അവൻ കഴിയുന്ന പോലെ വേച്ച് വേച്ച് നടന്നു..എല്ലുകൾ നുറുങ്ങുന്ന വേദനയാണ്.. എങ്കിലും ഈ ഗേറ്റ് കടന്ന് വീണാലും വേണ്ടില്ല.. ഇവരുടെ മുന്നിൽ നിന്ന് രക്ഷപ്പെടണം…
“സണ്ണീ… ഇനിയെന്താ വേണ്ടത്… ?..
അവനെ വിട്ടത് മണ്ടത്തരമായോ… ?”..
ഗേറ്റ് കടന്ന് പോകുന്ന ചന്ദ്രനെ നോക്കി മാർട്ടിൻ ചോദിച്ചു..
“സാരമില്ലെടാ… അവനിനി ഒന്നിനും വരില്ല… “
“നമുക്കിനി പോയാലോ ഇച്ചായാ…?..
എനിക്ക് മമ്മിയെ ഒന്ന് കാണണം…”
മിയ പറഞ്ഞു… മമ്മിയോട് രണ്ട് വർത്താനം പറയാഞ്ഞിട്ട് അവൾക്കൊരു സമാധാനമില്ല..
“ഉം… പോകാം… വാടാ… നിന്നെ വീട്ടിലിറക്കാം… ഇനിയിവിടെ ഉറക്കൊഴിക്കേണ്ട കാര്യമില്ലല്ലോ…”
അവർ ചെന്ന് കാറിൽ കയറി..
ഗേറ്റിനടുത്തേക്ക് നടന്ന് ചെന്ന് വണ്ടി പുറത്തിറങ്ങിയപ്പോ, ഗേറ്റ് പൂട്ടി മാർട്ടിനും കയറി..
✍️✍️✍️.
പോർച്ചിൽ കാർ നിർത്തിയതും കൊടുങ്കാറ്റ് പോലെയാണ് മിയ വണ്ടിയിൽ നിന്നിറങ്ങിയത്… വാങ്ങിയ സാധനങ്ങളുടെ കവർ പോലും അവൾ എടുത്തില്ല… കയ്യിലിരുന്നു ചാവി കൊണ്ടവൾ മുൻവാതിൽ തുറന്നു..മമ്മിയെ ബുദ്ധിമുട്ടിക്കണ്ടാന്ന് കരുതി വാതിൽ പുറത്ത് നിന്ന് പൂട്ടിയാണവർ പോയത്…
അവൾ ബെറ്റിയുടെ മുറി വാതിലിൽ ശക്തിയിലടിച്ചു..
“മമ്മീ… മമ്മീ… വാതില് തുറക്ക്…”.
അകത്ത് ബെറ്റി ഉണർന്ന് കിടക്കുകയാണെങ്കിലും അവൾ വിളി കേട്ടില്ല.. മിയ വീണ്ടും വാതിലിലടിച്ചു…
“മമ്മീ… വാതില് തുറക്കാൻ…”
മിയക്ക് നല്ല ദേഷ്യം വരുന്നുണ്ടായിരുന്നു..
ബെറ്റി, മനസിൽ പ്രാകിക്കൊണ്ട് വന്ന് വാതിൽ തുറന്നു..
“എന്താടീ… ഉറങ്ങാനും സമ്മതിക്കില്ലേ നീ… ?”..
വാതിൽ തുറന്ന് ദേഷ്യത്തോടെ ബെറ്റി ചോദിച്ചു..
“മമ്മിയെ ഞാനുറക്കിത്തരാം… ചെറ്റത്തരം കാണിച്ചിട്ട് നേരത്തേ കിടന്നുറങ്ങിയാൽ ആരും അറിയില്ലെന്ന് കരുതിയോ… ?.”..
മിയ നിന്ന് ചീറി…
ബെറ്റി അമ്പരന്നു.. ഞാനെന്ത് ചെറ്റത്തരം കാണിച്ചു. ?
“ദേ… രാത്രി വിളിച്ചുണർത്തി അനാവശ്യം പറയരുത്.. ഞാനെന്ത് ചെറ്റത്തരം ചെയ്തെന്നാ… ?”..
“ഇല്ലേ… മമ്മിയൊന്നും ചെയ്തില്ലേ..?”..
മിയ, ബെറ്റിയെ പിടിച്ച് വലിച്ച് സെറ്റിയിലേക്കിരുത്തി..
സണ്ണി മൂന്നാല് കവറുകളുമായി ഹാളിലേക്ക് കയറി.. മുൻവാതിലവൻ അടച്ച് കുറ്റിയിട്ടു..
കവറുകളല്ലാം ടേബിളിലേക്ക് വെച്ചു..
“നീയെന്ത് ഭ്രാന്താടീ പറയുന്നേ… ?..
എനിക്കൊന്നും മനസിലാവുന്നില്ല…”
സെറ്റിയിൽ നിന്ന് എഴുന്നേൽക്കാൻ നോക്കിക്കൊണ്ട് ബെറ്റി പറഞ്ഞു.
മിയ വീണ്ടും അവളെ പിടിച്ചിരുത്തി.
“അങ്ങിനെയൊന്നും ചോദിച്ചാ മമ്മിക്ക് മനസിലാവില്ലെടീ… ഞാൻ ചോദിക്കാം…”
സണ്ണി, ബെറ്റിയുടെ മുന്നിലേക്ക് വന്നു.. അതോടെ ബെറ്റി പേടിച്ചു..
“മമ്മീ…ഒറ്റച്ചോദ്യം… എന്നെ തല്ലാൻ ആളെയിറക്കാൻ മമ്മി ചന്ദ്രനോട് പറഞ്ഞോ… ?”…
വിറച്ച് പോയി ബെറ്റി… താൻ ചന്ദ്രേട്ടനോട് ഫോണിൽ പറഞ്ഞത് ഇവരെങ്ങിനെ അറിഞ്ഞു… ?..
ഇല്ല… ഇവരൊരിക്കലും അറിയില്ല..ചന്ദ്രേട്ടൻ പറയില്ല… തല പോയാലും…
“പറ മമ്മീ… ഞങ്ങള് കേട്ടത് സത്യമാണോ… ?.. ഇച്ചായാനെ തല്ലാൻ ആളെയിറക്കാൻ മമ്മി പറഞ്ഞോ… ?”..
മിയ ദേഷ്യത്തോടെ ചോദിച്ചു.
“ഇല്ല…”
താഴോട്ട് നോക്കി ബെറ്റി പറഞ്ഞു..
“എന്നാലേ,മമ്മിയുടെ കാമുകനെ ഞങ്ങള് പിടികൂടി.. തോട്ടത്തില് റബ്ബർഷീറ്റ് മോഷ്ടിക്കാൻ വന്നതാ… അയാളാ പറഞ്ഞത്… മമ്മി പറഞ്ഞിട്ടാ മോഷ്ടിക്കാൻ വന്നതെന്ന്…”
മിയ പറഞ്ഞത് കേട്ട് ബെറ്റി ഞെട്ടിക്കൊണ്ട് തലയുയർത്തി..
“എന്തിനാന്ന് ചോദിച്ചപ്പോ കാര്യവും അവൻ പറഞ്ഞു… എന്നെ തല്ലാൻ ആളെയിറക്കാൻ പൈസക്ക് വേണ്ടീട്ടാണെന്ന്… എല്ലാം മമ്മി പറഞ്ഞിട്ടാന്നും പറഞ്ഞു…”
സണ്ണി പറഞ്ഞത് കേട്ട് ബെറ്റിക്കൊരു കാര്യം മനസിലായി..ചന്ദ്രൻ തന്നെ കുടുക്കിയിരിക്കുന്നു.. തല്ലാൻ ആളെയിറക്കാൻ താൻ പറഞ്ഞെന്ന് സത്യം.. പക്ഷേ., മോഷ്ടിക്കാൻ താൻ പറഞ്ഞിട്ടില്ല… ഇയാളിതെന്തിനാണ് ഇതെല്ലാം കൂടി തന്റെ തലയിൽ വെച്ചത്..?..
“മോശമായി മമ്മീ… വളരെ മോശമായിപ്പോയി… ഞാനിഷ്ടപ്പെട്ട് കെട്ടിയതാ ഇച്ചായനെ… ആ ഇച്ചായനെ തല്ലാൻ മമ്മിക്കെന്തവകാശം… ?..
മതി… മമ്മീം മോളും തമ്മിലുള്ള ബന്ധമൊക്കെ ഇന്നത്തോടെ തീർന്നു.. ഞാനിപ്പത്തന്നെ ഡാഡിക്ക് വിളിക്കും… മമ്മി പോകാനൊരുങ്ങിക്കോ…”