ഇതൊന്നും വകവെക്കാതെ കേസിന് പോയ ആൾക്ക് പൈസ പോയി എന്നല്ലാതെ ഒരു നടപടിയും അമ്മക്കെതിരെ വന്നില്ല.നാട്ടുകാർ രഹസ്യമായി പോലും ഈ വിഷയം പറയാൻ പിന്നെ മുതിർന്നില്ല. ഇതാണ് ചന്ദ്രന്റെ പൊതു സ്വഭാവം .നീണ്ടു,മെലിഞ്ഞ ചതുരകണ്ണട വെച്ച എന്റെ കാലന്റെ കളി. ഇതൊക്കെയാണേലും എന്റെ വീട്ടിൽ അയാൾക്ക് യാതൊരു സ്ഥാനവുവും അമ്മ കൊടുത്തിട്ടില്ല.വീടിന്റെ തിണ്ണയിൽ വന്നിരിക്കും എന്നല്ലാതെ വീടിനകത്തേക്ക് അയാൾ കേറുന്നത് പോലും ഞാൻ ഇതുവരെ കണ്ടിട്ടില്ല. അമ്മയതിന് സമ്മതിക്കേം ചെയ്യില്ല. അമ്മയെ അയാൾക്കും പേടിയാണ്.
ബാക്കിലുള്ള ബസ് എന്നെ ഇറക്കി പോയത് പോലും ഞാൻ അറിഞ്ഞില്ല.ചന്ദ്രനെ നോക്കി അയാളുടെ കൂസലില്ലാത്ത ഇരുത്തം കണ്ട്,നിന്നകാലിൽ നിന്ന് പോയി. കാലിൽ കാൽ കേറ്റി ബെഞ്ചിൽ ഇരിക്കുന്ന അയാൾ, മുറുക്കാൻ വായിലേക്ക് തിരുകി,രണ്ടു ചവക്കൽ സാവധാനം ചവച്ച്,ആ ചതുരം കണ്ണടക്കുള്ളിലൂടെ എന്നെ നോക്കി. ചിരിയും, സംസാരവും ഞങ്ങൾ തമ്മിൽ ഇല്ലാത്തത് കൊണ്ട് അയാളെ പാടെ അവഗണിച്ചു,കനമുള്ള ബാഗും തൂക്കി ഞാന്‍ വീട്ടിലേക്ക് നടക്കാൻ തിരിഞ്ഞു .
“ഡാ…ആടെ നില്ലടാ …” മുറുക്കാൻ വായിലിട്ട ശബ്‌ദം വ്യത്യാസത്തോടെ അയാളെന്നെ പുറകിൽ നിന്ന് വിളിച്ചു.നാശം!!എനിക്കങ്ങു കലി കേറി. അമ്മയോടുള്ള ഭയവും ഭക്തിയുമൊന്നും അയാളെന്നോട് കാണിക്കലില്ല.വേണമെന്നില്ല!! എന്നാലെന്നെ ചെറിയ കുട്ടിയെപ്പോലെ ഡാ. ….നിക്കെടാ…..എന്നൊക്കെ അയാള് പറയുമ്പോ ആ ചെപ്പക്കുറ്റിക്ക് ഒന്ന് കൊടുക്കാൻ തോന്നും. ഞാൻ അയാളെ അടിമ ഒന്നുമല്ലല്ലോ! എന്നാലും ഞാൻ നിന്നു. ചന്ദ്രൻ കടയിൽ നിന്ന് ഇറങ്ങി.വായിൽ കവിഞ്ഞ വെറ്റിലയുടെ ചുവന്ന ദ്രാവാകം സൈഡിലേക്ക് തുപ്പി,എന്നെയൊന്നു ആകെ നോക്കി.
“ക്ലാസ്സ്‌ കഴിഞ്ഞല്ല്യോ…മഴയായോണ്ട് വൈകി വൈകി ക്കാണും….” ചുറ്റിനുമുള്ള ആളുകളെ കാണിക്കാൻ പുള്ളി കൃത്രിമമായി ഉണ്ടാക്കിയ വളിഞ്ഞ ചിരിയോടെ എന്നോട് ചോദിച്ചു. ഞാൻ അയാളെ കക്ഷത്താണ് ന്ന് നാട്ടുകാരെ കാണിക്കാനുള്ള ആയാളുടെ വ്യഗ്രത. എനിക്കാ ചോദ്യങ്ങൾ തീരെ പിടിക്കുന്നില്ലന്ന് പുള്ളി എന്റെ മുഖത്തു നോക്കി കണ്ടെത്തിക്കാണും. ഞാനതിന് പട്ടിയുടെ വില കൊടുത്തില്ല!!
“നിനക്ക് മുട്ടായിയോ,ചായയോ വല്ലതും വാങ്ങി തരണോടാ ..?”ചന്ദ്രന്റെ ശബ്‌ദം പൊന്തി.ഞാൻ വില കൊടുക്കാത്തത് അയാളെ ചൊടിപ്പിച്ചെന്ന് ആ ചോദ്യം കേട്ടാലറിയാം.നാലാളു കേൾക്കാൻ പാകത്തിന് അയാളെന്നെ കൊച്ചു കുട്ടിയെ പോലെയാക്കി.അച്ഛനും,ചേട്ടനും നാട്ടുകാരുടെ മുന്നിൽ പരിഹാസ്യരാവുന്ന പോലെ എന്നെയും കൊച്ചക്കാനുള്ള ആയാളുടെ ശ്രമം. ചന്ദ്രന്റെ ചോദ്യം കേട്ടവർ ചെറിയ പുച്ഛത്തോടെ എന്നെ നോക്കി. എനിക്ക് കൈപ്പത്തിയിലൂടെ ഒരു തരിപ്പങ്ങു കേറി.
“ഡാ ചന്ദ്രാ…” ഞാൻ പല്ല് കടിച്ചു മെല്ലെ മുരണ്ടു. അണ്ടിക്ക് അടി കിട്ടിയപോലെ ചന്ദ്രൻ ആ വിളി കേട്ട് ഞെട്ടി.
“അച്ഛനും,എന്റെ ഏട്ടനും നാട്ടുകാർക്കും,നിനക്കും വാലാട്ടിന്ന് കരുതി എന്റെ മുന്നിൽ വെന്ന് ഇമ്മാതിരി ചോദ്യം ചോദിച്ചാലുണ്ടല്ലോ….” അയാളുടെ നേർക്ക് ഇത്തിരികൂടെ അടുത്തുകൊണ്ട് വേറെ ആർക്കും സംശയം വരാതെ ഞാൻ വീണ്ടും മുരണ്ടു. പാവമാണെന്ന് ഇത്രേം കാലം വിചാരിച്ച എന്റെ അടുത്ത് നിന്ന് അയാളിത് പ്രതീക്ഷിച്ചു കാണില്ല.
“പള്ളയിൽ കത്തി കേറ്റും ഞാൻ..പറഞ്ഞില്ലാന്നു വേണ്ട….!!” ഞാനതും കൂടെ പറഞ്ഞു.നാട്ടുകാരെ സംശയിപ്പിക്കാതെ ചിരിച്ചു കൊണ്ട് മാറി. ചന്ദ്രൻന്റെ മുഖത്തു നീര് വെച്ചു. എന്നെ നോക്കാൻ കഴിയാതെ കണ്ണട കയറ്റി വെച്ചയാൾ ചുറ്റിനും നോക്കി.
“മുട്ടായിയും ചായയും പൊതിഞ്ഞു വീട്ടിലേക്ക്, കൊണ്ടുവന്നാ മതി ചന്ദ്രേട്ടാ,ഞാനാടെയിരിക്കാം ഇപ്പൊ സമയം തീരെയില്ല!!….” ഞങ്ങളുടെ സംസാരം പരുങ്ങിയെങ്കിലും നോക്കി നിന്ന,ആളുകൾ കേൾക്കട്ടേന്ന് കരുതിത്തന്നെ ഞാന്‍ വിളംബി.മനസ്സിന് പിടിച്ചു വെച്ച വളി വിട്ട സുഖം.പറയാൻ എനിക്കെവിടുന്ന് ധൈര്യം കിട്ടി? .ചന്ദ്രൻ ചമ്മി നാറിയോന്ന് അറിയില്ല.അയാൾക്ക് നല്ല തൊലിക്കട്ടിയാണ്.എന്നെ നോക്കതെ മുഖത്തു വരുന്ന ഭാവമാറ്റം നാട്ടുകാരെ കാണിക്കാതെ കിട്ടിയതും വാങ്ങി ചന്ദ്രൻ മെല്ലെ എന്റെ അടുത്ത് നിന്ന് മാറി.സന്തോഷം!!അയാൾക്കിട്ട് ഇനിയും കൊട്ടണം.വീട്ടുകാര്യവും,കാര്യങ്ങളും നോക്കുന്നതിന് പകരമായി വടക്കേ പറമ്പിലെ രണ്ടേക്കർ അമ്മ അയാൾക്ക് വർഷങ്ങളായി വിട്ട് കൊടുത്തതാണ്.അതിലെ ആദായം തന്നെ ലക്ഷങ്ങൾ വരും.ഇപ്രാവശ്യം അയാൾ അതിൽ നിന്ന് ഒരു ഇല പറിക്കുന്നത് എനിക്ക് കാണണം. സമ്മതിക്കരുത്!!
ചന്ദ്രൻ കണ്ണിൽ നിന്ന് മാഞ്ഞുന്ന് തോന്നിയപ്പോ,നാട്ടുകാരുടെ ചെറിയ ചിരിയും വാങ്ങി ഞാൻ മെല്ലെ നടന്നു.
ഇപ്പൊ ചന്ദ്രനോട് പെരുമാറിയത് പോലെ,ആരോടും ഞാനിങ്ങനെ പെരുമാറലില്ല.എനിക്കീ അമ്മയുടെ പദവിയും,വലുപ്പമൊന്നും വേണമെന്നുമില്ല. എന്നാലും ചന്ദ്രൻ ഇപ്പൊ വന്നു വാങ്ങിക്കൂട്ടിയതല്ലേ.
സൈഡിൽ നിന്നും നീട്ടിയ ഒരു വിസിൽ. ഇടത്തെ കടയിൽ നിന്ന് എന്റെ കൂട്ടുകാരൻ സെന്തിൽ കൈ പൊക്കി കാട്ടി. അവന്റെ കൂടെ കളിക്കൂട്ടുകാരിയും,കാമുകിയും എല്ലാമായ വൈഷ്ണവി എന്നെ കണ്ട് നല്ല ചിരി ചിരിച്ചു. ചെറുപ്പം മുതലേ ഞങ്ങൾ മൂന്നും തമ്മിൽ നല്ല അടുപ്പമാണ്. വൈഷ്ണവി അവന് പറ്റിയ കുട്ടിയാണ്, അവരുടെ പ്രേമം എനിക്കൊക്കെ അസൂയ തോന്നിക്കുന്ന തരത്തിലുമാണ്. എന്ത് സ്നേഹമാണ് രണ്ടാൾക്കും. ഞാൻ ഊരയിലും താടിയിലും കൈ കൊടുത്തു അവരെ നോക്കി നിന്നു ചിരിച്ചു.
ഇങ്ങനെ പരസ്യമായി,അവർ ഒന്നിച്ചു വരാൻ തുടങ്ങിയത് എപ്പോ മുതലാണെന്നുള്ള ചോദ്യം അതിലുണ്ടായിരുന്നു. എന്റെ മുന്നിൽ നിന്ന് ഇത്തിരി ദൂരെ നിൽക്കുന്ന അവരോട് സംസാരിക്കാൻ ബുദ്ധിമുട്ടുണ്ട്. പിന്നെ വരാമെന്ന് കൈ കാട്ടി ചിരിച്ച സെന്തിലിനും, വൈഷ്ണവിക്കും ഞാൻ ഒരു ഫ്ലയിങ് കിസ്സ് കൊടുത്ത് തിരിഞ്ഞപ്പോ ചന്ദ്രന്റെ ഒച്ച പതിഞ്ഞെവിടുന്നോ വീണ്ടും കേട്ടു .
“അങ്ങനെയൊക്കെ പറഞ്ഞാ. ..എങ്ങനെയാ മോളെ? .. നാലഞ്ചു മസായില്ലേ..ഇറക്കി പുറത്തു വിടാൻ എനിക്കറിയാഞ്ഞിട്ടല്ലന്ന് അറിയാലോ…” ആ പ്രശ്നം കേൾക്കാൻ നിക്കണ്ടാന്നായിരുന്നു മനസ്സിൽ. എന്നാ ആ പരട്ട ശബ്‌ദം ഏതോ പാവത്തിനെ തിന്നാണല്ലോന്ന് ഓർത്തപ്പോ ഞാൻ തിരിഞ്ഞു നോക്കി.
ആദ്യമായി ഷോക്ക് എന്താണെന്ന് അറിഞ്ഞ സമയത്തെ പോലെ,ഒരു തരം തരിപ്പ് എന്റെ തലയിൽ കേറി.ചന്ദ്രന്റെ വൃത്തികെട്ട കണ്ണിന്റെ മുന്നിൽ നിൽക്കുന്ന പെണ്ണിന്റെ മുഖം നാട്ടുകാരുടെ നടുവിൽ ആയതുകൊണ്ട് കൂടി വിളറി വെളുത്തു നിൽക്കുന്നത് കണ്ട് എന്റെ നെഞ്ച് വിങ്ങിപ്പോയി.വേറാരുമല്ല എന്റെ ഏട്ടത്തിയമ്മ!!
അറിയാതെ എന്റെ നാക്കിൽ ആ പേര് വന്നു ‘ആനി’. കരച്ചിൽ എങ്ങനെയാണ് വന്നത്. അവസാനം ഞാൻ കണ്ട കോലമേയല്ല ഏട്ടത്തിയുടെ .ഒരുപാട് മെലിഞ്ഞു പോയി,ഇട്ട ചുരിതാറും ആ ശരീരവും തമ്മിൽ യാതൊരു ബന്ധവും ഇല്ലാത്ത പോലെ.നിറം മങ്ങി മുഖമെല്ലാം കരുവാളിച്ചു ,കീറിയ പിന്നി തുടങ്ങിയ ചുരിതാറും ഇട്ട്. പഴയ ചിരി പോലും ആ മുഖത്തു നിന്നായിരുന്നോ വന്നതെന്നു പോലും സംശയിപ്പിക്കുന്ന കോലം.
