അവിടെ ചെന്നപ്പോ ഒരു ഉത്സവത്തിന് ഉള്ള ആള്. പിന്നെ റിസപ്ഷൻ ഇരിക്കുന്ന കുട്ടി നമ്മടെ ആള് ആയതുകൊണ്ടും അവൾക്ക് എന്നെ കൊണ്ട് ആവിശ്യമുള്ളത് കൊണ്ടും ഞാൻ അവളെ നോക്കി ഒന്ന് കണ്ണ് കാണിച്ചപ്പോൾ, അര മണിക്കൂറിൽ എനിക്ക് ഡോക്ടറെ കണ്ടിട്ട് അവിടെന്ന് ഇറങ്ങാൻ പറ്റി.
എന്നിട്ട് അവൾക് മുഖം കൊടുക്കാതെ ഞാൻ അവിടെന്ന് ഇറങ്ങി. അപ്പോഴേക്കും ഉച്ചക്ക് 12.30കഴിഞ്ഞു. ഇനിയുള്ള അപ്പോയിന്റ്മെന്റ് എല്ലാം 4മണിക്ക് ശേഷമാണ്. ഞാൻ ഫോൺ എടുത്ത് പഞ്ച്-ഔട്ട് ചെയ്ത് നേരെ കഴിക്കാൻ പോയി. എഴുപതുരൂപക്ക് നല്ല നാടൻ വീട്ടിലെ ഊണും മേടിച് ഞാൻ വീട്ടിൽ പോയി, അതും കഴിച്. യൂട്യൂബ് നോക്കി ഇരുന്നു.
ഫോൺ അടി കേട്ടാണ് ഞാൻ ഉണർന്നേ. എന്റെ അടുത്ത സുഹൃത്തും സഹപ്രവർത്തകനുമായ രാഹുൽ.
“ഹലോ?”
“നീ എവിടാ? വീട്ടിലാണോ?”
“ഓ, വീട്ടില. എന്താ?”
“നീ പോയില്ലേ ഉച്ചക്ക് ശേഷം?”
“ഉറങ്ങിപ്പോയി, ഞാൻ ഇറങ്ങാൻപോകുന്നു”
“വൈകിട്ട് വരില്ലേ? ദേവികയുടെ birthday പരിപാടിയുണ്ട്.”
“ഞാൻ ഒരു 8 മണി ആകുമ്പോ എത്തിയേക്കാം.”
“നാളെ സെക്കന്റ് സാറ്റർഡേ അല്ലെ. പോകണ്ടല്ലോ.. അപ്പൊ രണ്ടെണ്ണം അടിച്ചിട്ട് പോകാം.നീ വാ.”
“അടിച്ചിട്ട് വണ്ടി ഓടിച്ചു ഏതേലും പോലീസ്കാരന്റെ കൈയിൽ ചെന്ന് കേറിക്കൊടുക്കാൻ.. ഒന്ന് പോടാ. ഒന്നാമത് സമയം ശെരിയല്ല.”
“എന്റെ റൂമിൽ കിടക്കാം നീ വാ.”
“Ah നോക്കട്ടെ. നീ വയ്ക്ക്. ഞാൻ late ആയി.”
അടുത്ത രണ്ട് അപ്പോയിന്റ്മെന്റ് വലിയ കുഴപ്പമില്ലാതെ കഴിഞ്ഞു. ഈ ആഴ്ച ടാർഗറ്റ് ആയിട്ടുണ്ട്. അതുകൊണ്ട് അടുത്ത് രണ്ടുദിവസം എന്നെ വിളിച്ചു ബുദ്ധിമുട്ടിക്കില്ല. സെയിൽസ് റിപ്പോർട്ട് ഗ്രൂപ്പിലും ടീം ലീഡർനും അയച്ചിട്ട് ഒരു കട്ടനും കുടിച്ചിട്ട് വീട്ടിൽ എത്തി.
കുളിച്. ബോഡി ലോഷനും ഇട്ട്. ഒരു ഓവർസൈസ് കറുത്ത ടീഷർട്ടും ക്രീം ലൂസ് ഫിറ്റ് പാന്റ്സും ഇട്ട്. കൂടുതൽ ഓവറാകാതെ പെർഫ്യൂം അടിച്ചു ഇറങ്ങി.
പോകുന്ന വഴി അടുത്തുള്ള ഫാൻസി ഷോപ്പിൽ നിന്നും അവൾക്ക് ഒരു ലിമിറ്റഡ് എഡിഷൻ മേക്കപ്പ് കിറ്റും വാങ്ങി ഞാൻ അവളുടെ ഫ്ലാറ്റിന്റെ താഴെ എത്തി. വണ്ടി താഴെ വച്ചിട്ട്. ഞാൻ ലിഫ്റ്റിൽ കയറി. അഞ്ചാമത്തെ നിലയിൽ ഇറങ്ങി. അവളുടെ ഫ്ലാറ്റിലേക്ക് കയറി.
പരിപാടി തുടങ്ങിയതേ ഉള്ളു. ഞാനും രാഹുലും ദേവികയുടെ രണ്ടുമൂന്നു സുഹൃത്തുക്കളും അവളുടെ അച്ഛനും അമ്മയും അനിയനും.
“എന്തടാ വൈകിയേ?”
എന്റെ കൈയിൽ പിടിച്ചുകൊണ്ട് ദേവിക ചോദിച്ചു.
ഞാൻ അവളുടെ തോളിൽകൂടി കൈ ഇട്ടിട്ട് പറഞ്ഞു.
“ടാർഗറ്റ് ആകണ്ടേ മോളൂസേ. ഇന്നത്തെ ജോലി കഴിഞ്ഞപ്പോൾ തന്നെ ലേറ്റ് ആയി. ഇന്നാ ഇത് നിനക്ക് എന്റെ ഗിഫ്റ്റ്.”
അവൾ അത് വാങ്ങി തുറന്ന് നോക്കി. പെണ്ണിന്റെ കണ്ണ് വിടരുന്നതും കവിൾ ചുവക്കുന്നതും കണ്ടുകൊണ്ട് നിന്നെ എന്നെ അതെ മുഖത്തോട് നോക്കിയിട്ട്
“എടാ തെണ്ടി നീ ഇത് ഓർത്തുവച്ചിട്ട് എനിക്ക് വാങ്ങിയതാ അല്ലെ?”
എപ്പഴോ പുറത്ത് പോയപ്പോൾ അവൾക് ഈ കിറ്റ് ഇഷ്ടപ്പെട്ടു എന്ന് പറഞ്ഞിരുന്നു. അതാ പിന്നെ ഇത് തന്നെ വാങ്ങിക്കാം എന്ന് കരുതിയെ. ആ ഏതായാലും അവൾ ചാടിത്തുള്ളി ആ കിറ്റ് അമ്മയെയും അച്ഛനെയും കാണിച്ച സന്തോഷിക്കുമ്പോൾ എനിക്കും ഒരു നിർവൃതി. അവൾക്ക് ഇതുപോലെ ഒരു നൂറെണ്ണം വാങ്ങിച്ചുകൊടുത്താലും അവൾ എനിക്ക് ആഹാരം വാങ്ങിത്തന്നിതിന് പകരമാവില്ല. ജീവിതത്തിൽ ബുദ്ധിമുട്ടിയപ്പോൾ എല്ലാംകണ്ടറിഞ്ഞു ചെയ്തിട്ടുണ്ട് രാഹുലും ഇവളും. അതുവച്ചു നോക്കിയാൽ ഇതൊക്കെ എത്രയോ ചെറുത്.
“ഇപ്പൊ അടിക്കുന്നോ? ആഹാരം കഴിച്ചിട്ട് അടിക്കുന്നോ?”
എന്റെ അടുത്ത് വന്നിട്ട് രാഹുൽ ചോദിച്ചപ്പോഴാണ് ഞാൻ വർത്തമാത്തിലേക്ക് എത്തിയത്.
“പിന്നെ ആവാം. ഇതൊക്കെ ഒന്ന് കഴിയട്ടെ.”
അപ്പോഴേക്കും കേക്ക് മുറിക്കാൻ സമയമായി. ദേവിക നടുക്കും അച്ഛനും അനിയനും അമ്മയും അവളുടെ ഇരു വശത്ത് നിന്നുകൊണ്ട് മെഴുകുതിരി ഊതിയണച്ചിട്ട് അവൾ കേക്ക് മുറിച് അമ്മയ്ക്കും അച്ഛനും അനിയനും കൊടുത്തു അവർ തിരിച്ചും. ഇതൊക്കെ ഞാൻ എന്റെ ഫോണിൽ പകർത്തികൊണ്ട് കണ്ടു.