കടലിന്റെ നീല. തിളങ്ങുന്ന നീല. പെട്ടെന്ന് രാജി റൂമിലേക്ക് കടന്ന് വന്നു. നിമിഷങ്ങൾക്ക് എന്തോ സംഭവിക്കുന്നത് പോലെ തോന്നി ജ്യോതിക്ക്. ഒരു പ്രിയദര്ശന് സിനിമയില് നിന്നും ഇറങ്ങി വന്നതു പോലെയുണ്ടായിരുന്നു രാജി. ചോരയോളം ചുവന്ന സാരിയും ബ്ലൗസും. അഴിച്ചിട്ട മുടി ഇപ്പോഴും ഈറനാണ്. അവളുടെ ഇടം കയ്യിലേക്ക് സാരിത്തലപ്പ് അലസമായ് ഊർന്നുകിടന്നിരുന്നു.
“ആ… എറങ്ങ്യാ… വേഗം വാ…” രാജി ധൃതിയില് ജ്യോതിയുടെ കൈ പിടിച്ച് തന്റെ നേരെ നിർത്തി. പെട്ടെന്ന് തന്നെ അടിപ്പാവാടയുടെ വള്ളി അഴിച്ച് പൊക്കിളിന് താഴേക്ക് ഇറക്കിക്കെട്ടി. ജ്യോതിയുടെ കൈകൾ അറിയാതെ തന്റെ വയറിനെ പൊത്തിപ്പിടിച്ചു. രാജി തന്നെ ആ കൈകള് പിടിച്ചുമാറ്റി. സാരി എടുത്ത് അവളുടെ അരയില് ചുറ്റി. അവൾ സാരി ഞൊറിഞ്ഞെടുക്കുന്നത് കാണാന് ഒരു ചന്തമുണ്ടായിരുന്നു.
ജ്യോതി അത് സാകൂതം നോക്കിനിന്നു. ഞൊറിതീർത്തതും അവൾ ഇടം കൈ കൊണ്ട് അരയിലെ സാരിച്ചുറ്റിൽ പിടിച്ചു. ജ്യോതിയില് ഇതുവരെ അറിഞ്ഞിട്ടില്ലാത്ത ഒരു ഇക്കിളി ഉണർന്നു. വലം കൈ കൊണ്ട് ഞൊറി ഒടിച്ച് പൊക്കിളിന് കീഴേക്ക് കയറ്റി. രാജിയുടെ വിരലുകൾ അടിവയറ്റിൽ സ്പർശിച്ചപ്പോൾ തന്റെ ഉള്ളൊന്ന് വിറച്ചത് ജ്യോതിയറിഞ്ഞു. രാജിയുടെ വിരലുകൾ ആ അരച്ചുറ്റിനിടയിലുടെ കുറച്ചു നേരം കൂടി ഓടിനടന്നു.
“വയറ് ചാടീട്ട്ണ്ടല്ലോ” രാജി ഇടക്ക് പറഞ്ഞു. അതിന് ജ്യോതി ഒന്നു മൂളുക മാത്രമാണ് ചെയ്തത്.
“തലയെന്താ ചെയ്യുന്നേ? ഞൊറിഞ്ഞ് കുത്തുന്നോ? അതോ ഇങ്ങനെ ഫ്രീയായിട്ടിടണോ?” തന്റെ സാരിത്തലപ്പ് കാണിച്ച് രാജി ചോദിച്ചു.
“ഞൊറിഞ്ഞ് കുത്താം”
“ഓക്കേ.”
എവിടെയൊക്കെയോ സൂചികൾ കയറി. എവിടെയൊക്കെയോ ഇടക്കിടക്ക് രാജിയുടെ വിരലുകൾ സ്പർശിക്കുകയും ചെയ്തു. രാജിയുടെ ബ്ലൗസിനേക്കാൾ അല്പം കൂടി കഴുത്ത് ഇറക്കി വെട്ടിയതാണ് ജ്യോതിയുടേത്. അവളുടെ മുലച്ചാലിലേക്ക് സ്വർണ്ണത്തിന്റെ നൂലുമാലയിലെ ലോക്കറ്റ് ഇറങ്ങി പോകുന്നത് രാജി കണ്ടു.
“നിനക്ക് കുറച്ച് വണ്ണമുള്ളോണ്ട് സാരി നന്നായി ചേരും” സാരിത്തലപ്പ് തോളത്തേക്ക് ഒതുക്കിവയ്ക്കുമ്പോൾ രാജി പറഞ്ഞു.
“നിനക്കും സാരി നല്ല ചേർച്ചയുണ്ട്.” പൊതിച്ച നാളികേരം ചെമ്പട്ടിൽ കിഴികെട്ടിയ പോലെയുള്ള രാജിയുടെ കുഞ്ഞുമുലകളിൽ നോക്കിയാണ് ജ്യോതി അത് പറഞ്ഞത്. രാജി അത് കണ്ടുവോ ആവോ…
സാരിയുടുപ്പിച്ച് കഴിഞ്ഞ് രാജി മാറി നിന്ന് ജ്യോതിയെ കണ്ണാടിക്കു മുന്നിലേക്ക് നിർത്തി. ‘കൊള്ളാം… നല്ല രസമുണ്ട്’ ജ്യോതി മനസ്സിലോർത്തു.
അവരവർ സ്വന്തം മുഖത്തെ മിനുക്കുപണികളിലേക്ക് കടന്നു. എല്ലാം കഴിഞ്ഞപ്പോള് രാജി ഇത്തിരി കളഭം ചാലിച്ച് കൊണ്ടുവന്ന് കുറി വരച്ചു. വലത്തെ മോതിരവിരൽ കൊണ്ട് നടുനെറ്റിയിൽ ഒരു കുഞ്ഞു കുറി. ആ കുറിയിൽ ജ്യോതി നോക്കി നിൽക്കുന്നത് കണ്ടപ്പോള് രാജി ചോദിച്ചു,
“നിനക്ക് വേണോ?”
ജ്യോതി ഒന്നും പറഞ്ഞില്ല. രാജി പക്ഷെ ഒരല്പം കളഭം തൊട്ടെടുത്ത് ജ്യോതിയുടെ നെറ്റിയിലും തൊട്ടു കൊടുത്തു. കരിമഷിയിട്ട കണ്ണുകൾ ഒരു നിമിഷം ഉടക്കി. പിന്നെ ഇടറിമാറി.
ഒരുങ്ങിക്കെട്ടി ബസ്സില് പോയാല് മുഷിയുമെന്നതിനാൽ കോളേജിലേക്ക് പോകുവാൻ അടുത്തൊരു വീട്ടിലുള്ള രാജിയുടെ കൂട്ടുകാരിയുടെ സ്കൂട്ടർ തരപ്പെടുത്തി വച്ചിരുന്നു. രാജിയാണ് സ്കൂട്ടർ ഓടിച്ചത്. ജ്യോതി പുറകിൽ ഒരു വശത്തേക്ക് കാലുകളിട്ടിരുന്നു. കാറ്റിൽ പറക്കുന്ന രാജിയുടെ അഴിച്ചിട്ട മുടിയിഴകൾ ജ്യോതിയുടെ വലതുകവിളിൽ തഴുകിക്കൊണ്ടിരുന്നു.
തന്റെ വലതു കൈ എവിടെ വെക്കണമെന്ന സംശയത്തിലായിരുന്നു ജ്യോതി അന്നേരം. രാജിയുടെ തോളത്ത് വെക്കണോ? അതോ തുടയിലോ? അതുമല്ലെങ്കിൽ വയറ്റിൽ ചുറ്റിപ്പിടിക്കണോ? ഒരു പിടിത്തവുമില്ല. പെട്ടെന്ന് ഒരു ഗട്ടറിൽ ചാടിയതും ജ്യോതി സീറ്റിലൊന്ന് തെന്നി.
“പിടിച്ചിരിക്കെടീ…” രാജി ശകാരിച്ചു.
ജ്യോതി പെട്ടെന്ന് കയ്യെടുത്ത് തോളിൽ പിടിച്ചു. രാജിയുടെ വലുതുതോളിൽ ബ്രാ സ്ട്രാപ്പിന്റെ കനപ്പ് അവൾക്ക് അനുഭവപ്പെട്ടു. തള്ളവിരലുകൊണ്ട് അതില് ഒന്ന് തഴുകി നോക്കുകയും ചെയ്തു. അങ്ങനെയിരിക്കെ കോളേജിലെത്തി. എന്നത്തെയും പോലെ അവർ രണ്ടും രണ്ട് വഴിക്ക് നീങ്ങി.