“ഇതൊക്കെ നാളെ രാവിലെ കോടതിയിൽ എത്തും വക്കീലേ. നിങ്ങളുടെ ഈ അൻസി മാഡം നടത്തിയ എല്ലാ സാമ്പത്തിക ഇടപാടുകളും ഇപ്പോൾ എന്റെ ടീം ഹാക്ക് ചെയ്തു കഴിഞ്ഞു,” എബി തന്റെ ടാബ്ലെറ്റ് അവർക്ക് നേരെ തിരിച്ചു. ഷാഹിർ ഇതിനോടകം വക്കീലിന്റെ വിദേശ അക്കൗണ്ടുകൾ മരവിപ്പിച്ചിരുന്നു.
അൻസി ദേഷ്യം കൊണ്ട് വിറച്ചു. അവൾ തന്റെ ബാഗിൽ നിന്നും ഒരു ചെറിയ പിസ്റ്റൾ പുറത്തെടുത്തു. “എബി! നീ ജീവനോടെ പുറത്തുപോകില്ല!”
പക്ഷേ അൻസി ട്രിഗർ അമർത്തുന്നതിന് മുൻപ് സണ്ണി അവളുടെ കൈക്ക് അടിച്ചു. തോക്ക് ദൂരേക്ക് തെറിച്ചുപോയി. “സ്ത്രീയാണെന്ന പരിഗണന ഇനി പ്രതീക്ഷിക്കണ്ട അൻസി . നിങ്ങൾ എന്റെ കുടുംബത്തെ തകർത്തവളാണ്,” സണ്ണി പല്ലുഞെരിച്ചു പറഞ്ഞു.
അപ്പോഴേക്കും ഹാരിസ് സാറിന്റെ നേതൃത്വത്തിലുള്ള പോലീസ് സംഘം ഗോഡൗൺ വളഞ്ഞു. വക്കീലിനെയും അൻസിയെയും വിലങ്ങു വെച്ച് പുറത്തേക്ക് കൊണ്ടുപോകുമ്പോൾ, എബി രാമകൃഷ്ണനെ ഫോണിൽ വിളിച്ചു.
“സാർ… പേടിക്കണ്ട. ശരണ്യ സുരക്ഷിതയാണ്. ആ വ്യാജ രേഖകളെല്ലാം എന്റെ കയ്യിലുണ്ട്. നിങ്ങൾ നാളെ ഓഫീസിൽ വന്ന് സത്യം പറഞ്ഞാൽ മതി.”
രാമകൃഷ്ണന്റെ മറുപടിയ്ക്കായി കാത്തുനിൽക്കാതെ എബി വർഷയെ വിളിച്ചു. “വർഷേ… വക്കീലിന്റെ കളി അവസാനിച്ചു. ഇനി നമുക്ക് സമാധാനമായി ഉറങ്ങാം.”
ഗോഡൗണിന് പുറത്ത് കടൽക്കാറ്റ് ആഞ്ഞു വീശുന്നുണ്ടായിരുന്നു. എബി തന്റെ ബൈക്ക് സ്റ്റാർട്ട് ചെയ്യുമ്പോൾ സണ്ണി അരികിൽ വന്നു. “എബി… ഇനി നമ്മൾ എങ്ങോട്ടാ?”
“ഇതൊരു തുടക്കം മാത്രമാണ് സണ്ണീ… കൊല്ലം നഗരത്തെ വൃത്തിയാക്കാൻ ഇനിയും ഒരുപാട് ചപ്പുചവറുകൾ ബാക്കിയുണ്ട്.”
രാജ്മോഹന്റെയും വക്കീലിന്റെയും തകർച്ചയ്ക്ക് ശേഷം വർഷയുടെ വിവാഹക്കാര്യത്തിൽ വീട്ടുകാർക്ക് വലിയൊരു സമ്മർദ്ദമുണ്ടായിരുന്നു. നിഖിൽ നേരത്തെ വില്ലൻ പക്ഷത്തായിരുന്നെങ്കിലും, അവസാന നിമിഷം എബിയെ സഹായിച്ചതും രാജ്മോഹന്റെ രഹസ്യങ്ങൾ ചോർത്തി നൽകിയതും പരിഗണിച്ച് എബി തന്നെയാണ് ഈ വിവാഹത്തിന് മുൻകൈ എടുത്തത്. വർഷയുടെ സുരക്ഷയും സന്തോഷവും മുൻനിർത്തി എബി എടുത്ത ആ തീരുമാനം എല്ലാവരെയും അമ്പരപ്പിച്ചു.
കൊല്ലത്തെ പ്രശസ്തമായ ആ ഓഡിറ്റോറിയം വീണ്ടും അണിഞ്ഞൊരുങ്ങി. പക്ഷേ ഇത്തവണ അവിടെ ഭീഷണികളോ പുകബോംബുകളോ ഉണ്ടായിരുന്നില്ല. ഹാരിസ് സാറും ലോപ്പസ് അപ്പൂപ്പനും മുൻനിരയിൽ തന്നെയുണ്ട്. എബിയുടെ നിർബന്ധപ്രകാരം നിഖിലിന് ഒരു അവസരം കൂടി നൽകാൻ വർഷയുടെ കുടുംബം തയ്യാറായി.
നിഖിൽ ഒരു പുത്തൻ വെള്ള ഷർട്ടും മുണ്ടും ധരിച്ച് സ്റ്റേജിൽ നിൽക്കുകയായിരുന്നു. പഴയ നിഗൂഢതകളെല്ലാം മാറി, തന്റെ തെറ്റുകൾക്ക് പ്രായശ്ചിത്തം ചെയ്യാനുറച്ച ഒരുവന്റെ വിനയം അവന്റെ മുഖത്തുണ്ടായിരുന്നു.
വർഷ പട്ടുസാരിയുടുത്ത് സുന്ദരിയായി സ്റ്റേജിലേക്ക് നടന്നു കയറി. അവൾ എബിയെ തിരഞ്ഞു. എബി സ്റ്റേജിന് ഒരു വശത്ത് മാറി നിന്ന് ആ കാഴ്ച നോക്കി പുഞ്ചിരിക്കുകയായിരുന്നു. വർഷയുടെ കണ്ണുകളിൽ ഒരു നിമിഷം സങ്കടം മിന്നിമറഞ്ഞെങ്കിലും, എബിയുടെ ആ ഉറച്ച നോട്ടം അവൾക്ക് ധൈര്യം നൽകി. തന്റെ പ്രണയത്തേക്കാൾ വലിയൊരു കടമയാണ് എബി നിർവ്വഹിക്കുന്നതെന്ന് അവൾക്ക് അറിയാമായിരുന്നു.
നിഖിൽ വർഷയുടെ കഴുത്തിൽ താലി ചാർത്തി.
വിവാഹത്തിന് ശേഷം എല്ലാവരും പിരിഞ്ഞു പോകുമ്പോൾ എബി പുറത്ത് തന്റെ ബൈക്കിന് അരികിൽ നിൽക്കുകയായിരുന്നു.സണ്ണി അങ്ങോട്ട് നടന്നു വന്നു.
“എബി… നീ വലിയൊരു മനസ്സാണ് കാണിച്ചത്. വർഷയെ നിനക്ക് വേണമെങ്കിൽ സ്വന്തമാക്കാമായിരുന്നു. എന്നിട്ടും നീ നിഖിലിനെ തിരഞ്ഞെടുത്തു,” സണ്ണി പതുക്കെ പറഞ്ഞു.
“സണ്ണീ… പ്രണയം എന്ന് പറയുന്നത് ഒരാളെ സ്വന്തമാക്കൽ മാത്രമല്ല. അവൾ സുരക്ഷിതയായിരിക്കണം. നിഖിൽ ഇപ്പോൾ മാറിയിരിക്കുന്നു. അവൻ അവളെ നന്നായി നോക്കും. എനിക്ക് എന്റെ വഴികളുണ്ട്… നിയമത്തിന്റെയും നീതിയുടെയും ഈ വഴിയിൽ എനിക്ക് തനിയെ സഞ്ചരിക്കാനാണ് ഇഷ്ടം,” എബി തന്റെ ഹെൽമെറ്റ് എടുത്തു.