അടുത്തേക്ക് വന്ന അവൾ എന്നെ കണ്ട് സന്തോഷത്തോടെ എന്നെ നോക്കി
ഇക്കാ… വന്നിട്ടെന്താ വിളിക്കാഞ്ഞേ…
നീ അകത്തുണ്ടെങ്കിൽ കയറുമ്പോ കാണാന് കരുതി… അല്ല ഇങ്ങനെ തന്നെ പോവുകയാണോ എന്താ പരിപാടി…
എന്ത് പരിപാടി… ഇങ്ങനെ ഒക്കെ അങ്ങ് പോണു…
അവൾ ബോൾ വാങ്ങിവെച് കൈയ്യിലെ നീഡിൽ മാറ്റി പഞ്ഞി വെച്ചു എഴുനേറ്റുകൊണ്ട്
അവൻ വിളിക്കാറില്ലേ…
(അവളുടെ മുഖത്ത് നാണം നിറഞ്ഞു) മ്മ്…
പറഞ്ഞോ…
എന്ത്…
എല്ലാരും പൊട്ടൻ മാരാണെന്ന തോന്നാലുണ്ടോ നിങ്ങക്ക് രണ്ടാൾക്കും…
ഇളിഞ്ഞ ചിരിയോടെ എനിക്ക് പാക്കറ്റ് ജ്യൂസ് എടുത്ത് തന്നു
ബിച്ചുവിന്റെ കല്യാണം ഉറപ്പിച്ചു…
മ്മ്… പറഞ്ഞു…
ആര്…
അത്…
പറ…
പോ ഇക്കാ കളിയാക്കാതെ…
ഞങ്ങളെപ്പോഴാ വീട്ടിൽ വരണ്ടേ…
എന്തിന്…
ചായകുടിക്കാൻ…
എപ്പോ വേണെങ്കിലും വരാലോ…
ഒന്നങ്ങു തന്നാലുണ്ടല്ലോ… പൊട്ടൻ കളിക്കുന്നോ…
(ചളിപ്പ് മറക്കാൻ വിഷയം മാറ്റാൻ എന്നപോലെ) ഇതെന്താ ക്യാമറ ഒക്കെയായി…
അത് ആ പ്രാങ്കൻ മാരുടെയാ… (ക്യാമറ കൈയിൽ കൊടുത്തു) ബ്ലഡ് കൊടുക്കുന്ന ആ നാലുപേരുടെയും ഫോട്ടോ ഒന്നെടുത്തേ…
അവൾ ക്യാമറയുമായി പോയി അവരുടെ ഫോട്ടോ എടുത്ത് ക്യാമറ തിരികെ തന്നു
എന്താ നിങ്ങളെ തീരുമാനം…
അറിയില്ല… ആദിക്ക ഒന്നും പറയുന്നില്ല…
നീയും പറയുന്നില്ലല്ലോ…
ചിരിയോടെ നിൽക്കുന്ന അവളെ നോക്കി
കൊല്ലമെത്രയായിന്ന് വല്ല ബോധവുമുണ്ടോ രണ്ടാൾക്കും… ഇങ്ങനെ ക്യാമ്പും സംസാരോം കൊണ്ട് പോയാൽ മതിയോ…
അത്… ഇക്കാ… ഞാനെങ്ങനെ…
നിങ്ങൾ തീരുമാനിക്കുന്നെങ്കിൽ തീരുമാനിക്ക്… വയസ്സ് കൂടി വരുകയാ രണ്ടാൾക്കും… ഇനിയും ഇങ്ങനെ പരസ്പരം പറയാതെ എത്ര കാലം കൊണ്ടുപോവാനാ പ്ലാൻ…
ഇക്കാ… അത്…
നോക്ക് ഫാരീ… ഇനിയും ഇങ്ങനെ കൊണ്ടുപോയാൽ ശെരിയാവില്ല… ബിചൂന്റെ നിശ്ചയം വരെ നിങ്ങൾക്ക് സമയമുണ്ട് അത് കഴിഞ്ഞാൽ അന്ന് ഞങ്ങൾ വീട്ടിലേക്ക് വരും പറഞ്ഞില്ലെന്നു വേണ്ട…
അള്ളോഹ്… അത് ഈ ഞായറാഴ്ചയല്ലേ…
അതേ… അന്ന് നിനക്കെന്തേലും പരിപാടിയുണ്ടോ…
ഡ്യൂട്ടിയുണ്ട്…
അന്ന് ലീവ് ആക്ക്…
എന്നാലും ഇത്ര പെട്ടന്ന്…
പെട്ടന്നോ… കൊല്ലം എത്രയായിന്ന് വല്ല ബോധവുമുണ്ടോ…
അത് ഇക്കാ…
എന്തേ അവനെ ഇഷ്ടമല്ലെന്നുണ്ടോ…
അള്ളോഹ്… അതല്ല…
പിന്നെ…
പെട്ടന്ന് വീട്ടിൽ പറയാൻ ഒക്കെ ഇത്തിരി സമയം…
ബെസ്റ്റ്… കൊല്ലമിത്ര ആയിട്ട് തമ്മിൽ ഇഷ്ടമാണെന്ന് പറയാത്ത നിങ്ങളിനി വീട്ടിൽ പറയുന്നതും കാത്തിരുന്നാൽ ഉപ്പാപ്പേം ഉമ്മാമേം ആവണ്ട വയസിൽ കല്യാണം കഴിപ്പിക്കേണ്ടി വരും… വീട്ടിലൊക്കെ ഞങ്ങൾ പറഞ്ഞോളാം… നീ ഞാറാഴ്ച വീട്ടിലുണ്ടായാൽ മതി…
(മുഖത്ത് നിറഞ്ഞുവന്ന ടെൻഷനോടെ) സമ്മതിക്കുമോന്നറിയില്ല…
സമ്മതിച്ചില്ലേൽ എന്ത് ചെയ്യും…
അറിയില്ല…
ഒളിച്ചോടുമോ…
ഞാൻ പറയുന്നത് കൊണ്ടൊന്നും തോന്നരുത്…
ഇല്ല പറ…
ചിരിക്കില്ലെങ്കിലും അടുത്തിരുത്തി നല്ല വാക്ക് പറഞ്ഞില്ലെങ്കിലും എപ്പോഴും ഗൗരവത്തിലാണെങ്കിലും ഞങ്ങൾക്ക് ഉപ്പ ഒരു കുറവും വരുത്തിയിട്ടില്ല… ഉപ്പ ഒരു പാട് കഷ്ടപെട്ടാ ഞങ്ങളെ വളർത്തിയത്… ഉപ്പാക്ക് വേണ്ടി ഉപ്പ ഒന്നും ചെയ്യാറുമില്ല… ഞങ്ങളെ അത്രയും സ്നേഹിക്കുന്ന ഞങ്ങൾക്കുവേണ്ടി ജീവിക്കുന്ന ഉപ്പാനെ നാണം കെടുത്തിയോ ഉപ്പാന്റെ മനസ് വേദനിപ്പിച്ചോ ഞാനിറങ്ങിവരില്ല… ഉപ്പ സമ്മതിക്കുമെന്നെനിക്ക് തോന്നുന്നില്ല അതുകൊണ്ടാ ആദിക്കനോട് ഞാൻ ഇഷ്ടമാണെന്നു പറയാത്തെ… വീട്ടിൽ കല്യാണ കാര്യം പറഞ്ഞപ്പോ ഒരു വർഷം കൂടെ ജോലി ചെയ്തിട്ട് മതി എന്ന് ഉമ്മാനോട് പറഞ്ഞു നിൽക്കുകയാ ഞാൻ… ആദിക്കാനേ എനിക്കിഷ്ടമാ… ഇക്കാന്റെ സ്ഥാനത് വേറൊരാളെ കാണാനും എനിക്ക് പറ്റില്ല… ഉപ്പാനോടോ ഉമ്മാനോടോ ഇക്കാനോടോ ആദിക്കാന്റെ കാര്യം പറയാനുള്ള ധൈര്യമെനിക്കില്ല… എനിക്കിഷ്ടമായാലും ഇല്ലെങ്കിലും ഉപ്പ പറയുന്ന ആളെ മാത്രമേ ഞാൻ കല്യാണം കഴിക്കൂ… അത് ആദിക്ക ആകണമെന്ന് എനിക്ക് ആഗ്രഹവുമുണ്ട്… ഉറപ്പില്ലാത്തൊരു കാര്യത്തിൽ ആഗ്രഹം കൊടുക്കാൻ എനിക്ക് പറ്റാത്തോണ്ടാ ഞാൻ ആദിക്കാനോട് ഇഷ്ടമാണെന്നു പറയാത്തത്… എപ്പോഴും മറ്റുള്ളവരുടെ കാര്യങ്ങൾക്ക് ഓടി നടക്കുന്ന ആദിക്കാന്റെ ആ നല്ല മനസ് വേദനിപ്പിച്ചാൽ പടച്ചോൻ പോലുമെനോട് പൊറുക്കില്ല… പടച്ചോനോട് തേടുകയല്ലാതെ എന്ത് ചെയ്യണമെന്നെനിക്കൊരു പിടിയുമില്ല…
തല കുനിച്ചു നിൽക്കുന്ന അവൾ കണ്ണുനീര് തുടക്കുന്ന അവളുടെ തലയിൽ തലോടി
വെറുതെ ഓരോന്നാലോചിച്ചു വിഷമിക്കണ്ട… നിങ്ങൾ ക്യാമ്പും കാര്യങ്ങളും ആയി ഹാപ്പിയായിട്ടിരിക്ക്… എല്ലാം പടച്ചോന്റെ വിധി പോലെ നടക്കും… മോള് സന്തോഷമായിട്ടിരിക്ക് പടച്ചോൻ നല്ലതെ വരുത്തൂ… പിന്നെ നിന്റെ ആദിക്കാനോട് ഞാനീ ചോദിച്ചതും പറഞ്ഞതുമൊന്നും പറയാൻ നിൽക്കണ്ട…
മ്മ്…
അവളോട് യാത്ര പറഞ്ഞു അവിടുന്ന് ഇറങ്ങി പുറത്തേക്ക് വരുന്നതിനിടെ ബിച്ചുവിന്റെ കാൾ വന്നു
അവൻ പറഞ്ഞ കാര്യങ്ങൾ കേട്ട് ഒക്കെ പറഞ്ഞു പ്രിയയെ വിളിച്ചു
ഹലോ…
നിന്റെ അടുത്ത് ആരേലുമുണ്ടോ…
ഉണ്ട്… എന്തേ…
നീ ഒന്ന് മാറി നിൽക്ക്…
അവൾ ആരോടോ പുറത്ത് പോവാൻ പറഞ്ഞു
പറഞ്ഞോ…
ഡി വൈ എസ് പി ജയിംസ് ആരാ…
ഈ കേസിൽ ഏന്റെ ടീം മെമ്പറാണ്… എന്തേ…
ആളെങ്ങനെ…
ഒരു കറപ്ഷൻ ഇല്ലാത്ത ഓഫിസറാണ്… ജയിംസ് ഒരിക്കലും അങ്ങനെ ചെയ്യുമെന്നെനിക്ക് തോന്നുന്നില്ല… ജയിംസിന്റെ തിയറികളും കണ്ടെത്തലുകളും ഈ കേസിൽ ഒരുപാട് ഹെല്പ് ചെയ്തിട്ടുണ്ട്… അങ്ങനെ ചെയ്യാനായിരുന്നെങ്കിൽ ജയിംസിന് ആ തെളിവുകൾ അവർക്ക് കൊടുത്താൽ മതിയായിരുന്നു…
ഉറപ്പാണോ…
നൂറ് ശതമാനം…
എങ്കിൽ നീ ജയിമ്സിനെ കൂട്ടി ഞാനയക്കുന്ന ലൊക്കേഷനിലേക്ക് വാ… കാര്യമൊന്നും പറയണ്ട വേറെ ആരും വേണ്ട…
ശെരി…
ഫോൺ വെച്ച് അവന്മാരെ നോക്കി
നിങ്ങളെ കൈയിൽ വണ്ടിയുണ്ടോ…
ഉണ്ടേട്ടാ…
എനിക്ക് കുറച്ച് പ്രിന്റ് ഔട്ട് എടുക്കാൻ ഉണ്ടായിരുന്നു ഒന്ന് കൂടെ വരാമോ…
അതിനെന്താ…
അവരുടെ വണ്ടിയിൽ കയറി ക്യാമറ അവരുടെ കൈയിലേക്ക് കൊടുത്തു
നിങ്ങളെ പേരെന്താ…
ശാമിൽ, അനൂപ്, ആഷിക്, കലിം
ഏന്റെ പേര് ഷബിൻ നിങ്ങളുടെ ഈ പ്രായത്തിൽ ഉപദേശം ബോറു പരിപാടിയാണെന്നറിയാം ഞാൻ പറയാൻ പോകുന്നത് ഉപദേശമായി എടുക്കണ്ട ഏന്റെ അഭിപ്രായം മാത്രമായി കണ്ടാൽ മതി സ്വീകരിക്കുന്നതും നിരസിക്കുന്നതും നിങ്ങളുടെ ഇഷ്ടം… നിങ്ങൾ ഇന്ന് കാലത്ത് ചെയ്ത കാര്യം നിങ്ങൾ നല്ല ഉദ്ദേശത്തോടെ ചെയ്തതാണ് പക്ഷേ അതൊരു ബാഡ് മെസ്സേജ് നിങ്ങളുടെ കാഴ്ചക്കാർക്ക് കൊടുക്കുന്നുണ്ട്…
മനസിലാവാതെ അവരെന്നെ നോക്കി
ഒരു ആക്സിഡന്റ് കണ്ടാൽ അത് നിങ്ങളെ പോലുള്ളവർ പ്രാങ്ക് ചെയ്യുന്നതാണോ അല്ലെങ്കിൽ റിയൽ ആണോ എന്ന് മനസിലാവാത്ത അവസ്ഥ ഇപ്പോഴുണ്ട്… അങ്ങനെ ഒരു സാഹചര്യത്തിൽ ക്യാമറക്ക് മുന്നിൽ ഇതുപോലുള്ള കാര്യങ്ങൾ ചെയ്യാൻ ആഗ്രഹിക്കുന്ന ചെറിയൊരു ശതമാനം ആളുകൾ ഒരാക്സിഡന്റ് കണ്ടാൽ നിൽക്കുമെങ്കിലും ക്യാമറക്ക് മുന്നിൽ ഇതുപോലുള്ള കാര്യങ്ങൾ ചെയ്യാൻ ആഗ്രഹിക്കാത്ത വലിയൊരു ശതമാനം ജനങ്ങൾ തിരക്കുകൊണ്ടോ കോമാളി ആവാൻ താല്പര്യമില്ലാത്തതുകൊണ്ടോ ആക്സിഡന്റ് ആണോ പ്രാങ്ക് ആണോ എന്നറിയാതെ ആക്സിഡന്റുകളെ പ്രാങ്കെന്നു കരുതി മുഖം തിരിച്ചു പോവും…