ഞങ്ങളുടെ ഉത്സവത്തിനു അമ്പലത്തിൽ കോടിയേറി. നാടു ഒന്നടങ്കം സന്തോഷിക്കുന്ന കുറച്ചു നാളുകളാണ് ഇത്.ഞാനും കൂട്ടുകാരും ഉത്സവം കഴിയുന്നത് വരെ അമ്പലത്തിൽ തന്നെ ആയിരിക്കും. ഇതിന് മാത്രം വീട്ടിൽ ഒന്നും പറയില്ല.ഉത്സവത്തിന്റെ അവസാന ദിവസം നാടകവുമുണ്ട്.
നാടകത്തിന്റെ അന്ന് രാവിലെയാണ് ഞാൻ അറിഞ്ഞത് +2 പരീക്ഷ അടുത്തതിനാൽ പ്രിയ നാടകത്തിനു പോകുന്നില്ല. എന്റെ വീട്ടിൽ നിന്നും അവളുടെ വീട്ടിൽ നിന്നും എല്ലാവരും പോകും.
പെട്ടെന്ന് എന്റെ മനസ്സിൽ കൂടി ഒരു പദ്ധതി തോന്നി.
+2 കഴിഞ്ഞു ചിലപ്പോൾ ഞാനും അവളും വേറെ കോളേജിൽ പോയാൽ എനിക്ക് അവളെ ഇനി കാണാൻ പോലും കിട്ടില്ല. വേറെ ചുള്ളൻമാർ വളക്കാനും സാധ്യത ഉണ്ട്.
അതിനാൽ ഇന്ന് എല്ലാവരും നാടകത്തിന് പോയി കഴിയുമ്പോൾ അവളോട് ക്ഷമ പറഞ്ഞു, എന്റെ ഉള്ളിലെ പ്രണയം അവളെ അറിയിക്കണം. ഇതിന് ഇതു പോലൊരു അവസരം ഇനി കിട്ടില്ല.
ഇതിനായി നാടകം തുടങ്ങിയപ്പോൾ പതിയെ അവിടുന്നു ഞാൻ മുങ്ങി.
നേരിട്ട് പ്രിയയുടെ വീട്ടിൽ പോയാലോ എന്ന് ആലോചിച്ചു.
എന്നാൽ രാവിലെ മുതൽ പണിയെടുത്തു വിയർത്തതിനാൽ ഒന്നു കുളിച്ചു വൃത്തിയായി പോകാം എന്നു വിചാരിച്ചു വീട്ടിൽ കയറി കുളിച്ചു. ചേട്ടന്റെ വില കൂടിയ പെർഫ്യൂമും അടിച്ചു ഞാൻ പ്രിയയുടെ വീട്ടിലേക്ക് പോകുമ്പോഴാണ് വിദ്യാമ്മ അവിടേക്കു വന്നത്.
എന്താണ് വിദ്യാമ്മേ നാടകം കാണുന്നില്ലേ?
അപ്പോൾ നീ ഒന്നും അറിഞ്ഞില്ലേ? അവിടെ മുട്ടൻ അടി നടക്കുവാ. വെളിയിൽ നിന്ന് വന്ന കുറച്ചുപേർ സ്ത്രീകളെ ഉപദ്രവിക്കാൻ ശ്രമിച്ചു. നാട്ടുകാർ അവരെ മർദിച്ചു. മോന്റെ കൂട്ടുകാരും അവരുടെ കൂടെ തല്ലാൻ ഉണ്ടാരുന്നു. ഞാൻ ഓർത്തു ശ്രീയും ഉണ്ടാകുമെന്ന്. മോൻ എന്താ ഇങ്ങു പോന്നത്?
അത് വിദ്യാമേ, ദേഹം മുഴുവൻ വിയർത്തിരിക്കുവാരുന്നു. കുളിച്ചിട്ടു അങ്ങോട്ട് വരാൻ ഇരിക്കുവാരുന്നു.
ആ സമയത്ത് എന്റെ അച്ഛനും അമ്മയും അവിടെ എത്തി. ഞാനും തല്ലാൻ ഉണ്ടാരുന്നു എന്ന് ആരോ അച്ഛനോടു പറഞ്ഞുവത്രെ.
അച്ഛൻ അവിടെ കിടന്ന വടി എടുത്തു എന്നെ പൊതിരെ തല്ലി.
കൂടെ കടുത്ത ഒരു തീരുമാനവും എടുത്തു “ +2 കഴിഞ്ഞു ഇവനെ ഇനി നാട്ടിൽ നിർത്തുന്നില്ല.”
പ്രിയയെ കാണാമെന്നും, എന്റെ പ്രണയം അറിയിക്കാം എന്നുള്ള എല്ലാം പദ്ധതിയും പാളി.
ആരെയും ദ്രോഹിക്കാത്ത എനിക്ക് മാത്രം ഈ ശിക്ഷകൾ തരുന്ന ഈശ്വരനെ അന്ന് ഞാൻ വെറുത്തു.
+2, പ്രിയ നല്ല മാർക്കോടു കൂടി പാസ്സായി. ഞാൻ കഷ്ടിച്ച് കടന്നു കൂടി. അപ്പന്റെ കാശിന്റെ ബലത്തിൽ ഞാൻ ബാംഗ്ലൂരിൽ BBA ചേർന്നു. അവൾ നാട്ടിൽ എഞ്ചിനീയറിംഗും.
ജീവിതത്തിൽ മൊത്തം തിരിച്ചടികളും പരാജയങ്ങളും നേരിട്ട എനിക്ക് വാശിയാരുന്നു എല്ലാവരോടും.
അതിന്റെ ഫലമായി ഞാൻ 3 വർഷം കൊണ്ടു നല്ല മാർക്കോടു കൂടി തന്നെ ബിരുദമെടുത്തു. ക്യാമ്പസ് ഇന്റർവ്യൂവിൽ ഒരു MNC യിൽ ജോലിയിൽ പ്രവേശിച്ചു. രണ്ടു വർഷം കൊണ്ടു തന്നെ ഉയർന്ന ഒരു പദവിയിൽ എത്തുവാൻ എനിക്ക് സാധിച്ചു.ലോൺ എടുത്താണെങ്കിലും ഒരു ഫ്ലാറ്റും ബാംഗ്ലൂർ നഗരത്തിൽ എനിക്ക് സ്വന്തമായി.
ഞാൻ നേരിട്ട അപമാനത്തിന്റ കനൽ അപ്പോഴും കെട്ടിട്ടില്ലാത്തതിനാൽ, വീട്ടിലോട്ടുള്ള വിളികൾ ഒക്കെ കുറവാരുന്നു.
എന്നാൽ ഇടയ്ക്കു ഞാൻ വിദ്യാമ്മയെ വിളിക്കും. പ്രിയയേ കുറിച്ച് അറിയുവാനുള്ള ഒരു എന്റെ ഒരു അടവാരുന്നു അതു.
അങ്ങനെ 5 വർഷത്തിന് ശേഷം നാട്ടിൽ എത്തി. പ്രതീക്ഷിച്ച പോലെ തന്നെ വീട്ടുകാർക്കു എന്നോട് ആ പഴയ പുച്ഛ മനോഭാവം തന്നെ.ബാംഗ്ലൂരിലെ എന്റെ ഇപ്പോഴത്തെ കാര്യങ്ങൾ അറിഞ്ഞാൽ ചിലപ്പോൾ ഈ പുച്ഛം മാറിയേക്കാം. എന്നാൽ ഞാൻ അതു പറയാൻ പോയില്ല.
ഞാൻ വന്നു ഒന്ന് കുളി പാസ്സാക്കി, വെളിയിലേക്ക് പോകുവാൻ തുടങ്ങിയപ്പോഴാണ് എന്റെ അമ്മ പറഞ്ഞത് “ വിദ്യ നിന്നെ തിരക്കിയിരുന്നു. പ്രിയയുടെ ജോലി കാര്യം പറയാനാ. നിന്നെ കൊണ്ട് പറ്റുന്ന സഹായം ചെയ്തു കൊടുക്കണം എന്നു പറഞ്ഞു.
“ സൗകര്യമില്ല, എല്ലാവർക്കും ആവശ്യം വരുമ്പോൾ ഞാൻ വേണം. ആവശ്യം കഴിഞ്ഞാൽ ഞാൻ പിന്നെ വെറുക്കപെട്ടവൻ. ഞാൻ ആ പരുപാടി ഒക്കെ നിർത്തി. എന്റെ കൂട്ടുകാർ അത്രക്ക് നിർബന്ധിച്ചത് കൊണ്ട് മാത്രമാ ഞാൻ ഉത്സവത്തിനു വന്നത്. ഉത്സവം കഴിഞ്ഞു മറ്റേനാൾ തന്നെ ഞാൻ സ്ഥലം വിടും “
നാടിനോടും നാട്ടുകാരോടും ഉള്ള എന്റെ ദേഷ്യവും വെറുപ്പും കാരണമാണ് ഞാൻ അങ്ങനെ പറഞ്ഞത്.
പക്ഷേ ഇതു പറഞ്ഞു തിരിഞ്ഞു നോക്കുമ്പോൾ പ്രിയ ഇതെല്ലാം കേട്ടു കൊണ്ട് നിൽക്കുന്നു.അവൾ ഉടൻ തന്നെ ഇറങ്ങി അവളുടെ വീട്ടിലേക്കു പോയി.
ഞാൻ ആകെ അങ്ങ് വല്ലാതെയായി.
പതുക്കെ വീട്ടിൽ നിന്ന് ഇറങ്ങി പ്രിയയുടെ വീട്ടിലേക്കു പോയി.
പ്രസാദേട്ടൻ ജോലിക്ക് പോയിരുന്നു. വിദ്യാമ്മ എന്നെ കണ്ടുടനെ കെട്ടി പിടിച്ചു ഒരു ഉമ്മ തന്നു.താടി ഒക്കെ വന്നു അങ്ങ് വലിയ കൊച്ചനായി പോയല്ലോ എന്നൊക്കെ പറഞ്ഞു.
പ്രിയ ഞങ്ങളുടെ സംസാരം കേട്ട് അവിടേക്കു വന്നു. അവളുടെ കണ്ണൊക്കെ നിറഞ്ഞിരിക്കുന്നു.