“”സത്യം……..””
അവളുടെ കൈയ്യിൽ തന്റെ വലം കൈ ചേർത്ത് ഗിരി പറഞ്ഞു……
അണഞ്ഞു പോയ പ്രകാശം മല്ലികയുടെ മിഴികളിൽ തിരികെയെത്തി…
“” സുധാകരേട്ടൻ പറഞ്ഞേല്പിച്ച ഒരു കാര്യമുണ്ട്… “”
“” അതെന്താണെന്ന് പറഞ്ഞു കൂടെ…….?””
മല്ലിക പുഞ്ചിരിച്ചു……
“” പെണ്ണുങ്ങളുടെ മനസ്സിൽ രഹസ്യമങ്ങനെ ഇരിക്കില്ല… അതാ പറയാത്തത്… “
ഗിരി ചിരിച്ചു… ….
“” എന്നാലുമൊന്ന് പറയെടോ…””
മല്ലിക അവന്റെ ചുമലിൽ മൃദുവായി തട്ടി..
“” സമയമാകട്ടെ…….”
ഗിരി പറഞ്ഞൊഴിഞ്ഞു..
“” ഗിരി, നമ്മളിവിടെ നിന്ന് പോകും എന്ന് ഉമയോട് പറഞ്ഞു,അല്ലേ… ….?””
“” ഇതു തന്നെയാ ഞാൻ ഒന്നും പറയാത്തത്… രഹസ്യം പരസ്യമാകും… “
ഗിരി ചിരിയോടെ എഴുന്നേറ്റു..
അവൻ തിണ്ണയിലെ കസേരയിൽ വന്നിരുന്നതും ഒരു കസേരയുമായി , മല്ലികയും വന്നിരുന്നു……
“” അനിയത്തി എന്ത് പറഞ്ഞു… ?””
താടിയ്ക്ക് കൈ കൊടുത്ത് മല്ലിക ചോദിച്ചു……
“” അവളുടെ കല്യാണമാണ്……..””
ഗിരി പതിയെ പറഞ്ഞു…
“” കല്യാണമോ………? എന്ന്… ?””
മല്ലിക ഒന്നമ്പരന്നു..
“ എന്നാണെന്നാണ് അറിയില്ലാത്തത്… …. “
ഗിരി ശൂന്യതയിലേക്ക് മിഴികളെയ്തു…
“അറിയില്ലെന്നോ……..?””
“” അതേ ചേച്ചീ………. അവൾക്ക് ഒരാളെ ഇഷ്ടമാണ്, കല്യാണം പറഞ്ഞുറപ്പിച്ചതുമാണ്…”
ഗിരി ഒന്നു നിർത്തി മല്ലികയെ നോക്കി…
“” അവളെന്റെ മാത്രം അനിയത്തിയല്ലേ… അതുകൊണ്ട് ഞാൻ നടത്തണം ,,…””
മല്ലികയ്ക്ക് ഒന്നും മനസ്സിലായില്ല…
“” ചേട്ടൻമാരുടെയും എന്റെയും അനിയത്തിയുടെയും അമ്മ രണ്ടു പേരാ…””
ഗിരി വിളറിയ ചിരി ചിരിച്ചു….
“” അമ്മയുടെ വിഹിതം വിറ്റ കാശ് ബാങ്കിലുണ്ട്…… അതുകൊണ്ടൊന്നും തികയില്ല…… ആകെ വിൽക്കാനുണ്ടായിരുന്നത് വണ്ടി ആയിരുന്നു , അതു പോയി… …. “
അവന്റെ സ്വരത്തിൽ നിരാശ നിറഞ്ഞിരുന്നു…
“”ശ്രദ്ധിക്കണ്ടായിരുന്നോ… ?””
മല്ലിക ചോദിച്ചു……
“” ശ്രദ്ധ ഉണ്ടായിരുന്നു… എന്തോ കുറച്ചു കാലമായി, എന്നെ ഞാനല്ല നിയന്ത്രിക്കുന്നത് എന്നൊരു തോന്നൽ………. “
“” കൂട്ടുകാരൊക്കെ……..?””
“ അവരൊക്കെ എന്നേക്കാളും കഷ്ടത്തിലാ ചേച്ചീ… പിന്നെ, ജീവൻ കളഞ്ഞും കൂടെ നിന്നോളും… “
ഗിരി അഭിമാനത്തോടെ പറഞ്ഞു…
“” എത്ര വേണം ഇനി……….?””
തന്റെ കഴുത്തിലെ നൂലുപോലുള്ള മാലയിൽ തെരുപ്പിടിച്ചാണ് മല്ലിക ചോദിച്ചത്……
ഗിരി അതു കണ്ടു…
“” നൂറ്റൊന്നു പവൻ… …. “
ഗിരി പറഞ്ഞതും മല്ലിക വായ പൊളിച്ച് കസേരയിലേക്ക് ചാരി….
“” തറവാട്ടു പേരിന് ദോഷം വരരുതല്ലോ… മാത്രമല്ല അവളുടെ സന്തോഷമല്ലേ വലുത് ….?””
ഗിരി എഴുന്നേറ്റു..,
അവൻ മുറ്റത്തേക്കിറങ്ങിയതും ചിന്താഭാരത്തോടെ മല്ലിക അനുഗമിച്ചു…
ജാക്കി ചണച്ചാക്കിൽ നിന്ന് ഇളകി…
എന്താണിവന്റെ മനസ്സിലിരുപ്പ് ….?
മല്ലികയിലും സംശയത്തിന്റെ മുള പൊട്ടിത്തുടങ്ങി..
സഹോദരിയുടെ വിവാഹം നടത്തേണ്ടവൻ ഈ മലഞ്ചെരിവിൽ വന്നു കിടക്കേണ്ട കാര്യം എത്ര ആലോചിച്ചിട്ടും അവൾക്ക് മനസ്സിലായില്ല… ….
ഗിരി വീടിനു പിന്നിലുള്ള പറമ്പിലേക്ക് നോക്കി…
കാടു കയറിക്കിടക്കുന്നു……
“” ഇതൊന്നു വെട്ടണം……..”
ആരോടെന്നില്ലാതെ ഗിരി പറഞ്ഞു…
ജാക്കി , അവനെ ചുറ്റിപ്പറ്റി നിന്ന ശേഷം, യാത്രയ്ക്കുള്ള സ്കോപ്പില്ല എന്ന് കണ്ട്, തിരികെ ചണച്ചാക്കിൽ തന്നെ അഭയം പ്രാപിച്ചു…
മല്ലിക അത് ശ്രദ്ധിച്ചില്ല…
“” കല്യാണത്തിന് ഞങ്ങളെ വിളിക്കുമോ… ….?””
മല്ലിക ചിന്തയിൽ നിന്നുണർന്നു…
“” നിങ്ങളൊക്കെയില്ലാതെ എന്ത് കല്യാണം… ?””
ഗിരി ചിരിച്ചു…
താഴെ പറമ്പിനതിരിൽ രണ്ടു പേർ ജോലി ചെയ്യുന്നത് ഗിരി കണ്ടു…
“” പുതിയ പണിക്കാർ എത്തിയെന്ന് തോന്നുന്നല്ലോ… …. ?”
“” എന്താ അവരുടെയും കൈ തല്ലിയൊടിക്കാൻ പ്ലാനുണ്ടോ………..?””
മല്ലികയും ചിരിയോടെ അവരെ നോക്കി…
“” നോക്കാം………. “
ഗിരി മുറ്റത്തിനു നേർക്ക് നടന്നു……
അമ്പൂട്ടൻ അന്ന് നേരത്തെ വന്നു..
ഗിരി, അവനെയും കൂട്ടി വെറുതെ പുഴക്കരയിൽ പോയി തിരികെ വന്നപ്പോഴേക്കും ഉമ എത്തിയിരുന്നു… ….
അന്നും പഴം പൊരിയും പാൽ ചായയുമായിരുന്നു…
അകത്ത് ഉമയുടെയും മല്ലികയുടെയും സംസാരം കേൾക്കുന്നുണ്ടായിരുന്നു…
“” പുറത്തിറങ്ങണ്ടാന്ന് കുഞ്ഞമ്മ പറഞ്ഞില്ലേ…….?””
“” ഞാൻ പറഞ്ഞെടീ………. “
“” മുറിവോ… ….?””
“” വാട്ടമുണ്ട്……. “
“” പഴുപ്പോ………..?””
“” നീ ചെന്ന് നോക്ക്…………….”
മല്ലിക ദേഷ്യപ്പെട്ടതും ഉമ നിശബ്ദയായി…
കുറച്ചു കഴിഞ്ഞതും ഡെറ്റോളും ലോഷനും കോട്ടണുമായി “” കമ്പോണ്ടർ അമ്പൂട്ടൻ “ ഹാജരായി.
പിന്നാലെ ഹെഡ് നഴ്സ് ഉമയും….
ഉമ, അതിന്ന് വാങ്ങിക്കൊണ്ടു വന്നതാണെന്ന് ഗിരിക്ക് മനസ്സിലായി…
മല്ലിക അകത്ത് ജോലിയിലായിരുന്നു……
“” ഇയാള് തിരിഞ്ഞിരുന്നേ………. “
ഉമ ഗാംഭീര്യത്തിൽ പറഞ്ഞു…
“” ഇയാളല്ല …. ഉണ്ണി മുകുന്ദൻ… ….””
ഗിരിയും അതേ ഗാംഭീര്യത്തിൽ പറഞ്ഞു…
കാറ്റു കുത്തി വിട്ട ബലൂൺ പോലെ ഉമ, ചുങ്ങിപ്പോയി…
അവൾ നാക്കു കടിച്ച് നോക്കിയതും അമ്പൂട്ടൻ അരഭിത്തിയിൽ കൈ കുത്തി മുറ്റത്തേക്ക് ചാടി…
ചണച്ചാക്കിനു മീതെ, നായ്പ്പൂട പറന്നതും മുറ്റത്തേക്ക് ജാക്കി , ഓരിയിട്ട് ചാടുന്നതും ഗിരി കണ്ടു…
അമ്പൂട്ടൻ ജാക്കിയുടെ മേലേക്കാണ് ചാടിയത്…
ഉമ ലോഷനെടുത്ത് മുറിവിലൊഴിച്ച് കലിപ്പു തീർത്തു……
അരഭിത്തിയിലേക്ക് വലം കൈ വെച്ച് . അതിലേക്ക് മുഖം ചാരി ഗിരി കിടന്നു…
നല്ല നീറ്റലുണ്ടായിരുന്നു..
“” ഇനി കൈ കാണിക്ക്………. “
മൂന്നു നാലു മിനിറ്റു കഴിഞ്ഞ് ഉമ ഉത്തരവിട്ടു…
ഗിരി മുഖമുയർത്തി , അവളുടെ നേരെ കൈ നീട്ടി…
ഉമ ഗിരിയുടെ മുഖത്തു നോക്കുന്നുണ്ടായിരുന്നില്ല…
കൈ കൂടി ഡ്രസ്സ് ചെയ്ത ശേഷം, ഉമ മെഡിസിനൊക്കെ വാരിക്കൂട്ടി……
“” ഞാനത് ചുമ്മാ പറഞ്ഞതാ… “
അകത്തേക്ക് തിരിയാൻ നേരം ഉമ പറഞ്ഞു……
“” എന്ത്… ….?””
ഗിരി അജ്‌ഞത നടിച്ചു… …..
“” നേരത്തെ പറഞ്ഞത്………. “
“” അതെന്താന്നാ ചോദിച്ചത്…… ?””
ഉമ കണ്ണുകളുരുട്ടി തറപ്പിച്ചു നോക്കിയ ശേഷം അകത്തേക്ക് കയറി…
***** ***** ***** ***** ******
പുതിയറ……….
ക്രൈം ബ്രാഞ്ച് ഓഫീസ്…….
ഡി.വൈ. എസ്. പി സത്യപാലന്റെ ക്യാബിനു മുന്നിലേക്ക് ഹർഷൻ വന്നു……
ഗ്ലാസ്സ് ഡോർ തുറന്നതും സത്യപാലൻ പുഞ്ചിരിച്ചു…….
“” എനി അപ്ഡേറ്റ് ……..?””
ഹർഷൻ സല്യൂട്ട് അടിച്ച ശേഷം ചെയറിലേക്കിരുന്നു……
“” നതിംഗ് സർ… …., പുതിയ ഒരവതാരം വന്നു കയറിയിട്ടുണ്ട്… ഒരു ഗിരി… “
“” അത് താൻ വിളിച്ചപ്പോൾ പറഞ്ഞായിരുന്നല്ലോ………. “
“” ഉം… ഒരു ക്രൈം റിക്കാർഡ്സിലും അവന്റെ പേരൊന്നുമില്ല, ഏതാണ്ട് കൊട്ടടക്കയോ, ഒട്ടുപാലോ മോഷ്ടിച്ച കേസിൽ ആള് കുറച്ചു കാലം നമ്മുടെ ചിലവിൽ കഴിഞ്ഞിരുന്നു…””
സത്യപാലൻ സീറ്റിലേക്ക് ചാരി……
“” നമ്മളന്വേഷിക്കുന്ന കസ്റ്റഡി മർഡർ കേസിലൊന്ന്, അതായത് സുധാകരനും ഈ ഗിരിയും ഒരുമിച്ച് ജയിലിൽ കിടന്നു എന്ന് പറഞ്ഞാണ് അവനവിടെ വന്നു കയറിയിട്ടുള്ളത്… “
