ഇൻജെക്ഷൻ നൽകി മിനിറ്റുകൾക്കുള്ളിൽ അയാളുടെ ശരീരത്തിന്റെ അനക്കം നിന്നു. അപ്പോഴേക്കും അയാളെ രണ്ടുപേർ ചേർന്ന് മറ്റൊരു മുറിയിലേക്ക് വലിച്ചിഴച്ചു കൊണ്ടുപോയി. ജാനകി വീണ്ടും രക്ഷപെടാൻ ഉള്ള പഴുതുകൾ തേടിക്കൊണ്ടിരുന്നു. ഇവിടെ വന്നതിനു ശേഷം രാത്രിയാകുന്നതും പകൽ ആകുന്നതും അറിയുന്നില്ല. ആ വലിയ മുറിക്ക് പുറത്തേക്ക് തുറക്കപെടുന്ന ഒരു ദ്വാരം പോലും ഇല്ല. ആകെ ഉള്ള ഒരു വാതിൽ തുറക്കപ്പെടുന്നത് മെയിൻ ഹാളിലേക്ക് ആണ് എന്നാൽ അവിടെ എപ്പോഴും ആരെങ്കിലും ഒക്കെ കാണും.
ഭക്ഷണം തരാൻ വരുന്നത് ഒക്കെ അവന്റെ ആളുകൾ തന്നെ ആണ്, അവരെല്ലാം തന്നെ ഞങ്ങളെ നോട്ടം കൊണ്ട് പലതവണ ബലാത്സംഗം ചെയ്ത് കഴിഞ്ഞു.
ആദ്യം എല്ലാത്തിനോടും പേടി ആയിരുന്നു, എന്നാൽ ജീവിതത്തിൽ പേടിച്ചു പേടിച്ചു പേടി ഇല്ലാതാവുന്ന ഒരു സമയം വരും. അത് തന്നെയാണ് ഇവിടെയും സംഭവിച്ചുകൊണ്ട് ഇരിക്കുന്നത്. ഇപ്പോൾ ഒരു തരം മരവിച്ച അവസ്ഥയാണ്.
ഓരോന്ന് ആലോചിച്ചു ഇരിക്കുന്നതിനിടയിൽ വാതിൽ മലർക്കെ ചവിട്ടി തുറന്ന് അസ്ലാനും അവന്റെ കുറച്ച് ആൾക്കാരും അകത്തേക്ക് കയറി. കൂടെ ഒരു ഡോക്ടർ എന്ന് തോന്നിക്കുന്ന ഒരാളും ഉണ്ടായിരുന്നു.
അവരെ കണ്ട് ജാനകി ഒഴികെ എല്ലാവരും ഞെട്ടി എഴുനേറ്റു അവളുടെ പിന്നിൽ ഉള്ള ഒരു മൂലയിലേക്ക് ഒതുങ്ങി കൂടി നിന്നു.
“നോക്കി നിക്കാതെ പോയി ഓരോരുത്തരെ ആയി പിടിച്ചോണ്ട് വാടാ…” അസ്ലാന്റെ വാക്കുകൾ കേട്ടതും അവർ ഓരോ ആൾക്കാരെ ആയി വലിച്ചുകൊണ്ട് ആ ഡോക്ടർ എന്ന് തോന്നിക്കുന്ന ആളുടെ അടുത്തേക്ക് കൊണ്ടുപോയി.
അയാൾ അയാളുടെ കയ്യിൽ ഉള്ള ഒരു ചെറിയ പെട്ടി തുറന്ന് അതിൽ നിന്നും സിറിഞ്ജ് എടുത്തു. എന്നിട്ട് ഓരോ പെൺകുട്ടികളുടെ ബ്ലഡ് സാംപിൾ ശേഖരിക്കാൻ തുടങ്ങി. ജാനകി എല്ലാം സസൂക്ഷ്മം വീക്ഷിച്ചുകൊണ്ടേ ഇരുന്നു.
അവളുടെ മനസ്സിൽ പല സംശയങ്ങൾ ഉടലെടുക്കാൻ തുടങ്ങി. എന്നാൽ ഒരു നിഗമനം എടുക്കാൻ അവൾക്ക് ആയില്ല. എവിടെയോ കുറച്ച് കണ്ണികൾ കൂടി ചേരാൻ ഉള്ളത്പോലെ തോന്നി.
ഓരോ ആൾക്കാരുടെ സാംപിൾ അവരുടെ പേരെഴുതി അയാൾ ഒരു പ്രത്യേക പെട്ടിയിൽ ഭദ്രമായി വെച്ചു. അവസാനത്തെ ഊഴം ജാനകിയുടെ ആയിരുന്നു… അവർ പിടിച്ചു വലിച്ചു കൊണ്ടുപോകുന്നതിന് മുൻപ് തന്നെ അവൾ സ്വയം എഴുനേറ്റു ഡോക്ടറുടെ അടുത്തേക്ക് ചെന്നു. അവളുടെ ആരെയും കൂസാതെ ഉള്ള ആ വരവ് അയാളിൽ ഒരു ഞെട്ടൽ ഉളവാക്കി. പകച്ചു നിന്ന അയാളുടെ നേരെ അവൾ ബ്ലഡ് എടുക്കാനായി തന്റെ വലത് കൈ നീട്ടി.
ഒരു നിമിഷത്തെ അമ്പരപ്പിനു ശേഷം അയാൾ സമനില വീണ്ടെടുത്ത് അവളുടെ കൈയിലേക്ക് സിറിഞ്ജ് കൊണ്ടുവന്നു. ആ കയ്യിൽ പച്ച കുത്തിയ ചിത്രത്തിലേക്ക് അയാൾ ഒന്ന് നോക്കി.
പറന്നകലുന്ന പക്ഷികളുടെ ചിത്രം പച്ചകുത്തിയ അവളുടെ കൈ….
തുടരും…
****************************