”പടച്ചോനെ… ഇവൾ ഇതെന്ത് കിടപ്പാ ഈ കിടക്കുന്നത്,” അവൻ പതുക്കെ ആത്മഗതിച്ചു. അവളെയൊന്ന് തട്ടി ഉണർത്താൻ തോന്നിയെങ്കിലും നിഷ്കളങ്കമായി ഉറങ്ങുന്ന ആ മുഖം കണ്ടപ്പോൾ അവന് അതിന് തോന്നിയില്ല. വളരെ കഷ്ടപ്പെട്ട്, ശ്വാസം അടക്കിപ്പിടിച്ച് അവൻ അവളുടെ കൈകൾ മാറ്റി കട്ടിലിൽ നിന്നിറങ്ങി.
നേരെ ബാത്ത്റൂമിലേക്ക് കയറി വാതിലടച്ചു.
കണ്ണാടിക്ക് മുന്നിൽ നിന്ന് മുഖത്തേക്ക് ആഞ്ഞു വെള്ളമൊഴിച്ചു. എന്നിട്ട് കണ്ണാടിയിലെ തന്റെ പ്രതിബിംബത്തെ നോക്കി അവൻ പതുക്കെ സംസാരിക്കാൻ തുടങ്ങി.
”ഫൈസി… നീ പുലിയാടാ പുലി! ഇന്ന് ഏഴാം ദിവസമാണ്. ഈ ഏഴ് ദിവസവും ഈ ഐറ്റം കൂടെയുണ്ടായിട്ടും നീ പിടിച്ചു നിന്നല്ലോ… നിനക്ക് ഒരു പത്മശ്രീ തന്നാലും കുറഞ്ഞുപോകും!” അവൻ പതുക്കെ ചിരിച്ചു.
”അപ്പുറത്ത് കിടക്കുന്നത് വെറുമൊരു പെണ്ണല്ല, ഒരു ആറ്റം ബോംബാണ്. ആ മഞ്ഞ ബനിയനും ആ ഷോർട്സും ഒക്കെ ഇട്ട് അവൾ മുന്നിൽ വന്നിട്ടും, മടിയിൽ വന്നിരുന്നിട്ടും നീ അന്തസ്സ് കളഞ്ഞില്ലല്ലോ. ശരിക്കും നീ ഒരു സംഭവമാണ്. ഇനി ഒരു ഏഴ് ദിവസം കൂടിയേ ഉള്ളൂ. അത് കൂടെ ഇങ്ങനെയങ്ങ് പിടിച്ചു നിന്നാൽ മതി. നീ ജയിക്കും മോനേ ഫൈസി…
കം ഓൺ ഫൈസി….
യു ക്യാൻ……”
തന്റെ മനസ്സിന് താൻ തന്നെ ഒരു മോട്ടിവേഷൻ നൽകി അവൻ ഒന്ന് നിവർന്നു നിന്നു. ഒരു വലിയ യുദ്ധം ജയിച്ച പോരാളിയുടെ ഭാവമായിരുന്നു അവന്റെ മുഖത്ത്. പക്ഷേ, പുറത്ത് കട്ടിലിൽ കിടക്കുന്ന ആ കുറുമ്പത്തിക്ക് ഇനിയുള്ള ഏഴ് ദിവസങ്ങളിൽ തന്റെ ഈ മോട്ടിവേഷൻ ഒക്കെ തകർക്കാൻ അധികം സമയം വേണ്ടെന്ന് ഫൈസിക്ക് ഉള്ളാലെ ഒരു പേടിയുണ്ടായിരുന്നു.
കണ്ണാടിയിൽ നോക്കി മീശ ഒന്ന് പിരിച്ച ശേഷം അവൻ ബാത്ത്റൂമിൽ നിന്നിറങ്ങി. ഇനി അടുത്ത ഏഴ് ദിവസങ്ങൾ… അതുകൂടി കഴിഞ്ഞാൽ ഈ പരീക്ഷണം അവസാനിക്കും.
ഭക്ഷണം കഴിഞ്ഞ് പതിവുപോലെ ലുഡോ കളി തുടങ്ങിയെങ്കിലും ഇന്ന് ഫൈസിക്ക് ഒരു പ്രത്യേക ഉഷാറായിരുന്നു. രാവിലെ ബാത്ത്റൂമിലെ കണ്ണാടിക്ക് മുന്നിൽ നിന്ന് സ്വയം കൊടുത്ത മോട്ടിവേഷൻ അവന്റെ ആത്മവിശ്വാസം കൂട്ടിയിട്ടുണ്ട്.
”ദേ നോക്കിക്കോ ഐഷു… ഇന്ന് നിന്റെ എല്ലാ കരുക്കളും വെട്ടിക്കൊണ്ട് ഞാൻ ഹോം ആകും,”
ഫൈസി ആവേശത്തോടെ ഡൈസ് എറിഞ്ഞു.
പതിവിന് വിപരീതമായി ഫൈസിക്ക് ഇന്ന് ഭാഗ്യം തുണച്ചു. ഓരോ വെട്ടും ഐഷുവിനെ തളർത്തി. അവൻ കസേരയിൽ ഇരുന്ന് കൈയ്യടിക്കുകയും എഴുന്നേറ്റു നിന്ന് ഡാൻസ് കളിക്കുകയും ചെയ്യുന്നുണ്ടായിരുന്നു.
”ഹോ… കാക്കുവിന് ഇന്ന് ഇതെന്തുപറ്റി? വല്ലാത്തൊരു ഉന്മേഷം ആണല്ലോ.. ഇതിനുമുമ്പ് ജയിച്ചിട്ടേയില്ലാത്തത് പോലെ,എന്നാലും 1 ആഴ്ചയായി ഞാനാ എല്ലാം ജയിച്ചേ. ചക്ക വീണു മുയല് ചത്തെന്നു പറഞ്ഞ പോലെ രണ്ട് കളി ജയിച്ചു…അയ്നാണ്…..” ഐഷു ചുണ്ട് പിളർത്തി പരാതിപ്പെട്ടു.
”രണ്ടോ മൂന്നോ…തോറ്റില്ലേ നീ….” അവൻ ആറടിച്ചു കൊണ്ട് അവളുടെ അവസാനത്തെ കരുവും വെട്ടി ഹോം ആയി. “യെസ്! ഞാൻ ജയിച്ചു! ഇനിയെങ്കിലും സമ്മതിക്ക് ഫൈസിക്കാക്ക പുലിയാണെന്ന്.” അവൻ അർമാദിക്കുന്നത് കണ്ട് ഐഷു കളി മതിയാക്കി ഫോണിലേക്ക് മുഖം താഴ്ത്തി.
“” തോറ്റു തോറ്റു തൊപ്പിയിട്ട് ഞാനാ പടച്ചോനോട് ഒന്ന് ജയിപ്പിക്കാൻ പ്രാർത്തിച്ചേ… എന്നിട്ടാണെങ്കിൽ ഒടുക്കത്തെ ജാടയും.. വല്ലാത്ത സാധനാ കാക്കു ങ്ങള്…. “”
അവളതും പറഞ്ഞുകൊണ്ട് മൊബൈലിൽ തോണ്ടി…അവളുടെ കുറുമ്പുള്ള മുഖം കണ്ട് അവനും ചിരി വന്നു…
അല്പം കഴിഞ്ഞ്, കൗതുകം സഹിക്കാതെ ഫൈസി അവളുടെ അടുത്തേക്ക് നീങ്ങിയിരുന്നു.
“ഇങ്ങു തന്നേ നിന്റെ ഫോൺ… നീ ആ നാൽപ്പത് വീഡിയോ അല്ലാതെ വേറെ എന്തൊക്കെയാണ് ഇതിൽ ഒളിപ്പിച്ചു വെച്ചിരിക്കുന്നത് എന്ന് എനിക്കൊന്നു കാണണം.”
പണ്ടത്തെപ്പോലെ അവൾ ഫോൺ തട്ടിപ്പറിച്ചില്ല. പകരം ഒരു വല്ലാത്ത ഭാവത്തിൽ അവൾ അത് അവന് നൽകി. ഫൈസി പതിയെ ക്രോം ഹിസ്റ്ററി എടുത്തു. അവളുടെ പഴയ സെർച്ച് ഹിസ്റ്ററികൾക്കിടയിൽ കഴിഞ്ഞ മൂന്ന് ദിവസത്തെ തിരച്ചിലുകൾ കണ്ടപ്പോൾ ഫൈസിയുടെ കണ്ണ് തങ്ങിപ്പോയി.