“ഈ ചിത്രങ്ങൾ എല്ലാം കണ്ടിട്ട് നിനക്ക് എന്ത് തോന്നുന്നു? എന്തെങ്കിലും സാമ്യത തോന്നുന്നുണ്ടോ?” അവളുടെ ചോദ്യം കേട്ട് അവൻ അതിലെ ഓരോ ചിത്രങ്ങളും എടുത്ത് നോക്കി. എല്ലാം വ്യത്യസ്ത ഡിസൈൻ, ചിലതിൽ നിറങ്ങൾ ഉണ്ട് മറ്റു ചിലതിൽ ഒരു വർണ്ണം മാത്രം. കാലിലും കയ്യിലും കഴുത്തിലും ഒക്കെ പക്ഷികൾ പറക്കുന്നത് പച്ച കുത്തിയിരിക്കുന്നു. എന്നാൽ അതിൽ സാമ്യത ഒന്നും അവനു മനസിലാക്കാൻ സാധിച്ചില്ല.
“ഇതിൽ എല്ലാം എന്താ സാമ്യത..?”
“നീ ഒരു കാര്യം ശ്രദ്ധിച്ചോ ഇതിൽ കാണുന്നത് എല്ലാം ഏതൊക്കെയോ സ്ത്രീകളുടെ ശരീരഭാഗങ്ങൾ ആണ്. അതായത് ഇത്തരം ഡിസൈൻ കൂടുതൽ യൂസ് ചെയ്യുന്നത് സ്ത്രീകൾ ആണ്. അങ്ങനെ ആണെങ്കിൽ നിന്റെ ഓർമ്മയിൽ തെളിയുന്ന കയ്യും ഒരു സ്ത്രീയുടെ ആവാൻ അല്ലേ സാധ്യത?” മിഴി പറഞ്ഞത് കേട്ട് അവൻ വേഗം വീണ്ടും എല്ലാ ഫോട്ടോസും എടുത്ത് നോക്കി.
ശെരിയാണ്… ഇതെല്ലാം സ്ത്രീകളുടെ കൈകളും കാലുകളും ആണ്. അവനു അതൊരു പുത്തൻ ഉണർവ് നൽകി, താൻ ശെരിയായ ദിശയിൽ തന്നെ ആണ് പോകുന്നത് എന്നവന് തോന്നി.
“കൊള്ളാല്ലോ നീ… നല്ല ഒബ്സർവേഷൻ ആണല്ലോ വല്ല ഡിക്റ്റക്റ്റീവ് പണിക്ക് പൊക്കുടേ ഇവിടെ ഇങ്ങനെ ഇരിക്കാതെ!!!!” അവർ രണ്ടും ചിരിച്ചു. അത്രനേരം അവർക്കിടയിൽ തളം കെട്ടി നിന്ന മൗനം അങ്ങനെ ഒഴിവായി.
“സ്ത്രീ തന്നെ ആവാൻ ആണ് അപ്പൊ സാധ്യത… ഇനി അത്‌ ആരാണ് എന്നാണ് കണ്ടെത്തേണ്ടത്. പക്ഷേ എങ്ങനെ…?” അവർ തമ്മിൽ നോക്കികൊണ്ട് ചോദിച്ചു.
**************************** കല്യാൺ റെയിൽവേ സ്റ്റേഷന് അടുത്തുള്ള ഒരു ചേരി… എല്ലാ തരം കുറ്റവാളികളും സ്വയ്ര്യവിഹാരം നടത്തുന്ന ഈ ഇടം അസ്‌ലാൻ എന്ന ഒരു ഗുണ്ടാ നേതാവിന്റെ കൺട്രോളിൽ ആണ്. അതിനാൽ തന്നെ പുറമെ നിന്ന് ഒരാൾക്ക് ഇവിടേക്ക് കടക്കുക എന്നത് ചിന്തിക്കാൻ ആവാത്ത ഒന്നാണ്.
നാലുപേർ ചേർന്ന് രണ്ട് കയ്യിലും കാലിലും പിടിച്ച് ഒരു പെണ്ണിനെ തൂക്കികൊണ്ടുവന്ന് ഒരു ഹാളിലേക്ക് വീശിയെറിഞ്ഞു. അവളുടെ ശരീരം തറയിൽ ഇടിച്ചുയർന്ന് മൂന്നു വട്ടം ഉരുണ്ട് നിശ്ചലമായി. പിടഞ്ഞെഴുനേക്കാൻ നോക്കിയ അവളുടെ മുടിക്കുത്തിൽ പിടിച്ച് അതിൽ ഒരുവൻ വലിച്ചിഴച്ചു അവരുടെ നേതാവ് എന്ന് തോന്നിക്കുന്ന ഒരുത്തനു മുന്നിൽ കൊണ്ടിട്ടു.
അയാൾ മെല്ലെ തറയിൽ ഒരു മുട്ട് കുത്തി അവളുടെ അടുത്ത് നിന്നു.
“എങ്ങോട്ടാ എന്റെ പൊന്നുമോൾ ഓടി രക്ഷപെടാൻ നോക്കിയത്? ഈ ചേട്ടന്മാർക്ക് ഒക്കെ ഞാൻ കാശും കൊടുത്ത് ഇവിടെ നിർത്തിയിരിക്കുന്നത് നിങ്ങളെ ഇവിടെ ഒരു കുറവും വരുത്താതെ പൊന്നു പോലെ നോക്കാൻ അല്ലേ? അപ്പൊ എന്റെ മോൾ ഇങ്ങനെ ഓടി രക്ഷപെടാൻ നോക്കിയാൽ എനിക്ക് ആ കാശ് നഷ്ടം അല്ലേ?” അയാൾ ക്രൗര്യമായി പുഞ്ചിരിച്ചുകൊണ്ട് ചോദിച്ചു.
അയാളുടെ മുഖം പതിയെ അവളുടെ അടുത്തേക്ക് വന്നതും അവൾ ഒരു ചീറ്റ പുലിയെ പോലെ ചീറി വെട്ടിത്തിരിഞ്ഞു.
“കഴുവേർടെ മോളെ വന്ന അന്ന് മുതൽ ഞാൻ നിന്നെ നോക്കി വെച്ചേക്കുവാ, ഇവിടെ ഉള്ള ബാക്കി പെണ്ണുങ്ങൾക്ക് ഇല്ലാത്ത നിന്റെ ധൈര്യോം സാമർഥ്യവും…. കൊന്നു തള്ളാൻ എനിക്ക് അറിയാഞ്ഞിട്ടല്ല, നിനക്കൊക്കെ ജീവൻ ഉണ്ടെങ്കിലേ എന്നെപോലെ ഉള്ളവർക്ക് നിന്നെയൊക്കെ വിറ്റ് കാശാക്കാൻ പറ്റു. അത്കൊണ്ട് മാത്രമാണ് നീ ഇപ്പഴും എന്റെ മുന്നിൽ കിടന്നു ഇങ്ങനെ ചീറുന്നത്.”
“പക്ഷേ നീ ഒന്നോർത്തോ…. മൂന്നു മാസം… മൂന്നേ മൂന്നു മാസം മാത്രേ നിന്റെയി തിളപ്പ് കാണു. അത്‌ കഴിഞ്ഞാൽ നീയൊക്കെ ഏതെങ്കിലും വേശ്യാലയത്തിൽ ഒതുങ്ങും. ഒതുക്കും ഈ അസ്‌ലാൻ. ഇനി നീ ഇത്പോലെ എങ്ങാനും ഓടിപ്പോവാൻ നോക്കിയാ, ഇവിടെ നിക്കുന്ന ഓരോരുത്തരും നിന്റെ ദേഹത്തെ താലോലിക്കും പിന്നെ നിനക്ക് ഇവിടെ കഴിയാം ഞങ്ങളുടെ വെപ്പാട്ടിയായിട്ട്. കേട്ടോടി നായെ…” അസ്‌ലാൻ അവളുടെ കവിളിൽ കുത്തിപ്പിടിച്ചു പറഞ്ഞു.
“തൂക്കി എടുത്ത് അകത്തു കൊണ്ടുപോയി ഇട്ട് പൂട്ടെടാ ഇവളെ…. എന്നിട്ട് ആ മറ്റവനെ ഇങ് കൊണ്ടുവാ ആ ഇൻവെസ്റ്റിഗേറ്റീവ് എഴുത്തുകാരനെ.” അയാളുടെ ചുണ്ടിൽ ഗൂഢമായൊരു ചിരി വിടർന്നു.
അസ്‌ലാൻ പറഞ്ഞ ഉടൻ തന്നെ അവളെ രണ്ടുപേർ ചേർന്ന് വലിച്ചിഴച്ചു ഒരു റൂമിലേക്ക്‌ എടുത്തെറിഞ്ഞു എന്നിട്ടത് പുറത്ത് നിന്നും ലോക് ചെയ്തു. അവൾ ചെന്ന് വീണത് ഒരു കൂട്ടം പെൺകുട്ടികളുടെ നടുവിലേക്കാണ്, കണ്ണീർ വറ്റിയ… പ്രതീക്ഷകൾ അസ്തമിച്ച ഒരു കൂട്ടം പെൺകുട്ടികളുടെ ഇടയിൽ…. അവൾ വീണ വേദനയിൽ ഒന്ന് ഞരങ്ങി, പതിയെ എഴുനേക്കാൻ ശ്രമിച്ചു. അപ്പോഴേക്കും രണ്ട് പെൺകുട്ടികൾ അവളുടെ അടുത്തേക്ക് വന്ന് അവളെ പിടിച്ച് എഴുന്നേൽപ്പിച്ചു.
“ജാനകീ… നിന്നോട് ഞാൻ പറഞ്ഞതല്ലേ രക്ഷപെടാൻ നമ്മളെകൊണ്ട് ആവില്ല എന്ന് പിന്നേം എന്തിനാ നീ….” അതിൽ ഒരുവൾ പറഞ്ഞു തീരുന്നതിനു മുന്നേ ജാനകി അവളെ രൂക്ഷമായി ഒന്ന് നോക്കി.
“മരണത്തോട് ഉള്ള എന്റെ പേടിയൊക്കെ നമ്മളെ ഇവിടെ കൊണ്ടുവന്ന അന്ന് തന്നെ തീർന്നതാ… ഒന്നും മറന്നിട്ടില്ലല്ലോ രാധികേ നീ? ഏതെങ്കിലും വേശ്യാലയത്തിൽ ഒടുങ്ങുന്നതിനേക്കാൾ എന്തുകൊണ്ടും നല്ലത് മരണം തന്നെ ആണ്. പിന്നെ ജാനകി രക്ഷപെടുന്നു എങ്കിൽ അത്‌ ഒരിക്കലും ഒറ്റയ്ക്കാവില്ല… എന്റെ ഒപ്പം നിങ്ങൾ ഇരുപത് പേരും ഉണ്ടാവും. അത്‌ എന്റെ വാക്കാ.” ഉറച്ച ശബ്ദത്തിൽ എല്ലാവരോടുമായി പറഞ്ഞിട്ട് അവൾ എഴുനേറ്റു മുറിയുടെ ഒരു ഒഴിഞ്ഞ കോണിലേക്ക് നടന്നു.
അൽപ സമയം അവിടെ നിന്നതിനു ശേഷം മറ്റുള്ളവർ ശ്രദ്ധിക്കുന്നില്ല എന്ന് ഉറപ്പ് വരുത്തിയ ശേഷം തന്റെ ഡ്രെസ്സിനുള്ളിൽ ഒളിപ്പിച്ച ഒരു പൊതി അവൾ അവിടെ ഒരു സ്ഥലത്ത് ഭദ്രമായി വെച്ചു. ശേഷം ബാത്‌റൂമിൽ കയറി മുഖത്ത് വെള്ളം ഒഴിച്ച് കഴുകി. അടികൊണ്ട് മുറിഞ്ഞ വായിൽ അപ്പോഴും ചോരയുടെ രുചി അവൾക്ക് അറിയാൻ കഴിഞ്ഞു. അസ്‌ലാൻ പറഞ്ഞത് അവൾ ഓർത്തു…. മൂന്ന് മാസം…. അതാണ് ഞങ്ങളുടെ ജീവന്റെ കാലാവധി.. അത്‌ കഴിഞ്ഞാൽ എല്ലാവരെയും ഇവർ കച്ചവടം ചെയ്യും. പക്ഷേ എന്തിനായിരിക്കും ഈ മൂന്നു മാസം? സാധാരണ ഇത്രയും റിസ്ക് എടുത്ത് ഇത്രയും ആൾക്കാരെ മൂന്നു മാസം ഒക്കെ തടവിൽ പാർപ്പിക്കേണ്ടതില്ല. പിടിക്കപ്പെടാൻ ഉള്ള സാധ്യത കൂടുതൽ ആണ്. അതാണ് ഇനി കണ്ടെത്തേണ്ടത്. പക്ഷേ എങ്ങനെ? ആരാണ് അസ്‌ലാൻ പറഞ്ഞ ആ എഴുത്തുകാരൻ… ഊഹം ശെരിയാണെങ്കിൽ അയാൾക്ക്‌ അസ്‌ലാനെ പറ്റി എന്തൊക്കെയോ അറിയാം. അത്‌ മറ്റുള്ളവർ അറിയുന്നതിന് മുൻപ് അയാളെ തീർക്കാൻ ഉള്ള പ്ലാൻ ആണ്.
അവൾ വേഗം പുറത്തിറങ്ങി താക്കോൽ പഴുതിലൂടെ പുറത്തേക്കു നോക്കി. അവിടെ ഒരാളെ അവന്റെ ശിങ്കിടികൾ ചേർന്ന് തല്ലി ചതയ്ക്കുന്നു. ഏകദേശം ഒരു 15 മിനിറ്റ് നേരത്തെ മർദനങ്ങൾക്ക് ശേഷം അയാളെ അവർ എന്തോ ഒന്ന് ഇൻജെക്ട് ചെയ്തു. അത്‌ എന്താണെന്ന് ഒരു ഡോക്ടർ ആയ അവൾക്ക് മനസിലാക്കാൻ അധികനേരം വേണ്ടി വന്നില്ല. മാത്രമല്ല ഏതാനും ആഴ്ചകൾക്ക് മുൻപ് തങ്ങളെ ഇവിടെ കൊണ്ടുവന്നപ്പോഴും മയക്കി കിടത്താനായി അവർ ആ ഇൻജെക്ഷൻ എല്ലാവർക്കും നൽകിയിരുന്നത് അവൾ ഓർത്തു.
