” ഇനി ബാക്കി നമുക്ക് ഇത് കഴിച്ചിട്ട് സംസാരിക്കാം. ”
വെളുത്ത ഓട്ട് കിണ്ണം പോലെ ഉള്ള പത്രത്തിൽ ആണ് ബിരിയാണി കൊണ്ട് വെച്ചത്. കൂടെ കാലിയായ ഒരു പ്ലേറ്റും.
സുധി ആ പ്ലേറ്റിലേക്ക് ബിരിയാണി എടുത്ത് ഇടാൻ നോക്കി. എന്നാൽ അതിന് സുധിക്ക് ആയില്ല. അതുകണ്ട് ശ്യാമ എഴുന്നേറ്റ് സുധിയുടെ പ്ലേറ്റിലേക്ക് ബിരിയാണി ഇട്ടു കൊടുത്തു. പിന്നെ സ്വന്തം പ്ലേറ്റിലേക്കും ബിരിയാണി എടുത്തു.
ഇടതു കൈകൊണ്ട് ബിരിയാണി കഴിക്കാൻ ബുദ്ധിമുട്ടുന്ന സുധിയെ കണ്ട് ശ്യാമയ്ക്ക് സങ്കടം തോന്നി. ശ്യാമ ചോദിച്ചു.
” ഞാൻ വാരി തരണോ..? നേരത്തെ പറഞ്ഞില്ലേ ഞാൻ ശരിക്കും ഭക്ഷണം കഴിച്ചിട്ടില്ലെന്ന്. വാരി കഴിക്കാൻ ബുദ്ധിമുട്ടാണെങ്കിൽ ഞാൻ വാരി തരാം. ”
“ശ്യാമയ്ക്ക് അത് ബുദ്ധിമുട്ടാവില്ലേ..? ഞാൻ എങ്ങനെയെങ്കിലും കഴിച്ചോളാം.”
” അതുവേണ്ട ഞാൻ വാരി തരാം. ഞാനിപ്പോൾ അപ്പു ഏട്ടന്റെ ഒരു ഹോം നേഴ്സ് പോലെയല്ലേ..? ”
അങ്ങനെ പറഞ്ഞ് ശ്യാമ ചിരിച്ചു. സുധിയുടെ എതിർവശത്തിരുന്ന ശ്യാമ എഴുന്നേറ്റ് സുധിയുടെ അടുത്തായി വന്നിരുന്നു. എന്നിട്ട് സുധിയുടെ പ്ലേറ്റിൽ നിന്നും ബിരിയാണി വാരി സുധിയുടെ വായിൽ വെച്ചുകൊടുത്തു.
സുധിയുടെ കണ്ണ് നിറഞ്ഞു. എന്നിട്ട് സുധി പറഞ്ഞു.
” പണ്ടെങ്ങോ അമ്മ ഇങ്ങനെ തന്ന ഓർമ്മയുണ്ട് മനസ്സിൽ. ഇനി അതിന് ശ്യാമയുടെ മുഖം ആയിരിക്കും.”
” അതെ ഇപ്പോൾ ഒന്നും സംസാരിക്കേണ്ട. മര്യാദയ്ക്ക് ഇരുന്ന് ഭക്ഷണം കഴിക്ക്.”
സുധിയുടെ കണ്ണ് നിറഞ്ഞത് കണ്ട് ശ്യാമയ്ക്ക് സങ്കടം വന്നിരുന്നു.
സുധി ബിരിയാണി കഴിച്ചു കൊണ്ട് വീണ്ടും പറഞ്ഞു.
” ശ്യാമയും കഴിക്ക്. ”
ശ്യാമ മറ്റൊന്നും ഓർക്കാതെ സുധിക്ക് വാരി കൊടുക്കുന്നതിനൊപ്പം ശ്യാമയും കഴിച്ചു.
“ശ്യാമേ അച്ചാർ തൊട്ട് നാവിൽ വെച്ച് തരുമോ
ചോറ് മാത്രം ഇങ്ങനെ കഴിക്കാൻ പറ്റില്ല..? ”
അപ്പോഴാണ് ശ്യാമ അ കാര്യം ഓർത്തത്. ശ്യാമ ചൂണ്ടു വിരലിനാൽ അച്ചാർ എടുത്തു സുധിയുടെ നാവിൽ തൊട്ടു. സുധി പിന്നെ ആ വിരൽ നന്നായി ചപ്പി വലിച്ചാണ് വിട്ടത്. ഇത് ഇടയ്ക്ക് തുടർന്നു. കൊള്ളി മിട്ടായി നുണയും പോലെ സുധി ശ്യാമയുടെ വിരൽ നുണഞ്ഞു.
ഇടതു കൈയിൽ ചിക്കന്റെ പീസ് എടുത്ത് ശ്യാമയെ നോക്കിക്കൊണ്ട് സുധി കടിച്ചെടുത്ത് കഴിച്ചു. അതുകൊണ്ട് ശ്യാമയ്ക്ക് നാണം തോന്നി.
ബിരിയാണി കഴിച്ചശേഷം കൈയ്യും വായയും കഴുകാനും ശ്യാമ സുധിയെ സഹായിച്ചു.
വീണ്ടും ആ കസേരയിൽ വന്നിരുന്നപ്പോൾ ശ്യാമ ചോദിച്ചു.
” ഇപ്പോൾ വിശപ്പു മാറിയോ.? ”
” കുറച്ച്..? ”
” കുറച്ചോ..? ഇനിയും വേണമെങ്കിൽ വാങ്ങിക്കോ. ഞാൻ വാരി തരാം ”
” വേണ്ട ഇനി രാത്രിയിൽ മതി. ഇന്നുമുതൽ ശ്യാമേ ഒരു ഡ്യൂട്ടി കൂടിയായി.. എനിക്കിനി എന്നും ശ്യാമ ഇങ്ങനെ വാരി തന്നാൽ മതി”
അത് കേട്ട് ശ്യാമ ചിരിച്ചു. എന്നിട്ട് പറഞ്ഞു..
” അപ്പോൾ എനിക്ക് സ്കൂളിലേക്ക് പോകണ്ടേ..?. ഇപ്പോൾതന്നെ സ്കൂളിലേക്ക് വരാൻ നേരം വൈകുന്നു എന്നാണ് ആ മാനേജരുടെ പരാതി.”
” ആ പരാതി ഒക്കെ നമുക്ക് മാറ്റിയെടുക്കാം. അതൊന്നും ഇനി ശ്യാമ പേടിക്കേണ്ട. നമുക്ക് എല്ലാത്തിനും എന്തേലും വഴി കാണാം. എല്ലാത്തിനും ശ്യാമയ്ക്ക് ഇനി കൂടെ ഞാനുണ്ട്.”
അവർ എഴുന്നേറ്റു പുറത്തേക്ക് നടന്നു. സുധി പേഴ്സ് എടുത്ത് ശ്യാമയുടെ കയ്യിൽ കൊടുത്തു. എന്നിട്ട് പറഞ്ഞു.
“എത്രയാണെന്ന് വെച്ചാൽ എടുത്തുകൊടുക്ക്. ”
“അതിന് അപ്പു ഏട്ടന്റെ കയ്യിൽ പണം ഉണ്ടോ..?”
“ആഹ്! ഇവിടെ കൊടുക്കാനുള്ളതൊക്കെ അതിൽ കാണും. ”
ശ്യാമ പേഴ്സ് തുറന്നു നോക്കി. അതിൽ കുറച്ച് 500 രൂപയുടെ നോട്ടുകൾ ഉണ്ടായിരുന്നു. ശ്യാമ അതിൽ നിന്നും ഒരു 500 രൂപ എടുത്തു കൊടുത്തു. ബാക്കി വാങ്ങി പേഴ്സിൽ വെച്ച ശേഷം പേഴ്സ് സുധിക്ക് തിരിച്ചു കൊടുത്തു.