വിദ്യാരംഭം

Related Posts

None found

എല്ലാ കൊല്ലവും നടത്താറുള്ളത് പോലെ ഇക്കൊല്ലവും നമ്മുടെ പള്ളിയിൽ വരുന്ന ബുധനാഴ്ച വിദ്യാരംഭത്തിനുള്ള അവസരം ഉണ്ടായിരിക്കുന്നതാണ്.. വർഷങ്ങളായി ജാതി മത ഭേതമന്യേ നമ്മുടെ നാട്ടിൽ പിന്തുടർന്ന് വരുന്ന ഈ സമ്പ്രദായത്തിന് ബഹുമാനപ്പെട്ട മുഖ്യമന്ത്രിയുടെ പ്രത്യേക പ്രശംസ കഴിഞ്ഞ തവണ കിട്ടിയത് പ്രത്യേകം ഓർക്കുന്നു..

ലോകം മുഴുവൻ ജാതിമത വിദ്വെഷങ്ങളാൽ തമ്മിൽ തല്ലി മരിക്കുമ്പോ നമ്മുടെ ഗ്രാമം എല്ലാവരെയും സഹോദരങ്ങൾ ആയി കണ്ടു എല്ലാ ആഘോഷങ്ങളും ഒന്നിച്ചു ഒരു മനസ്സായി ആഘോഷിക്കുക എന്നത് വളരെ അധികം സന്തോഷം നൽകുന്ന ഒരുകാര്യം ആണ്.. വിദ്യാസമ്പന്നർ എന്ന് നടിക്കുന്ന പരിഷ്കാരികൾ നമ്മുടെ നാടിന്റെ ഈ നന്മ കണ്ടു പഠിക്കട്ടെ എന്ന് ആഗ്രഹിക്കുന്നു.. പതിവുപോലെ ബുധനാഴ്ച രാവിലെ വിശുദ്ധ കുർബാനക്കു ശേഷം പാരിഷ് ഹാളിൽ ആയിരിക്കും വിദ്യാരംഭ ചടങ്ങുകൾ ആരംഭിക്കുക..

പതിവ് പോലെ നമ്മുടെ കരയോഗം പ്രെസിഡന്റും പള്ളി ഇമാമും വരാമെന്നു സമ്മതിച്ചിട്ടുണ്ട്.. കൂടാതെ നമ്മുടെ ജോൺ സാറും ലീന ടീച്ചറും ഉണ്ടായിരിക്കുന്നതാണ്.. നമ്മുടെ ഗ്രാമത്തിൽ ഇക്കൊല്ലം വിദ്യാരംഭത്തിനുള്ള കുട്ടികളെ എല്ലാം കൊണ്ട് വരാൻ എല്ലാ മാതാപിതാക്കളും ശ്രദ്ദിക്കുമല്ലോ.. മാതാപിതാക്കൾക്ക് എഴുത്തിനിരുത്തുന്ന ഗുരുനാഥന് ദക്ഷിണ എന്തെങ്കിലും കൊടുക്കണം എന്ന് ആഗ്രഹം ഉണ്ടെങ്കിൽ ഇത്തവണ അവരെ നേരിട്ട് ഏൽപ്പിക്കാതെ അവിടെ വച്ചിരിക്കുന്ന ചാരിറ്റി ബോക്സിൽ ആണ് ഇടേണ്ടത്.. നമ്മുടെ സുലൈമാൻ ഇക്കയുടെ മകളുടെ കരൾ മാറ്റ ശസ്ത്രക്രിയ ഫണ്ടിലേക്ക് ഉപയോഗിക്കുന്നതാണ്..

കുർബാനക്ക് ശേഷമുള്ള അറിയിപ്പുകളിലേക്കു വികാരിയച്ചൻ കടന്നപ്പോ ലീന തന്റെ കയ്യിലെ വാച്ചിലേക്ക് നോക്കി ഒൻപതു മണി ആകുന്നു.. വികാരിയച്ചൻ എപ്പോ നിർത്തുമോ ആവോ ..പതിവില്ലാതെ പാട്ടുകുർബാന തന്നെ നടത്തി ഇന്ന് വൈകി അതിനു ശേഷം അറിയിപ്പുകൾ, അതെങ്ങനാ ചെറിയ ഒരു കാര്യം പറയാൻ ആണെങ്കിലും അതിനെ പരമാവധി നീട്ടി വലിച്ചു പറയുന്ന സ്വഭാവം ആണല്ലോ അദ്ദേഹത്തിന്റേത്..അച്ചായൻ രാവിലെ എത്തും എന്നാണ് പറഞ്ഞത് വീട്ടിൽ എത്തിയോ ആവോ ..

ഇതോടെ അറിയിപ്പുകൾ കഴിഞ്ഞു – ലീനയുടെ ചിന്തകൾക്ക് വിരാ
മം ഇട്ടുകൊണ്ട് വികാരിയച്ചന്റെ സ്വരം മൈക്കിലൂടെ മുഴങ്ങി.. ആശ്വാസത്തോടെ മുട്ടിൽ നിന്നു കുരിശു വരച്ചു ലീന പുറത്തേക്കിറങ്ങി.

ബാഗിൽ നിന്നും മൊബൈൽ ഫോൺ എടുത്തു നോക്കി ഭാഗ്യം അച്ചായൻ വിളിച്ചിട്ടില്ല സൈലന്റ് മോഡിൽ നിന്നും മാറ്റി മൊബൈൽ ബാഗിൽ തന്നെ വച്ചു. തലയിൽ നിന്നും സാരി മാറ്റി തോളിലൂടെ പുതച്ചു കൊണ്ട് പതിയെ നടന്നു

ഹോ ഈ വികാരി അച്ചന്റെ ഒരു പ്രസംഗം എനിക്കാണെങ്കിൽ ഉറക്കം വന്നിട്ട് മേലാരുന്നു

എന്റെയും കാര്യം അത് തന്നെ ഈ കിളവന്മാർ അച്ചന്മാർ ഇടവകയിൽ വന്നാൽ ഉള്ള കുഴപ്പം ഇതാ

പിന്നിൽ നിന്നും രണ്ടു പെൺകുട്ടികളുടെ സംസാരം കേട്ട് ലീന തിരിഞ്ഞു നോക്കി.. അലീനയും ഷീബയും ആണ്. ലീന തിരിഞ്ഞു നോക്കുന്നത് കണ്ടപ്പോ തങ്ങൾ പറഞ്ഞത് കേട്ടാണല്ലോ തിരഞ്ഞു നോക്കിയത് എന്ന് സംഭ്രമത്തോടെ ചമ്മിയ ചിരിയും ചിരിച്ചു അവർ തലകുനിച്ചു സ്പീഡിൽ നടന്നു പോയി.. അതുങ്ങൾ പറഞ്ഞത് സത്യം ആണല്ലോ എന്ന് മനസ്സിൽ ഓർത്തുകൊണ്ട് ലീന ചെറുതായി ഒന്ന് ചിരിച്ചു

ലീന ടീച്ചറേ

ഹായ് മേഴ്‌സി എന്നാ ഉണ്ട് മോളെ വിശേഷം നീ ഇവിടെ ഉണ്ടാരുന്നോ

സുഖം ആയിരിക്കുന്നു ടീച്ചറെ ഞാൻ മിനിഞ്ഞാന്ന് വന്നു

നീ ഇപ്പൊ എവിടെയാ

ഞാൻ ഇപ്പോഴും ഖത്തറിൽ ആണ് ടീച്ചറേ അന്ന് ഞങ്ങളുടെ ക്ലാസ്സിൽ പഠിച്ച ആഷിക്കും ദേവനും ലിസ്സ മോളും ഒക്കെ ഖത്തറിൽ ഉണ്ട് ഞങ്ങൾ ഒരു കോളേജ് ഗ്രൂപ് ഉണ്ടാക്കിയിട്ടുണ്ട് മിക്കവരും ടീച്ചറെ അന്വേഷിക്കാറുണ്ട്

സന്തോഷം എല്ലാവരെയും എന്റെ സ്നേഹാന്വേഷണങ്ങൾ അറിയിക്കുക

തീർച്ചയായും ടീച്ചറേ , ഞാൻ നാട്ടിൽ പോരുന്നു എന്നറിഞ്ഞപ്പോ എല്ലാവരും ടീച്ചറെ പ്രത്യേകം അന്വേഷിച്ചതായി പറയണം എന്ന് പറഞ്ഞു. അടുത്ത കൊല്ലം ഈ കൊറോണ ഭീതി ഒക്കെ ഒന്ന് മാറിയാൽ എല്ലാവരും ഒരു ഗെറ്റ് ടുഗതർ പ്ലാൻ ചെയ്യുന്നുണ്ട് ടീച്ചറെയും ക്ഷണിക്കും ഉറപ്പായും വരണേ
തീർച്ചയായും വിളിക്കണം ഞാൻ ഉറപ്പായും വരാം നിങ്ങളെ പോലെ ഉള്ള കുട്ടികൾ ഞങ്ങളെ ഇപ്പോഴും ഓർക്കുന്നതാണ് ഞങ്ങളുടെ ഏറ്റവും വലിയ സന്തോഷം..

പിന്നെ ടീച്ചറേ ഒരു കാര്യം കൂടി ഉണ്ട്

എന്താണ് മോളേ

നാളെ എഴുത്തിനു ഇരിക്കാൻ എന്റെ മോൾ ഇവാനയും ഉണ്ട് അവളെയും ടീച്ചറിന്റെ അടുത്ത് തന്നെ എഴുത്തിനിരുത്താൻ കൂടിയാണ് ഞാൻ ഞങ്ങൾ ഇത്തവണ ഈ സമയത്തു തന്നെ ലീവ് എടുത്തു വന്നത്

ആണോ സന്തോഷം അപ്പൊ നാളെ രാവിലെ കൊണ്ട് പോരൂ

എന്നെയും എഴുത്തിനു ഇരുത്തിയത് ടീച്ചർ ആയിരുന്നു

ആഹാ അത് കൊള്ളാമല്ലോ അമ്മയെയും മോളെയും എഴുത്തിനു ഇരുത്താൻ ഭാഗ്യം എനിക്കാണോ

ഭാഗ്യം ഞങ്ങളുടെയല്ലേ ടീച്ചറേ ടീച്ചർ എഴുത്തിനിരുത്തിയ ആരാ രക്ഷപെട്ടു പോകാത്തത് അതല്ലേ ഇവിടെ എല്ലാവരും ടീച്ചറുണ്ടെങ്കിൽ ഈ സമയത്തു അവധി എടുത്തു വരുന്നത്

സന്തോഷം മോളേ ..ഇങ്ങനെ നല്ല വാക്കുകൾ കേൾക്കുന്നത് ഒത്തിരി സന്തോഷം ഞാൻ പ്രത്യേകം പ്രാർത്ഥിക്കാം കേട്ടോ – മേഴ്‌സിയോട് യാത്ര പറഞ്ഞു ലീന മുന്നോട്ട് നടന്നു

ടീച്ചറേ ഇന്ന് തന്നെയാണോ വന്നത് സാർ എന്തിയേ – ലീന ചോദ്യം കേട്ട് തിരഞ്ഞു നോക്കി

ആ ആലീസ് ചേച്ചിയോ, ആ ചേച്ചി ഇന്ന് തന്നെയാ വന്നത് അച്ചായൻ വണ്ടന്മേട്ടിൽ ഏലത്തോട്ടത്തിൽ പോയതാ ഇന്ന് വരും

അവിടെ പണിക്കാരൊക്കെ ഇല്ലേ
ഉണ്ട് ചേച്ചീ എന്നാലും നമ്മുടെ ഒരു നോട്ടം വേണോല്ലോ അത് കൊണ്ട് പോകുന്നതാ ജോസപ്പ് ചേട്ടൻ എന്തിയേ

ഓ അങ്ങേര് ഇന്ന് വന്നില്ല ടീച്ചറേ ഇന്നലെ വൈകിട്ട് വന്നത് ആ ഷാപ്പിലെ കള്ളു മുഴുവൻ തീർത്തിട്ടാ രാവിലെ എഴുനേൽക്കേണ്ടേ

ആഹാ ഇപ്പോഴും നല്ല വെള്ളം ആണോ

ഒന്നും പറയേണ്ട ടീച്ചറേ ..സാർ വന്നു കഴിയുമ്പോ അങ്ങേരെ കണ്ടാൽ ഒന്ന് ഉപദേശിക്കാൻ പറയണേ സാർ പറഞ്ഞാൽ അങ്ങേര് അനുസരിക്കും കുറച്ചു നാൾ എങ്കിലും കുടി കുറക്കും

ഓ അതിനെന്താ ഞാൻ പറയാമല്ലോ

സത്യം പറഞ്ഞാൽ അങ്ങേർക്കു ഈ നാട്ടിൽ ആകെ അല്പം പേടിയും ബഹുമാനവും ഉള്ളത് നിങ്ങളെ രണ്ടിനെയും മാത്രമാ അതാ ഇടയ്ക്കിടെ ഞാൻ നിങ്ങളെ ഇങ്ങനെ ശല്യപ്പെടുത്തുന്നത്

ഓ ഇതൊക്കെ എന്ത് ശല്യപ്പെടുത്തൽ ആണ് ചേച്ചി ..ചേച്ചി ധൈര്യമായി പൊക്കോ ഞാൻ അച്ചായനോട് പറഞ്ഞേയ്ക്കാം

ശരി ടീച്ചറെ – ആലിസ് ചേച്ചി പോകുന്നത് കണ്ടു ലീന പതിയെ നടന്നു.

ലീന ടീച്ചറേ – അടുത്ത വിളി കേട്ട് ലീന തിരിഞ്ഞു നോക്കി മഠത്തിലെ സിസ്റ്റർ റോസ് മരിയ ആണ് വേഗത്തിൽ അവർ നടന്നു ലീനയുടെ അടുത്തെത്തി