‘എനിക്ക് വേണം.. ഞാൻ നിന്നെ വിടൂല്ലടാ പട്ടീ..’ മീര അടുക്കളയിൽ നിന്ന് വിളിച്ചു പറഞ്ഞു.
‘ആ. ഇപ്പൊ എങ്ങനെ ഇരിക്കണ് . നീ പെട്ട് മോനെ.. ഇവള് അങ്ങനെ ആരുടേയും മുന്നിൽ വീഴാത്തത് ആണ്.’
‘ആ.. കാണാൻ ഒക്കെ കൊള്ളാം.. പക്ഷെ ഈ സ്വഭാവം..’
പെട്ടെന്ന് മീര അവിടേക്ക് ഓടിയെത്തി അവനെ കെട്ടിപിടിച്ചു നെഞ്ചിൽ തല വച്ചു കിടന്നു പറഞ്ഞു.
‘അതൊക്കെ നമുക്ക് മാറ്റി എടുക്കാടാ ചെക്കാ. ‘
‘ശ്ശേ.. എന്താ ഇത്.. പാറൂ രക്ഷിക്കടീ..’
‘ച്ചേ.. വിട് പെണ്ണേ.. അവന് കുറച്ച് സ്വൈര്യം കൊടുക്ക്.’ പാർവതി അവളെ അവന്റെ ദേഹത്ത് നിന്ന് വലിച്ചു മാറ്റി.
‘പാറുവാ.. ഡാ.. ചെക്കാ. ചേച്ചി നെ പാർവതി ന്ന് വിളിച്ചാൽ മതി.. പണ്ടത്തെ ആൾ അല്ല എന്റെ ചേച്ചി.’
‘അത് പള്ളീൽ പോയി പറഞ്ഞാൽ മതി. എനിക്ക് പാറുവും പാറുവിന് ഞാനും കഴിഞ്ഞേ ആരുമുള്ളൂ.. അല്ലെടീ..’ രോഹൻ അവളെ തോളോട് ചേർത്ത് നിർത്തി പറഞ്ഞു.
‘അതാണ് എന്റെ ചെക്കൻ…’ പാറു അവനെ കൊഞ്ചിച്ചു കൊണ്ട് പറഞ്ഞു.
‘ഓ. പിന്നേം തൊടങ്ങി.. രണ്ടും വന്നേ.. അടുക്കളയിൽ പണിയുണ്ട്.’ അവൾ രോഹനെ പിടിച്ചു വലിച്ചു.
‘നിങ്ങൾ തമ്മിൽ വല്ല മുൻപരിചയം ഉണ്ടോടാ?’ അടുക്കളയിൽ വച്ച് പാർവതി ചോദിച്ചു.
‘ഇല്ലെടീ.. എന്താ?’
‘ അല്ല.. തല്ല് കൂടാൻ ആയിട്ടാണെങ്കിലും നിങ്ങൾ പെട്ടെന്ന് സിങ്ക് ആയല്ലോ.. ഇവൾ അങ്ങനെ ആരുടെ മുന്നിലും വീണുപോകുന്ന ടൈപ്പ് അല്ല..’
‘അത് ഞങ്ങൾ തമ്മിൽ വല്ല മുജ്ജന്മ ബന്ധം വല്ലതും ഉണ്ടാകും.. അല്ലേടാ?’ മീര അവനെ നോക്കി പുഞ്ചിരിച്ചു.
‘ഓഹ്.. എന്താ ഒരു ഇളി.. വേഗം ഫുഡ് എടുക്കെടീ.. വിശന്നിട്ട് വയ്യ..’
അപ്പോഴേക്കും കാളിങ് ബെൽ അടിച്ചു.. രോഹൻ പോയി തുറന്നപ്പോൾ ഷിജു കേറി വന്നു.
‘ഹായ്.. രോഹൻ.. എപ്പോ എത്തി.’
‘ഞാൻ ഇപ്പൊ എത്തിയുള്ളൂ.. ഇവരോട് കത്തിയടിച്ച് ഇരിക്കായിരുന്നു.’
‘ആ.. എങ്കിൽ നമുക്ക് കഴിക്കാം.’
രണ്ടാളും കൈ കഴുകി ഉണ്ണാൻ ഇരുന്നു. അപ്പോഴേക്കും പെണ്ണുങ്ങൾ രണ്ടും കൂടി ഫുഡ് കൊണ്ട് വന്ന് നിരത്തി.
‘നിങ്ങളും ഇരിക്ക്.. ഒരുമിച്ചു കഴിക്കാം.. അല്ലെങ്കി ഇറങ്ങാൻ വൈകും.’
എല്ലാരും കൂടി ഇരുന്ന് കൊണ്ട് ഭക്ഷണം കഴിച്ചു. കഴിക്കുന്നതിനിടയിൽ മീരയുടെയും അവന്റെയും കണ്ണുകൾ ഇടയ്ക്ക് കൂട്ടിമുട്ടി. പരസ്പരം നോക്കി പുഞ്ചിരിച്ചു കൊണ്ട് അവർ കഴിച്ചു.
ഊണ് കഴിഞ്ഞ് രോഹൻ കൊച്ചുങ്ങളുടെ അടുത്തേക്ക് പോയി. രണ്ടിനെയും കൊറേ നേരം കളിപ്പിച്ചു. അവരെ പുതിയ ഡ്രസ്സ് എല്ലാം ഇട്ട് ഒരുക്കിയതും അവനായിരുന്നു. രോഹന്റെ ഈ ചെയ്തികൾ എല്ലാം കണ്ട് മീര അന്തം വിട്ട് നോക്കി നിന്നു.
‘എന്താടീ നോക്കുന്നെ.. അവൻ ഇതിനൊക്കെ മിടുക്കൻ ആണ്.. എന്റെ പിള്ളേരെ ജീവനാ.. അവർക്കും അതെ.’ പാർവതി പറഞ്ഞു.
‘ഇവൻ നല്ല ബേബിസിറ്റർ തന്നെ. അപ്പൊ കെട്ടി കഴിഞ്ഞാ പിള്ളേരെ നോക്കാൻ വേറെ ആളെ നോക്കണ്ട ല്ലേ ചേച്ചി.’
‘വന്ന് വന്ന് പെണ്ണിന് ഇപ്പൊ കെട്ടിന്റെ വിചാരം മാത്രം ഉള്ളു.’ പാർവതി അവളുടെ തലയിൽ കിഴുക്ക് വച്ച് കൊടുത്തു.
‘വാ.. നമുക്ക് ഒരുങ്ങാം.’
അവർ രണ്ടാളും റൂമിലേക്ക് പോയി. ഷിജു ഈ നേരം കൊണ്ട് എല്ലാം പാക്ക് ചെയ്തിരുന്നു.
‘എല്ലാം സെറ്റല്ലേ ചേട്ടാ.’ രോഹൻ കുപ്പിയുടെ കാര്യം ചോദിച്ചു.
‘അതൊക്കെ സെറ്റ് ആണ്. പിന്നെ അവിടെ ഒരു വില്ല ബുക്ക് ചെയ്തിട്ടുണ്ട്. അവിടെ പോകാനുള്ള റൂട്ട് മാപ്പ് മൊത്തം അവർ തരാം എന്ന് പറഞ്ഞിട്ടുണ്ട്.വേഗം ചെന്ന് കിട്ടിയാൽ മാത്രം മതി.’
‘ നല്ല തിരക്ക് ഉള്ള സീസൺ അല്ലെ.. ബ്ലോക്ക് ഇല്ലാതെ എല്ലാ സ്ഥലവും കവർ ചെയ്യാൻ പറ്റുമോന്നാ സംശയം.ആ.. അതവിടെ എത്തിയിട്ട് നോക്കാം..’
എല്ലാരും റെഡി ആയി വന്നു. കൂട്ടുകാരന്റെ എർട്ടിഗയിൽ അവർ സാധനങ്ങൾ എല്ലാം എടുത്ത് വച്ച് പുറപ്പെട്ടു. ഷിജുവും രോഹനും മുന്നിലും ബാക്കി 3 പേരും കുട്ടികളും പിന്നിലും ഇരുന്നു. വിശേഷങ്ങളും തമാശകളും പറഞ്ഞും പാട്ട് പാടിയും പാട്ട് കേട്ടും മയങ്ങിയും അവർ അങ്ങനെ രാത്രിയോടെ ഊട്ടിയിൽ എത്തി. ഇടയ്ക്ക് ചായ കുടിക്കാനും ഭക്ഷണം കഴിക്കാനും എല്ലാം നിർത്തിയത് കൊണ്ട് അവർക്ക് ക്ഷീണം ഉണ്ടായിരുന്നില്ല.