അദ്ധേഹത്തിന്‍റെ കണ്ണുകള്‍ നെവിളില്‍ തറഞ്ഞു.
നെവില്‍ തിരിച്ചു നോക്കിയെങ്കിലും പതിയെ കണ്ണുകള്‍ താഴ്ത്തി. അപ്പോള്‍ അങ്ങേ അറ്റത്ത് ഇരുന്ന സാന്ദ്രയെ അവന്‍ കണ്ടു. അമ്മയോടൊപ്പമാണ് അവള്‍. “സാരമില്ല” എന്ന അര്‍ത്ഥത്തില്‍ അവള്‍ കൈ ഉയര്‍ത്തിക്കാണിച്ചു. നെവില്‍ അപ്പോള്‍ പുഞ്ചിരിക്കാന്‍ ശ്രമിച്ചു.
“ഹിന്ദു മത വിശ്വാസിയാണ് അദ്ദേഹമെങ്കിലും നമ്മുടെ മൊത്തം ഇടവകയുടെയും പ്രാര്‍ത്ഥന ആവശ്യപ്പെട്ടിട്ടുണ്ട്…ദൈവ ചിന്തയും അച്ചടക്കവും ധാര്‍മ്മികതയുമില്ലാത്ത നമ്മുടെ ചില ഇടവകാംഗങ്ങളുടെ ക്രൂര പ്രവര്‍ത്തിയുടെ ഫലമായാണ് ആ കുട്ടിക്ക് ഇതുപോലെയൊരു ദുരന്തനുഭവമുണ്ടാക്കിയത്….”
അദ്ദേഹം വീണ്ടും നെവിലിനെ നോക്കി.
അവന്‍ അദ്ധേഹത്തില്‍ നിന്നും കണ്ണുകള്‍ മാറ്റി സാന്ദ്രയെ നോക്കി.
“സാരമില്ല,” എന്ന അര്‍ത്ഥത്തില്‍ അവള്‍ വീണ്ടും അവന്‍റെ നേരെ കൈ കാണിച്ചു.
“നമുക്ക് ആരാധന ആരംഭിക്കാം…”
റവറന്‍റ്റ് ഡെറിക്സണ്‍ മുമ്പിലിരിക്കുന്ന വിശ്വാസികളെ മൊത്തത്തില്‍ ഒന്ന് നോക്കിയതിന് ശേഷം പറഞ്ഞു.
അപ്പോള്‍ ക്വയര്‍ അംഗങ്ങള്‍ മുമ്പോട്ട്‌ വന്നു. ക്രീം, ഇളം മഞ്ഞ നിറത്തില്‍ കസ്സോക്കും സര്‍പ്ലീസും അവര്‍ ധരിച്ചിരുന്നു. സ്ത്രീകള്‍ സ്കാര്‍ഫും.
ഏകദേശം പന്ത്രണ്ടോളം ആളുകള്‍ ഉണ്ടായിരുന്നു ക്വയറില്‍.
“ഗോഡ്!”
പിമ്പില്‍ നിന്നും ഒരു സത്രീസ്വരം നെവില്‍ കേട്ടു.
“അതാരാ മിഡിലില്‍ നില്‍ക്കുന്ന ആ സുന്ദരി….?”
“ജീസസ്!”
മറ്റൊരു സ്വരം അവന്‍ പിമ്പില്‍ നിന്നും കേട്ടു.
“ഇത്രയും സൌന്ദര്യമോ? ഈസ് ഷി മേഡ് ഓഫ് ഗോള്‍ഡ്‌?”
നെവില്‍ തല തിരിച്ചു പിമ്പോട്ടു നോക്കി.
പിന്‍ നിരയില്‍ ഇരുന്ന ആസ്ത്രീകളെ അവന്‍ മുമ്പ് കണ്ടിട്ടില്ല. അവന്‍ നോട്ടം അവിടെ നിന്നും പിന്‍വലിച്ചു.
“ആരാ അത്?”
അവര്‍ വീണ്ടും ചോദിക്കുന്നത് കേട്ടു.
“ഹെലന്‍….”
കാതറിന്‍ പിമ്പോട്ട് തിരിഞ്ഞ് അവരോട് പറയുന്നത് നെവില്‍ കേട്ടു.
“ഹെലന്‍ ജൊഹാന ഡെറിക്സണ്‍… റവറന്‍റ്റ് ഡെറിക്സണ്‍ എമ്മെറ്റിന്‍റെ മകള്‍…”
നെവില്‍ ആദ്യം അദ്ഭുതപ്പെട്ട് മമ്മയെ നോക്കി.
പിന്നെ ക്വയര്‍ ഏരിയായിലേക്കും.
അവിടെ ക്വയര്‍ ഗ്രൂപ്പിന്‍റെ മദ്ധ്യത്തില്‍ ഹെലന്‍ നില്‍ക്കുന്നത് അവന്‍ കണ്ടു.
ഹെലന്‍ ജൊഹാന ഡെറിക്സണ്‍….
[തുടരും]
