“” നിന്റെ കാര്യമോടീ… ഞാനാരോടെങ്കിലും പറയണോ… ?””
“” അതൊന്നും വേണ്ട ചേച്ചീ.. എന്റെ കാര്യം പറഞ്ഞാൽ ചേച്ചിയുടെ അവസരം കൂടി ഇല്ലാതാകും…………”
ശാന്തമ്മ ബാബു കണ്ണാടി വലതു കയ്യിലേക്ക് മാറ്റി…
“” കുറച്ചൊക്കെ ഞാനും അറിഞ്ഞായിരുന്നു… ഭാര്യ മരിച്ച അവന് പിള്ളേരെ നോക്കാൻ വേണ്ടി മാത്രമാണ് നിന്നെ ആവശ്യമെന്ന് പിന്നീടാ അറിഞ്ഞത്…”
ശാന്തമ്മ ബാബുവിന്റെ സ്വരം മാറി…
“ ഞാനും അത്ര നല്ലതല്ലായിരുന്നല്ലോ… “”
പൂർണ്ണിമ വേദന നിറഞ്ഞു മന്ദഹസിച്ചു..
“ അവന്റെ പെണ്ണുപിടി കാരണമാ അവള് കെട്ടിത്തൂങ്ങിയത്…… എന്നിട്ടും ആ നാറിക്ക് ബോധം വന്നില്ല… “”
പൂർണ്ണിമ പതിയെ നോട്ടം മാറ്റി…
“” സമ്മതത്തോടെയും അല്ലാതെയും വീണ എത്ര പെണ്ണുങ്ങളുടെ കണ്ണീരുണ്ടാകും .. “”
പൂർണ്ണിമ അനങ്ങിയില്ല….
“” നിനക്ക് നല്ല കഴിവുണ്ടായിരുന്നു.. ഞാനും സിന്ധുവുമൊക്കെ നിന്റെയീ അവസ്ഥ പറയാറുണ്ട്… “
“” എന്നിട്ടും ഞാനെവിടെയും എത്തിയില്ലല്ലോ ചേച്ചീ…””
“” സാരമില്ല… അങ്ങനെ പറയാനല്ലേ പറ്റൂ.. രാജീവ് മനസ്സു വെച്ചാൽ നിനക്ക് എത്രമാത്രം സിനിമ കിട്ടേണ്ടതാ.. സത്യത്തിൽ എന്താ പ്രശ്നം…… ? നീ പറ…”
“” ശത്രുവായിപ്പോയില്ലേ……….””
പൂർണ്ണിമ വീണ്ടും അതേ മന്ദഹാസത്തോടെ തിരിഞ്ഞു…
ഹോട്ടലിന്റെ മെയിൻ ഗേറ്റിനു മുന്നിലേക്ക് സേതു മണ്ണാർക്കാടിന്റെ കാർ വന്നുനിൽക്കുന്നത് ഇരുവരും കണ്ടു..
“ അവർ വന്നു…”
പൂർണ്ണിമ പറഞ്ഞു.
“” നീയതങ്ങ് പറ പെണ്ണേ…”
“” പിന്നെയാവട്ടെ ചേച്ചീ… “”
പൂർണ്ണിമ ആ സംസാരത്തിന് മനപ്പൂർവ്വം തടയിട്ടു…
സേതുവിന്റെ കാർ വന്നു നിന്ന് അഞ്ചു മിനിറ്റിനകം അജയൻ പൂർണ്ണിമയുടെ മുറിയിലേക്കു വന്നു…
“” ശാന്ത ചേച്ചിക്ക് ഇന്ന് സീനുണ്ട്.. ഞാനെവിടെയൊക്കെ തിരക്കി നിങ്ങളെ… ?””
“” ഞാനെന്നാ ആരുടെയെങ്കിലും കൂടെ കിടക്കാൻ പോയോന്ന് കരുതിയോ… “”
ശാന്തമ്മ ബാബു എടുത്തടിച്ചതു പോലെ മറുപടി കൊടുത്തു..
അജയന്റെ മുഖമൊന്നു വിളറി……
“” എന്റെ കാര്യം വല്ലതും പറഞ്ഞോ അജയാ…”
അവന്റെ ജാള്യത മറയ്ക്കാനെന്നവണ്ണം പൂർണ്ണിമ ചോദിച്ചു..
“” പറഞ്ഞില്ല… പക്ഷേ ഷൂട്ടിംഗ് മുടങ്ങിയിട്ടില്ല…………’’
പൂർണ്ണിമ ഒരു ദീർഘനിശ്വാസമെടുത്തു..
“” അപ്പോൾ നായികയോ…?””
ശാന്തമ്മ ബാബു ചോദിച്ചു..
“” ശാന്ത ചേച്ചിക്കെന്നാ നായികയാകാൻ കഴിവില്ലേ……….?”
ചിരിയോടെ പറഞ്ഞതേ അജയൻ മുറി വിട്ടു…
“” അനിയൻ അങ്ങനെ സമ്മതിച്ചു കൊടുക്കാൻ വഴിയില്ലാത്തതാണല്ലോ.. പിന്നെന്തു പറ്റി………? “
ശാന്തമ്മ പൂർണ്ണിമയെ നോക്കി…
പൂർണ്ണിമ കൈ മലർത്തി…
🌺 🌺 🌺 🌺 🌺
ക്ഷേത്രത്തിൽ നിന്ന് വന്നയുടനെ ദോശയും ചട്നിയും ചായയും കഴിച്ച ശേഷം, പുറത്തേക്ക് കാഴ്ചയുള്ള, ചെറിയ കോലായിലെ കസേരയിലായിരുന്നു ശ്രീനിവാസൻ…
അതാണ് പതിവ്…
ആ ഇരിപ്പിൽ ഒന്നു മയങ്ങും…
ഉച്ച ഭക്ഷണമാകുമ്പോൾ ഉണരും…
ഭക്ഷണമൊക്കെ കഴിഞ്ഞ് , പഴയ സംഗീത ഉപകരണങ്ങളും കീർത്തനങ്ങളും പൊടി തട്ടി വെയ്ക്കും…
വൈകുന്നേരം പുഴയിലെ കുളി കഴിഞ്ഞ് വീണ്ടും ക്ഷേത്രത്തിലേക്ക്..
ഞായറാഴ്ചകളിൽ മാത്രമാണ് ചെറിയൊരു മാറ്റം…
ആദ്യ കാലങ്ങളിൽ കസേരയിൽ കൂടെ മയങ്ങുവാൻ മനുമിതയായിരുന്നു…
പിന്നീടയാളുടെ നെഞ്ചിൽ കിടന്നു മയങ്ങുവാൻ മന്ത്രമിത വന്നു…
ഇപ്പോൾ ആരുമില്ലെന്നു മാത്രം…
മാറ്റമില്ലാത്തത് ശ്രീനിവാസന് മാത്രമായിരുന്നു…
അകത്ത് സേതുലക്ഷ്മിയുടെയും കുട്ടികളുടെയും ബഹളം കേൾക്കുന്നുണ്ടായിരുന്നു…
ഷൂട്ടിംഗാണ് വിഷയം……
മനുമിത മന്ത്രമിതയോട് പറഞ്ഞ് എരിവു കേറ്റിയിട്ടുണ്ട്……
അതുകൊണ്ടു തന്നെ അവളാണ് ബഹളത്തിനു മുൻപിൽ…
മധുമിതയുടെ ശബ്ദം മാത്രം കേൾക്കാനില്ല…
സേതുലക്ഷ്മി അതിന് സമ്മതിക്കില്ലെന്ന് അറിയാം… അതു തന്നെ കാരണം..
കഴിഞ്ഞ തവണയും ഷൂട്ടിംഗ് വന്നപ്പോൾ ഈ കരയിൽ നിന്നും അത് കാണാൻ പോകാത്തവരായി ആ കുടുംബം മാത്രമേ ഉണ്ടായിരുന്നുള്ളൂ…
ഇടയ്ക്ക് വന്ന് മന്ത്രമിത ശ്രീനിവാസനോട് അനുവാദം ചോദിച്ചു…
അമ്മയോട് ചോദിക്കാൻ ശ്രീനിവാസൻ മറുപടി കൊടുത്തു…
അയാളുടെ നെഞ്ചിലെ രോമവും വലിച്ചു പറിച്ച്, “ അല്ലെങ്കിലും നിക്കറ്യാർന്നു”” എന്ന് പറഞ്ഞ് അവൾ കരഞ്ഞു കൊണ്ടു പോയി…