അവർ എന്നെ നോക്കിയൊന്ന് പുഞ്ചിരിച്ചു.
ഞാനും.
“” അകത്തേക്ക് വാ..! “”
ഞങ്ങളെ അകത്തേക്ക് ക്ഷണിച്ച് തിരിച്ചുനടന്ന അവരെ താടക തടഞ്ഞു.
“” ഇല്ലക്ക…! ഇപ്പൊ കേറണില്ല…! ഓഫീസിലേക്ക് പോണം. ഞങ്ങള് വൈകീട്ട് വരാം.! “”
അവളാവസാനം എന്നെനോക്കിയാണ് പറഞ്ഞത്. അത് എന്തിനാണെന്ന് മനസിലായതും ഞാനവളെ നോക്കി വരാമെന്ന് സമ്മതിച്ചുകൊണ്ട് തലയാട്ടി. അല്ലേലും വൈകീട്ടവളെ എങ്ങനെ വൈകിപ്പിക്കാം എന്നോർത്ത് നടക്കുകയായിരുന്നല്ലോ ഞാൻ. അതോടവളുടെ മുഖമൊന്ന് വിടർന്നു.
“” ഉച്ചക്കത്തേക്കുള്ള ഫുഡ് ഞാൻ ഏല്പിച്ചിട്ടുണ്ട് അക്കാ..! സമയമാവുമ്പോ അവരത് കൊണ്ട് തരും. ഇതാ ഇത് വച്ചോ…!””
അവരോട് പറഞ്ഞിട്ടുവള് കുറച്ചഞ്ഞൂറിന്റെ നോട്ടവരുടെ കയ്യിലേക്ക് വച്ചുകൊടുത്തു. അവരത് വാങ്ങി രണ്ട് കണ്ണിലുമൊന്ന് തൊട്ട് തൊഴുത് സഹായിയുടെ കയ്യിലേൽപ്പിച്ചു.
“” ഇത്രേടം വരെ വന്നിട്ട് കേറാണ്ടെങ്ങനാ മോളേ…! “”
അവരൊന്നൂടെ പറഞ്ഞെങ്കിലും വൈകീട്ടുറപ്പായും വരുമെന്നവൾ വാക്ക് കൊടുത്തു. പിന്നേ അവരോട് യാത്ര പറഞ്ഞവിടുന്നിറങ്ങി.
“” എന്താ ഒന്നും മിണ്ടാണ്ടിരിക്കണേ…! “”
കുറച്ച് നേരമായി ഓരോ ചിന്തകളിൽ മുഴുകിയിരുന്ന എന്നോടായി താടക ചോദിച്ചു. സാധാരണ ഞങ്ങളൊന്നിച്ചുണ്ടാവുമ്പോ കാര്യമായ സംസാരമൊന്നും ഉണ്ടാവാത്തതാണ്. എന്നാലവള് ഇന്നത്തെ എന്റെ പെരുമാറ്റം കണ്ടിട്ടോ എന്തോ ഓരോന്നൊക്കെ ചോദിച്ച് തുടങ്ങി.
“” ഹേയ് ഓരോന്ന് ചിന്തിച്ചിരുന്നതാ…! “”
മുഷിപ്പിക്കണ്ട എന്നോർത്ത് ഞാനും സംസാരിച്ച് തുടങ്ങി. സത്യത്തിലീ ശോകാവസ്ഥ എനിക്കും മടുത്ത് തുടങ്ങിയിരുന്നു.
“”ഹ്മ്മ്…!!””
അതിനവളൊന്ന് മൂളി.
“” തനിക്കെങ്ങനാ അവിടൊക്കെ പരിചയം?!””
ഓർഫനെജുമായി അവൾക്കുള്ള ബന്ധമോർത്ത് ഞാൻ ചോദിച്ചു.
“” അങ്ങനെ ചോദിച്ചാ..! കുറച്ച് കാലമായിട്ട് ബന്ധമുണ്ടെന്ന് കൂട്ടിക്കോ..!! “”
അവളൊരു ചിരിയോടെ പറഞ്ഞെന്നെ നോക്കി.
എനിക്കവളുടെ മറുപടി കേട്ടപ്പൊഴെന്തോ പന്തികേട് തോന്നി. തടകേടെ അച്ഛന്റെ അന്നത്തെ പെരുമാറ്റോം അവൾടെ ഇപ്പോഴുള്ള മറുപടിയുമൊക്കെ കൂട്ടിവായ്ക്കുമ്പോൾ…!
ഇവളെ അവർ ദത്തെടുത്തതാണോ എന്നൊരു ചിന്ത എന്നിലേക്ക് കടന്നുവന്നു. എന്നാലത് മനസ്സിൽ വച്ച് ഞാനവളോട് ചോദിച്ചു.
“” എന്ന് വച്ചാ…! “”
“” എന്നവച്ചാ ചെറുപ്പം മുതൽ ഞാനിവിടെ വരാറുണ്ട്. എല്ലാവർഷോം എന്റെ പിറന്നാളിന് അവിടെ ഫുഡ് ഞങ്ങളുടെ വക ആയിരുന്നു. അമ്മേടെ ആഗ്രഹം ആണത്. പിന്നേ പിന്നേ എനിക്കും അവിടിഷ്ടായി. ഇപ്പൊ പിന്നേ ഇടയ്ക്കിടെ അവിടെ ചെല്ലും…! “”
അവളൊരു ചിരിയോടെ പറഞ്ഞെങ്കിലും അമ്മയെ ഓർത്ത് അവൾക്ക് നല്ല വിഷമം ഉണ്ടെന്ന് അവളുടെ ശബ്ദമൊന്നിടറിയപ്പോൾ എനിക്ക് മനസിലായി. അതോടൊപ്പം ഞാൻ കുറച്ച് മുന്നേ ചിന്തിച്ചതോർത്ത് ഒരല്പം ജാള്യതയും എനിക്ക് തോന്നി.
“” അമ്മയെ മിസ്സെയ്യണുണ്ടോ…? “”
ഞാനത് ചോദിച്ചപ്പോഴവൾ ഒന്ന് മൂകയായി.
“” ഹേയ് ഡോ… ഞാൻ ചുമ്മാ..! വിഷമായെങ്കി സോറി…!! “”
അവളതോർത്ത് കണ്ണ് നിറക്കുന്നകണ്ടപ്പോൾ ഞാൻ വല്ലാതായി.
“” ഹേയ്… കുഴപ്പല്ല.! “”
അവള് കണ്ണ് തുടച്ച് മുഖത്ത് ഒരു ചിരിവരുത്തി.
“” അവിടെവച്ച് അവർക്കൊക്കെ തന്നെ പരിചയമുണ്ടെന്നറിഞ്ഞപ്പോ ഞാങ്കരുതി തന്നെയവിടന്ന് ദത്തെടുത്തതാന്ന്…!! “”
അവളുടെ മൂഡ് മാറ്റാനായി ഞാനൊരു തമാശയെന്നോണം നേരത്തേ ഞാൻ ചിന്തിച്ച കാര്യമവളോടായി പറഞ്ഞു.
“” ഏഹ്… “”
തേല്ലോരമ്പരപ്പോടെ എന്നെനോക്കിയ അവളടുത്തനിമിഷം പൊട്ടിച്ചിരിച്ചു.
നല്ല ശബ്ദമുണ്ടാക്കിയുള്ള അവളുടെ ചിരിക്കണ്ട് എനിക്കും ചെറുതായി ചിരിവന്നു.
“” അപ്പൊ എന്നെ തവിട് കൊടുത്ത് വാങ്ങീതാണെന്നാണോ…!! “”
അവളതേ ചിരിയോടെ എന്നെനോക്കി ചോദിച്ചു.
“” ആഹ്… എനിക്കതിൽ ചെറിയ സംശയമൊക്കെയുണ്ട്…! “”
ഞാനും ചിരിയോടെ പറഞ്ഞതും അവളെന്നെ തുറിച്ചുനോക്കി.
“” പോടാ…! “”
പറഞ്ഞ് കഴിഞ്ഞ് നാക്ക് കടിച്ച് ഒരുകണ്ണടച്ചുള്ള അവളുടെയിരുത്തം കണ്ട് ഞാൻ ചിരിച്ചുപോയി. സംഭവം ആ ഫ്ലോയിൽ വന്നതാണെന്ന് എനിക്ക് മനസിലായിരുന്നു.
“” ഇത്തിരി ഫ്രീഡം തന്നൂന്ന് വച്ച് തലേക്കേറാൻ നിക്കണ്ട..!! “”
എന്നാലും അവളെയൊന്ന് വിരട്ടിയേക്കാമെന്ന ഉദ്ദേശത്തോടെതന്നെ ഞാനത് പറഞ്ഞപ്പോൾ താടകയൊന്ന് പതറി.
“” സോറി…!! “”
അവളത് പറഞ്ഞ് മുഖം കുനിച്ചപ്പോൾ ഞാനറിയാതെ ചിരിച്ചുപോയി.
എന്നാലെന്റെ ചിരികണ്ട് അവളെന്നെ ഒരമ്പരപ്പോടെ മിഴിച്ച് നോക്കി.
ഇനി ഞാൻ വല്ല സൈക്കോയും ആണോന്ന് കരുതിക്കാണുവോ എന്തോ…!!
“” ഞാൻ ചുമ്മാ കളിപ്പിക്കാൻ പറഞ്ഞതാ… താനിത്ര പാവമായിരുന്നോ!!. ഓഫീസിലെല്ലാരേം ഇട്ട് വിറപ്പിക്കണ ആളാന്ന് കണ്ടാപറയുവോ..!! “”
ഞാനൊരു ചിരിയോടെ പറഞ്ഞപ്പോൾ അവളും ഒരുചിരിയോടെ എന്നെ നോക്കിയതല്ലാതെ മറുപടി തന്നില്ല.
ഇത്രേം ഫ്രണ്ട്ലി ആയ്ട്ട് അവളോട് സംസാരിക്കണത് ആദ്യമായിട്ടാണ്. എന്തായാലും താടക നല്ല കമ്പനി ആണെന്ന് എനിക്ക് കുറച്ച് നേരം സംസാരിച്ചപ്പോൾ തന്നെ തോന്നി.
“” എന്തായാലും ഇത്രൊക്കെ ആയസ്ഥിതിക്ക് ഇനിത്തോട്ട് നമ്മൾ ഫ്രണ്ട്സ്..!! “”
ഞാൻ ഒരുചിരിയോടെ പറഞ്ഞവൾക്ക് നേരെ കൈനീട്ടി.
തടകേം ഒരു ചിരിയോടെ എന്റെ കയ്യിൽ പിടിച്ച് കുലുക്കി.
കുറച്ച് നേരം കൊണ്ടുതന്നെ ഞങ്ങൾ ഓഫീസിലെത്തി. കേറിചെന്ന ഞങ്ങളെ എല്ലാരും വിഷ് ചെയ്തു. അതോടൊപ്പം തടകക്ക് ബിർത്തഡേ വിഷും എല്ലാരും പറയുന്നുണ്ട്. അവർക്കൊക്കെ ചിരിയോടെ നന്ദിയും പറഞ്ഞ് താടക കാബിനിലേക്ക് പോയി. ഞാൻ എന്റെ കാബിനിലേക്കും.
ഉച്ചക്ക് ലഞ്ച് ബ്രേക്കിനു തടകേടെ ബർത്ഡേ പ്രമാണിച്ച് ചെറിയൊരു ഫങ്ക്ഷന് ഉണ്ടായിരുന്നു. കാര്യമായിട്ട് ഒന്നുമില്ല. ചെറിയൊരു കേക്ക് കട്ടിങ്. അത് സ്റ്റാഫ്സ് എല്ലാരും കൂടി പിരിച്ചെടുത്ത് വാങ്ങിച്ചതാണ്.
അവൾ കേക്ക് കട്ട് ചെയ്ത് ഒരു ചെറിയ പീസ് കയ്യിൽ എടുത്തതും എല്ലാരും എനിക്ക് നേരെ തിരിഞ്ഞു.
“” സാർ ചെല്ല്…! “”
അവൾക് കേക്ക് കൊടുക്കാനായി എല്ലാരും നിർബന്ധിച്ചു.
“” ഹേയ്… അതൊന്നും വേണ്ട…!! “”
ഞാനൊരു ചിരിയോടെ ഒഴിഞ്ഞ് മാറാൻ നോക്കി.
“സാറിന്റെ നാണം നോക്യേ…! അങ്ങട് കൊടുക്ക് പാപ്പാ!! ” എന്നൊക്കെയുള്ള കമന്റ് വന്നതും ഞാനൊന്ന് ചമ്മി.
തമ്മിൽ വല്യ അടുപ്പമൊന്നുമില്ലേലും ഇവരുടെ ഒക്കെ മുന്നിൽ ഞങ്ങൾ ഭാര്യേം ഭർത്താവും ആണല്ലോ.!