റോഷൻ : “ ഡാ.. വിമലേ.. എണീക്കെടാ..”
“മുഖ്യമന്ത്രി.. രാജി വക്കണം.”, അബോധവസ്ഥയിൽ വിമൽ എന്തോ വിളിച്ചു പറഞ്ഞു.
“അടിപൊളി..!”, വിമലിന്റെ മറുപടി കേട്ടതും പ്രമോദ് ഒരു കമന്റ് പാസ്സാക്കി.
ഇനി എന്തു ചെയ്യുമെന്ന ഭാവത്തിൽ റോഷൻ പ്രമോദിനെ നോക്കി. റോഷന്റെ നോട്ടം കണ്ട പ്രമോദ് വിമലിന് നേരെ ഒന്നൂടെ തിരിഞ്ഞു. ശേഷം അവന്റെ അവസ്ഥ നോക്കി ഒരു ദീർഘശ്വാസം എടുത്ത് വിട്ടു.
*** *** *** *** ***
വീട്ടിൽ, വിമലിന്റെ അമ്മ; ഭാർഗ്ഗവിക്ക് ചോറ് വിളമ്പിക്കൊടുത്ത ശേഷം അഞ്ജു വിമലിനെ ഒരിക്കൽ കൂടി ഡയൽ ചെയ്തു നോക്കി. റിംഗ് ചെയ്യുന്നുണ്ടെങ്കിലും ആരും ഫോൺ എടുക്കുന്നില്ല.
“അവൻ ഇതുവരെ എത്തിയില്ലേടി..?”, ചോറ് കഴിക്കുന്നതിനിടയിൽ ഭാർഗ്ഗവി ചോദിച്ചു. ഒപ്പം മറുപടി കേൾക്കാനായി തന്റെ പാതിമാത്രം കേൾവിയുള്ള ചെവി അവർ കൂർപ്പിച്ചുപിടിച്ചു.
“ഇപ്പോ വരും അമ്മേ”, ഭാർഗ്ഗവിക്ക് കേൾക്കാൻ വേണ്ടി അൽപം ഉച്ചത്തിൽ മറുപടി പറഞ്ഞുകൊണ്ട് അഞ്ജു വിമലിനെ ഒന്നൂടെ ഡയൽ ചെയ്തു. ഈ സമയം വിമലിന്റെ റിംഗ് ടോണും മീട്ടിക്കൊണ്ട്, ഒരു ഇന്നോവ അവരുടെ ഗേറ്റ് കടന്ന് വന്നെത്തി. അസമയത്ത് വരുന്ന പരിചയമില്ലാത്ത വണ്ടി നോക്കിയ അഞ്ജു, അതിനകത്ത് റോഷനാണെന്ന് കണ്ട് ഒന്നു പുഞ്ചിരിച്ചു. റോഷന് പിന്നാലെ പ്രമോദും ഇന്നോവയിൽ നിന്നും പുറത്തിറങ്ങി. റോഷൻ അഞ്ജുവിനെ നോക്കി ചിരിക്കണോ വേണ്ടയോ എന്ന ശങ്കയോടെ പുറകിലെ ഡോർ തുറന്നു. അതിനകത്ത് അടിച്ചു കിണ്ടിയായി കിടക്കുന്ന തന്റെ കണവനെ കണ്ടതും അഞ്ജു സ്ഥിരം കലാപരിപാടി എന്ന പുച്ഛഭാവത്തിൽ തന്റെ അരക്ക് കൈ കുത്തി നിന്നു.
“സോറി, ഇച്ചിരി ഓവറായിപ്പോയി”, വിമലിനെ താങ്ങിക്കൊണ്ട് റോഷൻ പറഞ്ഞു.
റോഷനും പ്രമോദും ചേർന്ന് വിമലിനെ വണ്ടിക്ക് വെളിയിലേക്കിറക്കിയതും, തന്റെ സാരിത്തുമ്പ് അരയിൽ കുത്തിക്കൊണ്ട് അഞ്ജു ഇറങ്ങിച്ചെന്ന് വിമലിന്റെ ഒരു തോളിൽ താങ്ങി.
വിമൽ : ” പ്രധാന മന്ത്രിയും.. രാജി വക്കണം” ബോധമില്ലാതെ വിമൽ വീണ്ടും വിളിച്ചു കൂവി. കേട്ട വഴിക്ക് അഞ്ജു കൈച്ചുരുട്ടി അവന്റെ തലക്ക് ഒരു കിഴുക്ക് കൊടുത്തു. ശേഷം, ഒച്ചയെടുക്കാൻ തുറന്ന അവന്റെ വായ ഉടനടി പൊത്തിപ്പിടിച്ചു.
“മിണ്ടാതെ പോയിക്കിടന്നോണം. അമ്മ ഉറങ്ങീട്ടില്ല.” അഞ്ജു കർക്കശസ്വരത്തിൽ പറഞ്ഞു. അവളുടെ പ്രയോഗം കണ്ട് പ്രമോദും റോഷനും ഒരു സെക്കന്റ് പരസ്പരം നോക്കി.
അമ്മ എന്ന് കേട്ടതും വിമൽ അബോധവസ്ഥയിലും നല്ല കുട്ടിയായി. അവന്റെ ആ മാറ്റം കണ്ടതും റോഷൻ അറിയാതെ ചിരിച്ചുപോയി. ഇത് കണ്ട അഞ്ജു റോഷനെ നോക്കിയും ഒന്ന് കണ്ണുരുട്ടി.
“എന്നാ ആശാനേ, ഞാൻ മെല്ലെ വിട്ടോട്ടെ”, വീട്ടിലെ മൊത്തത്തിലുള്ള അവസ്ഥ കണ്ടു പ്രമോദ് ചോദിച്ചു.
റോഷൻ അഞ്ജുവിനെ നോക്കി. വിമലിനെ എത്തിക്കാൻ തനിക്കൊപ്പം അവൾ മതിയാകും.. “അല്ല അവൾക്കൊപ്പം നീ മതിയാകും എന്നതാണ് കറക്റ്റ്”, അലവലാതി ഉടനടി തിരുത്തി… റോഷൻ പ്രമോദിനോട് വിട്ടോളാൻ പറഞ്ഞു. വേഗം തന്നെ ഇരുവരോടും യാത്ര പറഞ്ഞു, പ്രമോദ് ഇന്നോവയിൽ കയറി, സ്ഥലം കാലിയാക്കി.
“എന്നെ പിടി.. ക്കേണ്ടാ.. ഞാൻ ഫിറ്റൊ..ന്നുമല്ല.”, ഇന്നോവ ഗേറ്റ് കടന്നതും, അഞ്ജുവിന്റെ കൈ തട്ടി മാറ്റി വിമൽ വീണ്ടും പുലമ്പി.
അഞ്ജു: “ആണോ.. എന്നാ ശരി”
വിമലിന്റെ പറച്ചില് കേട്ട് അഞ്ജു തന്റെ കൈ രണ്ടും എടുത്തു. ഒപ്പം റോഷനോടും ഒന്ന് വിട്ടേക്കാൻ കണ്ണുകൊണ്ടു കാണിച്ചു. കാര്യം പിടികിട്ടിയില്ലെങ്കിലും റോഷൻ പറഞ്ഞപ്പടി പിടി അയച്ചു.
റോഷനേയും അഞ്ജുവിനേയും നോക്കി അമിതമായ ആത്മവിശ്വാസത്തിൽ ഒരു ചിരി ചിരിച്ചുകൊണ്ടു വിമൽ മുന്നോട്ട് നടക്കാൻ തുടങ്ങിയതും ബാലൻസ് നഷ്ട്ടപ്പെട്ട് അവൻ തലകുത്തി വീണതും ഒരുമിച്ചായിരുന്നു…✨
നിലത്ത് കിടക്കുന്ന വിമലിൽ നിന്നും കണ്ണെടുത്ത് റോഷൻ അഞ്ജുവിനെ ആശ്ചര്യത്തോടെ ഒന്നു നോക്കി. തന്നെ നോക്കുന്ന റോഷനോടായി അവൾ യാതൊരു ഭാവമാറ്റവുമില്ലാതെ കണ്ണുകൊണ്ടു ‘എന്താ’ എന്ന് തിരക്കി.
“ഒന്നുമില്ലേ…!” റോഷൻ അവളുടെ ആറ്റിട്യൂഡ് കണ്ടു ചെറിയ പേടിയോടെ തോളനക്കിക്കാണിച്ചു.