“ഇന്ന് കൂടെയേ ഞാൻ വിളമ്പി തരൂ.. നാളെ മുതൽ മോള് വേണം ഇതൊക്കെ ചെയ്യാൻ..എല്ലാവർക്കും മോള് വേണം വിളമ്പി കൊടുക്കാൻ. ”
“നീ എന്തിനാടി ഓരോന്ന് പറഞ്ഞു മോളെ പേടിപ്പിക്കുന്നത്.. അതൊക്കെ മോള് കണ്ടറിഞ്ഞു ചെയ്തോളും. മിടുക്കിയല്ലേ നമ്മുടെ മോള്. ” ജീവേട്ടന്റെ അച്ഛൻ ആണ് അത് പറഞ്ഞത്.
“നിനക്കെപ്പോഴാ പുതിയ സ്ഥലത്തേക്ക് പോകേണ്ടത്.? ” ജീവേട്ടന്റെ അച്ഛൻ ജീവേട്ടനോട് ചോദിച്ചു.
“എവിടെ പോകുന്ന കാര്യം ആണ് .?. നിങ്ങൾ പറയുന്നത്?” ജീവേട്ടന്റെ അമ്മ ചോദിച്ചു.
“എടി… ഇവന് സ്ഥലം മാറ്റം ആയന്ന് അന്നേ പറഞ്ഞതല്ലേ..? അതാ ഞാൻ ചോദിച്ചത്. നീ മോളെയും കൊണ്ട് പോകുന്നുണ്ടോ?” ജീവേട്ടന്റെ അച്ഛൻ ചോദിച്ചു.
“അത് എന്ത് ചോദ്യമാ അല്ലേടാ… എന്റെ മോളെ കൂട്ടാതെ ഇവൻ പോകാനോ കണക്കായി. അല്ലേടാ!!!” ജീവേട്ടന്റെ അമ്മ പറഞ്ഞു.
“അടുത്ത സൺഡേ പോകണം.. ” ജീവേട്ടൻ പറഞ്ഞു.
“അപ്പോൾ ഇനി ഒരാഴിച്ച അല്ലേ ഉള്ളൂ. അപ്പോഴേക്കും വിരുന്ന് എല്ലാം പോയി കഴിയുമോ?” ജീവേട്ടന്റെ അച്ഛൻ തന്നെയാണ് ചോദിച്ചത്.
“വിരുന്നൊക്കെ അടുത്ത വരവിനു പോകാം. നാളെ കഴിഞ്ഞു മറ്റന്നാൾ മോളുടെ വീട്ടിൽ പോകണം രണ്ടാളും. എന്നിട്ട് രണ്ടു ദിവസം അവിടെ നിന്നിട്ട് ഇങ്ങോട്ട് വന്നാൽ മതി. അത് കഴിഞ്ഞു ഒരു ദിവസം മുൻപ് തന്നെ ജോലി സ്ഥലത്തേക്ക് പോയിക്കോ? കുറേ ദൂരം പോകേണ്ടതല്ലേ.? ” ജീവേട്ടന്റെ അമ്മ പറഞ്ഞു.
“അവിടെ റൂം ഒക്കെ റെഡിയായോ? ഇല്ലെങ്കിൽ നീ മാത്രം പോയിട്ട് പിന്നെ മോളെ കൊണ്ടു പോയാൽ മതി.” ജീവേട്ടന്റെ അച്ഛൻ പറഞ്ഞു.
“അയ്യോ അത് വേണ്ട. അവിടെ ഒരു വീട് തന്നെ കിട്ടിയിട്ടുണ്ട്. അങ്ങോട്ടും ഇങ്ങോട്ടും യാത്ര ചെയ്യുന്നത് ബുദ്ധിമുട്ട് ആണ്. രണ്ടു ദിവസം വേണം അവിടെ എത്താൻ.. അതും കാറും കൊണ്ടു പോകുമ്പോൾ.”
അത് കേട്ട് എല്ലാവരും ചിരിച്ചു. എന്താ ചിരിക്കാൻ കാര്യം എന്നല്ലേ.. അത് പറയുമ്പോൾ ഉള്ള ജീവേട്ടന്റെ ഭാവം ആണ് ചിരിക്കാൻ കാരണം. എന്നെ ഇവിടെ നിർത്തി പോകേണ്ടി വരുമോ എന്ന പേടി പോലെയാണ് ജീവേട്ടൻ പറഞ്ഞത്.
ഭക്ഷണം കഴിഞ്ഞ ശേഷം. ജീവേട്ടൻ അവിടെ തഞ്ചി കളിക്കുന്ന കണ്ട് അമ്മ പറഞ്ഞു.
” ഡാ നീ റൂമിലേക്ക് പോയിക്കോ… മോളെ ഞാൻ വേഗം വിടാം. നീ പേടിക്കേണ്ട. ”
“അതിന് ഞാൻ എന്തെങ്കിലും പറഞ്ഞോ.. എനിക്ക് ഉറക്കം ഒന്നും വരുന്നില്ല. ഞാൻ മെല്ലെ ഉറങ്ങിക്കോളും.. പോയിട്ട്”
“അതെല്ലെങ്കിലും എന്റെ മോനിന്ന് ഉറക്കം ഉണ്ടാകില്ല എന്ന് അമ്മയ്ക്ക് അറിയാം.. മോൾക്ക് ക്ഷീണം കാണും. രണ്ടു പേരും സംസാരിച്ചു ഉറങ്ങാൻ വൈക്കേണ്ട.. വേഗം ഉറങ്ങിക്കോണം..”
“എന്നാ ഞാൻ ഉറങ്ങാൻ പോകുകയാ… അമ്മയുടെ മോളെ എപ്പോഴാണെന്ന് വിചാരിച്ചാൽ വിട്ടാൽ മതി. എനിക്ക് ഒന്നും ഇല്ല. ” അതും പറഞ്ഞു ജീവേട്ടൻ മുകളിലേക്ക് പോയി. മുകളിലാണ് ജീവേട്ടന്റെ മുറി.
കുറച്ചു കഴിഞ്ഞു. അമ്മ എന്റെ കൈയിൽ പാൽ ഗ്ലാസ് തന്നു. എന്നിട്ട് പറഞ്ഞു.
“എന്റെ മോൻ പാവമാ.. മോളെ ഒരുപാട് ഒരുപാട് ഇഷ്ട്ടമാ.. മോള് എന്നും അവന്റെ കൂടെ ഉണ്ടാകണം. പിന്നെ എനിക്ക് വേഗം ഒരു മുത്തശ്ശി ആകണം. അധികം വൈക്കേണ്ട കേട്ടല്ലോ..?”
അമ്മ പറയുന്നത് കേട്ട് എനിക്ക് നാണം തോന്നി. അമ്മ തന്നെയാണ് എന്നെ ജീവേട്ടന്റെ റൂമിൽ കൊണ്ടു വിട്ടത്. പാൽ ഗ്ലാസ്സുമായി റൂമിൽ കയറി. ജീവേട്ടൻ വന്നു വാതിൽ ചാരി ലോക്ക് ചെയ്തു. എന്നേയും കൂട്ടികൊണ്ട് കട്ടിലിൽ പോയി ഇരുന്നു. എന്നെ പിടിച്ചു കട്ടിലിൽ ഇരുത്തി.
ഞാൻ പാൽ ജീവേട്ടന് കൊടുത്തു.
“ആദ്യം എന്റെ അമ്മു കുടിക്ക് എന്നിട്ട് ഞാൻ കുടിച്ചോളാം. ” ജീവേട്ടൻ പറഞ്ഞു.
“ഏട്ടൻ അല്ലേ ആദ്യം കുടിക്കേണ്ടത്. ഏട്ടൻ കുടിച്ചിട്ട് ബാക്കി എനിക്ക് തന്നാൽ മതി ഞാൻ കുടിച്ചോളാം.” ഞാൻ പറഞ്ഞു.
“അങ്ങനെ എന്റെ ബാക്കി കുടിക്കാൻ അല്ല . എന്റെ പെണ്ണിനെ ഞാൻ ഇങ്ങോട്ട് കൂട്ടി കൊണ്ടു വന്നത് . അത് കൊണ്ട് നമുക്ക് ഒരുമിച്ചു കുടിക്കാം. ആദ്യം അമ്മു കുടിക്കും പിന്നെ ഞാൻ പിന്നെ അമ്മു പിന്നെ ഞാൻ….. അങ്ങനെ നമുക്ക് കുടിക്കാം.” അങ്ങനെ പറഞ്ഞു ജീവേട്ടൻ ആ പാൽ ഗ്ലാസ് എന്റെ ചുണ്ടിൽ മുട്ടിച്ചു.