നിനക്ക് അറിയാമോ ലോച്ചായന്റെ രണ്ടാമത്തെ ലൈനാ ഞാൻ. പക്ഷെ ഞാൻ എത്ര ലൈൻ അടിച്ചാ എന്ന് എനിക്ക് ഓർമ പോലും ഇല്ല. എന്നാലും എന്നോട് അതൊന്നും ഒരിക്കൽ പോലും പറഞ്ഞിട്ടില്ല.
തങ്കപ്പെട്ട മനുഷ്യനാ, വെള്ളമടി ഇല്ല, ചീത്ത വിളി ഇല്ല, ഒരു ദുശീലങ്ങളും ഇല്ല. എനിക്ക് ആകെ വെള്ളമടിക്കാനും രണ്ട് തെറി പറയാനും നീ മാത്രമേ ഉള്ളു കമ്പനി.
എനിക്കും ഇവിടെ വേറെ ആരും ഇല്ല നിമ്മി.
ഞങ്ങൾ അങ്ങനെ അന്യ രാജ്യത്ത് എത്തിയാണ് സുഹൃത്തുക്കൾ ആവുന്നത്. ഞാൻ അവൾക്ക് നാട്ടിൽവെച്ച് എന്റെ മനസ്സിൽ വല്യ വില കൊടുത്തിരുന്നില്ല എന്ന് ആലോചിക്കുമ്പോൾ വല്ലാത്ത ഒരു കുറ്റബോധം.
ഞാൻ അർഹിക്കുന്നതിലും കൂടുതൽ കേറിങ് എന്നോട് അവൾ കാണിക്കുമ്പോൾ എനിക്ക് എന്നോട് തന്നെ ഒരു വെറുപ്പ് തോന്നും. കുറേ പഴഞ്ചൻ ചിന്താഗതികൾ മനസ്സിൽ കൊണ്ട് നടന്നിട്ട് ഞാൻ എന്തോ വെല്യ സംഭവം ആണെന്ന തോന്നൽ ഏറെക്കുറെ മാറി കിട്ടി. പൊട്ടക്കുളത്തിലെ തവളക്ക് കുളം വിട്ടാൽ അല്ലെ ലോകം എത്ര വലുതാ എന്ന് മനസ്സിലാക്കൂ.
അങ്ങനെ പഠിച്ചും, പള്ളിയിൽ പോയും, കള്ള് കുടിച്ചും, സമയം പെട്ടെന്ന് കടന്ന് പോയി. ഞങ്ങൾ രണ്ടും കോഴ്സ് കംപ്ലീറ്റ് ചെയ്തു.
നിമ്മിയും ലോറെൻസും അപ്പോളും കറക്കം തന്നെ.
പക്ഷെ എനിക്ക് ഇനി ജോലി എന്തെങ്കിലും വേണമെന്നായി, എത്രനാളാ വീട്ടിൽ നിന്ന് കാശ് മേടിക്കുന്നെ, ഇവിടെ വന്നിട്ട് പാർടൈം ആയിട്ട് പോലും എങ്ങും ജോലിക്ക് കേറി കുറച്ച് കാശ് ഉണ്ടാക്കാൻ പറ്റിയില്ല.
പ്രായം കൂടി വരുവാ. നല്ല ജോലി ഇല്ലാതെ നാട്ടിൽ പോവാൻ പറ്റില്ല.
ഇവിടേം പരിചയക്കാർ കൂടി. പള്ളിലെ മലയാളികളും നാട്ടിലെ മലയാളികളും തമ്മിൽ വെല്യ വെത്യാസം ഒന്നും ഇല്ല, ആവശ്യം ഇല്ലാത്ത ഇഷ്ടം പോലെ ചോദ്യങ്ങളും ഉപദേശങ്ങളും ഇവിടേം കേട്ട് തുടങ്ങി.
റൂമിൽ ഒറ്റക്ക് ഇരുന്ന് മടുത്തു, ഇവിടെ ഉള്ള എല്ലാ പിള്ളാർക്കും പാർട്ണർസ് ഉണ്ട്, എനിക്കാണേൽ എല്ലാം കൊണ്ടും ഒരു ഒറ്റപ്പാട്, മൊത്തത്തിൽ മടുപ്പായി തുടങ്ങി.
ഇവിടുന്ന് മാറി താമസിച്ചിട്ട് ഒരു ജോലി നോക്കാൻ ഞാൻ തീരുമാനിച്ചു. ഈ കാര്യം ഞാൻ ആരോടും പറയാൻ നിന്നില്ല. ഒരു രണ്ട് മൂന്ന് മണിക്കൂർ അകലെ ഉള്ള ഒരു ടൗണിൽ ഒരു വീട് സങ്കടിപ്പിച്ചു, പള്ളിലും ആരോടും പറഞ്ഞില്ല. നിമ്മിയോടും ലോറെൻസിനോടും പോകുന്ന ഒരാഴ്ച മുമ്പേ പറയാം എന്ന് തീരുമാനിച്ചു.
അങ്ങനെ സ്ഥലം മാറാൻ ഉള്ള എല്ലാ തയാറെടുപ്പും കഴിഞ്ഞ്, ഞായറാഴ്ച പള്ളിലും പോയി.
പക്ഷെ അന്ന് നിമമീം ലോറിൻസും പള്ളിൽ വന്നില്ല, വിളിച്ചിട്ട് രണ്ട് പേരും ഫോണും എടുത്തില്ല.
ഞാൻ രണ്ട് പേർക്കും എന്റെ താമസം മാറാനുള്ള പ്ലാൻ മെസ്സേജ് ആയി അയച്ചു.
നിമ്മി ഉടൻ തന്നെ മറുപടി തന്നു. ഞാൻ പ്രതീക്ഷിച്ച പോലെ അവൾ കൂടുതൽ ഒന്നും തന്നെ ചോദിച്ചില്ല.
‘നല്ല കാര്യം, പോകുന്ന മുൻപേ കാണാൻ പറ്റുവാണേൽ കാണാം’ എന്ന് പറഞ്ഞ് മെസ്സേജ് ഇട്ടു.
എനിക്ക് എന്തോ ഒരു പന്തികേട് തോന്നി, പക്ഷെ ഞാൻ കൂടുതൽ ഒന്നും ചോദിക്കാൻ നിന്നില്ല.
ആ ആഴ്ച്ച മുഴുവൻ പുതിയ സ്ഥലത്തേക്ക് മാറുന്ന സന്തോഷവും തയാറെടുപ്പും ആയിരുന്നു.
പോകുന്ന തലേ ദിവസം വന്ന് കാണാം എന്ന് നിമ്മി മെസ്സേജ് അയച്ചിരുന്നു.
ഞാൻ പാക്കിങ് എല്ലാം കഴിഞ്ഞ് പുതിയ സ്ഥലത്തെ പറ്റി ഒക്കെ വായിച്ച് കൊണ്ട് ഇരുന്നപ്പോൾ ഡോർ ബെൽ കേട്ടു, നിമ്മിയാണ്.
പോകുന്ന മുൻപേ കാണാം എന്ന് പറഞ്ഞത് പോലെ തന്നെ കക്ഷി എത്തി. ഞാൻ വാതിൽ തുറന്നു. അവൾ എനിക്ക് ഒരു പേപ്പർ ബാഗ് നീട്ടി, ഞാൻ അത് വാങ്ങി തുറന്ന് നോക്കി. കുറച്ച് സ്നാക്സ്, പിന്നെ ഒറു ഫുൾ കുപ്പിയും.
ലോറെൻസ് വന്നില്ലേ? ഞാൻ ചോദിച്ചു.
ഇല്ല. അവൾ ഒറ്റ വാക്കിൽ മറുപടി പറഞ്ഞു.
അപ്പോളാണ് ഞാൻ അവളെ ശ്രദ്ധിക്കുന്നത് മുഖം എല്ലാം വീങ്ങി, കണ്ണ് ഒക്കെ കരഞ്ഞ് കലങ്ങിയത് പോലെ ഇരിക്കുന്നു.
എന്നാ പറ്റി നിമ്മി? നീ എന്നാ വല്ലാണ്ട് ഇരിക്കുന്നെ? അവൾ കുറച്ച് നേരം ഒന്നും മിണ്ടാതെ നിന്നു.