ലേ..
നന്ദിനി ചിരിയോടെ പറഞ്ഞവസാനിപ്പിച്ചപ്പോൾ ലേഖ പറഞ്ഞു.
കൊള്ളാമല്ലോടാ തന്റെ ഭാവി മരുമോൻ.. കക്ഷിയോട് ഒരു ദിവസം ഇങ്ങോട്ട് ഒക്കെ ഒന്ന് ഇറങ്ങാൻ പറ.ആളെ ഞാനും ഒന്ന് കാണട്ടെടോ.
ആയിക്കോട്ടെ.. ഞാൻ പറയാം.
ലേഖ മാഡത്തെ മാനേജർ വിളിക്കുന്നു..
അറ്റൻഡർ ശങ്കരൻ ചേട്ടൻ വന്ന് പറഞ്ഞതും ലേഖ എഴുനേറ്റു പോയി..
🌹🌹🌹🌹🌹🌹🌹🌹
ഉച്ച കഴിഞ്ഞുള്ള ഫസ്റ്റ് പിരീഡ് ഇഗ്ലീഷ് ക്ലാസ് തകർപ്പനായി നടക്കുന്നുണ്ട്.മാത്തപ്പൻ മാഷിന്റെ ക്ലാസ്.. പഠിപ്പിസ്റ്റുകൾ ആയ കുട്ടികൾ അങ്ങേരെ വായിലേക്കും നോക്കി ഇരിക്കുന്നുഅല്ലാത്തവർ ഉറക്കം എന്ന മഹാ കലയിൽ ഏർപ്പെട്ടിരിക്കുന്നു.ഉറങ്ങുന്നവരെ മാഷ് കണ്ടെങ്കിലും അദ്ദേഹം പറയുന്നത്..
അവർ അവരുടെ ജോലി വൃത്തിയായി ചെയ്യുന്നുണ്ട്.നിങ്ങൾ പഠിക്കണം എന്നുള്ളവർ നിങ്ങളെ ജോലി ചെയ്യ് എന്നാണ്.
ശിവാനി ബുക്കിൽ കുത്തി വരഞ്ഞ് ഇരിക്കുകയാണ്.അവൾക്ക് തൊട്ടരികെ ആയി ഇരിക്കുന്നത് അവളുടെ ചങ്കും കരളും ആയ സേറ സാമുവേൽ.. അവൾക്കിപ്പുറം ദീപു..ഉഴപ്പന്മാരെ ഉസ്താദ്.ഇവരെ രണ്ടുപേരുടെയും നടുക്കാണ് ശിവാനിയുടെ ഇരിപ്പ്.
അവർ രണ്ടുപേരും ചില നേരം അവൾക്ക് രണ്ട് മാലാഖമാർക്ക് സമമാണ്.കച്ചറ കളിക്കാൻ കൂടെ
നിക്കുമ്പോൾ ആണ് അവർ മാലാഖമാർ ആകുന്നേൽ ക്ലാസ് ടെസ്റ്റ് സമയത്ത് ഒന്നും പഠിക്കാതെ വന്ന് ചോദ്യപേപ്പറിലെ ചോദ്യം തിരിച്ചും മറിച്ചും ശിവ എഴുതി വയ്ക്കുമ്പോൾ സേറയും ദീപുവും അവളുടെ പേപ്പർ നോക്കി
വള്ളി പുള്ളി തെറ്റാതെ അത് അതേ പോലെ അവരുടെ പേപ്പറിലും പകർത്തി എഴുതി വയ്ക്കും.ആ സമയം ആണ് അവൾക്ക് അവർ രണ്ടുപേരും ചെകുത്താന്മാരായി തോനുന്നത്.
ഒന്നുമില്ലേലും ക്രമനമ്പർ എങ്കിലും ഇവർക്ക് മാറ്റി എഴുതിക്കൂടെ എന്ന് തോന്നും ശിവക്ക്.അതിനാൽ തന്നെ മൂന്ന് പേരുടെയും ഉത്തരകടലാസുകളിൽ ഒരെണ്ണം മാത്രമേ ടീച്ചേഴ്സ് നോക്കുകയുള്ളൂ.അതാണേൽ ടീച്ചർ ക്ലാസിൽ വന്നു വിവരിക്കുകയും ചെയ്യും.നാണം കെട്ട് ഇപ്പൊ അവർക്ക് അത് ഒരു പ്രശ്നമേ അല്ല..
സേറയുടെ ഇരിപ്പ് കണ്ടാൽ അറിയാം അവൾ ഈ ലോകം വിട്ട് മറ്റേതോ ലോകത്തൂടെ പറക്കുകയാണെന്ന്.അടുത്ത സെക്കന്റിൽ ശിവ ദീപുവിന്റെ ബുക്കിലേക്ക് ഒന്ന് എത്തി നോക്കി.
കക്ഷി ആൾടെ തന്നെ പടം വരയ്ക്കുന്ന തിരക്കിൽ ആണ്.ആ കോളേജിൽ വര എന്നൊരു കഴിവ് ദൈവം കണ്ടറിഞ്ഞു വാരി കോരി നൽകിയിയിട്ടുണ്ടെങ്കിൽ അത് ദീപുവിനാണ്.
വരയും കുറിയും കഴിഞ്ഞ് ദീപു തന്റെ ബുക്കിലെ പേജ് കീറി എടുത്ത് നല്ല വൃത്തിയായി ഒരു പ്ലെയിൻ ഉണ്ടാക്കി.
പിന്നെ അതിലേക്കു നോക്കി സ്വയം ആത്മ സംതൃപ്തിയടഞ്ഞു.
കൊള്ളാം രാവണന്റെ പുഷ്പക വിമാനം..
പുറത്ത് ഒരു കൂട്ടം പെൺകുട്ടികൾ വരാന്തയിൽ നിൽക്കുന്നത് ജനാലയിലൂടെ കാണുന്നുണ്ട്.അവരിൽ ആ ചുരുണ്ട മുടിക്കാരിയെ ലക്ഷ്യം വച്ച് അവൻ തന്റെ കൈയിലെ പുഷ്പക വിമാനം പറത്തി വിട്ടു.
ഇത് കണ്ടതും ശിവാനി അവന്റെ കാലിൽ ഒരു ചവിട്ടു കൊടുത്തു.അപ്പോഴേക്കും വിമാനം ചുരുണ്ട
മുടിക്കാരിയുടെ തലയിൽ തന്നെ കൃത്യമായി ലാൻഡ് ചെയ്തിരുന്നു.
അവളുടെ കൂട്ടുകാരി അത് എടുത്ത് കൊടുക്കുന്നതും അവൾ ആ പേപ്പർ നിവർത്തി വായിക്കുന്നതും കൂടി കണ്ടതും ശിവാനി പറഞ്ഞു.
ദീപു ആ പെണ്ണ് ആരാ എന്നറിയോ നിനക്ക്..
സ്ഥലം സർക്കിളിന്റെ മോളാ.. മഹാ അഹങ്കാരി.. നീ തീർന്നെടാ മോനേ ദീപു.
യ്യോ.. സത്യാണോടി..
അതേടാ പോത്തേ.. പേടിക്കണ്ട.ഈ ക്ലാസ്സിൽ പത്ത് നാൽപത് ആൺപിള്ളേർക്കിടയിൽ അത് ആര് വിട്ടതാണെന്ന് എങ്ങനെ അവൾ കണ്ട് പിടിക്കാനാ.
അതൊക്കെ സിംപിൾ ആയി അവൾക്ക് പറ്റും ശിവാ..