“ആഹ്… ഞാൻ നോക്കിട്ട് വരാം, ആദ്യം നീ ദേ ഈ ഗുളിക കഴിക്ക്. അപ്പോഴേക്കും ഞാൻ അത് എടുത്തു വരാം.” അവൾ ഗുളിക അവനു കൈമാറി.
അവൾ പോയി കുറച്ച് നേരമായി… അവൻ അക്ഷമനായി, ഇടയ്ക്ക് ഡോർ തുറന്നു ഇടനാഴിയിലേക്ക് നോക്കി വീണ്ടും വന്നു കട്ടിലിൽ ഇരുന്നു. അപ്പോഴേക്കും മിഴി എത്തിയിരുന്നു.
“ഗുഡ് മോർണിംഗ് എക്സ്… ഇന്നെന്താ നേരത്തെ എഴുന്നേറ്റോ? പൂജ എവിടെ?” അവൾ റൂമിലേക്ക് കയറികൊണ്ട് ചോദിച്ചു.
“അവളെ ഞാൻ ഒരിടം വരെ പറഞ്ഞു വിട്ടേക്കുവാ ഇപ്പൊ വരും.” “എങ്ങോട്ട്? ക്യാന്റീനിലേക്കാ?” “തോക്കിൽ കയറി വെടിവെക്കാതെ, ഇപ്പൊ വരും അപ്പൊ അറിയാല്ലോ.” അവൻ ചിരിച്ചു.
അപ്പോഴേക്കും പൂജ ഡോർ തുറന്ന് ഉള്ളിലേക്ക് കയറി. “കിട്ടിയോ….?” എക്സ് കട്ടിലിൽ നിന്ന് അറിയാതെ എഴുനേറ്റു. അവന്റെ കണ്ണുകൾ പ്രതീക്ഷ കൊണ്ട് തിളങ്ങി.
“കിട്ടി മോനേ കിട്ടി… മഹീന്ദർ സിംഗ് & രാകേഷ്, പേരും അഡ്രസ്സും എല്ലാം ഉണ്ട്. ഇവർ ഇവിടെ ഉള്ളവർ അല്ല മുംബൈക്ക് അടുത്ത് കല്യാൺ ആണ് സ്ഥലം. ദേ നോക്ക്.” അവൾ ആ പേപ്പർ അവനു നേരെ നീട്ടി. കാര്യങ്ങൾ ഒന്നും മനസിലാവാതെ മിഴി വാ പൊളിച്ചു നിന്നു.
“അല്ല എന്താ ഇവിടെ നടക്കുന്നെ?” മിഴി അവർ രണ്ടുപേരോടുമായി ചോദിച്ചു. “ഇവിടെയോ… ഇവിടെ ഞാൻ ഈ എക്സിന്റെ വാല്യൂ കണ്ടുപിടിക്കാൻ ഞാൻ ഒന്ന് ശ്രമിക്കുവാ.” അവൻ മിഴിയെ നോക്കി ചിരിച്ചുകൊണ്ട് പറഞ്ഞു.
“പൂജ.. നീ വിളിക്കുവോ? ഹോസ്പിറ്റലിൽ നിന്നാണെന്ന് പറഞ്ഞാൽ മതി, എവിടെയാണ് ഉള്ളത് അത്യാവശ്യമായി ഇവിടെ വരെ ഒന്ന് വരണം എന്ന് പറഞ്ഞാൽ മതി.”
“അതെന്തിനാ? നമുക്ക് നേരെ ചോദിച്ചൂടേ അന്ന് എന്തെങ്കിലും കിട്ടിയോ എന്ന്?” “അത് ബുദ്ധിയല്ല, ചിലപ്പോൾ അവർ കേസ് ആയി എന്നൊക്കെ വിചാരിച്ച് ഒന്നും വിട്ട് പറയില്ല. അത്കൊണ്ട് അവരെ ഇവിടെ വരുത്തണം. പിന്നെ ഞാൻ ഇന്ന് ഇവിടെ ഇരിക്കുന്നതിന് ഏറ്റവും വലിയ കാരണം ഇവർ രണ്ടാളും ആണ്, അത്കൊണ്ട് തന്നെ എനിക്ക് അവരെ കാണണം, നന്ദി പറഞ്ഞാൽ ഒന്നും തീരില്ല, എന്നാലും….”
“മം… അതാ നല്ലത്, മിഴി നിന്റെ ഫോൺ എടുക്ക്, ഈ നമ്പർ ഡയൽ ചെയ്യ്.” പൂജ പറഞ്ഞതും മിഴി വേഗം ഫോൺ എടുത്തു അവൾ പറഞ്ഞ നമ്പർ ഡയൽ ചെയ്തു ഫോൺ സ്പീക്കറിൽ ഇട്ടു.
ഫോൺ റിങ് ചെയ്യാൻ തുടങ്ങി. ഏഴാമത്തെ റിങ്ങിൽ കാൾ അറ്റൻഡ് ആയി…
“ഹലോ….” ഘനഗംഭീര ശബ്ദത്തോടെ ഒരാൾ….
“മഹീന്ദർ സിംഗ്….അല്ലേ?” പൂജ ഒരു സംശയത്തോടെ ചോദിച്ചു. “അതെ.. ആരാണ് സംസാരിക്കുന്നത്?”
“ഇത് K.V.M ഹോസ്പിറ്റലിൽ നിന്നാണ്, നിങ്ങൾ കുറച്ചുനാൾ മുൻപ് ഒരാളെ ഇവിടെ കൊണ്ടുവന്നു അഡ്മിറ്റ് ആക്കിയിരുന്നില്ലേ?”
“ഉവ്… അയാൾക്കിപ്പോ എങ്ങനുണ്ട്? രക്ഷപെട്ടോ? കുഴപ്പൊന്നും ഇല്ലല്ലോ അല്ലേ?” അയാൾ ആകാംഷയോടെ ചോദിച്ചു.
“അത്… ആള് രക്ഷപെട്ടു പിന്നെ നിങ്ങളെ കാണണം എന്ന് ഒരേ വാശി. അത്കൊണ്ട് വിളിച്ചതാണ്. അത്യാവശ്യമായി ഒന്നിവിടെ വരെ വരണം. ദയവായി ഒഴിവു പറയരുത്.” പൂജ വളരെ താഴ്മയോടെ തന്നെ കാര്യങ്ങൾ പറഞ്ഞു.
“വരുന്നത് കൊണ്ട് ബുദ്ധിമുട്ട് ഉണ്ടായിട്ടല്ല പക്ഷേ ഉടനെ വരാൻ കുറച്ച് ബുദ്ധിമുട്ട് ആണ്, ഞാൻ ഒരു ട്രക്ക് ഡ്രൈവർ ആണ് ഇപ്പൊ സ്ഥലത്തില്ല. എത്തിയാലുടൻ വരാൻ നോക്കാം.” അയാൾ പറഞ്ഞത് കേട്ട് എല്ലാവർക്കും നിരാശയായി. അയാൾ എവിടെയാ ഉള്ളതെന്ന് ചോദിക്കാൻ എക്സ് പൂജയോട് ആംഗ്യം കാട്ടി. “അത്…. താങ്കൾ ഇപ്പൊ എവിടെയാണ് ഉള്ളത്?” “മണ… അടുത്ത ആഴ്ച….ഞാൻ… എത്താൻ….” കാൾ ഡിസ്കണക്ട് ആയി “ഹലോ….ഹലോ… കേൾക്കുന്നുണ്ടോ ഹലോ..?” “കാൾ കട്ട് ആയല്ലോ… അയാൾ ഇനി കട്ട് ആക്കിയത് ആയിരിക്കുവോ?” മിഴി സംശയത്തോടെ ചോദിച്ചു. എക്സ് എന്തോ ആലോചിച്ചു കട്ടിലിൽ തന്നെ ഇരുന്നു. പൂജ അപ്പോഴേക്കും ധിറുതിയിൽ അവളുടെ ഫോൺ എടുത്ത് എന്തോ സേർച്ച് ചെയ്യാൻ തുടങ്ങിയിരുന്നു.
“നീ എന്താ ഈ സേർച്ച് ചെയ്യുന്നേ?” “അയാൾ പറഞ്ഞ സ്ഥലം കേട്ടോ നീ, അത് എവിടെയാണെന്ന് നോക്കുവാരുന്നു. മണ എന്നല്ലേ പറഞ്ഞത്, നോക്കട്ടെ.”