“അത്രേ ഉള്ളമ്മേ..” റോയ് പറഞ്ഞു.
ഊണ് കഴിഞ്ഞു റോയിയും ശിവനും സൈക്കിളില് പുറപ്പെട്ടു. ടൌണിലൂടെ അവരുടെ സൈക്കിള് നീങ്ങി. റീന പഠിക്കുന്ന കോളജിന്റെ ഗേറ്റില് നിന്നും മാറി ഒരു കടയുടെ അരികില് അവര് നിന്നു. കുട്ടികള് കോളജ് വിട്ട് വരാന് തുടങ്ങിയിരുന്നു. ശിവന്റെ കണ്ണുകള് പെണ്കുട്ടികളെ വിശ്രമമില്ലാതെ നോക്കുന്നത് കണ്ടു റോയ് അവനെ തോണ്ടി.
“അതേയ്..ഇവിടെ വായീ നോക്കാന് വന്നതല്ല..അവസാനം നീ വന്ന കാര്യം മറക്കല്ലേ..”
“ഹ..ഒന്ന് പോടാ..ഏതായാലും ഇവളുമാര് വെറുതെ പോവല്ലേ..ഒന്ന് നോക്കി വിട്ടുകളയാം..കണ്ണിന് അത്രയുമെങ്കിലും ആശ്വാസം കിട്ടുമല്ലോ….”
“ഉവ്വുവ്വ്…”
“എടാ പുല്ലേ നിനക്കൊരു ലൈന് ഉണ്ട്..അതുകൊണ്ടല്ലേ നീ ഇത്ര ഹരിശ്ചന്ദ്രന് കളിക്കുന്നത്…ഇല്ലാത്തവനെ അതിന്റെ വിഷമം അറിയൂ…” ശിവന് ദുഖത്തോടെ പറഞ്ഞു.
“എടാ ലൈന് ഉണ്ടെങ്കിലും ഇല്ലെങ്കിലും, അലവലാതി എന്നും അലവലാതി തന്നെ…വായീ നോക്കി..കൂട്ടുകാരന് ആയിപ്പോയി..അതല്ലെങ്കില്…”
“ടാ ദാ റീന വരുന്നുണ്ട്..അവള് നമ്മളെ കാണണ്ട…മാറി നില്ക്കാം”
ശിവന് പറഞ്ഞത് കേട്ടു റോയ് നോക്കി. റീന രണ്ടു കൂട്ടുകാരികള്ക്കൊപ്പം വരുന്നത് അവന് കണ്ടു.
“എടാ അവള്ടെ ഇടതുവശത്തുള്ള ആ പെണ്ണിനെ കണ്ടോ..നല്ല സൂപ്പര് പീസ് അല്ലേടാ..” ശിവന് റോയിയുടെ ചെവിയില് പറഞ്ഞു.
“പോടാ പുല്ലേ” റോയ് അവന്റെ ചെവിക്ക് പിടിച്ചു തിരുമ്മി.
ബസു കയറാനുള്ള വഴിയെ റീനയും കൂട്ടുകാരികളും പോകുന്നത് അവര് കണ്ടു മെല്ലെ പിന്നാലെ നീങ്ങി. സൈക്കിള് ഉരുട്ടിക്കൊണ്ടാണ് അവര് അവരെ പിന്തുടര്ന്നത്. ബസ് സ്റ്റോപ്പില് എത്തി അവര് നിന്നപ്പോള് റോയിയും ശിവനും മറഞ്ഞു നിന്നു.
ഒരു കറുത്ത എന്ഡവര് ബ്രേക്കിടുന്ന ശബ്ദം കേട്ടു റോയ് നോക്കി. റീന നിന്ന സ്റ്റോപ്പില് ആണ് വണ്ടി നിന്നിരിക്കുന്നതെന്ന് ശിവനും റോയിയും കണ്ടു. റീന അറപ്പോടെയും ഭയത്തോടെയും വണ്ടിയിലേക്ക് നോക്കിയിട്ട് മുഖം വെട്ടിച്ചു. അവളുടെ കൂട്ടുകാരികള് എന്തോ അടക്കം പറയുന്നത് റോയിയും ശിവനും കണ്ടു. ഡ്രൈവിംഗ് സീറ്റില് നിന്നും ഒരു യുവാവ് പുറത്തേക്ക് ഇറങ്ങി. നീല ജീന്സും കറുത്ത ടീ ഷര്ട്ടും ധരിച്ചിരുന്ന അവന് ആറടിയില് അധികം ഉയരമുണ്ടായിരുന്നു. നീണ്ട മുടിയും ഭംഗിയായി വെട്ടി നിര്ത്തിയ താടിയും അവന്റെ ആകര്ഷണീയത വര്ദ്ധിപ്പിച്ചു. ധരിച്ചിരുന്ന കറുത്ത കണ്ണട ഊരി ഒരു വഷളച്ചിരിയുമായി അവന് റീനയെ സമീപിച്ചു. ശിവനും റോയിയും അതുകണ്ടു. അവരുടെ നെറ്റിയില് ചുളിവുകള് വീണു.
“എടാ ഇത് രാജീവ് അല്ലെ…പരമേശ്വരന് മുതലാളിയുടെ മകന്?” റോയ് ചോദിച്ചു.
“അതെ..അവന് തന്നെ അളിയാ” ശിവന് പറഞ്ഞു.
“അപ്പോള് സംഗതി നമ്മള് കരുതിയത്ര നിസ്സാരമല്ല..ഇവന് ആള് മഹാ അപകടകാരിയാണ്….” റോയ് പറഞ്ഞു. അവന്റെ മുഖം വലിഞ്ഞു മുറുകിയിരുന്നു……തുടരും ….