ചേട്ടാ… റെയിൽവേ സ്റ്റേഷൻ…!!!
അതേ ഹർത്താലായതുകൊണ്ട് ഞാൻ വീട്ടിക്ക് പോവായിരുന്നു… ഞാനവിടെ അടുത്തായി ഇറക്കിവിട്ടാൽ മതിയോ… വേറൊന്നും കൊണ്ടല്ല പാർട്ടിക്കാർ എങ്ങാനും കണ്ടാൽ പ്രശ്നാ….
കൊഴപ്പില്ല ചേട്ടാ എന്നെ അവിടെ അടുത്ത് ഇറക്കിയാൽ മതി…
മം…
എന്തോ ഞാൻ ഒറ്റക്കാണ് എന്ന് കണ്ടതുകൊണ്ടാവാം ആളെന്നെ കുറച്ചു
ചുറ്റിയാണെങ്കിലും റെയിൽവേ സ്റ്റേഷനിൽ തന്നെ ഇറക്കിവിട്ടു… പോരാത്തതിന് കാശും വാങ്ങിച്ചില്ല…. സത്യം പറഞ്ഞാൽ രാത്രിയിൽ ഒരു പെണ്ണിനെ ഒറ്റക്ക് കണ്ടാൽ എല്ലാ ആണുങ്ങളും ഒരുപോലെ ആണെന്ന് ചിന്തിച്ച എന്നെ പൂർണമായും തിരുത്തുകയാണ് ആ ഓട്ടോ ഡ്രൈവർ ചെയ്തത്…
അതേ ചോദിക്കുന്നതുകൊണ്ട് ഒന്നും തോന്നണ്ടാ താനീ രാത്രിയിൽ ഇതെങ്ങോട്ടാ..
റെയിൽവേ സ്റ്റേഷനിലേക്ക് നടക്കുന്നതിനിടയിലാണ് ഞാനാ ശബ്ദം വീണ്ടും കേട്ടത്…!!!! അതാ ഓട്ടോ ഡ്രൈവർ ആയിരുന്നു…
ചേട്ടാ..!! ചേട്ടൻ പോയില്ലേ..
ഇല്ലടോ.. തന്നെ കണ്ടപ്പോൾ ഒറ്റക്കാക്കീട്ട് അങ്ങ് പോവാൻ തോന്നീല്ല… എന്റെ വീട്ടിലും ഉണ്ടേ തന്റെ പ്രായമുള്ള സ്ത്രീകൾ…
താങ്ക്സ് ചേട്ടാ…
താങ്ക്‌സൊക്കെ അവിടിരിക്കട്ടെ ആദ്യം പോയി ടിക്കറ്റ് ബുക്ക്‌ ചെയ്യ്… തന്നെ എന്തായാലും വണ്ടി കേറ്റി വിട്ടിട്ടേ ഞാൻ പോവുന്നുള്ളു…
ഞാനും പിന്നെ ഒന്നും പറയാതെ നേരെ ഉള്ളിൽ പോയി ടിക്കറ്റ് ബുക്ക്‌ ചെയ്തുകൊണ്ട് പുറത്തേക്ക് വന്നു…
എന്തായി.. ബുക്ക്‌ ചെയ്തോ..!!!
മം..
എപ്പഴാ ട്രെയിൻ…!!!
10:30 നാ ചേട്ടാ.!!!
ഓഹ്.. അപ്പൊ ഇനിയും ഒരു മണിക്കൂർ ഉണ്ടല്ലോ.. ഒരു കാര്യം ചെയ്യാം ദാ അവിടെ ഇരിക്കാം…
അതും പറഞ്ഞു ആളെന്നെയും കൂട്ടി അവിടെ അടുത്തുള്ള സീറ്റിലായി ഇരിപ്പുറപ്പിച്ചു…
ചേട്ടൻ പൊക്കോളൂ.. സമയം ഇപ്പൊത്തന്നെ ഒത്തിരി ആയില്ലേ…
അതൊന്നും കൊഴപ്പില്ലടോ… ഇങ്ങനുള്ള സ്ഥലത്ത് തന്നെ ഒറ്റക്കാക്കീട്ട് പോവുന്നേനും ഭേതം നേരത്തെ തന്നെ ഓടിച്ചവരുടെ കയ്യിൽ ഏൽപ്പിച്ചിട്ട് പോണതാ.. അതോണ്ട് എന്റെ കാര്യമോർത്തു മോള് ടെൻഷൻ അടിക്കണ്ടാ…. ഇനി പറ തനാരാ എവിടുന്നാ വരുന്നേ…
ഞാൻ..!! എന്റെ പേര് അനുശ്രീ
എല്ലാരും അനൂന്നാ വിളിക്കാ…
ഓഹ് എന്നാ ഞാനും അനൂന്ന് വിളിക്കാം… ആട്ടെ താനിപ്പോ എവിടുന്ന് വരാ…
കോയമ്പത്തൂർ…
അവിടെ.!! ആരാ..
അവിടെ..!!
മുദ്ധിമുട്ടാണെങ്കിൽ പറയണ്ടാട്ടോ… കുറച്ചു നേരം ഇരിക്കണ്ടതല്ലെ എന്നോർത്തപ്പോ ചോദിച്ചൂന്നൊള്ളു…
അയ്യോ ചേട്ടാ ബുദ്ധിമുട്ടൊന്നും ഇല്ല…. അവിടെ എന്റെ ഹസ്ബൻഡാ ഉള്ളേ…
ഹസ്ബൻഡോ..!! അപ്പൊ താൻ മാരീഡ് ആണോ…
മം… എന്താ ചേട്ടാ..
ഏയ്‌.!! കണ്ടാൽ പറയത്തില്ലാട്ടോ അല്ല അപ്പൊ age എത്ര ഉണ്ട്…
23..
ഓഹ് ഓക്കേ.!!! ഹസ്ബൻഡ് എന്ത് ചെയ്യുന്നു..
ആൾക്ക് അവിടെ മൂന്നാല് ട്രാവൽ ഏജൻസി ഉണ്ട്…
ഓഹ്..!! അല്ലാ ചോദിക്കോണ്ട് ഒന്നും വിചാരിക്കരുത് ഇവിടെ മലയാളികളെ
ഒന്നും കിട്ടാഞ്ഞിട്ടാണോ അവിടുന്ന് കല്ല്യാണം കഴിച്ചേ…
ആള് മലയാളിയാ എന്റെ വകേലൊരു റിലേഷൻ ആയിട്ട് വരും… എന്റെ 19 ആമത്തെ വയസ്സിൽ അച്ഛനും അമ്മയും മരിച്ചതോടെ കുടുംബക്കാർ എല്ലാരും കയ്യൊഴിഞ്ഞപ്പോ ആളാണ് എന്നെ കോയമ്പത്തൂരിലേക്ക് കൊണ്ടുപോയത്… അതിന് ശേഷം എന്നെ പഠിപ്പിക്കുകയും കെയർ ചെയ്യുകയും എല്ലാം കൂടി ആയപ്പോ ഞാൻ സ്നേഹിച്ചു പോവായിരുന്നു… അല്ലെങ്കിലും ഒരു പെണ്ണ് ഏറ്റവും കൂടുതൽ ആണുങ്ങളിൽ നിന്നും പ്രതീക്ഷിക്കുന്നത് ക്യായറിങ്ങ് അല്ലേ…
മം.. താൻ ഭാഗ്യവതിയാടോ ഇത്രയും നല്ലൊരു ഭർത്താവിനെ കിട്ടിയില്ലേ..
അതേ താനെന്തേലും കഴിച്ചോ…
മം…
അതേ ചുമ്മാ കള്ളം പറയൊന്നും വേണ്ടാ… ആ മുഖം കണ്ടാലറിയാം ഒന്നും കഴിച്ചിട്ടില്ലാന്ന്… വാ നമുക്ക് വല്ലതും കഴിക്കാൻ കിട്ടോന്ന് നോക്കാം…
വേണ്ട ചേട്ടാ ഞാൻ പോണ വഴിക്ക് കിട്ടാണെങ്കിൽ കഴിച്ചോളാം…
അതേ പറഞ്ഞാൽ കേട്ടില്ലെങ്കിൽ ഒരു ഏട്ടൻ എന്ന രീതിയിൽ ഞാൻ ചിലപ്പോ ഒരു തല്ലങ്ങ് വച്ചുതരും കേട്ടല്ലോ..
അയ്യോ വേണ്ട ചേട്ടായി… ഞാൻ വന്നോളാമെ.!!😄😄
ചെറു ചിരിയോടെ അതുംപറഞ്ഞു ഞാനാളുടെ പിന്നാലെ നടന്നു…
ചേട്ടാ നമ്മൾ എങ്ങോട്ടാ ഹർത്താലയോണ്ട് ഇന്നിനി കടകളൊന്നും ഉണ്ടാവില്ലല്ലോ…
താൻ പേടിക്കണ്ടടോ എന്റെ വീടിവിടടുത്താ നമുക്ക് അങ്ങോട്ട് പോവാം… എന്തായാലും ട്രെയിൻ വരാൻ ഇനിയും മുക്കാൽ മണിക്കൂറോളം എടുക്കും…
അയ്യോ ചേട്ടായീടെ വീട്ടിക്കോ..
ആഹ്.. അതിനിപ്പെന്താ മോള് പേടിക്കൊന്നും വേണ്ടാ അവിടെ കുറേപേർ ഉണ്ടടോ… സത്യം പറയാലോ അതെന്റെ കൂട്ടുകാരന്റെ വീടാ ഞങ്ങൾ മേലെയാണ് താമസിക്കുന്നത്…
ഞങ്ങളോ…
അതേടോ ഞാനും എന്റെ ഭാര്യയും…
ഓഹ്.. അപ്പൊ ചേട്ടന്റെ കല്ല്യാണം കഴിഞ്ഞതാണോ…
അതേക്കുറിച്ചൊന്നും പറയാതിരിക്കുന്നതാ മോളെ നല്ലത്…
അതെന്താ… പറ ചേട്ടായി…
അല്ല അതൊക്കെ പറയാം… നീ എന്നെ എങ്ങനാ കാണുന്നെ…
എന്റെ ചേട്ടനായിട്ട്…!!!! എന്തേ…
എന്നാ നിന്റെ ചേട്ടന്റെ പേരൊന്നു പറഞ്ഞേ…
അയ്യോ…!!! സോറി ചേട്ടായി ഞാൻ ചോദിക്കാൻ മറന്നു..
ഇനി നീ അറിയണ്ടാ….
പ്ലീസ് പറ ചേട്ടായി… സോറി ഞാൻ മറന്നത് കൊണ്ടല്ലേ…
അനുമോളെ നീ വന്നേ ആദ്യം വീട്ടിൽ പോയി വല്ലതും കഴിച്ചിട്ട് വരാം…
ഞാൻ വരണെങ്കിൽ ചേട്ടായി പേര് പറ പ്ലീസ്…
ശെരി പറയാം എന്റെ അനൂട്ടി ആദ്യം വണ്ടിയിൽ കേറ്…
മം..
അങ്ങനെ ഞാൻ ആളെയും വിശ്വസിച്ചുകൊണ്ട് വണ്ടിയിൽ കേറി ഇരുന്നു…
അധികം ദൂരമൊന്നും ഇല്ല ഒരു 5 മിനിട്ടിനുള്ളിൽ തന്നെ ഞങ്ങൾ ഒരു രണ്ടുനില വീടിനു മുന്നിൽ എത്തിച്ചേർന്നു…
പെട്ടന്ന് വണ്ടിയിൽ നിന്നുമിറങ്ങി ഞാനാ രണ്ടു നില വീടിന്റെ ഫ്രണ്ട്
ഡോറിന്റെ നേരെ നടന്നതും…
ഹലോ അനുമോളെ എങ്ങോട്ടാ… അതല്ലാ ഇത്. അവരൊക്കെ ഉറങ്ങിക്കാണും ഇനി അവരെ ശല്യപ്പെടുത്തണ്ടാ..
സൈഡിലായുള്ള കോണിപ്പടിയെ കാണിച്ചു അദ്ദേഹം പറയുമ്പോൾ എന്തോ മനസ്സിൽ എവിടേയോ ഒരു ഭയം നിഴലിച്ചിരുന്നു…
അതേ ആലോചിച്ച് നിന്നാലേ ട്രൈനങ്ങ് പോവും മോള് വേഗം വാ ഫുഡ്‌ കഴിച്ചു പോണ്ടേ…
മം.. അതിന് ചെറുതായി മൂളുകമാത്രം ചെയ്തുകൊണ്ട് ഞാനാളുടെ പിന്നാലെ നടന്നു….
കോണിപ്പടികൾ കേറി ചെറിയൊരു സിറ്റൗട്ടിനുള്ളിലായുള്ള വാതിലിൽ ആരുടെയോ പേര് പറഞ്ഞു തട്ടിയ ശേഷമാണ് എന്റെ ശ്വാസമോന്ന് നേരെ വീണത്…
ചേട്ടായി ആരാ ഈ ലച്ചു…
അതോ അതൊരു ഭൂതമാണ്..
ഭൂതോ..!!!
മം നീയങ്ങോട്ട് മാറിനിക്ക് ഇപ്പൊ അറിയാം…
പെട്ടന്നാണ് വാതിൽ തുറക്കുന്ന ശബ്ദം കേട്ടത്..!!! അതോടെ ചേട്ടായി പറഞ്ഞപോലെതന്നെ ഞാൻ സൈഡിലോട്ട് മാറിനിന്നു…
എവിടെ പോയി കിടക്കായിരുന്നടാ പട്ടി… ഇവിടൊരുത്തി ഒറ്റക്കാന്നുള്ള ബോധം പോലുമില്ലാതെ..
കണ്ടോ അനുമോളെ ഞാൻ നേരത്തെ പറഞ്ഞില്ലേ ആ സാധനാ ഇത് എന്റെ ഭാര്യ… ലക്ഷ്മി..!!! ലക്ഷ്മി വിനീത്..
ഓഹ് അപ്പൊ ചേട്ടന്റെ പേര് വിനീത്..!! അല്ലേ…
അല്ല വിനൂട്ടാ ആരാ ഇത്…
