ഷിഫാന ലജ്ജയോടെ അവനെ നോക്കി. ഇന്ന് തന്റെ ആദ്യരാത്രിയാണെന്ന്… ഇന്ന് ഏറ്റവും സന്തോഷിക്കേണ്ട ദിവസമാണെന്ന്…
ശരി… ഒരേട്ടൻ പറഞ്ഞതല്ലേ.. കഴിഞ്ഞതെല്ലാം മറക്കാം.. അവന് എന്തേലും പ്രശ്നമുണ്ടേൽ ഒക്കെ മാറ്റിയെടുക്കാം… ഈ ഏട്ടൻ തന്റെ കൂടെയുണ്ടാവുമെന്നുറപ്പാണ്.
അവൾ കണ്ണ് തുടച്ച് സന്തോഷത്തോടെ ദാസനെ നോക്കിച്ചിരിച്ചു.
“ഏട്ടാ… ഞാനൊരു കാര്യം പറഞ്ഞോട്ടെ..?”
“നീ പറയെടീ.. അമ്മൂ…”
“അത്… അത് ചേട്ടൻ തന്നെ നോക്കി എടുത്ത് തന്നാൽ മതി.. ഞാനിവിടെ ഇരിക്കാം… “
അത് പറയുമ്പോൾ അവളുടെ ചുണ്ടിലൊരു കളളച്ചിരി ദാസൻ കണ്ടു.
പക്ഷേ, അവനൊരു വല്ലായ്മ തോന്നി. ഇതൊക്കെ ഭർത്താവ് ചെയ്ത് കൊടുക്കേണ്ടതാണ്… അതാണ് ഏതൊരു പെണ്ണും ആഗ്രഹിക്കുക..ആ മരങ്ങോടനെ അതിനൊന്നും കിട്ടില്ല എന്നുറപ്പാണ്. ഇവളെ വിഷമിപ്പിക്കാനും വയ്യ…
വിനോദ് ഒരുമണിക്കൂർ കഴിഞ്ഞാണ് മടങ്ങിവന്നത്. ഷിഫാന കൗണ്ടറിനടുത്തുള്ള ചെയറിൽ ഇരിക്കുകയാണ്..
അവൻ ബൈക്ക് നിർത്തി ഇറങ്ങി വന്നു.
“കഴിഞ്ഞില്ലേടീ… ?’”
വന്നയുടനെ അവൻ മുരണ്ടു.
“കഴിഞ്ഞെടാ ഉവ്വേ… നിങ്ങള് പൊയ്ക്കോ… അമ്മൂ നീ കഴിക്കാനെന്തെങ്കിലും ഉണ്ടാക്കിയിട്ടുണ്ടോ..?”
അവൾ ചമ്മലോടെ ഇല്ലെന്ന് തലയാട്ടി.
“ആ.. ഇന്നിനിയൊന്നും ഉണ്ടാക്കണ്ട.. വരുമ്പോ കഴിക്കാനുള്ളത് ഞാൻ കൊണ്ടു വരാം…”
വിനോദ് ഒന്നും പറയാതെ ബൈക്കിൽ ചെന്ന് കയറി..
ഷിഫാന നാലഞ്ച് കവറുകളും കയ്യിൽ പിടിച്ച്, ദാസനോട് കണ്ണുകൾ കൊണ്ട് യാത്ര പറഞ്ഞ് നടന്ന് ചെന്ന് ബൈക്കിന്റെ പിന്നിൽ കയറി.
ആ യുവമിധുനങ്ങൾ തൊട്ടുരുമ്മിപ്പോകുന്നത് കണ്ട് ദാസനൊന്ന് നെടുവീർപ്പിട്ടു.
🌹🌹🌹
ദാസൻ വീട്ടിൽ വന്ന് കയറുമ്പോൾ വീടാകെ പ്രകാശത്തിൽ കുളിച്ച് നിൽക്കുകയാണ്..ഇതൊന്നും പതിവില്ലാത്തതാണ്.. ഇരുട്ട് മൂടിയ ഒരു പ്രേതഭവനത്തിലേക്ക് വരുന്നത് പോലെയാണ് എന്നും വരുന്നത്.
താൻ വരുമ്പോൾ വിനോദ് എത്തിയിട്ടുണ്ടാവില്ല. അവനെപ്പോഴാണ് വരുന്നതെന്ന് പോലും തനിക്കറിയില്ല.
അവന്റെ ബൈക്കിന്റെ ശബ്ദം കേട്ട് ഷിഫാന ഓടിവന്ന് വാതിൽ തുറന്നു.
ഹാളിലേക്ക് കയറിയ ദാസൻ ചുറ്റും നോക്കി..തന്റെ മുറിയിൽ നിന്നും പുറത്തേക്ക് വലിച്ചിട്ട സാധനങ്ങളൊന്നും കാണുന്നില്ല. കട്ടിലും,അലമാരയും മാത്രമുണ്ട്.
അവൻ മുറിയിലേക്ക് കയറിനോക്കി. എല്ലാം അടിച്ച് തുടച്ച് വൃത്തിയാക്കി സാധനങ്ങളെല്ലാം അടുക്കി വെച്ചിട്ടുണ്ട്.
അവൻ ഷിഫാനയുടെ മുഖത്തേക്കൊന്ന് നോക്കി. അവൾ കുസൃതിയോടെ ചിരിച്ചു.
“നീയാണോടീ ഇതെല്ലാം ചെയ്തേ..? “
അവൾ സന്താഷത്തോടെ തലയാട്ടി.
“അതൊന്നും വേണ്ടായിരുന്നു മോളേ.. വീട്ടിൽ വന്ന് കയറിയ ദിവസം തന്നെ…”
“അതൊന്നും സാരമില്ല ചേട്ടാ.. വിനോദേട്ടൻ സഹായിച്ചിരുന്നേൽ ഈ കട്ടില്കൂടി അകത്തേക്കിടാമായിരുന്നു..”
ഇതെല്ലാം ഇവൾ ഒറ്റക്ക് തന്നെയാണ് ചെയ്തതെന്ന് ദാസനറിയാം.. കുമ്പിട്ട് ഒരു ഇല പോലും എടുക്കാത്ത നാറിയാണവൻ..
ദാസൻ വീടിനകം ആകെയൊന്ന് നോക്കി. ഒരു പെണ്ണ് കയറി വന്ന എല്ലാ ലക്ഷണവും കാണുന്നുണ്ട്. അടുക്കളയൊക്കെ ഒന്നുകൂടി ചിട്ടയിലാക്കിയിട്ടുണ്ട്.
ഇവൾ നല്ല പെൺകുട്ടിയാണെന്ന് ദാസന് മനസിലായി. വന്ന് കയറുന്ന വീട് ഒരു സ്വർഗമാക്കി മാറ്റാൻ ഇവൾക്ക് കഴിയും.
“ചേട്ടാ.. ഈ കട്ടില് പിടിച്ച് അകത്തേക്കിടണ്ടേ…?’ ‘
“ അതിനി നാളെയെങ്ങാനും നോക്കാം.. അത് പിടിക്കാൻ ആരേലും വേണം..”
“ഞാൻ വിനോദേട്ടനെ വിളിക്കാം..”
“എന്നാ എന്റെ മോള് വേഗം ചെല്ല്..എന്നിട്ട് കെട്ട്യോനേയും വിളിച്ച് വാ..”
അതിലെ പരിഹാസം വ്യക്തമായും ഷിഫാന തിരിച്ചറിഞ്ഞു. ചേട്ടൻ വന്ന് ഇത്രനേരമായിട്ടും അവൻ പുറത്തിറങ്ങി വരാത്തത് തന്നെ അവൾക്കിഷ്ടമായിട്ടില്ല..
അവൾ മുറിയിലേക്ക് ചെല്ലുമ്പോൾ വിനോദ് മൊബൈലിൽ ഒരു കുത്ത് വീഡിയോ കാണുകയാണ്. അവളെ കണ്ട് വേഗം അവനത് ഓഫാക്കി.
“ചേട്ടൻ വന്നത് നിങ്ങള് അറിഞ്ഞില്ലേ വിനോദേട്ടാ..?’”
ദേഷ്യത്തിൽ തന്നെ ഷിഫാന ചോദിച്ചു.
അവൻ ഒന്നും മിണ്ടാതെ അവളെ തുറിച്ച് നോക്കി.
“എന്റെ വിനോദേട്ടാ… ഇതൊന്നും ശരിയല്ല… ചേട്ടന്റെ കട്ടിലും അലമാരയുമൊക്കെ റൂമിലേക്ക് പിടിച്ചിടണം… ഏട്ടനൊന്ന് വന്ന് സഹായിക്ക്..’”
വിനോദ് കട്ടിലിൽ എഴുന്നേറ്റിരുന്നു.
“അയാളെ കിടത്താഞ്ഞിട്ട് നിനെക്കെന്താടീ ഇത്ര ധൃതി… ?
അത്ര തിരക്കുണ്ടെങ്കിൽ നീ തന്നെ പിടിച്ച് കൊടുക്ക്… ഒരു കാര്യം ഞാൻ പറഞ്ഞേക്കാം… അയാളുടെ വക്കാലത്തും കൊണ്ട് ഇനിയന്റ്ടുത്ത് വരരുത്… അയാളുടെ അമ്മുവല്ലേ നീ..?
ചെന്ന് സഹായിച്ച് കൊട്..”
അവൻ പറഞ്ഞത് പൂർണമായും ഷിഫാനക്ക് മനസിലായില്ല. എങ്കിലും ചിലതെല്ലാം മനസിലാവുകയും ചെയ്തു. ചേട്ടൻ തന്നെ അമ്മൂന്ന് വിളിച്ചത് ഇവന് ഇഷ്ടമായിട്ടില്ല.
അവൾ വെറുപ്പോടെ അവനെ നോക്കി.
പിന്നെ മുറിയിൽ നിന്ന് പുറത്തിറങ്ങി.
“എവിടെടീ നിന്റെ മണവാളൻ.. അവൻ മണിയറയിൽ നിന്ന് ഇറങ്ങില്ലാന്ന് പറഞ്ഞോ..?”
ചിരിയോടെ ദാസൻ ചോദിച്ചു.
“ചേട്ടൻ വാ… കട്ടില് നമുക്ക് പിടിച്ചിടാം..’”
“അതവിടെ കിടന്നോട്ടെടീ.. നാളെ ആരെയെങ്കിലും വിളിച്ച് റെഡിയാക്കാം.. നീയാ ഭക്ഷണം വിളമ്പ്.. കഴിച്ചിട്ട്‌ കിടക്കാം…”
ടേബിളിൽ വെച്ച കവറുകൾ ചൂണ്ടിക്കാട്ടി ദാസൻ പറഞ്ഞു.
“അപ്പോ ചേട്ടനെവിടെ കിടക്കും..?
“ഞാനിന്ന് ഈ സെറ്റിയിൽ കിടന്നോളാം…”
ഷിഫാന വിഷമത്തോടെ അവനെ നോക്കി. താൻ വന്ന് കയറിയ ദിവസം തന്നെ ചേട്ടൻ പുറത്തായി എന്ന തോന്നൽ അവളെ വല്ലാതെ വിഷമിപ്പിച്ചു.
“ചേട്ടൻ വാ.. ഒരു കട്ടില് പിടിക്കാനുള്ള ആരോഗ്യമൊക്കെ എനിക്കുണ്ട്..”
അവൾ വാശിയോടെ പറഞ്ഞു.
“വേണ്ടെടീ.. ഇന്നൊരു ദിവസമല്ലേ… ?’”
“വേണം… ചേട്ടൻ വാ…”
അവൾ മുറിയിലേക്ക് കയറി.
വേറെ നിവൃത്തിയില്ലാതെ ദാസനും കയറി.
ആദ്യം മുറിയിലുണ്ടായിരുന്ന കട്ടിൽ രണ്ടാളുംമെല്ലെ മെല്ലെ പിടിച്ച് പുറത്തിറക്കി.
പിന്നെ ദാസന്റെ കട്ടിൽ അകത്തേക്ക് കയറ്റി. പൊക്കിയും, നിലത്തൂടെ വലിച്ചും വളരെ ബുദ്ധിമുട്ടിയാണത് കയറ്റിയത് .. അതിന് നല്ല ഭാരമുണ്ടായിരുന്നു.
അലമാരയും പിടിച്ചിടാൻ അവൾ തയ്യാറായെങ്കിലും, അവൾക്കതിന് കഴിയില്ല എന്ന് ദാസനുറപ്പായിരുന്നു.
കിടക്കയും ഇട്ട് ബെഡ്ഷീറ്റും വിരിച്ചാണവൾ മുറിയിൽ നിന്ന് പുറത്തിറങ്ങിയത്.
“നീ ഭക്ഷണം വിളമ്പെടീ.. അവനെയൊന്ന് വിളിച്ച് നോക്ക്.. “
ഷിഫാന മുറിയിൽ കയറി വിനോദിനെ വിളിച്ചു.
“ഏട്ടാ.. വാ… ഭക്ഷണം കഴിക്കാം..”
“എനിക്ക് വേണ്ട..”
“ അതെന്താ… ?’”
“ഇനി അതും ഞാൻ വിശദീകരിച്ച് തരണോ..?”
ഷിഫാന ഒന്നും മിണ്ടാതെ പുറത്തിറങ്ങി.
അടുക്കളയിൽ ചെന്ന് പാത്രങ്ങളെടുത്ത് വന്ന് ദാസനുള്ള ഭക്ഷണം വിളമ്പി.നല്ല ചിക്കൻ ബിരിയാണി.
“നിങ്ങള് കഴിക്കുന്നില്ലേ…?”
കൈ കഴുകി വന്നിരുന്ന ദാസൻ ചോദിച്ചു.
“അത്.. കുറച്ച് കഴിഞ്ഞിട്ട് കഴിക്കാമെന്ന് പറഞ്ഞു ഏട്ടൻ… “