” ഇല്ല മായേച്ചി.. അപ്പൊ ശെരി എന്നാൽ ”
എന്നും പറഞ്ഞ് ബൈക്കുമെടുത്ത് അനുവിന്റെ വീട്ടിലേക്ക് വച്ച് പിടിച്ചു. ഞാൻ അവളുടെ വീട്ടിൽ ചെന്ന് കാളിങ് ബെല്ലമർത്തി. അനു വന്ന് വാതിൽ തുറന്ന് തന്നു. അവൾ ഒരു കുർത്തയും ജീൻസ് പാന്റുമാണ് ഇട്ടിരുന്നത്.
” എടാ നീ ഇരിക്ക്.. ഒരു അഞ്ച് മിനിറ്റെ.. ”
എന്നും പറഞ്ഞ് അവൾ അകത്തേക്ക് പോയി. ഞാൻ അവളുടെ വീടും പരിസരവും വീക്ഷിച്ചു കൊണ്ടിരുന്നു. അവൾ അടുക്കള വാതിലൊക്കെ കുറ്റിയിട്ട് ഗ്യാസ് ഓഫ് ചെയ്ത് ഒരു ചെറിയ വാനിറ്റി ബാഗും കയ്യിലെടുത്ത് ഹാളിൽ വന്നു.
” എടി നിന്റെ അച്ഛനും , അമ്മേം അനിയനുമായി എവിടെ പോയതാ ”
“അവര് വല്യച്ചനെ കാണാൻ പോയേക്കുവാ.. മിക്കവാറും ഈ കല്യാണ കാര്യം ചർച്ച ചെയ്യാൻ തന്നെയാവും ”
” അപ്പൊ നീ പോയില്ലേ.. നീ എന്റെ കൂടെ പോരുന്ന കാര്യം അവരോട് പറഞ്ഞിരുന്നോ.,”
” ഞാൻ പറയുന്നതിന് മുൻപ് ആ രവി വിളിച്ചിരുന്നു. എന്നെ നിന്റെ കൂടെ പാർട്ടിക്ക് വിടുമോ എന്ന് ചോദിച്ച്..”
” ഓ.. അതായിരിക്കും അവര് നിന്നെ എന്റെ കൂടെ വിടാൻ എതിർത്തൊന്നും പറയാതിരുന്നത് അല്ലേ..? ”
” ആയിരിക്കും.. ശെരി വാ പോവാം..”
അങ്ങനെ ഞങ്ങൾ പുറപ്പെട്ടു. അനുവിന്റെ വീടിന്റെ അവിടന്ന് കഷ്ടിച്ച് ഒരു രണ്ടു കിലോമീറ്റർ മാത്രം പോയാൽ മതി.
” അജി.. ഇവിടന്ന് എത്ര ദൂരം ഉണ്ട് അവന്റെ ഫ്ലാറ്റിന്റെ അടുക്കലേക്ക്..”
” ഹേയ് അധിക ദൂരം ഒന്നുമില്ല, ഇതാ ഇപ്പൊ എത്തും..”
” എന്ന ഇപ്പൊ എത്തണ്ട.. നമുക്ക് ഒന്ന് കറങ്ങിയിട്ട് പതിയെ എത്തിയാൽ മതി..”
” വേണോ..”
” ആ വേണം..”
ഞാൻ മെയിൻ റോഡിലേക്ക് കയറി. വണ്ടി നേരെ ഓടിച്ച് കൊണ്ടിരുന്നു.
” അജി ഞാൻ അന്ന് പറഞ്ഞില്ലേ.. എന്റെ സ്വപ്നത്തെ പറ്റി.. അങ്ങനെ ഒരാളെ എനിക്ക് ഇപ്പൊ കിട്ടി ട്ടോ..”
” ഹേ.. നീ ആൾ കൊള്ളാമല്ലോ.. ആരാ കക്ഷി.. ”
” ആളെ ഞാൻ പറഞ്ഞ് തന്നാൽ ഞങ്ങളുടെ വിവാഹം നടത്തിതരോ.. നീയ്യ്..”
” മ്മ്.. നോക്കാം .. നീ ആളെ പറയ്..”
” അതൊക്കെ ഞാൻ പറയാം.. ആദ്യം ഈ കല്യാണം ഒന്ന് മുടക്കി താ..”
” അതൊക്കെ ഞാനേറ്റു.. നീ ആളെ പറയെടി ..”
” ഇന്ന് നമ്മൾ തിരിച്ച് പോവുമ്പോൾ ആ ആളെ ഞാൻ കാണിച്ച് തരാം പോരെ..”
” ഓഹ് മതി.. ”
ഞങ്ങൾ പിന്നേം കുറെ ദൂരെ പോയി..
എന്നിട്ട് ഞാൻ വണ്ടി തിരിച്ചു.
” നേരം ഒരുപാടായി ,ഇനിയും നമ്മൾ ഇങ്ങനെ പോയാൽ പാർട്ടിക്ക് എത്തുമെന്ന് തോന്നുന്നില്ല , തിരിച്ച് പോയാലോ അനു”
” മ്മ്.. പോവാം..”
ഞങ്ങൾ തിരിച്ച് അവന്റെ ഫ്ലാറ്റിൽ എത്തി. ഞങ്ങൾ എത്തുന്നതിന് മുൻപ്
അവിടെ എന്റെ കോളേജിലെ ഒട്ടു മിക്ക ഫ്രണ്ട്സും ഉണ്ടായിരുന്നു. ഞാൻ എല്ലാവരേം കണ്ട സന്തോഷം പങ്ക് വെച്ച് കൊണ്ടിരുന്നു.
അനു അവിടെയുണ്ടായിരുന്ന ഒരു സോഫയിൽ പോയി ഇരുന്നു. അവൾക്ക് അവിടെ ഫ്രണ്ട് എന്ന് പറയാൻ ഞാൻ മാത്രമല്ലെ ഉള്ളൂ..
രവി അവിടെ എല്ലാ സെറ്റപ്പും റെഡിയാക്കി വച്ചിരുന്നു. ഒരു മദ്യ സൽക്കാരം തന്നെ ഉണ്ടായിരുന്നു. ആൺ കുട്ടികളിൽ ഒട്ടു മിക്ക പേരും മദ്യം കഴിക്കുന്നവർ ആയിരുന്നു. പെൺകുട്ടികൾ അങ്ങനെ ആരും കഴിച്ച് കണ്ടില്ല.
രവി ജോജോ യെയും നാൻസിയെയും വിളിച്ച് ആ ഹാളിന്റെ ഒരു സൈഡിലേക്ക് കൊണ്ട് വന്ന് ബാക്കിയുള്ളവരെ നോക്കി പറഞ്ഞു.
” ഫ്രണ്ട്സ്.. ഇന്ന് നമ്മുടെ കൂടെ പഠിച്ച ഈ രണ്ട് യുവ മിഥുനങ്ങൾക്കും ആശംസ അറിയിക്കാൻ വേണ്ടിയാണ് ഒത്തു കൂടിയിരിക്കുന്നത്.. ഇവരെ പോലെ ഒരായിരം പ്രണയ ജോഡികൾ ഇനിയും ഭൂമിയിൽ പിറക്കട്ടെ എന്ന് പറഞ്ഞ് കൊണ്ട് നമുക്ക് ഇവർക്ക് സുന്ദരമായൊരു വൈവാഹിക ജീവിതം ആശംസിക്കാം .. സൊ ലെറ്റസ് എന്ജോയ് ദി പാർട്ടി ”
എന്ന് പറഞ്ഞ് അവൻ മദ്യ ഗ്ലാസ് ഉയർത്തി. എല്ലാവരും കയ്യടിച്ചു. പിന്നെ അവിടെ ഉച്ചത്തിൽ ഏതോ ഇംഗ്ലീഷ് പാട്ട് വെച്ചു. കൂടെ പാർട്ടി ലൈറ്റും വെച്ചു. എല്ലാവരും അതിനൊത്ത് താളം പിടിച്ച് ഡാൻസ് കളിച്ചും ചിരിച്ചും ഉറക്കെ കൂവി വിളിച്ചും കൊണ്ടിരുന്നു. അനു ഇതൊക്കെ കണ്ട് സോഫയുടെ ഒരു മൂലയിൽ ഇരുന്നു.
ഞാൻ അനു കൂടെ ഉള്ളത് കൊണ്ട് മദ്യം തൊടാൻ നിന്നില്ല. ഞാൻ അനുവിന്റെ അടുത്ത് ചെന്നു.
” അനു ബോറടിച്ചോ..”
” ഹേയ് ഇല്ല.. ”
” സോറി അനു. രവിയെ ഒന്ന് ഒഴിഞ്ഞ് കിയിട്ടില്ല. അവനെ ഒറ്റയ്ക്ക് കിട്ടിയിട്ട് വേണം കാര്യം പറയാൻ..”
” മ്മ്..”
” നീ വല്ലതും കഴിച്ചോ.. ബാ എന്തെങ്കിലും കഴിക്കാം ”
ഞാൻ അവളെ വിളിച്ച് കൊണ്ട് പോയി ഭക്ഷണം എടുത്ത് കൊടുത്തു.
” നീ കഴിക്കുന്നില്ലേ..”
” ഞാൻ ഒന്ന് ബാത്റൂമിൽ പോയിട്ട് വരാം.. നീ കഴിക്ക് ”
ഞാൻ അതും പറഞ്ഞ് അവിടെയുള്ള ബാത്രൂം ലക്ഷ്യമാക്കി പോയി. ഞാൻ പോകുന്നതും നോക്കി അവൾ നിന്നു. ഹാളിലെ ബാത്റൂമിൽ ആരോ ഉണ്ടായിരുന്നു . ഞാൻ ബെഡ്റൂമിലെ ബാത്റൂമിൽ കയറി. കുറച്ച് കഴിഞ്ഞപ്പോൾ പുറത്ത് ആരോ സംസാരിക്കുന്ന സൗണ്ട് കേട്ടു.
ഞാൻ വേഗം മൂത്രമൊഴിച്ച് പുറത്തിറങ്ങാൻ നോക്കിയപ്പോൾ പുറത്ത് നിന്ന് ആരോ ഡോർ ലോക്ക് ചെയ്തേക്കുന്നു.
” ഹാലോ.. ആരെങ്കിലും പുറത്തുണ്ടോ.. ഈ വാതിലൊന്ന് തുറക്കു പ്ലീസ്..”
ഞാൻ ഒരുപാട് തവണ വാതിലിൽ മുട്ടി വിളിച്ച് കൊണ്ടിരുന്നു. പുറത്ത് പാർട്ടിയുടെയും മറ്റും ബഹളം കാരണം ആരും കേൾക്കുന്നില്ല എന്ന് തോന്നുന്നു . ഏകദേശം ഒരു അരമണിക്കൂർ ആയിക്കാണും വാതിൽ തുറന്നു. നാൻസിയാണ് ഡോർ തുറന്ന് തന്നത്.
” ആരോ അറിയാതെ ലോക്ക് ചെയ്ത് പോയി എന്ന് തോന്നുന്നു നാൻസി ”
” ഓഹ് അത് ശെരി ഞാൻ ബാത്റൂമിൽ പോവാൻ വേണ്ടി വന്നപ്പോഴാ ലോക്കായി കണ്ടത് , ഉള്ളിൽ ആളുണ്ടെന്ന് അറിഞ്ഞില്ല ”
എന്ന് പറഞ്ഞവൾ ബാത്റൂമിൽ കയറി. ഞാൻ ആ ചൂടിൽ ഇരുന്ന് ആകെ വിയർത്തിരുന്നു. പാവം അനു അവിടെ ഒറ്റയ്ക്കാണല്ലോ എന്ന് ഓർത്ത് പുറത്തേക്ക് പോകാൻ വേണ്ടി നടന്നു. മുറിയിലാണെങ്കിൽ ലൈറ്റും ഇട്ടിട്ടില്ല. പുറത്തെ കോറിഡോറിൽ നിന്ന് അവിടെയുള്ള ജനൽ കാർട്ടന്റെ സൈഡിലൂടെ വരുന്ന ഒരു ചെറിയ വെളിച്ചം മാത്രേ ഉള്ളൂ അവിടെ.
ഞാൻ ആ മുറിയൽ നിന്ന് പുറത്ത് പോവാൻ വാതിൽ തുറന്നു. വാതിൽ അടച്ച് ഹാളിലേക്ക് പോവാൻ തിരിഞ്ഞതും വാതിലിനോട് ചേർന്ന ചുമർ ചാരി അനു നിൽക്കുന്നു.
” സോറി.. അനു ഞാൻ കുറച്ച് നേരം അതിനുള്ളിൽ പെട്ട് പോയി.. ബാ.. നമുക്ക് രവിയെ കാണാം..”
എന്ന് പറഞ്ഞ് അവളുടെ കൈ പിടിച്ചതും. ” ട്ടേ ”
എന്ന് മുഖമടച്ച് ഒരടിയായിരുന്നു. അവിടെ കൂടിയവരെല്ലാം പാട്ടീലും ഡാൻസിലും മുഴുകിയത് കൊണ്ട് അവരാരും അവളെന്നെ തല്ലിയത് ശ്രദ്ധിച്ചില്ല.
ഞാൻ എന്താ ഇപ്പൊ ഇവിടെ സംഭവിച്ചതെന്ന് അറിയാതെ അന്ധാളിച്ച് നിന്നു .
പക്ഷെ രവി അത് കണ്ടു. അവൻ ഓടി ഞങ്ങളുടെ അടുത്തേക്ക് വന്നു .
” ഹേയ്.. അനു എന്താ പ്രശ്നം.. എന്താ അജിത്ത്..”
” എനിക്ക് അറിയില്ല രവി… ഇവളെന്തിനാ ഇപ്പൊ തല്ലിയെന്ന് ”