സിദ്ധു മുഴുവനാക്കുന്നതിനു മുൻപ് തന്നെ ചിന്നൻ ഇടയിൽ കേറി ചോദിച്ചു..
” ആ…അത് തന്നെയാണ് ഞാൻ പറഞ്ഞു വരുന്നത്.. ”
സിദ്ധു പറയാം എന്ന അർത്ഥത്തിൽ കൈ കൊണ്ട് കാണിച്ചു പറഞ്ഞു..
” അവിടെയാണ് കുഞ്ഞിക്കുള്ള റോൾ.. അവളാണ് പറഞ്ഞതെന്നാ അവൻ പറഞ്ഞത്… ”
സിദ്ധു പറഞ്ഞപ്പോൾ അത് അംഗീകരിക്കാനാവാതെ ചിന്നൻ ആലോചനയോടെ തല കുലുക്കി..
” അതിനുള്ള വഴിയില്ല സിദ്ധപ്പാ.. പറഞ്ഞു കേട്ടിടത്തോളം അവനോട് അവൾ മിണ്ടാൻ പോലും സാധ്യതയില്ല, അതിന് മാത്രം വെറുപ്പിച്ചിട്ടുണ്ടെന്നാ എന്റെ അറിവ്… ”
ചിന്നൻ അവനറിയാവുന്ന കാര്യം തീർത്തു പറഞ്ഞു…സിദ്ധു ഇതിലെ വൈരുദ്ധ്യം കണ്ടുപിടിക്കാൻ ആവാതെ കുഴങ്ങി… അപ്പുണ്ണി പറയുന്നത് പോലെ ആണെങ്കിൽ കുഞ്ഞി നുണ പറയുന്നു പക്ഷെ എന്തിന്…??? ഇനി അപ്പുണ്ണി വെറുതെ ഒരു പേര് പറയുന്നതാണെങ്കിൽ തന്നെ ഒറ്റിയത് ആര്…??
അങ്ങനെ കുഞ്ഞിയെ മുന്നിലേക്കിട്ട് അവൻ ആരെയാണ് രക്ഷിക്കാൻ നോക്കുന്നത് എന്ന് അറിയണം..
അതിനേക്കാളും വലിയൊരു തലവേദന കുഞ്ഞി ചിന്നനെ വലിപ്പിക്കുന്നുണ്ടോ എന്നതാണ്… അവർ തമ്മിൽ ബന്ധമുണ്ടെങ്കിൽ അത് ചിന്നൻ അറിയാതിരിക്കാനായി നുണ പറയുന്നതും ആവാമല്ലോ…
അങ്ങനെ ആണെങ്കിൽ അവൾക്കൊരു അവാർഡ് കൊടുക്കേണ്ടി വരും… അത് സിദ്ധു മനസിലുറപ്പിച്ചു… അതിനു മുൻപ് ഇതിന്റെ കാര്യം കണ്ടുപിടിക്കണം…
തന്റെ ഉപ്പും ചോറും തിന്നു തന്റെ കോത്തിൽ അടിക്കുന്നതാരാണെന്നു കണ്ടെത്തൽ ഒന്നാമത്തെ ലക്ഷ്യം..
അപ്പുണ്ണി, കുഞ്ഞി ഇതിൽ നുണ പറയുന്നതാരാണെന്നു കണ്ടുപിടിക്കേണ്ടത് അടുത്ത ലക്ഷ്യം…
” ഡാ…… ”
ചിന്നൻ തന്നെ കുലുക്കി കുലുക്കി വിളിച്ചപ്പോളാണ് സിദ്ധു ചിന്തയിൽ നിന്നും ഉണർന്നു അവനെ നോക്കിയത്…
” നീ കേൾക്കുന്നുണ്ടോ…?? ”
അവൻ കുറച്ചു പരുഷമായി ചോദിച്ചപ്പോൾ സിദ്ധു മുഖം ചുളിച്ചു…
” നീ പറ….. ഇനി കേൾക്കാം.. ”
സിദ്ധു ക്ഷമയോടെ ശ്രദ്ധിച്ചു..
” നിന്റെ ഇതിലുള്ള പ്രശ്നം എന്താണ്…? അവൻ എങ്ങനെ അറിഞ്ഞു എന്നറിയാണോ വേണ്ടത്..?”
ചിന്നൻ സിദ്ധുവിനോട് ചോദിച്ചപ്പോൾ സിദ്ധു ഒന്ന് ദീർഘനിശ്വാസം അയച്ചു…
” അവൻ അറിഞ്ഞതും അവിടെ വന്നു പ്രശ്നമുണ്ടാക്കിയതും ഒന്നും എന്നെ സംബന്ധിച്ചു അത്ര വല്ല്യേ കാര്യങ്ങളൊന്നും അല്ല,
പക്ഷെ പുറത്ത് നിന്നൊരാൾക്ക് ഞങ്ങളുടെ ഇവിടെ നടക്കുന്നതൊക്കെ അറിയാൻ പറ്റുന്നുണ്ട് എന്നുള്ളത് ചെറിയ പ്രശ്നം തന്നെയാണ്… പുറത്തുള്ള എല്ലാവരും ചിറക്കൽ വീടിനു ഐശ്വര്യം മാത്രം ഉണ്ടാവണം എന്ന് കരുതുന്നവരല്ലല്ലോ…
ഞാൻ അവളെ ട്യൂൺ ചെയ്ത് നടക്കുന്നത് അവൻ അറിഞ്ഞെന്നു പറഞ്ഞാൽ ഒന്നുകിൽ അവളെ നിരീക്ഷിക്കാൻ ഒരാളെ അവൻ ഏർപ്പാടാക്കിയത് കൊണ്ടാവാം, അതാണെങ്കിൽ കുഴപ്പമില്ല മറിച്ചു അവിടെ നടക്കുന്ന ചെറിയ കാര്യങ്ങൾ പോലും പുറത്ത് അറിയിക്കുന്ന ഒരാൾ ആണെങ്കിൽ അത് ഇത്തിരി പ്രയാസമാകും..”
സിദ്ധു പറഞ്ഞത് മുഴുവനായും മനസിലായില്ലെങ്കിലും ചിന്നൻ തല കുലുക്കി…
” എടാ അവിടെ എത്രയോ പണിക്കാരുണ്ട്, അവർ ഒക്കെ നല്ലവരാണെന്നുള്ള കണക്കിൽ ലക്ഷ്മിയമ്മ ആണെങ്കിലും ശങ്കരൻമാമയാണെങ്കിലും ഒരുപാട് സ്വാതന്ത്ര്യം കൊടുക്കുന്നുണ്ട്,പൈസയാണെങ്കിലും സാധനങ്ങളാണെങ്കിലും എല്ലാം അവിടെയുള്ള എല്ലാവർക്കും അറിയാനും വഴിയുണ്ട്… ഇവരൊക്കെ വിചാരിച്ചാൽ മോഷണവും, അതിന്റെ മോളിലുള്ള കാര്യങ്ങളും നടക്കും… മനസ്സിലായോ..പണ്ടത്തെ കാലമല്ല, പണിയെടുത്തു പൈസ ഉണ്ടാക്കുന്നതിനേക്കാൾ സുഖായിട്ട് ഉണ്ടാക്കാൻ അറിയുന്ന ആളുകളും നമ്മുടെ നാട്ടിലുണ്ട്, അങ്ങനെ ഒരു നായിന്റെ മോനും ഇവിടുന്നു ഉണ്ടാക്കാൻ നിക്കരുതെന്നു എനിക്ക് നിർബന്ധമുണ്ട്…”
സിദ്ധു അവന്റെ ആശങ്കകൾ അവന് മനസിലാക്കി കൊടുത്തു…
” എടാ ഭയങ്കരാ… ഇങ്ങനൊരു അനുഭവത്തിൽ നിന്നും കള്ളവെടി വെക്കുന്നത് തെറ്റാണെന്നു പഠിക്കുന്നതിനു പകരം നീ ചിന്തിച്ചു കൂട്ടിയത് വല്ല്യേ വല്ല്യേ കാര്യങ്ങളാണല്ലോ.. ”
ചിന്നൻ സിദ്ധുവിനെ ആത്മാർഥമായി അഭിനന്ദിച്ചു…. സിദ്ധു അവന്റെ നർമ്മ സംസാരം കേട്ട് പൊട്ടിച്ചിരിച്ചു…
” പക്ഷെ…സിദ്ധപ്പാ …. ”
ചിന്നൻ സിദ്ധുവിന്റെ ശ്രദ്ധ ക്ഷണിച്ചു…
” ഒക്കെ ഞാൻ സമ്മതിച്ചു, പക്ഷെ കുഞ്ഞി ഇങ്ങനെയൊന്നും ചെയ്യൂല്ലടാ, എനിക്കറിയാലോ അവളെ… ഇവിടുത്തെ ഒന്നും അവൾ എന്നോട് പോലും പറയാറില്ല , പിന്നെയല്ലേ അവനോട്…. ആ കള്ളുകുടിയൻ പറയുന്നത് കേട്ട് നീ ഇതൊന്നും കാര്യമാക്കല്ലേ..”
ചിന്നൻ കളി വിട്ടു ഗൗരവത്തോടെ കുഞ്ഞിക്ക് നല്ല സെർട്ടിഫിക്കറ്റ് കൊടുത്തു…
” അങ്ങനെ ആണെങ്കിൽ അതാണെന്ന് നമുക്ക് കണ്ടുപിടിക്കണം,അതിനു ആദ്യം അപ്പുണ്ണിയെ കാര്യമായൊട്ടൊന്നു കണ്ടേക്കാം….”
സിദ്ധു ചിന്നന്റെ ഉറപ്പിനെ സംശയിക്കാതെ പറഞ്ഞു… ചിന്നൻ തലകുലുക്കി..
” അവൻ 6 മണി ആയാൽ കുന്നുംപുറം ഷാപ്പിൽ ഉണ്ടാവും, ഷാപ്പ് അടക്കണ വരെ അവിടെ അടിയോടടിയാവും…”
ചിന്നൻ നിസാരമായി പറഞ്ഞപ്പോൾ സിദ്ധു അത്ഭുതതോടെ ചിന്നനെ നോക്കി…
” നീ ഇത്ര ഡീറ്റൈൽ ആയിട്ട് പഠിച്ചോ അവനെ…. അന്ന് ചോദിച്ചപ്പോൾ പെട്ടെന്ന് ഓർമ വന്നില്ലല്ലോ ”
സിദ്ധുവിന്റെ ചോദ്യം കേട്ട് ചിന്നൻ പുച്ഛത്തോടെ മുഖം കോട്ടി…
” നീ ധന്യയുടെ പിന്നാലെ കൂടിയപ്പോ തന്നെ ഒരു സംഘട്ടനം പ്രതീക്ഷിച്ചു, അവന്റെ കാര്യങ്ങൾ ഞാൻ തന്നെ അറിയേണ്ടി വരുമെന്ന് എനിക്ക് ഉറപ്പായിരുന്നു, അപ്പൊ അത് മുന്നേക്കൂട്ടി നോക്കിവെച്ചു.. ”
അവൻ അഭിമാനത്തോടെ പറഞ്ഞു ഞെളിഞ്ഞു നിന്നു..
” ശ്ശെടാ ഭീകരാ…….. നീ കൊള്ളാലോ പുള്ളി… എന്തായാലും ഇത് എന്നേക്കാൾ ഉപകാരപ്പെടാൻ പോവുന്നത് നിനക്കായിരിക്കും…”
സിദ്ധുവിന്റെ പറച്ചിൽ കേട്ടു ചിന്നൻ അന്തം വിട്ടു…
” അതെങ്ങനെ…?? ”
ചിന്നൻ സംശയം മറച്ചു വെച്ചില്ല…
” ഇപ്പൊ പറയില്ല….വഴിയേ അറിഞ്ഞോളും… ”
സിദ്ധു കണ്ണടിച്ചു കൊണ്ട് പറഞ്ഞു….
” ഇങ്ങനെ ആണെങ്കിൽ ഞാൻ ഈ കളിക്ക് ഇല്ല, നീ തന്നെ ഒറ്റക്ക് നോക്കിക്കോ.. ”
ചിന്നൻ താൽപ്പര്യമില്ലാതെ മുഖം തിരിച്ചു കൊണ്ട് പറഞ്ഞു…
“അങ്ങനെ കടുത്ത തീരുമാനങ്ങൾ ഒന്നും എടുക്കല്ലേ മോനെ, നീയില്ലാതെ എനിക്ക് ഒന്നും ചെയ്യാൻ പറ്റില്ലെന്ന് നിനക്കറിയില്ലേ… നീ കൂടെ ഉള്ളപ്പോ ഉള്ളൊരു ധൈര്യമുണ്ട്….
നമുക്ക് ഇന്ന് തന്നെ വൃത്തിയായിട്ട് തുടങ്ങാം കാര്യങ്ങൾ, എനിക്കൊന്നു നീന്തി കുളിക്കണം… നീ ഉണ്ടെങ്കിൽ വാ…”
പുകഴ്ത്തലിൽ വീണ ചിന്നനെ നോക്കി ഉള്ളിൽ ചിരിച്ചുകൊണ്ട്
സിദ്ധു ഊഞ്ഞാലിൽ നിന്നും എണീറ്റു മൂരി നിവർന്നു…
ഏകദേശം ഒരു മണിക്കൂറോളം കുളത്തിൽ ചിലവഴിച്ച ശേഷം നല്ല കട്ടക്ക് ഒരു ചായയും കുടിച്ചു കഴിഞ്ഞാണ് ചിന്നന്റെ സൈക്കിളിൽ അവർ കുന്നുംപുറം ഷാപ്പിലേക്ക് തിരിച്ചത്… സിദ്ധു പുറകിൽ കയറി തോളത്തു തട്ടിയപ്പോൾ ചിന്നൻ ആഞ്ഞുചവിട്ടി…