ഇന്നേക്ക് ഒരാഴ്ചയായി ഞാനും അനുവും മിണ്ടിയിട്ട്. ഞാൻ എന്ത് ചെയ്തിട്ടാണ് ഇവൾ ഇങ്ങനെ എന്നെ ഒഴിവാക്കുന്നതെന്ന് ആലോചിച്ച് എന്റെ തല പെരുത്തു.ഒരു ദിവസം അവൾ കാന്റീനിലേക്ക് പോകുന്നത് എന്റെ കണ്ണിൽ പെട്ടു. രണ്ടും കല്പിച്ച് ഞാൻ അവളോട് കാര്യം എന്താണ് എന്നറിയാൻ പിറകെ പോയി.
കോളജ് ഗ്രൗണ്ടിന്റെ ഒരു സൈഡിലായാണ് കാന്റീൻ ഉള്ളത്. കാന്റീനിൽ കയറുന്നതിന് മുൻപ് ഞാൻ അവളുടെ കയ്യിൽ ബലമായി പിടിച്ച് കാന്റീനിന്റെ സൈഡിലേക്ക് കൊണ്ട് പോയി.
” അജി.. കൈ വിട് , എനിക്ക് പോണം ”
” നീ പൊക്കോ.. പക്ഷെ എനിക്ക് കാര്യമറിയണം ഞാൻ ചെയ്ത തെറ്റെന്താണ് എന്ന് ”
” നിനക്കിത്രയും ചെയ്തിട്ടും ഒന്നും അറിയില്ല .. അല്ലെ..? ”
” അറിയാമെങ്കിൽ എനിക്ക് നിന്നെ ഇവിടെ തടഞ്ഞ് ചോദിക്കേണ്ട ആവശ്യം ഇല്ല, എന്ത് തന്നെ സംഭവിച്ചാലും വേണ്ടില്ല എനിക്ക് ഇപ്പൊ അറിയണം ഞാൻ ചെയ്ത തെറ്റെന്താണ് എന്ന് ”
” നിന്നെ ആരാ എന്റെ കാര്യം നോക്കാൻ ഏല്പിച്ചെ.. ശെരിയാണ് ഇവിടെയുള്ള മറ്റെല്ലാ കുട്ടികളെക്കാളും ഞാൻ അടുത്തതും ഇടപെഴുകിയതും നിന്നോട് തന്നെ ആയിരുന്നു. എന്ന് കരുതി എന്റെ സംബന്ധം നടത്തിത്തരാൻ ഞാൻ ആവശ്യപെട്ടിരുന്നോ നിന്നോട്..?”
ഇവളെന്താ ഈ പറയുന്നത്. സംബന്ധം നടത്തിക്കൊടുക്കാൻ ഞാൻ എന്താ ബ്രോക്കറോ.. എനിക്ക് അവൾ പറഞ്ഞതൊന്നും മനസ്സിലായില്ല.
” നീ മനുഷ്യന് മനസ്സിലാകുന്ന ഭാഷയിൽ ഒന്ന് മൊഴിയോ..”
” നിന്റെ ഫ്രണ്ട് രവിയും അവന്റെ വീടുകാരും എന്റെ വീട്ടിൽ വന്നിരുന്നു, എന്നെ പെണ്ണ് കാണാൻ ”
അത് കേട്ട ഞാൻ ആകെ അന്തം വിട്ടപോലെയായി.
” രവിയോ..?”
” ആ..
നീയല്ലേ അവന്റെ അച്ഛനോടും അമ്മയോടും എന്നെ പറ്റി പറഞ്ഞതും അവരെ അങ്ങോട്ട് പറഞ്ഞ് വിട്ടതും ”
” എന്ന് രവി നിന്നോട് പറഞ്ഞോ..? ”
” ആ.. നിനക്ക് എന്ത് ദ്രോഹമാണ് ഞാൻ ചെയ്തത്, എന്റെ ഉള്ള് മുഴുവൻ നിനക്കറിയുന്നതല്ലേ.. എന്നിട്ടും നീ എന്നോട്..”
അതും പറഞ്ഞ് അവൾ അവിടെ നിന്ന് തേങ്ങാൻ തുടങ്ങി.
” അനു.. പ്ലീസ്.. ശെരിയാണ് അന്ന് നിന്റെ വീട്ടിലേക്ക് വന്നപ്പോൾ അവനെ കൂടെ കൂട്ടി എന്നത് നേരാ.. പക്ഷെ നീയിപ്പോ പറഞ്ഞതൊന്നും എന്റെ മനസ്സിൽ പോലും ചിന്ദിക്കാത്ത കാര്യാ..”
അവൾ കണ്ണുനീർ തുടച്ച് എന്റെ മുഖത്തേക്ക് നോക്കി.
” ഞാൻ രവിയെ അന്ന് നിന്റെ വീട്ടിലേക്ക് വന്ന അന്ന് കണ്ടതാണ് പിന്നെ ഇത് വരെ കണ്ടിട്ടില്ല. ഇത്രയും കാലം എന്റെ കൂടെ നടന്ന നിനക്ക് ഞാൻ പറഞ്ഞതാണോ അതോ ഇന്നലെ കണ്ട രവി പറഞ്ഞതാണോ വിശ്വസിക്കുന്നത് ”
” അത് അജി.. ഞാൻ .. ഇനിയിപ്പോ ഞാനെന്താ ചെയ്യാ…”
” നിന്നെ അവൻ കെട്ടിയിട്ടൊന്നും ഇല്ലാലോ.. നിനക്ക് നിന്റെ വീട്കാരോട് അവനെ ഇഷ്ടമല്ല എന്ന് പറഞ്ഞ് ഇതിൽ നിന്ന് ഒഴിഞ്ഞു മാറിയാൽ പോരെ..”
” നടക്കില്ല അജി.. അവൻ ഒരു പുളിങ്കൊമ്പാ.. അത് എന്റെ അച്ഛനും അമ്മയും മനസ്സിലാക്കിയത് മുതൽ അവര് ഈ കല്യാണം നടത്താൻ വലിയ ആവേശത്തിലാ…”
” നിനക്ക് ഈ വിവാഹത്തിൽ താല്പര്യമുണ്ടോ .. എനിക്ക് അത് അറിഞ്ഞാൽ മതി..”
” ഒരിക്കലും ഇല്ല.. എനിക്ക് ഇനിയും ഫ്രീയായി , ആരുടേം ശല്യമില്ലാതെ ഒരു പട്ടം കണക്കെ പറക്കണം.. ഞാനെന്ന പട്ടത്തിന്റെ നൂൽ പിടിക്കുന്ന ഒരാളെ എനിക്ക് വേണ്ട.. പകരം എന്റെ കൂടെ പറക്കാൻ ഒരു കൂട്ടാണ് വേണ്ടത് ”
ഞാൻ അവളുടെ കൈ രണ്ടും ചേർത്ത് പിടിച്ച് അവളുടെ കണ്ണിൽ നോക്കി പറഞ്ഞു.
” അങ്ങനെ ഒരാളെ നിനക്ക് കിട്ടുന്നത് വരെ ഞാൻ ഉണ്ടാകും കൂടെ, അത് പോരെ.. ”
പെട്ടെന്ന് അവിടേക്ക് ആരോ വരുന്നത് പോലെ തോന്നിയപ്പോൾ ഞാൻ അവളുടെ കൈ വിട്ടു.
” അജി.. വാ നമുക്കൊരു ചായ കുടിക്കാം..”
ഞാനും അവളും കാന്റീനിൽ കയറി ഓരോ ചായ കുടിച്ച് ഞങ്ങളുടെ ഉള്ളിലെ ആ കറുത്ത അദ്ധ്യങ്ങൾക്ക് വിരാമമിട്ട് വീണ്ടും സൗഹൃദ വലയം തീർത്ത് കൊണ്ടിരുന്നു.
അപ്പോഴും എന്റെ മനസ്സിൽ രവി തന്നോട് ചെയ്ത നെറികേട് ഉള്ളിൽ പുകഞ്ഞ് കൊണ്ടിരുന്നു. വേറെ ആര് അവളെ കെട്ടിയാലും വേണ്ടില്ല , അവനെ പോലെ ഉള്ള ഒരു ആഭാസന് ഞാൻ അവളെ കൊടുക്കില്ല എന്ന് മനസ്സിൽ ഉറപ്പിച്ചു.
ദിവസങ്ങൾ കൊഴിഞ്ഞ് കൊണ്ടിരുന്നു. അവര് തമ്മിലുള്ള വിവാഹം ഏകദേശം ഉറപ്പിച്ച രീതിയിലാണ് കാര്യങ്ങൾ മുന്നോട്ട് പോകുന്നത്. ഞാൻ ഈ വിവാഹം മുടക്കി തരാം എന്ന് അനുവിന് കൊടുത്ത ഉറപ്പിന്മേലാണ് അവൾ ഇരിക്കുന്നത്.
അന്നൊരു ഞായറാഴ്ചയായിരുന്നു. ഞാൻ രവിയ്ക്ക് വിളിച്ച് ഒന്ന് കാണണം എന്ന് പറയാൻ വേണ്ടി ഫോൺ എടുക്കാൻ നോക്കിയതും പെട്ടെന്ന് ഫോൺ ബെല്ലടിച്ചതും ഒരുമിച്ചായിരുന്നു. ഞാൻ റിസീവർ എടുത്ത് ചെവിയിൽ വച്ച് ചോദിച്ചു.
” ഹാലോ.. ആരാണ്.”
” എടാ ഇത് ഞാനാണ് രവി..”
തേടിയ വള്ളി കാലിൽ ചുറ്റി എന്ന് പറഞ്ഞാൽ മതിയല്ലോ..
” ആ. നിനക്ക് ഞാൻ വിളിക്കാൻ ഇരിക്കുകയായിരുന്നു.. നീ എന്തിനാ എന്റെ പേരും പറഞ്ഞ് നിന്റെ അച്ഛനേം അമ്മയേം കൂട്ടി അനുവിന്റെ വീട്ടിൽ പോയത്..? ”
” എല്ലാം പറയാം അളിയാ.. മറ്റന്നാൾ വൈകീട്ട് എന്റെ ടൗണിലുള്ള ഫ്ലാറ്റിൽ ഒരു പാർട്ടി വെച്ചിട്ടുണ്ട്. നമ്മുടെ കൂടെ പഠിച്ച ജോജോയും നാൻസിയും രെജിസ്റ്റർ മാരീജ് ചെയ്തു. അവരുടെ വീട്ടുകാർ തമ്മിൽ സമ്മതിക്കാത്ത കല്യാണം ആയതോണ്ട് ഒരാഴ്ച കഴിഞ്ഞാൽ അവര് ബാംഗ്ലൂരിന് പോവും, നമ്മുടെ ഒപ്പം ക്ളാസിൽ പഠിച്ച എല്ലാവരും ഉണ്ടാകും. നീയും വാ.. നമുക്ക് പൊളിക്കാം..”
ഞാൻ ആ ദിവസം തന്നെ രവിയെ ഈ വിവാഹത്തിൽ നിന്ന് പിന്തിരിപ്പിക്കാൻ പറ്റിയ സമയം എന്ന് ഉറപ്പിച്ചു. അവൻ സമ്മതിക്കില്ലെങ്കിൽ അവനും മായേച്ചിയും തമ്മിലുണ്ടായതെല്ലാം അവന്റെ വീട്ടുകാർ അറിയും എന്ന് ഭീഷണി പെടുത്തി കാര്യം നേടണം.
” ആ ശെരി… ഞാൻ വരാം.. എന്റെ കൂടെ അനുവിനേം ഞാൻ കൂട്ടുന്നുണ്ട്.. അതിന് കുഴപ്പമൊന്നുമില്ലലോ..”
” എന്ത് കുഴപ്പം നീ അവളേം കൂട്ടി വാടാ..”
” അപ്പൊ ശെരി മറ്റന്നാൾ കാണാം ”
” ഓക്കേ ടാ..”
ഞാൻ ഫോൺ വച്ച് വേഗം അനുവിന് വിളിച്ച് വിവരങ്ങൾ ധരിപ്പിച്ചു. അവൾ കൂടെ പോരാം എന്ന് ഉറപ്പ് നൽകി.
അങ്ങനെ ആ ദിവസം വന്നെത്തി. ഞാൻ നേരെ തറവാട്ടിലേക്ക് പോയി. മുത്തശ്ശിയും മായേച്ചിയും ഉണ്ടായിരുന്നു അവിടെ. കുറച്ച് നേരം കഴിഞ്ഞപ്പോൾ മാമൻ വന്നു.
” നീ എന്താടാ.. പതിവില്ലാതെ..”
” അത് മാമ എനിക്ക് ബൈക്കൊന്ന് വേണർന്നു.. കൂട്ടുകാരന്റെ ഒരു മാരിയേജ് പാർട്ടി ഉണ്ട്. അങ്ങോട്ട് പോവാനാ..”
ഞാൻ തല ചൊറിഞ്ഞ് പറഞ്ഞു.
” ആ കൊണ്ട് പൊയ്ക്കോ.. നാളെ രാവിലെ കൊണ്ടുവാ..”
” ശെരി മാമ.. ”
” എടാ നിന്റെ കൂട്ടുകാരൊന്നും ഇപ്പൊ വരാറില്ലേ ”
മായേച്ചിയാണ് ചോദിച്ചത്. എന്തിനാ എന്റെ കൂട്ടുകാർ എന്ന് പറയുന്നത്
ചേച്ചിയുടെ ജാരൻ വരാറില്ലേ എന്ന് ചോദിച്ചാൽ പോരെ ഞാൻ മനസ്സിൽ പറഞ്ഞു..