“ഇത് തന്നെയാണ് ശ്യാമയുടെ ജോലി പോകാൻ ഉള്ള പ്രധാന പ്രശ്നം. വരുന്നതോ വൈകി പോകുന്നതോ നേരത്തെ. പല ദിവസവും ലീവ്. പിന്നെ എങ്ങനെയാ അവർ വേറെ ആളെ നോക്കാതിരിക്കും.”
“സാർ പ്ലീസ് ഒന്ന് രണ്ടു ദിവസം കൂടി മാത്രം. അത് കഴിഞ്ഞാൽ ഞാൻ കൃത്യമായി വന്നോളാം. സാർ ഒന്ന് എനിക്ക് വേണ്ടി മുതലാളിയോട് സംസാരിക്കാമോ?”
“ഞാൻ ശ്യാമയോട് പറഞ്ഞിട്ടില്ലേ എന്റെ കാര്യം. എനിക്ക് ഇവിടെ വലിയ റോൾ ഒന്നും ഇല്ല. എല്ലാം അവർ പറയുന്നപോലെ ആണ് ഇവിടെ നടക്കൂ. അതാ ഞാൻ ശ്യാമയോട് മുതലാളിമാരെ ചെന്ന് കാണാൻ പറഞ്ഞത്. പിന്നെ ഞാൻ പറഞ്ഞില്ലെന്നു പറയരുത്. ഞാൻ പലപ്പോഴും മുതലാളിമാരോട് സംസാരിച്ചത് കൊണ്ടാണ് ശ്യാമ ഇന്നും ഇവിടെ ജോലി ചെയ്യുന്നത്. മുൻപ് തന്നെ ശ്യാമയെ പറഞ്ഞുവിടാൻ മുതലാളിമാർ ഒരുങ്ങിയതാ . എന്തായാലും ശ്യാമ പോയി ജോലി നോക്ക്.”
ശ്യാമ അവളുടെ സീറ്റിലേക്ക് പോയി.
അന്ന് വൈകുന്നേരവും അവൾ ഹോസ്പിറ്റലിൽ പോയി. ഇന്നെങ്കിലും അയാളെ കാണണം എല്ലാം പറയണം. അയാൾ തന്നെ തിരിച്ചറിഞ്ഞെങ്കിൽ മാപ്പ് പറഞ്ഞിട്ടായാലും അയാളുടെ കാല് പിടിച്ചിട്ടായാലും ഈ പ്രശ്നത്തിൽ നിന്നും തല ഊരണം.
എന്നാൽ ഇന്നും അയാൾ ഉറക്കത്തിൽ ആയിരുന്നു. അയാളെ കുറച്ചു സമയം നോക്കി നിന്ന ശേഷം തിരിച്ചു പോകാൻ നോക്കി.
” എവിടെ പോകുന്നു.? ഇങ്ങനെ വന്നു നിന്ന് ഒന്നും പറയാതെ പോയാൽ മതിയോ? ആരാണെന്നെങ്കിലും പറഞ്ഞിട്ട് പോയാൽ നന്നായിരുന്നു. ” അയാൾ പറഞ്ഞു.
“അത് ഞാൻ ശ്യാമ. വെറുതെ ഇത് വഴി പോയപ്പോൾ ഒന്ന് നോക്കിയെന്നെ ഉള്ളൂ.’
“ആണോ? എന്നെ മുൻപ് എവിടെ വെച്ചെങ്കിലും കണ്ടിട്ടുണ്ടോ? എന്റെ പേരെങ്കിലും അറിയാമോ?”
“ഇല്ല. എനിക്ക് അറിയില്ല. ഞാൻ ഇതിന് മുൻപ് കണ്ടിട്ടില്ല”
“എന്നാൽ എന്റെ പേര് ‘ ‘ സുധി’ ശ്യാമയെ ഞാൻ കണ്ടിട്ടുണ്ട്. വ്യക്തമായി കണ്ടിട്ടുണ്ട്. എവിടുന്നാണെന്ന് ഞാൻ പറയണോ?”
ശ്യാമ പേടിച്ചു പോയി.
“എന്നെ എവിടുന്ന് എവിടുന്ന് കണ്ടെന്ന..? ഞാൻ നിങ്ങളെ കണ്ടിട്ടില്ലല്ലോ?”
“ശ്യാമ എന്നെ കണ്ടെന്നു ഞാൻ പറഞ്ഞില്ലല്ലോ പറഞ്ഞോ?.എന്നെ കണ്ടോ ഇല്ലയോ എന്ന് പറയേണ്ടത് ഞാൻ അല്ല ശ്യാമയാണ്. . പക്ഷെ ഞാൻ ശ്യാമയെ കണ്ടിട്ടുണ്ടോ എന്ന് പറയേണ്ടത് ഞാൻ അല്ലേ? ഞാൻ ശ്യാമയെ കണ്ടിട്ടുണ്ട്. ”
“എവിടുന്ന് ? എവിടുന്നാ എന്നെ കണ്ടത്? ചുമ്മാ കള്ളം പറയരുത്”
“എവിടുന്നെന്ന് ചോദിച്ചാൽ ഇവിടുന്ന്. ഇവിടുന്ന് തന്നെ . ഇന്നലെ ഇവിടെ വന്നില്ലേ? എന്നെ നോക്കി നിന്നില്ലേ? അപ്പോൾ കണ്ടു ”
ശ്യാമക്ക് സമാധാനമായി . ഇവിടുന്നാണ് തന്നെ കണ്ടത്. അപ്പോൾ മുൻപ് കണ്ടിട്ടില്ല. ഇനി ഒപ്പ് ഇട്ട് കൊടുത്തത് കൂടി ഒഴിവാക്കിയാൽ തല്ക്കാലം രക്ഷപെട്ടു.
“അത്… അത് ഇതു വഴി പോയപ്പോൾ വെറുതെ നോക്കി എന്നെ ഉള്ളൂ.”
“ഓഹ്! അങ്ങനെ ആണോ.. ഞാൻ കരുതി. സോറി. കേട്ടോ ”
“ഓഹ്!!! അത് സാരമില്ല. ഇത് എങ്ങനെയാ പറ്റിയത് ? ”
“അതോ!! അത് ഒരു വട്ട് പെണ്ണ് വണ്ടിയുടെ കുറുകെ ചാടിയതാ . അവളെ രക്ഷിക്കാൻ വണ്ടി വെട്ടിച്ചപ്പോൾ ഇങ്ങനെ സംഭവിച്ചു. ”
“അപകടം നടക്കുമ്പോൾ ആ പെണ്ണിനെ ശരിക്കും കണ്ടിരുന്നോ?”
” ഏയ് ഇല്ല.. ഞാൻ ശരിക്കും കണ്ടിട്ടില്ല. അത് ഞാൻ കണ്ടു പിടിച്ചോളാം. ഈ ആക്സിഡന്റെ കാരണം എനിക്ക് ഉണ്ടായ നഷ്ട്ടം വളരെ വലുതാണ്. അത് ഞാൻ അവളെക്കൊണ്ട് വീട്ടിക്കും. പക്ഷെ ഇനി ഇവിടുന്ന് എങ്ങനെ ഇറങ്ങും എന്നാ ഞാൻ ചിന്തിക്കുന്നത്?”
“അതെന്താ.. ഇവിടുന്ന് ഇറങ്ങാൻ പ്രശ്നം ?
“അത് പിന്നെ ഇവിടുന്ന് ഇറങ്ങാൻ ഇവിടെ കൊടുക്കാൻ ഉള്ള പൈസ ഇപ്പോൾ എന്റെ കൈയിൽ ഇല്ല. സഹായിക്കാനും ആരും ഇല്ല പിന്നെ എങ്ങനെ ഇറങ്ങും”
” എല്ലാം ശരിയാകും. എന്തെങ്കിലും വഴിയുണ്ടാകും. പേടിക്കാതെ ഇരിക്ക് ”
“ഏയ്! എനിക്ക് പേടി ഒന്നും ഇല്ല. കാരണം എനിക്ക് ഇവിടെ ഇപ്പോൾ ഒരു ഭാര്യ ഉണ്ട്. അവൾ ആണ് എനിക്ക് വേണ്ടി ഓപ്പറേഷൻ ചെയ്യാൻ ഇവിടെ ഒപ്പ് ഇട്ട് കൊടുത്തത്. അപ്പോൾ അവൾ തന്നെ ഇവിടുത്തെ പണവും അടക്കും .. ഇല്ലേ അടക്കില്ലേ?” അയാൾ ശ്യാമയോട് ചോദിച്ചു.