അവൻ കയറിച്ചെല്ലുമ്പോ ഉപ്പ ഹുസൈൻ ഹാജി ടേബിളിൽ ചപ്പാത്തി കഴിക്കുകയാണ്.. ഉമ്മയും അടുത്തുണ്ട്..കബീർ ഒരു കസേര വലിച്ചിട്ട് ഉപ്പയുടെ അടുത്തിരുന്നു..
“” മോളേ നദീറാ…കബീറ് വന്ന്ക്ക്ണ്…അവന് ചോറെടുത്തോ…””..
ഉമ്മ അടുക്കളയിലേക്ക് വിളിച്ച് പറഞ്ഞു.. അടുക്കള ഭരണം ഇപ്പോ നദീറയാണ്..അവള് വന്നേ പിന്നെ ഉമ്മാക്ക് റെസ്റ്റാണ്..
നദീറ ചോറും കറികളും ടേബിളിൽ നിരത്തി അടുക്കളയിലേക്ക് തന്നെ പോയി..കബീറിന് ഉമ്മ വിളമ്പിക്കൊടുത്തു.. കഴിക്കുന്നതിനിടയിൽ അവൻ ഉമ്മാനോടും, ഉപ്പാനോടും ജമാലിന്റെ കാര്യം പറഞ്ഞു..
മുഴുവൻ കേട്ടപ്പോ ഉപ്പാക്ക് സന്തോഷമാണ് ഉണ്ടായത്..നദീറക്കൊരു ജീവിതമില്ലാത്തത് അയാൾക്ക് വലിയ സങ്കടമായിരുന്നു..ജമാലിനെ അവർക്കെല്ലാം ശരിക്കറിയാം..പലപ്പോഴും ഇവിടെ വന്നിട്ടുമുണ്ട്.. ഈ നാട്ടിലെ വലിയ പണക്കാരനുമാണ്..നദീറയെ അവൻ പൊന്നുപോലെ നോക്കിക്കോളും..
“മോളോടൊന്ന് ചോദിക്കണ്ടേ
ഇക്കാ… ?..
അവളുടെ അഭിപ്രായവും ഒന്നറിയണ്ടേ… ?”..
നദീറ ഇവിടുന്ന് പോകുന്നതിൽ വിഷമമുണ്ടെങ്കിലും, അവൾക്കൊരു നല്ല ജീവിതം കിട്ടുന്നതിൽ ഉമ്മാക്കും സന്തോഷമാണ്..
“” ഉം… ചോദിക്കണം..അവളുടെസമ്മതാ ആദ്യമറിയേണ്ടത്… നീ സാവകാശം അവളോട് കാര്യം പറ… ഇതറിയുമ്പോ ഒരു കരച്ചിലും പിഴിച്ചിലുമൊക്കെ ഉണ്ടാവും… എന്നാലും നീ തഞ്ചത്തിൽ കാര്യം പറഞ്ഞ് മനസിലാക്ക്… ജമാലിനെ മോൾക്കും അറിയുന്നതാണല്ലോ… “..
ഹുസൈൻ ഹാജി ആ ചുമതല ഭാര്യയെ ഏൽപിച്ചു..
“” ഞാൻ സംസാരിക്കാം ഇക്കാ… ഇത് കേൾക്കുമ്പോ എന്താണാവോ മോള് വിചാരിക്കുക… ?””..
അടുക്കളയിൽ നിന്ന് എല്ലാം കേട്ട നദീറക്ക് തനിക്കുണ്ടായ വികാരം എന്താണെന്ന് മനസിലായില്ല.. ദേഷ്യമാണോ,സങ്കടമാണോ, സന്തോഷമാണോ,ഞെട്ടലാണോ എന്നറിയില്ല.. ഈ വാർത്ത തീർത്തും അപ്രതീക്ഷിതമായിരുന്നു.. ഒരു രണ്ടാം വിവാഹം അവൾ ചിന്തിച്ചിട്ട് കൂടിയില്ലായിരുന്നു..
ജമാലിക്കയെ അടുത്തറിയാം.. സീനത്ത് അടുത്ത കൂട്ടുകാരിയായിരുന്നു… രണ്ട് കുടുംബങ്ങളും സൗദിയിൽ തന്നെയായിരുന്നു..രണ്ട് കുടുംബങ്ങളും പരസ്പരം ഫ്ലാറ്റുകളിൽ പോയി താമസിച്ചിട്ടുണ്ട്.. അനേകം യാത്രകൾ ഒരുമിച്ച് നടത്തിയിട്ടുണ്ട്..
പക്ഷേ,ജമാലിക്കയെ വേറൊരു രീതിയിൽ ഇത് വരെ കണ്ടിട്ടില്ല.. വളരെ മാന്യമായ പെരുമാറ്റമാണ്.. ഇക്കയുടെ ഭാര്യയാവുക എന്നാൽ അതൊരു ഭാഗ്യം തന്നെയാണ്.. സീനത്തിനെ ഇക്ക സ്നേഹിച്ചത് താൻ കണ്ടറിഞ്ഞതാണ്.. നല്ല സുമുഖനും,ആരോഗ്യവാനുമാണ് ഇക്ക.. നല്ല പണക്കാരനും.. തന്നെ പൊന്നുപോലെ നോക്കുമെന്നുറപ്പാണ്..തന്റെ മക്കളെ സ്വന്തം മക്കളായും ഇക്ക പോറ്റും..
ഒരു രണ്ടാം വിവാഹം ഉണ്ടെങ്കിൽ ജമാലിക്കയേക്കാൾ യോഗ്യനായ വേറൊരാളില്ല..
പക്ഷേ,……
ഇപ്പോ തനിക്കതിനാവുമോ.. ?..
ഒരു വർഷം മുൻപ് വരെ ഇക്കയിത് പറഞ്ഞിരുന്നെങ്കിൽ മറുത്തൊന്ന് ചിന്തിക്കാതെ താൻ സമ്മതം മൂളിയേനെ..പക്ഷേ, ഇനിയതിന് പറ്റുമോ… ?.
ഒരു വർഷമായി മനസിലിട്ട് ചിന്തിച്ച് കൂട്ടിയും കുറച്ചും നടക്കുകയാണ്.. ഇപ്പഴും ഒരു തീരുമാനത്തിലെത്തിയിട്ടില്ലെങ്കിലും അതല്ലാതെ വേറൊരു വിവാഹത്തിന് സമ്മതം മൂളാനാവില്ല..അത് നടക്കുമോന്നറീല.. വീട്ടുകാര് സമ്മതിക്കുമോന്നറീല..അത് ശരിയാണോന്നും അറീല..പക്ഷേ, കഴിഞ്ഞ ഒരു വർഷമായി താൻ മനസിൽ കൊണ്ട് നടക്കുകയാണ്.. ഒരാളോടും പറഞ്ഞിട്ടില്ല.. അറിയേണ്ടവൻ അറിഞ്ഞിട്ടുമില്ല.. പറയാൻ കഴിഞ്ഞിട്ടുമില്ല.. പറയാൻ പലവട്ടം ഒരുങ്ങിയതാണ്.. മനസ് തുറക്കാൻ പലവട്ടം അടുത്തേക്ക് ചെന്നതാണ്.. കഴിഞ്ഞില്ല.. കുടുംബം,സമൂഹം അങ്ങിനെ പ്രതിബന്ധങ്ങൾ ഒത്തിരിയുണ്ട്..
ഭർത്താവിന്റെ അനിയനാണെങ്കിലും കബീറിനെ മനസിൽ പ്രതിഷ്ഠിച്ച് പോയി നദീറ..അവളറിയാതെ..അവൻ പോലുമറിയാതെ.. ഉറക്കം വരാത്ത രാവുകളിൽ പല മുഖങ്ങൾ മനസിലൂടെ മിന്നിമാഞ്ഞെങ്കിലും അതിലെല്ലാം മിഴിവോടെ നിന്നത് കബീറിന്റെ മുഖമാണ്.. ഒരു ഭർത്താവ് ചെയ്യേണ്ട എല്ലാ കാര്യങ്ങളും അവൾക്കവൻ ചെയ്ത് കൊടുത്തു.. അവളുടേയും മക്കളുടേയും സർവ്വകാര്യങ്ങളും അവൻ കണ്ടറിഞ്ഞ് ചെയ്തു..നദീറയെ അവളുടെ വീട്ടിലേക്ക് കൊണ്ടാക്കുന്നതും,തിരിച്ച് കൊണ്ട് വരുന്നതും കബീറാണ്.. ഇക്കയുടെ ഭാര്യയെന്ന നിലക്കേ ഇന്ന് വരെ അവൻ പെരുമാറിയിട്ടുള്ളൂ.. തെറ്റായ ഒരു നോട്ടം പോലും ഉണ്ടായിട്ടില്ല..