”ഇതെന്താ ഈ ബസ്സിന്റെ മുൻഭാഗം ഇങ്ങനെ തകർന്നു കിടക്കുന്നത്? ആ ബലാത്സംഗ കേസ് നടന്നപ്പോൾ ഇത് ഇങ്ങനെയായിരുന്നില്ലല്ലോ?”
ആ പോലീസുകാരൻ ഒരു സിഗരറ്റ് കത്തിച്ച് ബസ്സിനെ നോക്കി ഒന്ന് ദീർഘശ്വാസമടുത്തു. എന്നിട്ട് ആ രഹസ്യം വിവരിക്കാൻ തുടങ്ങി:
”സാർ, ഈ ബസ്സിന് പിന്നിൽ മറ്റൊരു കഥ കൂടിയുണ്ട്. ആ ക്രൂരത നടന്ന് ഏകദേശം മൂന്ന് മാസം കഴിഞ്ഞപ്പോൾ, അന്ന് ഇത് പാർക്ക് ചെയ്തിരുന്ന സ്റ്റേഷൻ ഗ്രൗണ്ടിൽ നിന്നും ഈ വണ്ടി മോഷണം പോയി. ആരെങ്കിലും ഈ തുരുമ്പ് പെട്ടി മോഷ്ടിക്കുമെന്ന് ഞങ്ങൾ കരുതിയില്ല.”
നിരഞ്ജൻ നെറ്റി ചുളിച്ചു.
“മോഷണം പോയെന്നോ? എന്നിട്ട്?”
”അതെ സാർ. വണ്ടി മോഷ്ടിച്ച ആൾ പാതിരാത്രി ഇത് സിറ്റിയിലൂടെ ഓടിച്ചു പോയി. പക്ഷേ നിയന്ത്രണം വിട്ട ബസ് നേരെ ഇടിച്ചു കയറിയത് അവിടുത്തെ ഒരു ബോയ്സ് ഹോസ്റ്റലിലേക്കാണ് . വലിയൊരു ശബ്ദത്തോടെ ഹോസ്റ്റലിന്റെ മതിൽ തകർത്ത് അകത്തേക്ക് കയറി ഹോസ്റ്റലിന്റെ മുൻ ഭാഗം തകർത്തു . വിവരം അറിഞ്ഞ് ഞങ്ങൾ അവിടെ എത്തിയപ്പോഴേക്കും ആ കള്ളൻ അവിടുന്ന് രക്ഷപ്പെട്ടിരുന്നു. അവനെ പിടിക്കാൻ പറ്റിയില്ല. ആ ഇടിയിലാണ് ഈ ബസ്സിന്റെ മുൻഭാഗം ഇങ്ങനെ തകർന്നു പോയത്.”
പോലീസുകാരൻ പറഞ്ഞത് കേട്ട് നിരഞ്ജൻ ആലോചനയിലാഴ്ന്നു. വെറുമൊരു കള്ളൻ എന്തിനാണ് ഈ മരണവണ്ടി മോഷ്ടിക്കുന്നത്? അതും ഒരു ബോയ്സ് ഹോസ്റ്റലിലേക്ക് തന്നെ ഇത് ഇടിച്ചു കയറ്റിയതിൽ എന്തോ ഉദ്ദേശമില്ലേ?
ആ ബോയ്സ് ഹോസ്റ്റലിൽ അന്ന് താമസിച്ചിരുന്നവർ ആരായിരുന്നു? ലയയെ പീഡിപ്പിച്ച ആ രാഷ്ട്രീയക്കാരുടെ മക്കൾ അവിടെ ഉണ്ടായിരുന്നോ?
നിരഞ്ജൻ ചിന്തിച്ചു പെട്ടന്ന് ഒരു കാര്യം ഓർത്തപ്പോൾ നിരഞ്ജന്റെ സിരകളിലൂടെ ഒരു മിന്നൽ പിണർ പാഞ്ഞുപോയി. അവന്റെ നെറ്റിയിൽ വിയർപ്പ് പൊടിഞ്ഞു. അല്പം മുൻപ് വിഷ്ണുവിന്റെ വീടിന്റെ പിന്നാമ്പുറത്ത് കണ്ട ആ പഴയ കെട്ടിടത്തിന്റെ അവശിഷ്ടങ്ങൾ അവന്റെ കൺമുന്നിൽ തെളിഞ്ഞു വന്നു. കാടുപിടിച്ചു കിടക്കുന്ന തോട്ടത്തിന് നടുവിൽ, കരിങ്കല്ലുകൾ അടർന്നു വീണ ആ ഹോസ്റ്റൽ കെട്ടിടം.
”അതെവിടെയാ… ആ ബസ് ഇടിച്ചു കയറിയ ആ ഹോസ്റ്റൽ ഇപ്പോൾ എവിടെയാ?”
ഒരുതരം വെപ്രാളത്തോടെ നിരഞ്ജൻ ആ പോലീസുകാരന്റെ തോളിൽ പിടിച്ചു ചോദിച്ചു.
പോലീസുകാരൻ പതുക്കെ ആ സ്ഥലം വിവരിച്ചു. അയാൾ പറഞ്ഞു നിർത്തിയതും നിരഞ്ജന്റെ ഉള്ളൊന്നു കാളി. അത് വിഷ്ണുവിന്റെ വീടിന്റെ തൊട്ടുപിന്നിലുള്ള ആ പഴയ പറമ്പ് തന്നെയായിരുന്നു!
നിരഞ്ജൻ ആ തകർന്ന ബസ്സിന്റെ മുൻഭാഗത്തേക്ക് ഒരിക്കൽ കൂടി നോക്കി. എല്ലാം ഒരു ഭീകരമായ ചിത്രമായി അവന്റെ മനസ്സിൽ തെളിഞ്ഞു വന്നു:
അത് വെറുമൊരു മോഷണമോ അപകടമോ ആയിരുന്നില്ല. ലയയുടെ ക്രൂരമായ ബലാത്സംഗത്തിന് സാക്ഷിയായ ഈ ബസ്സ്, തെളിവുകൾ സഹിതം ആ ഹോസ്റ്റലിലേക്ക് ഇടിച്ചു കയറ്റിയത് എന്തിനായിരിക്കും?
ആ ഹോസ്റ്റലിൽ അന്ന് താമസിച്ചിരുന്നവരിൽ വിഷ്ണുവും ഉണ്ടായിരുന്നോ? അതോ ആ രാഷ്ട്രീയക്കാരുടെ മക്കളോടൊപ്പം വിഷ്ണുവിനും ഈ കേസിൽ പങ്കുണ്ടോ?
ആ ഹോസ്റ്റൽ നശിപ്പിക്കാൻ ബസ്സുമായി വന്ന ‘കള്ളൻ’ ശിവനാണെങ്കിൽ, ”ദൈവമേ… അപ്പോൾ ആ ഹോസ്റ്റൽ തകർത്തത് ഈ ബസ് തന്നെയായിരുന്നു!” നിരഞ്ജൻ മന്ത്രിച്ചു.
ആ പഴയ ബസ്സിലെ ക്രൂരതയും, ഹോസ്റ്റലിലെ നിഗൂഢതയും തമ്മിൽ എവിടെയോ ഒരു ബന്ധമുണ്ട്. ലയയെ ബസ്സിൽ വെച്ച് പീഡിപ്പിച്ചത് കണ്ടക്ടറും ഡ്രൈവറും ആണെങ്കിൽ, അതിനു മുൻപ് അവളെ ആ ചുവന്ന പാടുകൾ സമ്മാനിച്ച ആ ‘സംഘം’ ആ ഹോസ്റ്റലിൽ ഉണ്ടായിരുന്നവർ ആണോ?
…
നിരഞ്ജൻ ഒരു വിറയലോടെ ആ തകർന്ന ബസ്സിൽ നിന്നും പുറത്തേക്ക് ഇറങ്ങി. ആ പോലീസുകാരൻ പറഞ്ഞ വാക്കുകൾ അവന്റെ തലയ്ക്കുള്ളിൽ മുഴങ്ങിക്കൊണ്ടിരുന്നു.
വിഷ്ണുവിന്റെ വീടിന് പിന്നിൽ താൻ കണ്ട ആ തകർന്ന ദൈവങ്ങൾക്കിടയിലെ ബോയ്സ് ഹോസ്റ്റൽ… അത് തകർത്തത് ഈ ബസ്സ് തന്നെയാണെന്ന സത്യം അവനെ വല്ലാതെ അസ്വസ്ഥനാക്കി.