കണക്കുപുസ്തകം – 6 Like

: ഇച്ചായാ… പോലീസിൽ അറിയിക്കണ്ടേ

: നമ്മുടെ പയ്യനില്ലേ അവിടത്തെ സ്റ്റേഷനിൽ ഞാൻ വിളിച്ചു പറയാം … നീ നമ്മുടെ പിള്ളേരെയും കൂട്ടി അവിടെവരെ പോയേച്ചും വാ. എന്താ ചെയ്യേണ്ടതെന്ന് ഞാൻ പറഞ്ഞുതരാം. ആദ്യം ബ്ലെസ്സിയെ വിവരമറിയിക്കണം.. സിസിലിയെ (ഡെന്നിസിന്റെ ഭാര്യ) വിളിച്ച് പറഞ്ഞാമതി അവള് പറഞ്ഞോളും ബ്ലെസ്സിയോട്.

: ഞാൻ അവിടെ പോയിട്ട് എന്താ ചെയ്യേണ്ടത്… എന്നാലും ഹരി എവിടെപ്പോയതാവും.. അവന്റെ വണ്ടി അവിടെത്തന്നെ ഉണ്ടെന്ന ഷേർലി പറയുന്നത്..

: നീ ഞാൻ പറയുന്ന പോലെ ചെയ്യ്… ആദ്യം സിസിലിക്കുഞ്ഞിനെ വിളിക്ക്.

അവറാച്ചന്റെ നിർദേശങ്ങൾ അനുസരിച്ച അന്നാമ്മ രണ്ട് സഹായികളെയും കൂട്ടി മൂന്നാറിലേക്ക് പോകാനൊരുകുമ്പോഴാണ് സിസിലിയുടെ ഫോൺ വന്നത്. അവളുമായി സംസാരിച്ച ശേഷം വീണ്ടും അന്നാമ്മ അവറാച്ചന്റെ മുറിയിലെത്തി…

: ഇച്ചായാ.. ബ്ലെസ്സി നാട്ടിലേക്ക് വരണമെന്ന് പറഞ്ഞ് ബഹളമുണ്ടാക്കുന്നു പോലും

: അടുത്ത ഫ്ലൈറ്റിൽ കയറ്റി വിടാൻ പറ സിസിലിയോട്..

: ഹരിയുടെ കയ്യിൽ ബ്ലെസ്സിയെ കിട്ടിയാലുള്ള കാര്യമറിയാലോ…

: ഹരിക്കിനി ബ്ലെസ്സിയെ നോക്കാൻ എവിടുന്നാ നേരം… സ്വന്തം തടി രക്ഷിക്കാനുള്ള ഓട്ടം തുടങ്ങാൻ പോകുവല്ലേ ചെറുക്കൻ…

: എന്നാലും നമ്മൾ സൂക്ഷിക്കണം..

അവറാച്ചൻ പറഞ്ഞുകൊടുത്ത പ്രകാരം കാര്യങ്ങൾ നീക്കിയ ശേഷം അന്നാമ്മ മൂന്നാറിലേക്കുള്ള യാത്രതിരിച്ചു. യാത്രമധ്യേ അന്നാമ്മ ഹരിയുടെ ഫോണിലേക്ക് വിളിച്ചെങ്കിലും ഹരി ഫോണെടുത്തില്ല. പിന്നീട് അന്നാമ്മയുടെ ഫോൺ പോയത് സ്വപ്നയ്ക്കാണ്. മേരിയുടെ മരണവർത്തയറിഞ്ഞ സ്വപ്ന ശരിക്കും ഞെട്ടി.
: അപ്പൊ ഹരി സാർ….

: ഇപ്പൊ നിനക്ക് മനസിലായില്ലേ നിന്റെ സാർ എന്നേക്കാൾ വിഷമാണെന്ന്. ഞാനൊന്ന് മേരിയെ കണ്ടിട്ട് വരട്ടെയെന്ന് പറഞ്ഞ് ഷേർളിയെ മുറിയിൽ ഒറ്റയ്ക്കാക്കിയിട്ടാണ് അവൻ മേരിയുടെ അടുത്തേക്ക് പോയത്…

: സാർ തന്നെ ആയിരിക്കുമോ… ഒരാളെ കൊല്ലാനുള്ള ധൈര്യമൊക്കെ ഹരി സാറിന് ഉണ്ടോ

: അവന്റെ ചരിത്രം നിനക്കറിയുമോ…പതിനേഴ് തികയാത്ത കിളുന്ത് പെണ്ണിനെ പിച്ചിച്ചീന്തിയവന്റെ മോനാ… അവൻ ഇതല്ല ഇതിനപ്പുറം ചെയ്യും..

: മാഡം പോലീസിൽ അറിയിച്ചോ… കൊലപാതകമല്ലേ

: അവിടത്തെ CI എന്റെ ആളാ.. തൽക്കാലം ഈ വിവരം വേറെയാരും അറിയില്ല. ഇത് നമുക്ക് വീണുകിട്ടിയ നല്ല അവസരമാണ്. ഇത് ഞാൻ നന്നായി ഉപയോഗിക്കും.. അവനും അവന്റെ പൊലീസുകാരി പെങ്ങളും അന്നാമ്മയുടെ കാൽകീഴിൽ കിടന്ന് നക്കും..

: മേരിയെ ആരെങ്കിലും അന്വേഷിച്ചാൽ കുഴപ്പമാവില്ലേ…

: അവളെ ചോദിച്ചുവരാൻ ആകെയുള്ളത് ബ്ലെസ്സിയാണ്.. അത് ഞാൻ നോക്കിക്കോളാം. മേരിയെ വച്ച് ഹരിക്ക് ഞാൻ വിലയിടും… ഇതിനെല്ലാം കൂട്ടുനിന്ന നിനക്കും ഉണ്ടാവും അന്നാമ്മയുടെ വക സ്പെഷ്യൽ ഗിഫ്റ്റ്…ആഹ് പിന്നേ, നീയൊന്ന് ഹരിയെ വിളിച്ചുനോക്ക്. ഞാൻ വിളിച്ചിട്ട് എടുക്കുന്നില്ല… അവനോട് എന്നെ വിളിക്കാൻ പറയണം

: ശരി മാഡം… ഞാൻ പറയാം.

അവറാച്ചന്റെ വക്രബുദ്ദിയിൽ തെളിഞ്ഞ പ്ലാനുകളുമായി അന്നാമ്മ മൂന്നാറിലെത്തിച്ചേർന്നു. അവറാച്ചൻ പറഞ്ഞ പ്രകാര്യം കാര്യങ്ങളൊക്കെ നിർവഹിച്ചശേഷം ഷേർളി പകർന്നുകൊടുത്ത മദ്യവുമായി പൂന്തോട്ടത്തിൽ ഇരിക്കുമ്പോഴാണ് ഹരി അന്നമ്മയെ വിളിക്കുന്നത്…

: അന്നാമ്മേ… കാര്യങ്ങളൊക്കെ സ്വപ്ന പറഞ്ഞു… എന്താ സംഭവിച്ചത്..

: ഞാൻ ഹരിയോട് ചോദിക്കാനിരിക്കുകയാണ്… എന്താ ഹരി ഇങ്ങനെ.. അവൾ എന്തിനും ഒരുക്കമായിരുന്നല്ലോ… കൈയ്യബദ്ദം പറ്റാം പക്ഷെ ഇത്… ഇത്രയ്ക്ക് ക്രൂരനാണോ ഹരി

: അന്നാമ്മേ പ്ലീസ്.. ഞാൻ പറയുന്നതൊന്ന് കേൾക്ക്. ഞാൻ രാത്രി തന്നെ കൊച്ചിക്ക് തിരിച്ചു. ആ സമയത്ത് ഞാനില്ലായിരുന്നു അവിടെ..

: ഹരീ… നമ്മൾ ഇന്നലെമുതൽ പാർട്നെർസ് ആണ്. അതുകൊണ്ട് സത്യം പറഞ്ഞോളൂ. ഹരിക്ക് ഒന്നും സംഭവിക്കാതെ ഞാൻ നോക്കിക്കോളാം

: അന്നാമ്മേ സത്യമായിട്ടും എനിക്കൊന്നും അറിയില്ല.. ഞാനല്ല ചെയ്തത്

: ഹരീ… തെളിവുകൾ എല്ലാം നിനക്ക് എതിരാണ്. പോരാത്തതിന് സാക്ഷിയും ഉണ്ട്… ഷേർളി എല്ലാം പറഞ്ഞു എന്നോട്..
: ഷേർളിയോ… അവളെന്താ പറഞ്ഞത്…അന്നാമ്മേ, എന്റെ വണ്ടി അവിടെയുണ്ട്, ഇനിയതവിടെ കിടന്നാൽ കുഴപ്പമാണ്. ഞാനൊരാളെ വിടാം അതെടുക്കാൻ

: വണ്ടിയൊക്കെ അവിടെ നിൽക്കട്ടെ ഹരിയിപ്പോ എവിടാ.. നമുക്ക് നേരിട്ട് സംസാരിക്കാം..പിന്നെ ഹരിക്ക് രക്ഷപ്പെടണമെങ്കിൽ ഇനി ഞാൻ പറയുന്നതുപോലെ നിന്നേ പറ്റൂ… അല്ലെങ്കിൽ സ്വന്തം പെങ്ങളെകൊണ്ട് കയ്യിൽ വിലങ്ങണിയിക്കുന്നത് ഹരിക്ക് കാണേണ്ടി വരും.. നീ ആരാണെന്നൊക്കെ അറിഞ്ഞുതന്നാ ഞാൻ നീയുമായുള്ള ബന്ധത്തിന് തുടക്കമിട്ടത്… പഴയതൊക്കെ നമുക്ക് മറക്കാം. ആദ്യം നമുക്ക് മേരിയെ അടക്കണ്ടേ…. അതുകഴിഞ്ഞ് നീ നിന്റെ പെങ്ങളെയും കൂട്ടി തോട്ടത്തിൽ ബംഗ്ലാവിലേക്ക് വാ. ബാക്കിയൊക്കെ എന്റെ ഇച്ചായൻ പറയും.

: അന്നാമ്മേ… നമ്മൾ തമ്മിലുള്ള പ്രശ്നത്തിൽ അവളെയെന്തിനാ വലിച്ചിഴക്കുന്നേ…

: പ്രശ്നമോ.. ഹരിയെന്താ ഈ പറയുന്നേ.. ഹരിയെന്നെ വല്ലാതെ തെറ്റിദ്ധരിച്ചിരിക്കുവാ.. എല്ലാം ഞാൻ നേരിട്ട് പറയാം. ഇന്ന് രാത്രി മേരിയുടെ അടക്കിന് വരില്ലേ ഹരി…. ഇവിടെ വന്നാൽ മതി. എന്നിട്ട് നമുക്ക് ഒരുമിച്ച് പോവാം കൊച്ചിക്ക്, പോകുമ്പോ നമ്മുടെ വൈഗമോളെയും കൂട്ടാം….

: അന്നാമ്മേ ഞാൻ കൊച്ചിയിലെ വീട്ടിൽ വരാം.. നമുക്ക് എല്ലാം പറഞ്ഞു തീർക്കാം. ഞാനാണ് കൊന്നതെന്ന് പറഞ്ഞ അവളെയെനിക്ക് കാണണം, ആ ഷേർളിയെ..

………………

ഇതേസമയം അവറാച്ചൻ തന്റെ ഫോണെടുത്ത് കറക്കിയത് വൈഗയുടെ നമ്പറിലേക്കാണ്. അവറാച്ചന്റെ സംസാരത്തിൽ നിന്നും കാര്യങ്ങളുടെ കിടപ്പ് മനസിലാക്കിയ വൈഗയുടെ ഉള്ളൊന്ന് പിടഞ്ഞു. തന്റെ ഏട്ടനെ അഴിക്കുള്ളിലാക്കാനുള്ള എല്ലാ തെളിവുകളും അവറാച്ചൻ നിരത്തിയപ്പോൾ വൈഗയ്ക്ക് അവറാച്ചനുമുന്നിൽ പിടിച്ചുനിൽക്കാനായില്ല. ഈ അവസരം മുതലാക്കിയ അവറാച്ചൻ സന്ധി സംഭാഷണത്തിന് വൈഗയെക്കൂടി വീട്ടിലേക്ക് ക്ഷണിച്ചു. അവറാച്ചനുമായി സംസാരിച്ചയുടനെ വൈഗ പോയത് ശ്യാമപ്രസാദിന്റെ അടുത്തേക്കാണ്. രണ്ടുപേരുംകൂടി ഹരിയെ വിളിക്കാൻ ശ്രമിച്ചെങ്കിലും കിട്ടിയില്ല.

സന്ധ്യയോടുകൂടി കൊച്ചിയിൽ വന്നിറങ്ങിയ ബ്ലെസ്സിയെ സ്വീകരിക്കാനായി അന്നാമ്മ അയച്ച വണ്ടിയിൽ കയറി ബ്ലെസ്സി മൂന്നാറിലേക്ക് യാത്രതിരിച്ചു. രാത്രിയോടെ മൂന്നാറിലെത്തിയ ബ്ലെസ്സി തന്റെ പെറ്റമ്മയുടെ മുഖം കണ്ട് വിങ്ങിപ്പൊട്ടി. അന്നാമ്മയുടെ എസ്റ്റേറ്റിന്റെ ഒരു കോണിൽ മേരിക്കായി അന്ത്യവിശ്രമമൊരുക്കിയ ശേഷം അന്നാമ്മ ബ്ലെസ്സിയെ നെഞ്ചോട് ചേർത്തുപിടിച്ചു…

: കരയല്ലേ മോളേ… ദൈവം ചിലരെ നേരത്തെ വിളിക്കും. ഏതോ ഒരുത്തൻ ചവച്ചുതുപ്പിയശേഷം കൊന്നതാണ് നമ്മുടെ മേരിയെയെന്ന് ഈ സമൂഹം അറിയരുത്. അതല്ലേ അന്നാമ്മച്ചി ഇവിടെ കല്ലറയൊരുക്കിയത്. മോളുടെ അമ്മയുറങ്ങുന്ന ഈ മണ്ണ് ഇനി മോൾക്കുള്ളതാ..
: ഏതോ ഒരുത്തൻ അല്ലല്ലോ കൊച്ചമ്മേ… എനിക്കറിയാം ആരാണെന്ന്…എന്നോട് സംസാരിച്ചിരിക്കുമ്പോഴാ അവൻ എന്റെ അമ്മയെ…. എന്നാലും ഷേർളി നിനക്കെങ്കിലും തടുക്കാമായിരുന്നില്ലേ…