“ആര് നാടകം കളിച്ചു എന്നാ എന്റെ മക്കൾ ഈ പറയുന്നേ?” അച്ഛന്റെ ചോദ്യത്തിന് മുന്നിൽ ഞങ്ങൾ ഒന്ന് കുഴങ്ങി.
“ഞ… ഞങ്ങൾ…” ഞാൻ വീണ്ടും സംശയത്തോടെ പറഞ്ഞു.
“ഉണ്ട…. ഇവിടെ ഇത്രനാളും നാടകം കളിച്ചതും ആളെ പറ്റിച്ചതും നിങ്ങൾ രണ്ടാളും അല്ല… അത് ഞങ്ങളാണ്!!!!” അത്ര നേരം എല്ലാം കേട്ട് ചിരിച്ചോണ്ട് ഇരുന്ന ആമി ഇടപെട്ടു.
“ങേ…” ഞാനും നയനയും ഒരുപോലെ വാ പൊളിച്ചുപോയി.
ഞങ്ങളുടെ ആ നിൽപ്പ് കണ്ട് അമ്മ പറഞ്ഞു തുടങ്ങി.
“ഡാ.. നയനമോളെ ആദ്യമായി കണ്ടപ്പോൾ തന്നെ ഞാൻ ഉറപ്പിച്ചതാ ഇവൾ ആണ് എന്റെ മോളെന്നു. നിന്നോട് അത് അപ്പൊ പറഞ്ഞാൽ നീ ചാടി കടിക്കാൻ വരും അതാ ഞാൻ മിണ്ടാഞ്ഞത്. അന്ന് അവിടെ നിന്നു പോന്നു കഴിഞ്ഞ് പിന്നെ എങ്ങനെ നയനമോളെ കാണും എന്ന് കരുതി ഇരിക്കുവാരുന്നു ഞാൻ അപ്പോഴാണ് ആമിമോൾ കിടന്ന ഹോസ്പിറ്റലിൽ വെച്ച് അവിചാരിതമായി ഞാൻ വീണ്ടും മോളെ കാണുന്നത്. അത് എനിക്ക് ഒരു പിടിവള്ളി ആയിരുന്നു. പിന്നെ നിങ്ങളെ എങ്ങനെ ഒന്നിപ്പിക്കാം എന്നായിരുന്നു എന്റെ ചിന്ത. അന്ന് മോളെ കൊണ്ടുപോയി വീട്ടിൽ ആക്കാൻ പറഞ്ഞത് എന്തിനാരുന്നു എന്നാ നിന്റെ വിചാരം?” അമ്മ പറഞ്ഞു നിർത്തി.
എനിക്ക് തല കറങ്ങുന്ന പോലെ തോന്നി. നയന നാണം കൊണ്ടാണോ പേടി കൊണ്ടാണോ എന്നറിയില്ല ഇളിച്ചു തന്നെ നിക്കുന്നു.
“അന്ന് മോളെ വീട്ടിൽ കൊണ്ടുവന്നു സുരക്ഷിതമായി ആക്കിയപ്പോൾ എനിക്ക് അരവിന്ദിനോട് ഒരു ഇഷ്ടം തോന്നിയിരുന്നു. ഈ ഫസ്റ്റ് ഇമ്പ്രെഷൻ എന്നൊക്കെ പറയും പോലെ. പക്ഷേ അന്നൊന്നും ഞാൻ ഒരു കല്യാണം ആ രീതിയിൽ ഒന്നും ചിന്തിച്ചിരുന്നില്ല. എന്നാൽ എനിക്ക് അങ്ങനെ ചിന്തിച്ചു തുടങ്ങാൻ അധികം നാൾ വേണ്ടി വന്നില്ല.” അച്ഛൻ അച്ഛന്റെ ഭാഗം പറഞ്ഞു.
“ഇനി ഞാൻ പറയും…” ആമി തുടങ്ങി. ” ഏട്ടൻ നയനേച്ചിയെ വീട്ടിൽ ആക്കാൻ പോയപ്പോൾ തന്നെ ഞങ്ങൾ നിങ്ങളുടെ കല്യാണത്തിന് ഉള്ള പ്ലാനിങ് തുടങ്ങി ചെറുതായിട്ട്. അതിന് ആദ്യം വേണ്ടത് നിങ്ങൾ തമ്മിൽ അടുക്കണം. അതിന്റെ ആദ്യത്തെ പടി എന്നോണം ആണ് വല്യമ്മ ചേച്ചിയെ വീട്ടിൽ കൊണ്ട് വിടാൻ പറഞ്ഞത്. അന്ന് മഴ പെയ്യണെ എന്നാരുന്നു വല്യമ്മേടെ പ്രാർത്ഥന. അപ്പൊ നിങ്ങൾക്ക് കൊറച്ചു സമയം കൂടുതൽ സംസാരിക്കാൻ പറ്റുമല്ലോ. അങ്ങനെ ചേച്ചിയെ വീട്ടിൽ കൊണ്ടുപോയി വിട്ട് വന്ന ശേഷം ഈ ആമിമോൾ ചാര പ്രവർത്തനം തുടങ്ങി. ഏട്ടൻ അറിയാതെ തന്നെ ഏട്ടന്റെ എല്ലാ പരിപാടികളും ഞാൻ വീക്ഷിക്കാൻ തുടങ്ങി.” ആമിയും പറഞ്ഞു നിർത്തി.
“അത് കഴിഞ്ഞു വീണ്ടും നയനാമോൾ ഹോസ്പിറ്റലിൽ വന്നപ്പോൾ നിങ്ങൾ തമ്മിൽ ഫോണിൽ സംസാരിക്കാൻ അവസരം കൊടുത്താൽ കൊറേ കൂടി നന്നായിരിക്കും എന്നെനിക്ക് തോന്നിയത്. അത്കൊണ്ടാണ് ഏതോ ഒരു മരുന്നിന്റെ പേര് പറഞ്ഞു നിന്നെ ഞാൻ മോളെ കൊണ്ട് വിളിപ്പിച്ചത്. അന്ന് ഞാൻ നയനാമോളോട് വേഗം തന്നെ വീട്ടിൽ പൊക്കോളാൻ പറഞ്ഞു. പക്ഷേ അവൾ കേട്ടില്ല. പിന്നേം അവിടെ തന്നെ ചുറ്റി പറ്റി നിന്നു. അന്നേ എനിക്ക് മനസിലായി ഇനി അധികം വൈകാതെ തന്നെ നിങ്ങൾ ഒരു വഴി ആകും എന്ന്. അവസാനം ഞാൻ നിര്ബന്ധിച്ചാണ് മോളെ നീ വരുന്നതിനു മുന്നേ വീട്ടിലോട്ട് വിട്ടത്. കാരണം വേറൊന്നും അല്ല എന്നാൽ അല്ലേ എനിക്ക് നിന്റെ മനസ്സിൽ എന്താണെന്നു മനസ്സിലാവു. എന്റെ ഊഹം തെറ്റിയില്ല, അന്ന് ഓടി കിതച്ചു റൂമിലേക്കു വന്ന നീ ആദ്യം തന്നെ തേടിയത് നയന മോളെ ആണ്.” അമ്മ ആ പറഞ്ഞത് കേട്ട് എന്റെ തൊലി ഉരിഞ്ഞു പോയി.
“വീണ്ടും ഞാൻ ചാര പണി തുടങ്ങി. അതിന്റെ ആദ്യത്തെ പടി ആയിട്ടാണ് ഏട്ടന്റെ ഫോൺ ലോക്ക് ഞാൻ കണ്ടു പിടിച്ചത്. അന്ന് ആ ഹോസ്പിറ്റലിൽ വെച്ച് ഫോൺ അൺലോക്ക് ചെയ്തു തന്നപ്പഴേ അതിൽ ഏട്ടൻ അവസാനം നോക്കിയത് ചേച്ചിയുടെ വാട്സാപ്പ് ഡി പി ആണെന്ന് മനസ്സിലായി. അത് ഞാൻ കണ്ടു എന്ന് ഏട്ടനും മനസ്സിലായി. അന്ന് ഏട്ടന്റെ മുഖത്ത് കണ്ട കള്ളത്തരം എനിക്ക് ഇപ്പഴും ഓർമയുണ്ട്. അങ്ങനെ ഇരുന്നപ്പോൾ ആണ് വല്യമ്മ പറഞ്ഞത് ഇനി അഥവാ നിങ്ങൾ തമ്മിൽ കോൺടാക്ട് ഒന്നും ചെയ്തില്ലെങ്കിലോ എന്ന്. അന്നേരം എന്റെ തലയിൽ ഉദിച്ച ഐഡിയ ആയിരുന്നു ഞാൻ തന്നെ ചേച്ചിയുമായി ഏട്ടന്റെ ഫോണിൽ നിന്ന് ചാറ്റ് ചെയ്യുക എന്നത്. അതാകുമ്പോൾ എങ്ങനെ പോയാലും നിങ്ങൾ ഞാൻ ചാറ്റ് ചെയ്തതിന്റെ വാലിൽ പിടിച്ചെങ്കിലും ചാറ്റ് ചെയ്യാതിരിക്കില്ല. എന്റെ ആ ഐഡിയ എന്തായാലും ഫലം കണ്ടു. നിങ്ങൾ ചാറ്റിങ് തുടങ്ങി. പിന്നെ ഞാൻ ഇടയ്ക്കു ഇടയ്ക്ക് ഏട്ടന്റെ ഫോൺ എടുക്കും ലോക്ക് തുറന്നു നിങ്ങളുടെ ചാറ്റ് നോക്കും. എല്ലാം വല്യമ്മ പറഞ്ഞിട്ട് ആയിരുന്നു. അങ്ങനെ അതൊക്കെ ഞാൻ വല്യമ്മയോട് പറഞ്ഞപ്പോൾ ആണ് വല്യമ്മ പറഞ്ഞത് നിങ്ങൾ ഇങ്ങനെ പോയാൽ ഉടനെ ഒന്നും തമ്മിൽ ഇഷ്ടം ആണെന്ന് പറയാൻ പോണില്ല എന്ന്. അങ്ങനെ വല്യമ്മ നേരിട്ട് ഇടപെട്ടു. അത് വല്യമ്മ തന്നെ പറയും.” ആമി പറഞ്ഞു നിർത്തി.
“ഇപ്പൊ എന്റെ മക്കൾക്ക്‌ തോന്നുന്നുണ്ടാവും ഞാൻ എങ്ങനെയാ ഇതിൽ ഇടപെട്ടത് എന്ന് അല്ലേ?” അമ്മയുടെ ആ ചോദ്യം കേട്ട് ഞാനും നയനയും അറിയാതെ തന്നെ തല കുലുക്കി.
“പറയാം.. ഞാൻ വിനയയെയും ആമി മോൾടെ അച്ഛനെയും ആമി മോളെയും കൂട്ടി നയനമോൾടെ വീട്ടിൽ പോയി. എന്തിനാണെന്നോ. നിനക്ക് വേണ്ടി നയനമോളെ പെണ്ണ് ചോദിക്കാൻ.” ഇനി ഞാൻ ഞെട്ടാൻ ഒന്നും ബാക്കി ഇല്ലായിരുന്നു. നയന അവിടെ കിടന്ന കസേരയിലേക്കും ഞാൻ നിലത്തേക്കും ഇരുന്നുപോയി.
“അമ്മയും ബാക്കി എല്ലാവരും കൂടി വീട്ടിൽ വന്നു അതുവരെ ഉണ്ടായത് എല്ലാം ഈ എന്നോട് പറഞ്ഞു. നിങ്ങൾ തമ്മിൽ ഇഷ്ടത്തിൽ ആണെന്ന് ഞങ്ങൾ എല്ലാവർക്കും ഉറപ്പായിരുന്നു. പക്ഷേ രണ്ട് പേരും അത് ഇനിയും തമ്മിൽ പറയാതെ ഇരുന്നാൽ ശെരിയാവില്ല എന്ന് ഞങ്ങൾക്ക് തോന്നി. അതിനായി ഞങ്ങൾ കണ്ടുപിടിച്ച ഒരു നാടകം മാത്രം ആണ് ആ പെണ്ണുകാണൽ. എന്നിട്ടും ഞങ്ങൾക്ക് അത് നടക്കും എന്ന് വല്യ ഉറപ്പ് ഇല്ലായിരുന്നു. പക്ഷേ ഒന്ന് പയറ്റി നോക്കാൻ ഞങ്ങളും തീരുമാനിച്ചു.
വേറൊന്നും കൊണ്ടല്ല, ഞാനായിട്ട് കൊണ്ടുവരുന്ന എല്ലാ ആലോചനയും ഇവൾ തന്നെ എന്തെങ്കിലും കാരണം പറഞ്ഞു മുടക്കും. എന്നാൽ ഇവൾ കൊണ്ടുവരുന്ന ആലോചന നോക്കാം എന്ന് ഞാനും കരുതി. അങ്ങനെയാണ് നയനയെ പ്രഷർ ചെയ്യാനായി ഞാൻ ഒരു കൂട്ടർ പെണ്ണ്കാണാൻ വരുന്ന കാര്യം പറഞ്ഞത്. അത് അവൾ ആദ്യം പറയുന്നത് അരവിന്ദിനോട് ആവും എന്ന് ഞങ്ങൾക്ക് ഉറപ്പായിരുന്നു. അത്പോലെ തന്നെ നടന്നു. നഷ്ടമാവും എന്നൊരു പേടി നിങ്ങൾക്ക് രണ്ടുപേർക്കും ഉണ്ടാക്കുക അത്രേ ഞങ്ങൾ ഉദ്ദേശിച്ചുള്ളൂ. അങ്ങനെ ഒരു പേടി വന്നാൽ എന്തായാലും മനസ്സിലെ സ്നേഹം മറ നീക്കി പുറത്ത് വരും. അത് വിജയിച്ചു.” അച്ഛൻ പറഞ്ഞത് കേട്ട് നയന വിതുമ്പിപോയി.