അവനുമായി അങ്ങനത്തെ കുറച്ചു കാര്യങ്ങൾ സംസാരിച്ചു നിന്ന ശേഷം ഞാൻ ആന്റിയോട് ഈ കാര്യത്തെ പറ്റി പറയാനായി ലിവിങ് റൂമിലേക്ക് വീണ്ടും ഇറങ്ങി ചെന്നു.
ഞാൻ കിച്ചുവിന് കാറിന്റെ താക്കോൽ കൊടുക്കുമോ എന്ന് ചോദിക്കാനായി ചെന്നപ്പോൾ ആന്റി ആദ്യമൊന്നും സമ്മതിച്ചിരുന്നില്ല.
“ഏയ്…ഇല്ല…അവന് അതിനുള്ള പക്വതയൊന്നും ആയിട്ടില്ല.”
എന്നായിരുന്നു അവരുടെ മറുപടി.
പക്ഷെ, കിച്ചുവിന് ഇതിന് മുൻപ് കാർ ഓടിച്ച് എക്സ്പീരിയൻസ് ഉണ്ട്, ലൈസൻസ് ഒക്കെ ഉള്ളതല്ലേ, അവനെ ഇങ്ങനെ പുറത്തേക്ക് അധികം വിടാതെ ഇരുന്നാൽ ഭാവിയിൽ അവനത് ദോഷം ചെയ്യിലെ എന്നൊക്കെ ഞാൻ മാന്യമായി പറഞ്ഞ് നോക്കിയപ്പോൾ ഒടുവിൽ ആന്റി മനസ്സിലാമനസ്സോടെ സമ്മതം മൂളി.
“പക്ഷെ മോനെ, അവന് എന്തെങ്കിലും പറ്റിയലോ…”
ഒറ്റ മകനുള്ള ഒരമ്മയുടെ കരുതിലോടെ ആന്റി അത് എന്നോട് ചോദിച്ചു.
“ഏയ്… കാറിൽ അല്ലെ ആന്റി അതോർത്തു പേടിക്കൊന്നും വേണ്ട. സ്കൂട്ടറാണ് അതിലും അപകടം പിടിച്ച സാധനം. ഇതാവുമ്പോൾ കിച്ചു പതിയെ ഓടിച്ച് സേഫ് ആയിട്ട് മടങ്ങി വന്നോളും..”
“അഹ്…എന്നാലും…”
“സീമയാന്റി പേടിക്കണ്ട. ഒന്നുമില്ലെങ്കിലും അവന് പത്തൊൻപത് വയസ്സായില്ലേ… ചെറിയ കുട്ടി ഒന്നുമല്ലലോ.”
പാവം. എനിക്ക് മനസ്സിലാവും അവരുടെ മനസ്സിലെ വിഷമം. കാരണം, കിച്ചുവിന് എന്തെങ്കിലും പറ്റി കഴിഞ്ഞാൽ പിന്നെ അവർ ഈ വീട്ടിൽ തനിച്ചാവും എന്നുള്ള ഒരുതരം പേടിയാണ് ആന്റിയുടെ ഉള്ളിൽ.
“അല്ല? അവൻ ശരിക്കും എങ്ങോട്ടേക്കു പോകുന്നെയെന്നാ പറഞ്ഞെ?”
ഒടുവിൽ കാറിന്റെ കാര്യം പറഞ്ഞ് സെറ്റ് ആക്കിയ ശേഷം ആന്റി എന്നോടത് ചോദിച്ചു.
“അ… അത്… ആന്റി…”
ഞാൻ പതുക്കെ ചുറ്റും നോക്കി, മുകളിൽ നിന്നും കിച്ചു ഞങ്ങളെ നോക്കുന്നുമൊന്നുമില്ലലോ എന്ന് ഉറപ്പുവരുത്തിയ ശേഷം അവരുടെ അടുത്തേക്ക് ഒരല്പം കൂടി നീങ്ങിയിരുന്നു.
“ആന്റി… ഞാൻ ഇതൊരു രഹസ്യമായി പറയാം. കിച്ചു അറിഞ്ഞാൽ എന്നെ കൊല്ലും. അതുകൊണ്ട് ഞാൻ പറഞ്ഞതാണെന്ന് കിച്ചുവിനോട് പറയരുത്… പ്ലീസ്…”
ഞാൻ ഒരു പാവത്തെപ്പോലെ അഭിനയിച്ചു.
എന്റെ ഈ പെട്ടെന്നുള്ള ഭാവമാറ്റവും ഗൗരവവും കണ്ട് ആന്റി ഒന്ന് പരിഭ്രമിച്ചു.
“എന്താ വിശാലേ? നീ എന്നെ പേടിപ്പിക്കാതെ കാര്യം പറ.”
“അത്… കിച്ചു ഒരു പെൺകുട്ടിയുമായിട്ട് കറങ്ങാൻ പോകുന്നതാ.”
“പെൺകുട്ടിയോ? ഏത് പെൺകുട്ടി?”
അതിന്റെ സത്യാവസ്ഥ അറിയാനുള്ള ആകാംഷയിൽ ആന്റി എന്നോട് ചോദിച്ചു.
“ഞങ്ങടെ ക്ലാസ്സിൽ പഠിക്കുന്ന ഒരു കുട്ടിയാണ്, പേര് അഞ്ജലി. കിച്ചുവിന് ആണെങ്കിൽ അവളെ ഭയങ്കര ഇഷ്ടമാ…”
“അത് ശരി…ഈ ലോകമൊന്നും ഞാൻ അറിയുന്നില്ലലോ.. ആഹാ എന്നിട്ട്, ബാക്കി കേൾക്കട്ടെ?”
“അതുകൊണ്ട് ഇന്ന് അവൾ അവനെ പുറത്തേക്ക് വിളിച്ചതാ. ഒന്ന് കറങ്ങാൻ പോവാനായിട്ട്. അമ്മയോട് പറഞ്ഞാൽ സമ്മതിക്കില്ല എന്ന് കരുതിയാ എന്നോട് വണ്ടിയുടെ കാര്യമൊക്കെ ആന്റിയോട് ചോദിക്കാൻ പറഞ്ഞത്.”
ഞാൻ പറഞ്ഞത് കേട്ട് സീമ ആന്റിയുടെ മുഖത്ത് ആദ്യം ഒരു അമ്പരപ്പും, പിന്നീട് സ്വന്തം മകൻ വളർന്നു എന്ന തിരിച്ചറിവിലുള്ള ഒരു ചെറിയ പുഞ്ചിരിയും വിരിഞ്ഞു.
“ആഹാ… ഇതിന്റെ ഇടയിൽ ഇത്രയൊക്കെ കാര്യങ്ങൾ നടന്നിട്ടാണോ അവൻ എന്നോട് ഇതൊക്കെ ഒളിച്ചുവെച്ചത്… അപ്പൊ വിശാലിനോട് കിച്ചു ഇതൊക്കെ പറയുന്നുണ്ടല്ലേ?” ആന്റി എന്റെ മുഖത്തേക്ക് നോക്കി ചോദിച്ചു.
“പിന്നല്ലാതെ… ഞങ്ങൾ തമ്മിൽ പിന്നെ കട്ട ഫ്രണ്ട്ഷിപ്പ് അല്ലെ… മാത്രമല്ല അമ്മമാരോട് അവരുടെ പ്രണയങ്ങളെ പറ്റി പറയാൻ ഏതൊരു മക്കൾക്കും മടിയും, നാണവും ഒക്കെ കാണും. അവനത് കൊണ്ടാവും ആന്റിയോട് അത് പറയാതെ ഇരുന്നത്.”
“മ്മ്… ശരിയാണ്. പിന്നെ മോൻ പറഞ്ഞത് ഒരു കണക്കിന് നല്ലതാ… അവൻ ഇങ്ങനെ വീട്ടിൽ തന്നെ ഇരുന്നാൽ എങ്ങനാ… എന്തായാലും വിശാൽ ഇത് എന്നോട് തുറന്നു പറഞ്ഞത് നന്നായി. താങ്ക്യൂ…”