വെളിച്ചം അടുത്തു വന്നു കൊണ്ടിരുന്നു …
കോടമഞ്ഞിൽ മുനിഞ്ഞു കത്തുന്ന പ്രകാശ വൃത്തത്തിലേക്ക് മിടിക്കുന്ന ഹൃദയവുമായി അവൾ നോക്കി നിന്നു …
അതെ …..!
ഇങ്ങോട്ടാണ് വരുന്നത് ….!
പുതുമഴ കൊണ്ട ബാല്യം പോലെ അവളുടെ മനസ്സൊന്നു തുള്ളിയുലഞ്ഞു …
വരുന്നുണ്ടവൻ…..
ന്റെ ഷാനു …..!
കണ്ണീരിൽ പ്രകാശമൊന്നണഞ്ഞു..
സ്കൂട്ടി പോർച്ചിലേക്ക് എത്തിയിരുന്നു …
വണ്ടി സ്റ്റാൻഡിലിട്ട് ഷാനു സീറ്റ് ബോക്സ് തുറക്കുന്നതും ഒരു കവറെടുക്കുന്നതും അവൾ കണ്ടു …
കോട്ടൂരി വണ്ടിയിലേക്കിട്ടിട്ട് ചുവരിന്റെ ഓരം ചേർന്ന് അവൻ സിറ്റൗട്ടിലേക്ക് കയറി …
ചലിക്കാനാവാതെ ജാസ്മിൻ നിന്നു …
ഒരു കാറ്റുകൂടി വീശി …
അവനിൽ നിന്ന് അടയ്ക്കാമരത്തിന്റെ ഗന്ധം അവൾക്ക് അനുഭവേദ്യമായി …
” ഇ… യ്യ് ഏടാരുന്നു ….?”
“പറയാം മ്മാ …” അവൻ അകത്തേക്ക് കയറി .. പിന്നാലെ കയറിയ ജാസ്മിൻ വാതിലടച്ചു.
അവന്റെ ശരീരത്തും വസ്ത്രങ്ങളിലും മണ്ണും ചെളിയും പുരണ്ടിരിക്കുന്നത് കണ്ടവൾ നിയന്ത്രണം വിട്ടലറി…
” അനക്കെന്താടാ പറ്റ്യേ ….?”
മോളി ഒന്ന് വട്ടം തിരിഞ്ഞു നോക്കി , പലഹാരത്തിലേക്ക് വീണു …
” ഒന്നൂല്ലാന്ന് … ”
” അത് പറയാതെ ഇയ്യിവിടുന്ന് പോകൂലാ …”
ജാസ്മിൻ അവന്റെ മുൻപിൽ വഴി തടഞ്ഞു …
ഷാനു കയ്യിലിരുന്ന കവർ മേശപ്പുറത്ത് വെച്ചു. അതിൽ നിന്ന് ഫോണെടുത്ത് റൂമിലേക്ക് കയറാനൊരുങ്ങി …
അവൾ വീണ്ടും മുൻപിലേക്ക് കയറി …
ഷാനു അവളെ അവഗണിച്ചു കൊണ്ട് മൊബൈൽ ചാർജ്ജിലിട്ടു..
” ഇജ്ജെന്നോടു പറയൂലാലേ….”
വിങ്ങലോടെ അവൾ അവന്റെ ടീ ഷർട്ടിന്റെ കോളറിൽ കുത്തിപ്പിടിച്ചു..
“ങ്ങളിങ്ങനെ തുടങ്ങല്ലുമ്മാ ….”
” പിന്നെ …?”
” ഞാനൊന്ന് ശ്വാസമെടുത്തോട്ടെ… ?”
അവൾ കൈ വിട്ട് അവനെ തന്നെ നോക്കി നിന്നു …
ഷാനു ടീ ഷർട്ട് ഊരി മാറ്റി …
ഹാംഗറിൽ കിടന്ന ടർക്കി എടുത്ത് അരയിൽ ചുറ്റിയ ശേഷം അവൾക്കു പിന്തിരിഞ്ഞു നിന്ന് പാന്റ്സും ഊരി മാറ്റി.
പ്രത്യക്ഷത്തിൽ അവന്റെ ശരീരത്ത് മുറിപ്പാടുകളൊന്നും കാണാത്തത് അവൾക്ക് ആശ്വാസമായി …
“ഇനി പറ ..”
ഷാനു ഒരു നിമിഷം അവളുടെ മുഖത്തേക്ക് നോക്കി …
” ങ്ങക്ക് ഓർമ്മയുണ്ടോ ന്റെ കൂടെ പ്ലസ് വണ്ണിൽ പഠിച്ച രാജു ….?”
ഓർമ്മ ഉണ്ടെന്നോ ഇല്ലെന്നോ അവൾ പറഞ്ഞില്ല ….
“ഓന്റെ പുരയിവിടെ വൈശാലി കോളനീലാ…”
അതിന് എന്നൊരു ചോദ്യം അവളുടെ മുഖത്തുണ്ടായി …
“ഓന്റെ പൊര പോയുമ്മാ ….”
ചെറിയൊരു നടുക്കം അവളിലുണ്ടായി …
” ന്നിട്ട് …..?”
” എന്തോ അപകടം പറ്റീന്ന് പറഞ്ഞു മിഥുനാ രാവിലെ വിളിച്ചേ… ”
“ന്താ പറ്റിയേ ….?”
“അതൊരു കൂരയാമ്മാ …, പൊര എന്നൊന്നും പറയാനില്ല … ”
” വല്ലതും പറ്റിയോ …?” അവളും തണുത്തു തുടങ്ങിയിരുന്നു ….
“പെരുമഴ കണ്ട് ഓല് മാറിയതു കൊണ്ട് ആർക്കും ഒന്നും പറ്റീല്ല … ”
” അവിടെ ചെന്നപ്പോൾ അതൊക്കെ കണ്ടിട്ട് പോരാനും തോന്നീല്ലാ…”
” ഒടുവിൽ കൂടെ പഠിച്ച, ഇവിടുള്ള കുറച്ചു പിള്ളേരെ കൂട്ടി ഒരു ചെറിയ ഷെഡ്ഡ് ഉണ്ടാക്കി, അവരുടെ തുണികളും പാത്രങ്ങളും എടുത്തു വെച്ചിട്ടാ വരുന്നേ …”
“ഉം ..”
“പാവങ്ങളാമ്മാ ….”
ഷാനു തിരിഞ്ഞ് ഊരിയിട്ട വസ്ത്രങ്ങളുമായി ബാത്റൂമിലേക്ക് പോയി …
8: 10 PM
മസാലദോശയായിരുന്നു ഷാനു കൊണ്ടു വന്നത്..
ഷാനു കുളിക്കാൻ പോയപ്പോൾ തന്നെ ജാസ്മിനും കുളിച്ചിരുന്നു ..
കട്ടൻ ചായയും മസാലദോശയുമായിരുന്നു അന്നത്തെ അത്താഴം .
മസാലദോശയുടെ മൊരിഞ്ഞ ഭാഗവും കുറച്ച് മസാലയും വാരിത്തിന്ന് എരിവു വലിച്ച് മോളി പ്ലേറ്റ് ഷാനുവിന് നേരെ നിരക്കി ..
“ശ് … ക്കാക്ക കയിച്ചോ…”
ഷാനു അതും കൂടി കഴിക്കുന്നത് ജാസ്മിൻ നോക്കിയിരുന്നു …
അവൻ വന്നപ്പോൾ തന്നെ അവൾക്കു വിശപ്പു തുടങ്ങിയിരുന്നു ..
മഴയ്ക്ക് ഒരു ശമനവും ഉണ്ടായിരുന്നില്ല ..
9: 00 PM
ഷാനു റൂമിൽക്കയറി വാതിലടയ്ക്കുന്നത് കൊണ്ട് ജാസ്മിൻ അടുക്കളയിൽ നിന്ന് ഹാളിൽ വന്നു..
ലൈറ്റുകൾ ഓഫാക്കി അവളും റൂമിലേക്ക് കയറി .. വാതിൽ ചാരിയതല്ലാതെ അവൾ അടച്ചില്ല ..
ബെഡ്ലാംപ് ഓണാക്കി അവൾ കിടക്കയിലേക്ക് ഫോണുമായി ചാഞ്ഞു ..
താൻ വിട്ട മെസ്സേജൊക്കെ അവൻ വായിച്ചതായി അവൾ കണ്ടു …